1-3. 1) ¿Tuku xlakata max lu pekualh Ester akxni lakgalh xchixku? 2) ¿Tukuya takgalhskinin nakatsiyaw xtakgalhtin?

ESTER chuntiya talakatsuwima kpumapakgsin xalak Susa maski pekuan. Lu tuwa makgkatsi xlakata lu kaks malakawaninan la tlawakanit chiki. Tlakg tasiya patsaps nema litatlawanit ladrillo chu tsokgkanit, tlawakanit xadibujo toros nema kgalhikgo xpakgakan, leones chu soldados tiku maskujukgo flechas, chu xcolumnas chiki lu stlan xtasiyakgo chu anankgo lu xalaklanka estatuas. Xpumapakgsin mapakgsina lu stlan xtasiya, chu talhman xyawakanit lakatsu ksipi wanikan Zagros niku takta nieve, anta xtitaxtu lu xastalanka chuchut nema xminacha kkgalhtuchokgo Coaspes. Akxni xpulaktsalama uma chiki, nema liwana tlawakanit xlakata nalimasiyakan la xlilhuwa litliwakga kgalhi mapakgsina, Ester lakgama mapakgsina, tiku lilakgapaskan «lanka mapakgsina», ¡chu uma wa xchixku!

² Uma tsumat judía wanikan Ester tiku tliwakga xwi xtakanajla, nipara tsinu xlakpuwan pi xʼama tatamakgaxtokga tiku nitlan likatsi la uma mapakgsina.a Xla niti masiyaninit tayat la xla Abrahán, tiku tataktujulh chu kgalhakgaxmatli xlimapakgsin Dios akxni wanilh pi xtlawalh tuku xwanima xpuskat, Sara (Gén. 21:12). Max nipara tsinu lakgapasa Jehová, xDios Ester, chu Limapakgsin nema kamaxkilh judíos. Pero liwana lakgapasa xlimapakgsinkan persas, chu xpuskat aku nalakatsala akgtum limapakgsin nema ni xlitatlawat: pi niti nalakgan mapakgsina komo ni tasanikanit. ¡Chu xmakgnikan tiku xlakatsala uma limapakgsin! Maski chuna, Ester talakatsuwi kxkilhtin pumapakgsin chu taya niku tlan naʼakxilha mapakgsina chu liwana xkatsi pi xʼamaka makgnikan (kalikgalhtawakga Ester 4:11 chu 5:1).

³ ¿Tuku xlakata kalipekua xwilima xlatamat uma puskat tiku lu tlan xwi xtakanajla? ¿Tuku kinkamasiyaniyan tuku tlawalh? Xlakata tlan nakatsiyaw, pulana kaʼakxilhwi la xpuskat mapakgsina xalak Persia litaxtulh.

La xwanit xlatamat Ester pulana

4. ¿Tuku katsiyaw xlakata Ester akxni aktsinajku xwanit, chu tuku xlakata stakli kxchik xtapuxnimat Mardoqueo?

⁴ Ester nialh xkgalhi xnatlatni. Ni lhuwa tuku katsiyaw xlakata xnatlatni, kaj katsiyaw pi limapakuwika Hadassá, tukuwani xahebreo nema wamputun mirto, xastlan xalakgsnapapa xanat. Akxni nikgolh xnatlatni, xtapuxnimat wanikan Mardoqueo tiku xlina kata, lakgalhamalh chu lilh kxchik. Chu la xtsumat tsukulh makgastaka (Est. 2:5-7, 15).

5, 6. 1) ¿La makgastakli Mardoqueo Ester? 2) ¿Tuku xtlawakgo Mardoqueo chu Ester kxlatamatkan?

⁵ Mardoqueo chu Ester xafuerza xkalinkanit kkachikin niku xtapakgsi Persia, niku max xkalakgmakgankan xlakata xtakanajlakan chu Limapakgsin nema kstalanikgo. Xlikana max Ester tlakg kstaka xtapaxkit nema xkgalhini xtapuxnimat akxni xlitachuwinan Jehová, Dios xalakgalhamana tiku makglhuwa xkalakgmaxtunit xkachikin chu nialh makgas xʼamapa kalakgmaxtu (Lev. 26:44, 45). Chu wa xlakata lu xlapaxki chu ni xlamakgxtakga.

⁶ Taʼakgatekgsa pi mardoqueo kskuja kpumapakgsin anta kSusa, chu xkatatawila kmalakcha amakgapitsi kskujnin mapakgsina (Est. 2:19, 21; 3:3). Ni lhuwa tuku talichuwinan tuku xtlawa Ester akxni stakli, pero max xkuentajtlawa xtapuxnimat chu kskuja kxchik nema max xwi kʼakgtum aktsu kachikin xalak Susa, kxaʼakilhtutu kgalhtuchokgo. Max lu xlakgati xʼan kxmercado Susa, niku kstakan tuku xlitatlawanit oro, plata chu atanu. ¡Nipara tsinu xkatsi pi alistalh xʼama kgalhi putum tuku kstakan anta! Ama kilhtamaku nipara tsinu xlakpuwan la xʼama wan xlatamat alistalh.

«Lu [...] stlan tasiya»

7. ¿Tuku xlakata Vasti mapakgsina litaxtulh chu tuku lalh alistalh?

⁷ Akgtum kilhtamaku, wi tuku lakapala tsukulh talakgatumi kxlikalanka kachikin: ¡nitlan tsukulh talichuwinan xfamilia mapakgsina! Kʼakgtum fiesta, akxni napuxkun xwamakgo vino chu xalakwan liwat, Asuero matasaninalh xastlan xpuskat, Vasti, tiku xkatatlawama atanu fiesta lakpuskatin, pero ni amputulh. Xlakata mapakgsina lisitsilh xlakata tamamaxanilh, kakgalhskilh tiku kstakyawakgo tuku xlimalakgaxokgeka Vasti. Lakkaxwilika nialh mapakgsina nawan chu putsaka atanu. Xlakskujnin ankgolh kaputsakgo laktsuman tiku tlakg xalakstlan xlikalanka Persia, chu mapakgsina xʼama laksaka tiku xpuskat xʼama wan (Est. 1:1–2:4).

8. 1) ¿Tuku xlakata Mardoqueo xlilipuwan la xkitaxtunilh xtapuxnimat? 2) Chuna la wan Biblia, ¿la xlilakpuwanat tiku stlan tasiya? (Na kaʼakxilhti Proverbios 31:30.)

⁸ Akxni xʼakxilha la kstaktilhama xtapuxnimat, Mardoqueo lu tlan xlimakgkatsi chu tlakg xpaxki akxni xʼakxilha pi Ester lu lakapala kstakma chu lu stlan xtasiya. Biblia wan pi tsumat «lu stlan xtasiya chu lu lilakgatit xwanit» (Est. 2:7). Pero max Mardoqueo tsinu xlilakgaputsa. Chuna la wa Biblia, ni kaj talakaskin stlan natasiyakan. Komo tiku stlan tasiya ni kgalhi lakwan tayat la liskgalala chu ni tataktuju, lakapala tlakg lanka nalimakgkatsikan (kalikgalhtawakga Proverbios 11:22). ¿La xʼama likatsi Ester? Xlakata lu stlan xwanit, ¿xʼama tlanka makgkatsikan? Alistalh xʼama tasiya.

9. 1) ¿Tuku lalh akxni xlakskujnin mapakgsina akxilhkgolh Ester, chu tuku xlakata analh talipuwan xlakata tuku lalh? 2) ¿Tuku xlakata Mardoqueo mastalh talakaskin natatamakgaxtokga Ester tiku ni xkakninani Dios? (Kaʼakxilhti recuadro.)

⁹ Xlakskujnin Asuero akxilhkgolh pi Ester lu stlan xwanit, chu linkgolh xpumapakgsin, xakilhtutu kgalhtuchokgo (Est. 2:8). ¡Max lu nitlan limakgkatsikgolh akxni lamakgxtakgli! Xlakata la xtsumat xliʼakxilha Mardoqueo... Chu ni xlakaskin natatamakgaxtokga tiku ni xkakninani Dios, maski mapakgsina xwa, pero nila tuku tlawalh.b Max Mardoqueo limaklakaskilh xaʼawatiya kilhtamaku akxni nina xlinkan xlakata xmaxkilh lakwan tastakyaw nema putum kilhtamaku xʼama lakapastaka. Akxni xʼama kcastillo xla Susa, lakapastakma tuku naʼakgspula chu la nawan xlatamat anta.

«Xpaxkikgo putum tiku xʼakxilhkgo»

10, 11. 1) ¿Tuku max limakgkatsilh Ester anta niku linka? 2) ¿La likatsiyaw pi Mardoqueo xkatsiputun la xwi xtapuxnimat?

¹⁰ Kaj lakapala talakgpalilh xlatamat Ester, chu xwi niku ni xlakgapasnan, xkatawi makgapitsin laktsuman nema xkaliminkanit xlikalanka Persia. Tanu tanu la xlikatsikgo umakgolh laktsuman, tanu talismanin xkgalhikgo chu tanu tachuwin. Xkakuentajtlawa chatum tiku kskuja kpumapakgsin xwanikan Hegai, tiku xliyawakanit pi akgtuminika kata wi tuku xkatlawanikan xlakata tlakg stlan xwankgolh na xkalixapakan xalakmuksun aceites (Est. 2:8, 12). ¿La tsukukgolh likatsikgo xlakata putum xkamaxkikan? Makgapitsi lankajwa wankgolh chu tlakg stlan xwamputunkgo. ¿Pero nachuna likatsilh Ester?

¹¹ Tiku tlakg xkatsiputun xlakata la xkitaxtunima Ester wa Mardoqueo. Biblia wan pi chali chali xtalakatsuwi kchiki niku xwilakgolh laktsuman xlakata xkatsilh la xwi Ester (Est. 2:11). Chu max tuku xmakatsini chatum lakskujni, lu tlan xlimakgkatsi chu xlipaxuwa. ¿Tuku xlakata?

12, 13. 1) ¿La akxilhkgolh Ester tiku xtawilakgolh? 2) ¿Tuku xlakata max Mardoqueo lipaxuwalh akxni katsilh pi Ester ni wa pi judía xwanit?

¹² Hegai lu kaks xlilakawan xlakata la xlikatsi Ester wa xlakata lu tlan xlikatsini. Maxkilh kgalhtujun tiku xkuentajtlawakgolh chu maxkilh niku tlakg tlan anta kchiki niku xwilakgolh lakpuskatin. Chu asta kBiblia lichuwinan pi «chali chali tlakg xpaxkikgo putum tiku xʼakxilhkgo» (Est. 2:9, 15). ¿Tuku xlakata lu xpaxkikgo? ¿Xlakata lu stlan xwanit? Ni. Xla xkgalhi lu lakwan tayat nema xtlawa pi tlakg stlan xtasiyalh.

¹³ Kaʼakxilhwi tuku wan Biblia: «Ester ni xlichuwinanit xkachikin, nipara xparientes; xlakata Mardoqueo xwaninit pi ni xlichuwinalh» (Est. 2:10). Chuna la akxilhaw xtapuxnimat xwaninit pi ni xwa pi judía xwanit, xlakata xkatsi pi mapakgsinanin xalak Persia lu xlaksakpaxkinankgo. Xla liwana katsi pi maski ni xtawi xtapuxnimat, Ester liwana xʼama lakapastaka tuku xtlawalh chu chuntiya xkgalhakgaxmatli. ¡Mardoqueo max lu lipaxuwalh!

14. ¿La kamanan tlan tlawakgo chuna la Ester?

¹⁴ La uku, akxni lakgkgawasan putum kilhtamaku kgalhakgaxmatnankgo, na lu kamakgapaxuwakgo xnatlatnikan chu tiku kakuentajtlawakgo. Max min kilhtamaku katawilakgo tiku kaj limasiyakgo pi tlan likatsikgo, tlawakgo talakgxtumit nema ni xlitatlawat o tiku lu lixkajni likatsikgo, chu niti kakuentajtlawama, ni kamatlawikan tuku nitlan. Wata chuntiya akgstitum linkgo xlatamatkan. Umakgolh lakgkgawasan chuna la Ester, lu makgapaxuwakgo xTlatkan xalak akgapun (kalikgalhtawakga Proverbios 27:11).

15, 16. 1) ¿Tuku tlawalh Ester xlakata tlan xakxilhli mapakgsina? 2) ¿Tuku xlakata max tuwa makgkatsilh Ester xlakata talakgpalilh xlatamat?

¹⁵ Kalichuwinamparaw Ester. Akxni chalh kilhtamaku nalakgan mapakgsina, tlan katuwa tuku xlitakaxtayalh xlakata tlakg stlan stasiyalh. Xlakata ni lanka xmakgkatsikan, kaj litakaxtayalh tuku maxkilh Hegai (Est. 2:15). Max lakpuwa pi xlakata tlan xakxilhli mapakgsina ni kaj xtalakaskilh lu stlan xwa, wata tlakg tlan xkgalhilh lakwan tayat, la ni lanka xmakgkatsika, nema ni xʼanan kpumapakgsin. ¿Xlikana tuku xlakpuwan?

¹⁶ Biblia kinkakgalhtiyan: «Mapakgsina tlakg paxkilh Ester nixawa atanu lakpuskatin, wa xlakata xla tlakg tlan akxilhli chu limasiyanilh tapaxkit nema ni makgxtakgnan nixawa atanu laktsuman. Chu mapakgsina akwililh likaxtlawan tuku xwilikgo mapakgsinanin chu mapakgsina tlawaka xlakgxokgo Vasti» (Est. 2:17). Chuna, uma tsumat judía tiku ni lanka xmakgkatsikan xasasti mapakgsina wa, xpuskat mapakgsina tiku tlakg tliwakga xwanit ama kilhtamaku. ¡Lu lhuwa la talakgpalilh xlatamat! ¿La lismanilh atanu latamat? ¿Lanka xʼamaka limakgkatsikan? Ni.

17. 1) ¿La chuntiyaku kgalhakgaxmatli Ester xtapuxnimat? 2) ¿Tuku xlakata la uku talakaskin nalikatsiyaw la Ester?

¹⁷ Ester chuntiyaku xakgalhakgaxmatna xwanit chuna la pulana. Akgtum liʼakxilhtit, kgalhakgaxmatli xtapuxnimat chu ni wa pi judía xwanit. Nachuna, akxni Mardoqueo katsilh pi wi tiku xmakgniputunkgo mapakgsina, Ester tlawalh tuku wanilh Mardoqueo chu makatsinilh Asuero xlakata nitu xtlawanika (Est. 2:20-23). Putum kilhtamaku limasiyalh pi ni tlankajwa xlikatsi chu xkgalhakgaxmatnan, chu uma tayat limasiya pi lu tliwakga xwi xtakanajla. La uku nachuna kilitlawatkan, xlakata lamaw niku latamanin ni kgalhakgaxmatnankgo chu lakatsalakgo limapakgsin. Pero komo kgalhiyaw xaxlikana takanajla la Ester, lu xlakaskinka naʼakxilhaw uma tayat.

Taliʼakxilha xtakanajla

18. 1) ¿Tuku xlakata max Mardoqueo ni xtakilhputaniputun Hamán? (Na kaʼakxilhti nota.) 2) ¿La nachuna limasiyakgonit xtakanajlakan la Mardoqueo lhuwa xlakskujnin Dios xala uku?

¹⁸ Titaxtulh kilhtamaku, chatum tiku xwanikan Hamán lu xlakaskinka tsukulh litaxtu kpumapakgsin. Asuero xlichatiy mapakgsina tlawalh, tlakg xlakaskinka xmakgtayana litaxtulh, kstakyawana wa chu mapakgsinalh pi putum natakilhputanikgo (Est. 3:1-4). Maski Mardoqueo ni xmakgxtakga mapakgsina, xlakpuwan pi komo xkgalhakgaxmatli uma limapakgsin ni wa xmaxkilh kakni Dios. Xkatsi pi Hamán agaguita xwanit, chu max kxfamilia mapakgsina Agag xminitancha, mapakgsina xalak Amaleq nema palakachuwina Samuel makgnilh (1 Sam. 15:33). Amalequitas lu nitlan tuku xtlawakgonit wa xlakata xtalamakgasitsin Jehová chu na xtalamakgasitsin xkachikin xwankgonit, wa xlakata Dios wa pi xkamalakgsputuka (Deut. 25:19).c ¿Pi xʼama tatsokgostani chatum judío tiku ni xmakgxtakga Dios chatum amalequita? ¡Mardoqueo nikxni xʼama tatsokgosta! Tuku tlawalh kinkamalakapastakan la limasiyakgonit xtakanajlakan lhuwa lakchixkuwin chu lakpuskatin chuna la titaxtokgonit kata chu nachuna la uku. Chu maski kalipekua wilikgolh xlatamatkan xlakan wankgolh: «Pulh wa nakkgalhakgaxmataw Dios, ni xawa nchixkuwin» (Hech. 5:29).

19. ¿Tuku xtlawaputun Hamán chu la tlawalh xlakata mapakgsina xmaxkilh talakaskin?

¹⁹ Xlakata Mardoqueo ni xmalanki, Hamán lu sitsilh wa xlakata lakkaxwililh la xʼama malakgsputu chu putum judíos. Pulana lakgalh mapakgsina Asuero chu tsukulh nitlan kalichuwinalh akgtum kachikin, pero ni wa pi wa judíos. Lichuwinalh pi nitu xlitaxtukgo, «kaj kaniwa kachikinin kamakankanit», pero ni xkgalhakgaxmatninankgo chu nitlan xlikatsikgo xlakata ni xkgalhakgaxmatkgo xlimapakgsin mapakgsina. Alistalh wa pi xʼama masta lhuwa tumin xlakata tlan xkamalakgsputuka kPersia.d ¿Tuku wa Asuero? Maxkilh xʼanillo xlakata kxtukuwani xlimastalh uma limapakgsin o atanu nema xtalakaskilh (Est. 3:5-10).

20, 21. 1) ¿Tuku makgkatsilh Mardoqueo chu amakgapitsi judíos tiku xwilakgolh kPersia akxni Hamán wi tuku limapakgsinalh? 2) ¿Tuku skinilh Mardoqueo pi xtlawalh Ester?

²⁰ Akxni limapakgsinanka, makatsininanin akawayo ankgolh xlikalanka tamapakgsin, lakgatum lichuwinanka tuku tamapakgsin xmastanit, pi xʼamaka kamasputukan judíos. Max lu kaks lilakawankgolh akxni kgaxmatkgolh uma tamakatsin kJerusalén, tiku xtaspitkgonitta kBabilonia chu xkaxtlawamaparakgolh kachikin. ¡Nipara xkgalhikgoy patsaps nema xlitamakgtayakgolh! Max akxni Mardoqueo kgaxmatli uma tamakatsin, tunkun kalilakapastakli, xfamilia chu xʼamigos tiku xwilakgolh kSusa. Xlakata xlimasiyalh pi lu xlipuwan, xtitli xlhakgat, lilhakganalh xatulanka lhakgat, liʼakmawakaka lhkakaʼ chu pixlanka tasatilhalh xlikalanka kachikin. Pero Hamán tsukulh takgota mapakgsina, chu nipara tsinu xlakapastaka tuku nitlan xkatlawaninit judíos chu xʼamigos xalak Susa (kalikgalhtawakga Ester 3:12–4:1).

²¹ Mardoqueo xkatsi pi wi tuku xlitlawat. Pero ¿tuku tlan xtlawalh? Ester malakgachanilh makgapitsi lhakgat xlakata tlan xmakgkatsilh, pero ni makgamakglhtinalh. Alistalh akgatekgsli tuku makgasa ni xʼakgatekgsa: tuku xlakata Jehová xmastanit talakaskin pi xlinka kpumapakgsin xtapuxnimat nema lu xpaxki chu xtatamakgaxtokgli tiku ni xkakninani Dios. Lakapala malakgachanilh lu xlakaskinka tamakatsin: xlakgalh mapakgsina Asuero chu kskinilh «xpalakata xkachikin Ester» (Est. 4:4-8).

22. ¿Tuku xlakata Ester xpekuan nalakgan xchixku tiku mapakgsina xwanit? (Na kaʼakxilhti nota.)

²² Akxni makatsinika mapakgsina Ester, lu nitlan limakgkatsilh. Tlakg xʼama taliʼakxilha xtakanajla, chu wanilh Mardoqueo pi lu xpekuama. ¿Tuku xlakata xpekuan? Chuna la malakapastakapa xtapuxnimat, limapakgsin xalak Persia xwan pi xmakgnika tiku xlakgalh mapakgsina akxni nitu xtasanikanit. Akxni wi tiku ni xkgalhakgaxmata uma limapakgsin, tuku tlan xlakgmaxtulh wa komo mapakgsina xchaxli xlixtokgo nema xlitatlawanit oro chu xtapatilh. Pero ¿tlan xlakpuwa Ester pi xʼama lakgalhaman Asuero? Xlakata nipara tsinu xlakgalhamanit Vasti akxni tasanilh chu ni lakgalh. Chu tuku tlakg nitlan, xtitaxtunita puxumakaw kilhtamaku nema nitu xwanima Ester pi xlakgalh, chu xlimasiya pi nialh lu xlakgati uma xasitsin mapakgsina (Est. 4:9-11).e

23. 1) ¿Tuku wanilh Mardoqueo Ester xlakata xlimatliwakglhnilh xtakanajla? 2) ¿Tuku xlakata Mardoqueo kinkamaxkiyan akgtum lu tlan liʼakxilhtit?

²³ Mardoqueo tliwakga tuku wanilh, xlakata xmatliwakglhputun xtakanajla Ester. Wanilh pi Jehová xʼama kalakgmaxtu judíos, chu tlan xlimaklakaskilh Ester o atanu. Chu wanilh pi komo nitu xtlawalh, nila xʼama lakgtaxtu akxni tlakg xkaputsastalanika. Chuna, Mardoqueo limasiyalh pi lu xlipawan Jehová, chatum Dios tiku putum kilhtamaku makgantaxti tuku wan chu nikxni xʼama masta talakaskin pi namasputukan xkachikin (Jos. 23:14). Chu xaʼawatiya, kgalhskilh Ester: «¿Max mapakgsina tlawaka xlakata uma tuku titaxtumaw?» (Est. 4:12-14). ¡Mardoqueo lu limasiyalh pi lu xlipawan Dios! ¿Nachuna lipawanaw Dios? (Prov. 3:5, 6.)

Xlakata xtakanajla Ester nialh pekualh namakgnikan

24. ¿La limasiyalh Ester pi xkgalhi takanajla chu ni xpekuan?

²⁴ Ester katsilh pi xchanita kilhtamaku wi tuku natlawa. Skinilh Mardoqueo pi xkawanilh putum judíos na ni xwayankgolh akgtutu kilhtamaku. Chu limasiyalh la tliwakga xwi xtakanajla chu ni xpekuan akxni wa uma tachuwin nema asta la uku talakapastaka: «Chu komo nakni, kaknilh» (Est. 4:15-17). Umakgolh akgtutu kilhtamaku, tlakg lhuwa oración tlawalh. Akxni chalh hora, lilhakganalh tuku tlakg stlan xkgalhi, xlakata xmakgapaxuwalh mapakgsina, chu lakgalh mapakgsina.

25. Kawanti tuku lalh akxni Ester lakgalh mapakgsina.

²⁵ La akxilhwi niku tsuku uma capítulo, Ester lakgan mapakgsina. Akxni aku ama lu pekuantilha, lhuwa tuku lakapastakma, chu makglhuwa tlawani oración Dios. Tanu xkilhtin xchik mapakgsina. Anta tlan akxilha mapakgsina wi xpumapakgsin, liwana talakgaswiknit chuna la tlawakgo persas, akxpulaka chu xkgalhchixit statijwa chu liwana kaxwilinit. Katsiputun la makgkatsi chu akxilha la lakawan. ¿La xlilhuwa makgapalalh xlakata xchixku xkatsilh pi anta xya? Ni katsiyaw, ¡pero max Ester lu makgas makgkatsilh! Akxni akxilha, tsinu kaks lilakawan pero tunkun lakapaxuwalh chu limakaʼalh xcetro xla oro (Est. 5:1, 2).

26. ¿Tuku xlakata kstalaninanin Cristo talakaskin ni napekuanaw chuna la Ester?

²⁶ Ester tlawalh pi mapakgsina xmaxkilh talakaskin natachuwinan. Uma puskat tiku ni xmakgxtakga Dios kalipekua wililh xlatamat xlakata natataya Jehová chu nakamakgtaya xkachikin. ¡Akgtum lu tlan liʼakxilhtit kawilini putum xlakskujnin Dios! Kstalaninanin Cristo xala uku lu xlakaskinka akxilhaw tuku tatsokgnit la uma. Jesús wa pi tapaxkit xʼama kalilakgapaskan xaxlikana kstalaninanin (kalikgalhtawakga Juan 13:34, 35). Xlakata nalimasiyayaw uma tapaxkit talakaskin ni napekuanaw chuna la Ester. Pero uma kajku litsuku xlakata tuku titaxtulh. ¿La xʼama tlawa Ester xlakata Asuero xkanajlanilh pi kstakyawana Hamán tiku tlakg xpaxki kaj wi tuku nitlan xtlawaputun? ¿Tlan xʼama kalakgmaxtu judíos? Nakatsiyaw kʼatanu capítulo.

1-3. 1) ¿La xmakgkatsi Ester akxni xtalakatsuwina kxpumapakgsin xchixku? 2) ¿Tuku tlawalh mapakgsina akxni kaj xalan lakgapaxialhnalh Ester?

ESTER tsinu tsinu lakgtalakatsuwi mapakgsina chu tlakg lakapala tatsuwi xnaku. Akxni tanucha Ester niku wi mapakgsina kSusa nialhti chuwinan, Ester kgaxmata la tlawan chu la makawan xlhakgat nema lu stlan. Ni kgalhi kilhtamaku xlakata naʼakxilha la tatlawanit chiki, la xlistlan talayaw o la xlistlan xakgstin chiki nema litatlawanit puksnankiwi nema liminkanit kLíbano. Kaj wa akxilhnit chixku tiku wi kxpumapakgsin. ¡Xlakata wa tiku nawan komo namakgnikan Ester o ni!

² Mapakgsina liwana lakaʼakxilha chu lakglimakaʼan xlixtokgo nema litatlawanit oro. ¡Skaya limakgkatsi! Chuna limasiyalh pi ni xmakgnika Ester, chu tapati tuku tlawalh: xlakata alh kxlakatin mapakgsina chu nitu xtasanikanit. Ester tlan talakatsuwi niku xwi mapakgsina, xlakata lu lakgalhamanka, stonkga xmakan chu xamalh lixtokgo xlakata lu paxtikatsini (Est. 5:1, 2).

³ Liwana tasiya pi Asuero chatum mapakgsina tiku lhuwa tuku kgalhi chu kgalhi lhuwa limapakgsin. Chuna la wankgo tiku katsikgo xlakata uma, xlhakgatkan mapakgsinanin xalak Persia lhuwa millón dólares xtapalh xwanit. Pero maski lanka mapakgsina, Ester akxilha kxlakan pi paxki. Wani: «¿Tuku akgspulaman, mapakgsina Ester chu tuku kiskiniputuna?», chu wani pi asta itat xtamapakgsin xʼama maxki (Est. 5:3).

4. ¿Tuku tuwa taskujut xlakgaya Ester?

⁴ Ester limasiyanita pi kgalhi takanajla chu ni pekuan: lakganit mapakgsina xlakata nakamakgtaya xkachikin chu ni nakamasputukan. Asta la uku nitu akgspulama, xlakata mapakgsina makgamakglhtinalh. Pero tsankgajku tuku tlakg tuwa. Talakaskin nawani pi kstakyawana Hamán tiku lu lipawan lixkajni likatsi, xlakata akgskgawilh chu matlawilh akgtum limapakgsin niku xwan pi kakamasputuka xkachikin Ester. ¿La xʼama wani xlakata xkanajlanilh chu tuku kinkamasiyaniyan xlakata xtakanajla uma puskat?

Liwana laksakli “akxni nachuwinan”

5, 6. 1) ¿La tlawalh Ester chuna la wan Eclesiastés 3:1, 7? 2) ¿La limasiyalh Ester liskgalala akxni tachuwinalh xchixku?

⁵ ¿Putum nawani Ester mapakgsina anta kxlakatin amakgapitsin? Uma max nalimamaxani mapakgsina chu Hamán xkgalhilh kilhtamaku xlakata xkatsilh tuku nalikgalhtinan. ¿Tuku natlawa Ester? Akglhuwata ciento kata Dios xmatsokgninit mapakgsina Salomón: «Putum tuku tlawaputunkan xlikgalhit xkilhtamaku, [...] kilhtamaku akxni ni nachuwinankan chu kilhtamaku akxni tlan nachuwinankan» (Ecl. 3:1, 7). Max tiku xtlat Ester xlitaxtu, masiyanilh uma tastakyaw akxni staktilhalh. Chu, chuna la naʼakxilhaw, xla liwana katsi la xlilakaskinka nalaksaka kilhtamaku “akxni xlichuwinat”.

⁶ Wa xlakata Ester wani xchixku: «Komo mapakgsina nalakgati, la uku katamilh Hamán kʼakgtum taway nema naktlawani mapakgsina» (Est. 5:4). Mapakgsina wa pi naʼan chu matasaninalh Hamán. ¿Akxilhaw pi Ester liwana laksaka tuku natlawa chu lu skgalala? Maxkilh kakni xchixku, pero na lakkaxwililh akxni nawani tuku lilakgaputsa (kalikgalhtawakga Proverbios 10:19).

7, 8. ¿La kitaxtulh xapulana liwat nema tlawalh Ester chu tuku xlakata nina wanilh mapakgsina tuku xwaniputun?

⁷ Xlikana, xla liwana lakkaxwililh uma taway, tlawanilh tuku lakgati xchixku. Chu na mastalh vino xlakata napaxuwakgo (Sal. 104:15). Asuero lu paxuwalh, wa xlakata kgalhskinipa Ester tuku lakaskin. ¿Lakgchanita kilhtamaku akxni nawani?

⁸ Ester lakpuwan pi nina xliwanit. Wa xlakata, lichali katlawanipa atanu taway mapakgsina chu Hamán (Est. 5:7, 8). ¿Tuku xlakata nina wani tuku lilakgaputsa? Kalakapastakwi pi putum xkachikin Ester kamakgniputunkan xlakata chuna mapakgsinalh mapakgsina. Xlakata lhuwa tiku nanikgo, liwana xlilaksakat akxni nawani. Wa xlakata, kgalhkgalhilh chu tlawanipa xchixku atanu taway xlakata nalimasiyani la xlilhuwa paxki.

9. ¿La xlilakaskinka akxni kgalhkgalhinanaw chu la tlan nachuna natlawayaw la Ester?

⁹ ¡Lu xlakaskinka kgalhkgalhinankan pero ni lhuwa tiku chuna tlawakgo! Maski lu xwaniputun tuku xmakgkatsi, Ester kgalhkgalhilh akxni xlilat nawani. Nachuna kilitlawatkan, max kimputumkan akxilhnitaw tuku xlitalakgpalit. Komo lakaskinaw pi chatum mapakgsina kakinkalakkaxtlawanin akgtum taʼakglhuwit, max talakaskin natlawayaw la Ester chu nakgalhkgalhiyaw. Proverbios 25:15 wan: «Akxni kgalhkgalhinankan tlan lakgpalikan xtapuwan chatum puxku, chu tiku tlan chuwinan tlan laktukxa lukut». Komo ni tunkun nawanaw tuku wamputunaw chu liwana nachuwinanaw la tlawalh Ester, tlan “nalaktukxaw” tuku lu tuwa maski lu palha chuna la lukut. ¿Sikulunatlawalh Jehová Ester xlakata kgalhkgalhilh chu limasiyalh liskgalala?

Xlakata kgalhkgalhilh tatlawalh tuku xaʼakgstitum

10, 11. ¿Tuku xlakata Hamán sitsi akxni taxtucha niku tawayanka chu tuku wanikgolh xpuskat chu xʼamigos?

¹⁰ Xlakata Ester kgalhkgalhilh makgtayanalh xlakata wi tuku tlan xlalh. Hamán lu paxuwa taxtulh akxni xlimakgtum kakitawayalh mapakgsinanin, «xpaxuwa chu tlan xmakgkatsi xnaku» xlakata mapakgsina chu xpuskat wanikgolh pi kaʼalh. Pero akxni taxtulh kxchik mapakgsina, akxilhli Mardoqueo, tiku chuntiya ni takilhputaniputun. Chuna la akxilhwi kcapítulo 15, ni wamputun pi Mardoqueo kaj nitu liʼakxilha, wata xtlawa tuku xwani xtalakapastakni chu tlan xtalalilh Jehová. Pero, Biblia wan pi «Hamán tunkun lu sitsilh» (Est. 5:9).

¹¹ Akxni kalitachuwinalh xpuskat chu xʼamigos pi Mardoqueo ni takilhputanilh, wanikgolh pi xmatlawinalh lanka kiwi, liwaka 22 metros xlitalhman, chu kskinilh mapakgsina anta xmawakaka Mardoqueo. Hamán lu lakgatilh tuku wanikan chu tunkun tsukulh lakkaxwili pi chuna natlawa (Est. 5:12-14).

12. ¿Tuku xlakata mapakgsina skilh kalikgalhtawakganika niku xtsokgwilikan tuku tlakg xlakaskinka xalak Persia chu tuku tekgsli?

¹² Pero wi tuku lalh. Biblia wan pi uma katsisni «mapakgsina nila lhtatalh» chu wa xlakata Asuero skilh pi xlekgalhtawakganika niku xtsokgwilikan tuku tlakg xlakaskinka xalak Persia. Akxni likgalhtawakganika na anta xwi niku xwan pi wi tiku xlakkaxwilikgonit namakgnikan mapakgsina. Xla lakapastaka pi tiku chuna xtlawaputunkgo kachipaka chu kamakgnika. Pero ¿la kitaxtulh Mardoqueo, tiku makatsininalh tuku xʼamaka tlawanikan? Kaj xalan, kgalhskininalh tuku maxkika Mardoqueo xlakata xmakgtayanit. ¿Chu tuku wanikgolh? ¡Pi nitu maxkimaka! (kalikgalhtawakga Ester 6:1-3.)

13, 14. 1) ¿Tuku kaj xalan talakgpalilh xlakata tuku xlakkaxwilinit Hamán? 2) ¿Tuku wanikgolh Hamán xpuskat chu xʼamigos?

¹³ Asuero lu nitlan xmakgkatsi, wa xlakata katsiputun tiku napuxkun wilakgolh anta chu natalakkaxtlawakgo tuku ni kuenta tlawakgolh. ¡Chu Hamán anta wi kxkilhtin kxchik mapakgsina! Sokg chalh xlakata lakaskin namaxkikan talakaskin naxtokgowaka kkiwi Mardoqueo. Pero akxni nina xwani tuku xlakaskin, Asuero atanu tuku kgalhskin chu wani: ¿tuku tlan xlimalankika chatum tiku mapakgsina tlan akxilha? Hamán lakpuwan pi wa malankiputunkan, wa xlakata wanilh: kalimalhakgeka lhakgat nema maklakaskinkgo mapakgsinanin chu chatum puxku kalimapaxialhnilh xkawayu mapakgsina kSusa, kamalankilh kxlakatin amakgapitsin. Kaj kalakpuwanti la lakawa Hamán akxni katsilh pi chixku tiku xʼamaka malankikan wa Mardoqueo. ¿Tiku lakgayawalh mapakgsina xlakata namalanki Mardoqueo xlakatin amakgapitsin? ¡Wa Hamán! (Est. 6:4-10.)

¹⁴ Maski ni xlakaskin chu lu xsitsinit, tlawalh tuku wanilh mapakgsina. Pero akxni makgantaxtikgolh tunkun alh kxchik chu lu xlilakgaputsa tuku akgspulalh. Xpuskat chu xʼamigos wanikgolh pi uma tuku lama limasiya pi naʼakgspula tuku nitlan chu Mardoqueo tiku judío natlaja (Est. 6:12, 13).

15. 1) ¿Tuku lalh xlakata Ester kgalhkgalhinalh? 2) ¿Tuku xlakata talakaskin nalimasiyayaw pi “kgalhkgalhinanaw”?

¹⁵ Xlakata Ester ni tunkun wanilh mapakgsina tuku xlakaskin chu kgalhkgalhipa akgtum kilhtamaku xlakata nawani, Hamán kgalhilh kilhtamaku xlakata nalakkaxwili niku nani, maski ni xkatsi. Nachuna, max wa Jehová tiku tlawalh pi mapakgsina nila klhtatalh (Prov. 21:1). Wa xlakata Biblia kinkawaniyan pi “nakgalhkgalhinanaw” (kalikgalhtawakga Miqueas 7:7). Akxni makgxtakgniyaw Dios kintaʼakglhuwitkan, max naʼakxilhaw pi la kinkamakgtayayan tlakg tlan nixawa la akinin nalakpuwanaw natlawayaw.

Ni pekualh chu chuwinalh

16, 17. 1) ¿Tukuya kilhtamaku lakgchalh “akxni nachuwinan” Ester? 2) ¿Tuku xlakata Ester ni xtachuna xwanit la Vasti?

¹⁶ Ester nialh mamakgaslilh wa xlakata wanilh xchixku tuku xlakaskin akxni xlimakgtiy tlawanilh taway. Pero ¿la tlawalh? Wa mapakgsina tiku kgalhskimpa tuku xlakaskin (Est. 7:2). Lakgchanita kilhtamaku “akxni nachuwinan”.

¹⁷ ¿Pero tuku pulana tlawa Ester xlakata nakgalhti mapakgsina? Kaj kalakpuwanti pi pulana tsekg tlawani oración Dios. Chu alistalh ni pekuan chu wani: «Komo tlan kiʼakxilha, kimapakgsina, chu komo lakaskina, ni kakimakgnika xlakata akit kskima chu nachuna kinkachikin» (Est. 7:3). Akxilhaw pi Ester wanilh pi nakgalhakgaxmata tuku nawani mapakgsina. ¡Ester ni tlawalh la Vasti, xapulana xpuskat mapakgsina, tiku mamaxanilh xchixku! (Est. 1:10-12.) Ester na ni wanilh pi nitlan xlakata lipawa Hamán. Wata skinilh pi kamakgtayalh xlakata makgniputunkan.

18. ¿La wanilh xtaʼakglhuwit Ester mapakgsina?

¹⁸ Tuku skilh, tlan akxilhli mapakgsina chu na kaks lilakawa. ¿Tiku namakgniputun xpuskat mapakgsina? Ester wanipara: «Kistakanit akit chu kinkachikin, xlakata nakinkamakgnikanan chu nakinkamasputukanan. Pero, komo xkinkastakan xlakata kaj skujnin xaklitaxtuw nitu xakwa. Pero nitlan ni nakwan kintalakgaputsit xlakata na nitlan nakitaxtuni mapakgsina» (Est. 7:4). Kaʼakxilhti pi Ester lakatanks wa tukuya taʼakglhuwit xʼanan, chu na wa pi nitu xtiwa komo kaj skujni xlitaxtukgolh. Pero, xlichuwinat xwanit, xlakata xʼamaka kamakgnikan lhuwa latamanin chu na lu nitlan xʼama kitaxtuni mapakgsina.

19. ¿Tuku kinkamasiyaniyan xliʼakxilhtit Ester xlakata la nalakkaxtlawayaw lu tuwa taʼakglhuwit?

¹⁹ Ester liwana lakkaxwililh la namakatsininan lu xatuwa taʼakglhuwit. Xliʼakxilhtit kinkamasiyaniyan pi komo namin kilhtamaku natalakaskin nalitachuwinanaw akgtum lanka taʼakglhuwit tiku paxkiyaw o tiku kgalhi limapakgsin, talakaskin nakgalhkgalhiyaw akxni tlan nawanaw, namaxkiyaw kakni chu xlikana tuku nawanaw (Prov. 16:21, 23).

20, 21. 1) ¿La la wanilh Ester Mapakgsina tuku xtlawaputun Hamán chu tuku tlawalh mapakgsina? 2) ¿Tuku tlawalh Hamán akxni takatsilh pi xmatlawiputun mapakgsina tuku nitlan?

²⁰ Akxni Asuero kgaxmatli tuku wanilh Ester, kgalhskin: «¿Tiku uma chu niku wi tiku chuna tlawaputun?». Kalakpuwanti akxni Ester limasiyama xmakan chu wa: «Chixku, talatlawana, tiku ni kinkaʼakxilhputunan, wa Hamán tiku lixkajni likatsi». Akxni chuna wa nialhti chuwinalh. Hamán tsukulh pekuan. Akxilhli pi Asuero lu sitsinit katsilh pi lu nitlan tuku xʼama akgspula: mapakgsina katsilh pi kstakyawana tiku tlakg xlipawan, ¡mafirmarlinilh akgtum limapakgsin xlakata na xmakgnika xpuskat! Xlakata xmakgkatsi pi nila xmachokgo xtasitsi mapakgsina lakapala alh kxjardín, xlakata nialh xsitsilh (Est. 7:5-7).

²¹ Xlakata katsika tuku xmatlawiputun mapakgsina, Hamán lakgtatsokgostalh Ester xlakata xtapatilh. Akxni tanupa mapakgsina chu akxilhli pi kskinima Ester pi xtapatilh anta niku xjaxma, lu sitsilh chu limawakalh pi xlekgamanamputun xpuskat kxpumapakgsin. ¡Hamán xakstu tlawalh pi namakgnikan! Lakapala maxtuka chu xlakgatlapakanit. Chatum kskujni mapakgsina wanilh pi Hamán xyawanit kgantum kiwi niku kxtokgowakaputun Mardoqueo. Lakapala Asuero mapakgsinalh, ¡pi anta xmawakaka Hamán! (Est. 7:8-10.)

22. ¿La kinkamasiyaniyan xliʼakxilhtit Ester pi nikxni kamakgatsankgaw kintakanajlakan chu takgalhkgalhin?

²² Kkakilhtamaku niku lamaw max nalakpuwanaw pi nikxni katitatlawalh tuku xaʼakgstitum. ¿Minit kilhtamaku akxni chuna lakpuwanita? Ester nikxni xlajwanalh xtakanajla chu nikxni lakpuwa pi niti katimakgtayalh. Akxni lakgchalh kilhtamaku ni pekualh chu wa tuku xlama chu lipawa pi Jehová xʼama makgtaya. Nachuna katlawaw. Dios nitu talakgpalima. Chuntiya katlawani tiku nitlan likatsikgo chuna la tlawanilh Hamán (kalikgalhtawakga Salmo 7:11-16).

Tatayalh Jehová chu xkachikin

23. 1) ¿Tuku maxkilh mapakgsina Mardoqueo chu Ester? 2) ¿La kgantaxtulh tuku lichuwinalh Jacob xlakata Benjamín? (Kaʼakxilhti recuadro «Kgantaxtulh tuku xlichuwinanit Biblia».)

²³ Alistalh, mapakgsina ni kajwatiya katsilh pi Mardoqueo makgtayalh xlakata ni xmakgnika wata na katsilh pi wa makgastakli Ester chu lakgayawalh tuku xlakgaya Hamán. Na maxkilh Ester xchik Hamán chu putum tuku xkgalhi, chu xla makamaxkilh Mardoqueo (Est. 8:1, 2).

24, 25. 1) ¿Tuku xlakata ni kaj chuna tamakgxtakga Ester akxni makatsinilh mapakgsina tuku xtlawaputun Hamán? 2) ¿La kalipekua wilipa xlatamat Ester?

²⁴ Xlakata Ester chu Mardoqueo nialh katikamakgnika, ¿nialhtu katitlawalh Ester? Nialhtu xtlawalh komo kaj xakstu xpaxkika, pero xla ni kaj lakpuwan xlakata xlatamat. La uku limapakgsin nema xmastanit Hamán xlakata xkamakgnika judíos xtakatsima xlikalanka uma tamapakgsin. Hamán xlimaklakaskinit taskuwan xlakata nakatsi tukuya kilhtamaku tlakg tlan akxni xkamakgnika judíos. Biblia wan pi xlimakanit suerte o Pur ktachuwin nema tamaklakaskilh akxni tsokgka uma libro (Est. 9:24-26). Tsankgajku akglhuwa papaʼ xlakata nachan uma kilhtamaku pero lakapala talakatsuwima. ¿Tlan namachokgokan uma tuku nitlan?

²⁵ Ester limasiyalh pi ni xakstu paxkikan, kalipekua wililh xlatamat akxni lakgampa mapakgsina maski nitu xtasanikanit. Uma kilhtamaku kalakgtasa xkachikin chu tasaskinilh xchixku pi xlakgpalilh limapakgsin. Pero, limapakgsin nema xmastakgo mapakgsinanin xalak Persia nila xlakgpalikgo (Dan. 6:12, 15). Wa xlakata, mapakgsina kaliyawa Ester chu Mardoqueo xlakata namastakgo xasasti limapakgsin. Wa xlakata malakgachaka limapakgsin niku xwan pi judíos xkatalachipakgolh tiku xkamakgniputunkgo. Makatsininanin lakapala ankgolh kxlikalanka tamapakgsin chu linkgolh uma xatlan tamakatsin chu judíos paxuwaparakgolh (Est. 8:3-16). Kaj kalakpuwaw akxni judíos tiku xwilakgolh xlikalanka Persia akxni tsukukgolh takaxkgo xlakata natalachipakgo xtalamakgasitsinkan, nila chuna xtlawakgolh komo ni xmastaka xasasti limapakgsin. Pero wi atanu tuku tlakg xlakaskinka: ¿nakamakgtaya judíos «Jehová tiku pulalin lhuwa soldados»? (1 Sam. 17:45.)

26, 27. 1) ¿La kamakgtayalh Jehová xkachikin? 2) ¿Tuku xlichuwinankanit nema kgantaxtulh akxni kamakgnika xkamanan Hamán?

²⁶ Akxni chalh kilhtamaku, xkachikin Dios xtakaxkgonita. Asta lhuwa napuxkun xalak Persia katatayakgolh judíos xlakata takatsilh xliputum tamapakgsin pi Mardoqueo xlichatiy mapakgsina litaxtulh. ¡Jehová kamakgtayalh xkachikin xlakata xtlajakgolh! Chu xlakata alistalh nitu xtlawanika xkachikin, kamasputulh putum tiku ni xkaʼakxilhputun (Est. 9:1-6).a

²⁷ Nachuna, kamakgnika kgalhakaw xkamanan Hamán xlakata Mardoqueo tlan xlakgatayalh tuku xkgalhi Hamán (Est. 9:7-10). Chuna, Dios makgantaxtilh tuku xwanit pi xʼama kamasputu putum amalequitas, tiku lu ni xkaʼakxilhputunkgo xkachikin (Deut. 25:17-19). Max xkamanan Hamán awatiya amalequitas nema xlamakgo nema xwankanit pi xʼamaka kamasputukan.

28, 29. 1) ¿Tuku xlakata Jehová mastalh talakaskin pi xkachikin xtlawalh guerra akxni latamalh Ester? 2) ¿Tuku xlakata wanaw pi akgtum tasikulunalin xlakata kgalhiyaw xliʼakxilhtit Ester?

²⁸ Ester lu lanka taskujut tuku lakgatayalh, mastalh limapakgsin niku xwan pi tlan xtalachipanankgolh chu na wi tiku mamakgninalh. Max lu tuwa xwanit. Pero Jehová xlakaskin pi ni xkamasputuka Israel, xlakata kʼuma kachikin xʼama min Mesías, tiku kajwatiya tlan nakamakgtaya latamanin (Gén. 22:18). Xlakskujnin Dios xala uku lu lipaxuwayaw pi ni makgtlawayaw guerras nema xlakan tlawakgolh, xlakata akxni Jesús kichilh kKatiyatni kawanilh kstalaninanin pi nialh xchipakgolh likan nema limakgninankan (Mat. 26:52).

²⁹ Pero akinin kstalaninanin Cristo kgalhiyaw latalatlawat xla kintakanajlakan, xlakata Satanás lu masputuputun takanajla nema kgalhiniyaw Jehová (kalikgalhtawakga 2 Corintios 10:3, 4). Pero ni kintikatlajan komo natlawayaw chuna la Ester. Liwana lakkaxwililh la nachuwinan akxni xkgalhi taʼakglhuwit, limasiyalh liskgalala chu kgalhkgalhilh, akxni ni pekuanaw chu tatayayaw xkachikin Jehová. ¡Akgtum lu lanka talakgalhaman xlakata kgalhiyaw xliʼakxilhtit Ester!