¿Tuku kinkamasiyaniyan maktiy xtatsokgni Pedro?

1. ¿Tuku taskujut lakgayawalh Jehová apóstol Pedro akxni atsinu xtsankga nani?

APÓSTOL Pedro akglhuwa kata skujnanilh Jehová chu ni makgxtakgli. Akxtum talatamalh Jesús akxni xla xlichuwinama Dios, wa tiku pulana kalitachuwinalh Dios tiku ni judíos xwankgonit chu katatapakgsilh lakgkgolotsin tiku xpulalinankgo. Akxni atsinu xtsankga naniy, Jehová wi tuku xlakaskinka lakgayawapa. Max kkata 62 chu 64 akxni xminita Jesús, Dios malakpuwanilh natsokgwili maktiy xcartas: xlimaktum chu xlimaktiy tuku tsokgwililh Pedro, nema na makgtanuma kBiblia. Apóstol Pedro xlakaskin pi umakgolh xtatsokgni chuntiya xkamakgtayalh kstalaninanin Cristo maski xla ninita xwa (2 Ped. 1:12-15).

2. ¿Tuku xlakata lu makgtayanalh xtatsokgni Pedro?

² Pedro tsokgwililh umakgolh cartas akxni xnatalan «tipalhuwa tuku tuwa» xtitaxtumakgo (1 Ped. 1:6). Xʼanankgo latamanin tiku nitlan xlikatsikgo chu xmalakgatumikgo nixaxlikana tamasiy chu xmaxkajwiputunkgo congregación (2 Ped. 2:1, 2, 14). Kstalaninanin Cristo tiku xlamakgo kJerusalén nialh makgas xʼamakgo akxilhkgo “xlisputni putum tuku xʼanan”, uma xkilhchanima pi romanos xʼamakgo malakgsputukgo kachikin chu xtemplo (1 Ped. 4:7). Xtatsokgni Pedro lu kamakgtayalh kstalaninanin Cristo tiku xlamakgo amacha kilhtamaku xlakata natayanikgo tuku tuwa xtitaxtumakgo chu nakatsikgo tuku xtlawakgolh akxni xtitaxtukgolh tuku tlakg tuwa.b

3. ¿Tuku xlakata kililakputsananitkan tuku tsokgwililh Pedro?

³ Maski Pedro katsokgnanilh umakgolh maktiy cartas kstalaninanin Cristo xalak pulana siglo, Jehová tlawalh pi xwilika umakgolh tatsokgni kBiblia xlakata xlitamakgtayaw (Rom. 15:4). Akinin na lamaw kkakilhtamaku niku latamanin lixkajni linkgo xlatamatkan chu lhuwa tuku tuwa titaxtuyaw nema tlawa pi tuwa namakgkatsiyaw naskujnaniyaw Jehová. Nachuna, nialh makgas natitaxtuyaw tuku tlakg tuwa nixawa tuku malakgsputulh Jerusalén chu xtemplo. Wa xlakata umakgolh maktiy xtatsokgni Pedro wi tuku lu xlakaskinka kinkamasiyaniyan nema nakinkamakgtayayan skgalalh natawilayaw chu nakgalhkgalhiyaw xkilhtamaku Jehová, ni nakapekuaniyaw latamanin chu lu nakapaxkiyaw kinatalankan. Uma na lu nakamakgtaya lakgkgolotsin xalak congregación xlakata tlan nakakuentajtlawakgo xlakskujnin Jehová.

SKGALALH NATAWILAYAW

4. ¿Tuku max tlan xmaxlajwanilh kintakanajlakan? (2 Pedro 3:3, 4).

⁴ Latamanin ni kanajlakgo tuku wan Biblia xlakata kilhtamaku nema aku mima. Xlakata akglhuwata kata lichuwinamaw pi uma kakilhtamaku namasputukan, max makgapitsin latamanin kinkalilitsinkgoyan chu asta wankgo pi lisputni nikxni katimilh (kalikgalhtawakga 2 Pedro 3:3, 4). Komo chatum tiku litachuwinaw Dios, tiku ta’anaw k’escuela, tiku akxtum taskujaw o chatum kintalilakgapasnikan chuna nakinkawaniyan, kintakanajlakan max nataxlajwani. ¿Tuku nakinkamakgtayayan? Kaʼakxilhwi tuku lichuwinalh Pedro.

5. ¿Tuku nakinkamakgtayayan nakgalhkgalhiyaw asta akxni nachin xlisputni kakilhtamaku? (2 Pedro 3:8, 9).

⁵ Max makgapitsi latamanin lakpuwankgo pi Jehová makgapalama xlakata namasputu uma nixatlan kakilhtamaku. Pero Pedro wa tuku lu kinkamalakpuwaniyan. Kinkamalakapastakan pi Jehová nichuna akxilha kilhtamaku chuna la akinin akxilhaw (kalikgalhtawakga 2 Pedro 3:8, 9). Jehová liʼakxilha akgtum mil kata chuna la akgtum kilhtamaku. Nachuna, xla lu xakgalhkgalhina chu ni lakaskin pi nipara chatum lataman nalakgsputa. Pero xkilhtamaku nachin…, chu uma kakilhtamaku namalakgsputukan. ¡Lu lanka talakgalhaman liʼakxilhaw pi tlan maklakaskinaw kinkilhtamakujkan xlakata nakalitachuwinanaw putum latamanin xalaktlan tamakatsinin!

6. ¿La tlan skgalalh natawilayaw chu nakgalhkgalhiyaw xkilhtamaku Jehová? (2 Pedro 3:11, 12).

⁶ Pedro kinkalistakyawan pi «putum kilhtamaku [kalakapastakwi] xkilhtamaku Jehová» (kalikgalhtawakga 2 Pedro 3:11, 12). ¿La tlan chuna natlawayaw? Talakaskin pi chali chali nalilakpuwanaw la nawan kilatamatkan kxasasti kakilhtamaku. ¿Akxilhlakachipina akxni lijaxanampat nawan xaskgawiwi un chu nawaya lakgkgama liwat? ¿Lilakpuwana akxni nakamakgamakglhtinana mintalilakgapasni tiku nikgonita? ¿Chu lilakpuwana akxni nakawaniya tiku latamakgolh makgasa la kgantaxtukgolh tuku xlichuwinanit Biblia pi xʼama la? Komo nalilakpuwana la nawan milatamat kxasasti kakilhtamaku, namakgtayayan nalakapastaka pi lapat kxaʼawatiya kilhtamaku. Xlakata liwana katsiyaw tuku nala kkilhtamaku nema aku mima, ni mastayaw talakaskin pi tiku maʼakgpitsikgo ni xaxlikana tamasiy namaxlajwanikgo kintakanajlakan (2 Ped. 3:17).

NIALH NAKAPEKUANIYAW LATAMANIN

7. ¿Tuku max nala komo nakapekuaniyaw latamanin?

⁷ Xlakata katsiyaw pi xkilhtamaku Jehová lakatsu wi, kamakgtayaputunaw latamanin nalakgapaskgo xalaktlan tamakatsinin xla Tamapakgsin. Pero max namin kilhtamaku tuwa namakgkatsiyaw nakatachuwinanaw. ¿Tuku xlakata? Xlakata max kapekuaniyaw latamanin. Wa uma tuku akgspulalh Pedro katsisni akxni Jesús xlakputsananimaka. Wa pi ni kstalanina Jesús xwanit chu makglhuwa wa pi ni xlakgapasa (Mat. 26:69-75). Pero makgatlajalh xtapekua, chu alistalh tlan wa: «Ni kapekuanitit tuku xlakan pekuanikgo chu nipara kalilakgaputsatit» (1 Ped. 3:14). Umakgolh xtachuwin kinkamasiyaniyan pi tlan nialh nakapekuaniyaw latamanin.

8. ¿Tuku nakinkamakgtayayan nialh nakapekuaniyaw latamanin? (1 Pedro 3:15).

⁸ ¿Tuku nakinkamakgtayayan nialh nakapekuaniyaw latamanin? Pedro kinkamaxkin uma tastakyaw: «Kamaxkitit kakni Cristo tiku Malana kminakujkan» (kalikgalhtawakga 1 Pedro 3:15). Uma na kilhchanima pi kililakpuwanatkan tuku lakgayawakanit kiMalanakan chu kiMapakgsinakan, Jesucristo, chu litliwakga nema xla kgalhi. Komo akxni lichuwinamputuna Dios tsukuya pekuana, kalilakpuwanti kiMapakgsinakan Jesús. Akgtum liʼakxilhtit, kalilakpuwanti la xla mapakgsinamaja kʼakgapun, chu lakgayakgo lhuwa millón ángeles. Kalakapastakti pi xla makglhtinalh «putum limapakgsin […] kʼakgapun chu kkatiyatni» chu namakgtayayan «chali chali asta kxlisputni kakilhtamaku» (Mat. 28:18-20). Pedro kinkawanin pi talakaskin «putum kilhtamaku skgalalh [natawilayaw]» xlakata nakgalhmakgtayayaw kintakanajlakan. ¿Wi tiku litachuwinamputuna xtachuwin Dios kmintaskujut, kʼescuela o alakatanu? Komo chuna, kalilakpuwanti tuku tlan xtlawa chu kalakkaxwili tuku tlan xwanti. Kaskini Jehová pi kamaxkin litliwakga, chu kalipawanti pi xla namakgtayayan nialh nakapekuaniya latamanin (Hech. 4:29).

«LU KALAPAXKITIT»

9. ¿Tuku kilhtamaku Pedro ni limasiyalh tapaxkit? (Na kaʼakxilhti dibujo).

⁹ Pedro katsinilh tuku kilhchanima nalimasiyaya tapaxkit. Xla anta xwi akxni Jesús wa: «Kkamaxkiman xasasti limapakgsin: pi kalapaxkitit minchatunukan; chuna la kkapaxkinitan, nachuna wixin kalapaxkitit minchatunukan» (Juan 13:34). Pero alistalh, Pedro mastalh talakaskin namakgatlaja xtapekua chu nialh katawayamputulh kstalaninanin Cristo tiku ni judíos xwankgonit. Apóstol Pablo wa pi Pedro xlakgaputiyunama (Gál. 2:11-14). Pedro makgamakglhtinalh tastakyaw nema maxkilh Pablo chu talakgpalilh. Kmaktiy xtatsokgni, liwana limasiyalh pi ni kajwatiya talakaskin nawanaw pi kapaxkiyaw kinatalankan, wata talakaskin nalimasiyayaw.

10. ¿Tuku nakinkamakgtayayan nalimasiyayaw «tapaxkit xtachuna nema lakgalhinikan kfamilia chu ni lakgaputiyunan»? (1 Pedro 1:22).

¹⁰ Pedro wa pi talakaskin nakakgalhiniyaw kinatalankan «tapaxkit xtachuna nema lakgalhinikan kfamilia chu ni lakgaputiyunan» (kalikgalhtawakga 1 Pedro 1:22). Kgalhiyaw uma tapaxkit xlakata “kgalhakgaxmataw xaxlikana”, chu pulaktum tuku xaxlikana katsininitaw wa pi «Dios ni laksakpaxkinan» (Hech. 10:34, 35). Komo kajwatiya kalimasiyaniyaw tapaxkit makgapitsin kinatalankan xalak congregación, ni kgalhakgaxmatmaw tuku wa Jesús xlakata tapaxkit. Xlikana, max anan natalan tiku tlakg katalalinaw, chuna la Jesús xwilakgo xtamakgalhtawakgen tiku tlakg xkatalalin (Juan 13:23; 20:2). Pero Pedro kinkamalakapastakayan pi talakaskin nakalimasiyaniyaw putum kinatalankan «tapaxkit xtachuna nema lakgalhinikan kfamilia» (1 Ped. 2:17).

11. ¿Tuku kilhchanima lu nalapaxkiyaw xliputum kinakujkan?

¹¹ Pedro mastalh uma tastakyaw: «Lu kalapaxkitit xliputum minakujkan». Kʼuma versículo, “lapaxkikan xliputum naku” kilhchanima pi talakaskin nakalimasiyaniyaw tapaxkit asta tiku tuwa xmakgkatsiw xkalimasiyaniw. Akgtum liʼakxilhtit, ¿tuku xtlawaw komo chatum tala wi tuku nitlan xkinkatlawanin o nitlan xkinkamamakgkatsinin? Max ni xlimasiyaniputuw tapaxkit, wata xmalakgaxokgeputuw. Pero Jesús masiyanilh Pedro pi uma tayat ni makgapaxuwa Jehová (Juan 18:10, 11). Apóstol Pedro tsokgwililh: «Ni kalitamakgapuspittit tuku nitlan chu tuku nitlan kawanikantit. Wata kalitamakgapuspittit akgtum tasikulunalin» (1 Ped. 3:9). Komo wix lu nalimasiyaya tapaxkit, tlan nakalikatsiniya asta tiku nitlan tuku tlawanikgoyan.

12. 1) ¿Tuku atanu natlawayaw komo lu kapaxkiyaw kinatalankan? 2) ¿Tuku makgpuwantiniyan natlawaya video Nitu katlawalh nialh nakatalalinaw kinatalankan?

¹² Kxlimaktum tuku tsokgli Pedro, limaklakaskilh uma tachuwin: «Lu kalapaxkitit». Uma tapaxkit ni kaj makgtum tapatinan, wata «putum kilhtamaku tapatiputun achatum» (1 Ped. 4:8). Akxni Pedro wa uma, max xlilakpuwama tuku wanilh Jesús makgasa akxni litachuwinalh la nakatapatiyaw amakgapitsin. Akxni Pedro wanilh pi xtapatinamputun «asta makgtujun», max lakpuwa pi lu tlan xlikatsi. Pero Jesús masiyanilh Pedro pi ni kaj makgtujun xtalakaskin natapatinan, wata «asta tutupuxamakutujun». Uma wamputun pi putum kilhtamaku xtapatinalh. Chu akinin nachuna kilitlawatkan (Mat. 18:21, 22). ¿Tuwa makgkatsiya namakgantaxtiya uma tastakyaw? Ni kataxlajwani. Xlakata putum akinin makglakgalhinanin, putum xlakskujnin Jehová min kilhtamaku tuwa makgkatsiyaw natapatinanaw. Wa xlakata, ¿tuku tlan xtlawa? Tuku tlakg xlakaskinka wa pi natlawaya putum tuku matlaniya xlakata natapatiya mintala chu tlan natalalipimparaya.c

LAKGKGOLOTSIN, KAKAKUENTAJTLAWATIT XLAKSKUJNIN DIOS

13. ¿Tuku xlakata max lakgkgolotsin tuwa namakgkatsikgo nakakuentajtlawakgo natalan?

¹³ Max Pedro nikxni patsankgalh tuku wanilh Jesús akxni xlakastakwananita: «Kakakuentajtlawa laktsu kiborregos» (Juan 21:16). Komo wix kgolotsin xalak congregación, katsiya pi na milimakgantaxtit uma tastakyaw. Pero max min kilhtamaku tuwa makgkatsiya nalimaxtuya kilhtamaku namakgantaxtiya uma lu xlakaskinka tastakyaw. Kalakapastakwi pi talakaskin pi lakgkgolotsin nakamaxkikgo xfamiliajkan tuku maklakaskinkgo, tlan nakamamakgkatsinikgo chu nakuentajtlawakgo xtakanajlakan. Nachuna, xliwilitkan li’akxilhtit xlakata nalichuwinankgo Dios chu liwana nalakkaxwilikgo tuku namatitaxtikgo ktamakxtumit chu nalakkaxwilikgo taʼakgchuwin nema namastakgo kʼasambleas. Makgapitsi na makgtayanankgo kComités de Enlace con los Hospitales o kDepartamento Local de Diseño y Construcción. Xlikana pi lakgkgolotsin kgalhikgo lhuwa taskujut.

14. ¿Tuku xlakata lakgkgolotsin kakuentajtlawaputunkgo natalan, chu tuku tlan nakamakgtaya? (1 Pedro 5:1-4).

¹⁴ Pedro kawanilh amakgapitsin lakgkgolotsin: «Kamapuchwayanitit kgamputum xborregos Dios» (kalikgalhtawakga 1 Pedro 5:1-4). Liwana katsiyaw pi lakgkgolotsin lu kapaxkikgo xnatalankan chu kakuentajtlawaputunkgo. Pero max min kilhtamaku tuwa makgkatsikgo namakgantaxtikgo uma taskujut xlakata lu lhuwa taskujut kgalhikgo o lu tlakgwankgonit. Komo wix chuna titaxtupat, ¿tuku tlan xtlawa? Kawani Jehová la makgkatsiya. Pedro tsokgwililh: «Komo wi tiku kaskujnani amakgapitsin, chuna katlawalh xlakata Dios maxki litliwakga» (1 Ped. 4:11). Max minatalan titaxtumakgo taʼakglhuwit nema nila katilakkaxtlawakgolh kʼuma kakilhtamaku. Pero kalakapastakti pi Jesucristo, «xapuxku mapuchwayanina», tlan nakamakgtaya la uku chu kxasasti kakilhtamaku. Tuku Jehová lakaskin wa pi lakgkgolotsin nakapaxkikgo xnatalankan, nakakuentajtlawakgo chu tlan liʼakxilhtit nakalitaxtunikgo.

15. ¿Tuku tlawa chatum kgolotsin xlakata nakakuentajtlawa natalan? (Na kaʼakxilhti dibujo).

¹⁵ William, chatum tala tiku makgasa kgolotsin xalak congregación litaxtu, lu xlakaskinka liʼakxilha nakakuentajtlawakan natalanin. Akxni tsukulh pandemia xla COVID-19, xla chu amakgapitsin lakgkgolotsin xalak xcongregación akxilhkgolh pi lu xlakaskinka xwanit akgatunu semana nakatachuwinankan natalan tiku xmakgtapakgsikgo kxgrupojkan. ¿Tuku xlakata? Xla wan: «Lhuwa natalan xʼakstukan xwilakgo kxchikkan, chu tlakg ni tuwa xwanit wa xlilakpuwantawilakgolh tuku nitlan». Akxni chatum tala kgalhi akgtum taʼakglhuwit, William liwana kgaxmatni xlakata nakatsi tuku maklakaskin chu tuku lilakgaputsa. Alistalh putsa tuku namakgtaya uma tala, putsa akgtum video kkisitiojkan xla internet. William wan: «La uku tlakg xlakaskinka nakakuentajtlawakan natalan xalak congregación. Komo lu liskujaw nakamakgtayayaw latamanin nalakgapaskgo Jehová, tlakg liwaka lu kiliskujatkan nakakuentajtlawayaw kinatalankan xlakata ni namakgxtakgkgo Jehová».

KAMAXKIW TALAKASKIN JEHOVÁ PI NAKINKAMALAKGTAWAKGEKGOYAN

16. ¿Tuku tlan xtlawaw xlakata xlilatamaw tuku kinkamasiyaniyan xtatsokgni Pedro?

¹⁶ Kʼuma artículo lichuwinanitaw makgapitsi tuku kinkamasiyaniyan maktiy xtatsokgni Pedro. Max wix akxilhnita tuku tlakg tlan natlawaya. Akgtum liʼakxilhtit, ¿tlakg lilakpuwamputuna latamat nema nakgalhiyaw kxasasti kakilhtamaku? ¿Lakkaxwilinita wi tiku nalitachuwinana Dios kmintaskujut, kʼescuela o alakatanu? ¿Lilakpuwanita la tlakg tlan xkalimasiyani tapaxkit natalan? Chu komo wix kgolotsin xalak congregación, ¿liwana lakkaxwilinita xatapaxuwan nakakuentajtlawaya natalan? Komo akxni miʼakstu nalakputsananikana naʼakxilha tuku nitlan tlawapat, ni kalitaxlajwani. Kalakapastakti «xtalakgalhaman Malana» chu pi xla namakgtayayan (1 Ped. 2:3). Pedro kinkawanin: «Dios […] nakamalakgtawakgeyan xlakata tlan naskujnaniyatit. Xla tliwakglh nakayawayan, xla nakamatliwakglhan, liwana nakayawayan xlakata ni nalhtujatit» (1 Ped. 5:10).

17. ¿Tuku tasikulunalin namakglhtinanaw komo ni nataxlajwaniyaw chu namaxkiyaw talakaskin Jehová pi nakinkamalakgtawakgeyan?

¹⁷ Akgtum kilhtamaku, Pedro wa pi ni xlakgchan nataya kxlakatin xKgawasa Dios (Luc. 5:8). Pero xlakata Jehová chu Jesús lu makgatayakgolh chu limasiyanikgolh tapaxkit, Pedro ni makgxtakgli Cristo. Wa xlakata, maxkika talakaskin natanu kxTamapakgsin «kiMalanakan chu kiLakgmaxtunakan Jesucristo» (2 Ped. 1:11). ¡Lu tlan tamaskiwin! Komo wix ni nataxlajwaniya chuna la Pedro chu namaxkiya talakaskin Jehová namalakgtawakgeyan, na tlan namakglhtinana latamat nema ni kgalhi xlisputni. Nalakgchipina tuku mataxtukputun mintakanajla: lakgtaxtut (1 Ped. 1:9).