Niku Mastakan Xtakgalhtin Akgtum Takgalhskinin

◼ ¿Tlan namakgpitsikgo xtatayananin Jehová akgtum grabación o maktum copia xla akgtum bosquejo nema limastaka taʼakgchuwin?

Taʼakgchuwin xalak Biblia nema tamasta kinkamakgtayayan chu kinkamatliwakglhan (Hech. 15:32). Wa xlakata, max nakamaxkiputunaw amakgapitsin tiku ni kgaxmatkgonit xlakata na nakamakgtaya tuku lichuwinan. Xlakata lhuwa tuku xalaksasti taxtumakgo, akgtum taʼakgchuwin tlan nagrabarlikan chu komo wi tiku namalakgachaniputuna lakapala nalakgchan. Wi tiku makikgonit lhuwa taʼakgchuwin nema tagrabarlinit, maski makgasa tamastanit, chu xlakata kamakgtayaputunkgo xʼamigos kamasakwanikgo o kagrabarlinikgo. Amakgapitsi kgalhikgo akgtum página kʼInternet niku wilikgonit taʼakgchuwin xlakata tlan namakti tiku lakaskin.

Pero nitu wamputun komo wi tiku nagrabarli akgtum taʼakgchuwin xlakata xla nakgaxmata o nakagrabarlini xfamilia. Nachuna, lakgkgolotsin xalak congregación tlan naskinikgo chatum tala nagrabarlini taʼakgchuwin tiku tatatlakgo chu nila ankgo ktamakxtumit. Pero, wi tuku xlakata ni namakgpitsiyaw copias xla bosquejos o tuku grabarlinitaw xla akgtum taʼakgchuwin.

Akgtum taʼakgchuwin laksakkan natamasta xlakata namakgtaya akgtum congregación, wa xlakata max wi tiku nitlan naʼakxilha makgapitsi talakapastakni xla ama taʼakgchuwin nema nalamatitaxtini xlakata ni katsikgo tuku xlakata chuna tamastalh ama taʼakgchuwin. Nachuna, tuwa nakatsikan tiku chu tukuya kilhtamaku mastaka uma taʼakgchuwin xlakata tlan nalipawanaw pi tamasiy xtachuna tuku masiyakan uku chu ni maliwakakanit (Luc. 1:1-4). Chu nachuna, makgpitsikan copias chu grabaciones xla akgtum taʼakgchuwin max nalimalankikgo o wi tiku namakglhtinan kakni nema ni lakgchan (1 Cor. 3:5-7).

Skujni xatalipaw chu xaskgalala lhuwa skujma xlakata «akxni xkilhtamaku namaxkikgoy ntu nawakgoy [o xla takanajla] amakgapitsin» (Luc. 12:42). Uma liwat xla takanajla na kilhchani taʼakgchuwin nema mastakan kcongregaciones xla xtatayananin Jehová chu grabaciones nema tlan maktikan kpágina jw.org xla Internet. Tlan nalipawanaw pi skujni xatalipaw chu xaskgalala chu Lakgkgolotsin tiku Pulalinkgo xTatayananin Jehová nakinkamaxkikgoyan tuku maklakaskinaw xlakata tliwakga natawila kintakanajlakan (Hech. 16:4, 5).