Tuku katsiputunkgo tiku likgalhtawakgakgo
¿Asta tuku kilhtamaku nialh katilichuwinaw xatlan tamakatsinin?
Jesús wa: «Uma xatlan tamakatsinin xla Tamapakgsin natalichuwinan kxlilakgatum katiyatni xlakata natamakatsininan kputum laklanka kachikinin, chu alistalh namin lisputni» (Mat. 24:14). Kʼuma versículo chu kversículos 6 chu 13, tachuwin xagriego télos nema unu matitaxtikanit «lisputni» kilhchanima akxni namalakgsputukan xkakilhtamaku Satanás kʼArmagedón (Apoc. 16:14, 16). Wa xlakata, chuntiya nalichuwinanaw xatlan tamakatsinin asta akxni tsinu tsankga namin Armagedón. Uma tuku lichuwinamaw lakgpali tuku xapulana xʼakgatekgsaw.
Asta la uku, xʼakgatekgsaw pi xʼamaw lichuwinanaw Dios asta akxni xmalakgsputuka xaLanka Babilonia chu xtsukulh lhuwa tapatin (Apoc. 17:3, 5, 15, 16). Xkanajlayaw pi akxni xtsukulh lhuwa tapatin xʼama sputa kilhtamaku nema lilakgapasaw «kata xla xatlan xtalakaskin Jehová» (Is. 61:2, La Biblia. Traducción del Nuevo Mundo). Nachuna, xlakpuwanaw pi kajwatiya xlakgtaxtukgolh tiku ni xmakgxtakgkgolh Jehová akxni nina tsuku xwa lhuwa tapatin. Xwanaw pi umakgolh latamanin xʼamakgo litaxtukgo chuna la judíos tiku lakgtaxtukgolh akxni malakgsputuka Jerusalén kkata 607 akxni nina xmin Jesús. Kajwatiya lakgtaxtukgolh tiku xkalaksakkanita xlakata xkakninanikgo Jehová chu kxkajnikgo tuku nitlan (Ezeq. 5:11; 9:4). Pero uma ni tatalakxtumi tuku wa Jesús kMateo 24:14, niku lichuwinan pi natikamaxkikan talakaskin latamanin namakgamakglhtinankgo xatlan tamakatsinin asta akxni atsinu tsankga namin Armagedón chu namalakgsputukan uma kakilhtamaku.
Xlakata talakgpalima la xʼakgatekgsaw Mateo 24:14, na talakgpalima la xʼakgatekgsaw Apocalipsis 16:21, nema lichuwinan laklanka chijit. Akxni liwana lakputsananiyaw umakgolh akgtiy textos, akgatekgsaw pi watiya tamakatsinin lichuwinamakgo. ¿La likatsiyaw uma? Likatsiyaw xlakata la makgamakglhtinamakgo latamanin tamakatsinin xla Tamapakgsin. Chuna la tsokgli apóstol Pablo, xpalakatakan «tiku nakalakgmaxtukan», uma tamakatsinin xatlan, xtachuna tuku stlan takgankgawanan. Pero xpalakatakan xtalamakgasitsin Dios, uma tamakatsinin nitlan, xtachuna la tuku nitlan takgankgawanan (2 Cor. 2:15, 16). Ni lakgatikgo xlakata uma tamakatsinin masiya pi kakilhtamaku nema paxkikgo xalixkajni, akgchipanit Akgskgawini chu nialh makgas namasputukan (Juan 7:7; 1 Juan 2:17; 5:19).
Apocalipsis 16:21 na lichuwinan pi laklanka chijit nema kaj wi tuku kilhchanima “lu namalakgsputunan”. Max uma wamputun pi akxni lama nawan lhuwa tapatin, tlakg nalitasiya pi tuku lichuwinanaw xaxlikana. Chu tlakg lhuwa latamanin nalakgapaskgo xtukuwani Jehová (Ezeq. 39:7). ¿Wamputun uma pi akxni namalakgsputukan xaLanka Babilonia naʼanankgojku latamanin tiku nakgaxmatputunkgo xatlan tamakatsinin? Max chuna. Max naʼanankgo latamanin tiku nalakapastakkgo o xlimakgtumku nakatsikgo pi akglhuwata kata xtatayananin Jehová xlichuwinamakgo pi xʼamaka malakgsputukan ni xaxlikana takanajla.
Nala xtachuna tuku lalh kʼEgipto akxni Jehová xmalakgachanita 10 plagas. Akxni Jehová xkamalakgaxokgenita «putum xdioseskan egipcios», «lhuwa latamanin tiku tanu tanu xkilhtsukutkan» akxtum katataxtukgolh israelitas kʼEgipto (Éx. 12:12, 37, 38). Max umakgolh latamanin tsukukgolh tatayakgo Jehová akxni akxilhkgolh la xkgantaxtuma 10 plagas nema Moisés xlichuwinanit.
Putum tiku natataya Jehová akxni malakgsputukanita nawan xaLanka Babilonia nakgalhi talakgalhaman pi nakamakgtaya tiku xatalaksakni tiku lamakgolhku nawan kKatiyatni, chu chuna Jehová nalilakgapasa la tantum borrego (Mat. 25:34-36, 40). Pero uma kilhtamaku ni lhuwa katimakgapalalh, nakisputa akxni atsinu tsankga nachin Armagedón, akxni tiku xatalaksakni nema wilakgolhku kKatiyatni nakalinkgokan kʼakgapun.
Uma xasasti taʼakgatekgsni liwana limasiya pi Jehová lu paxkinan chu lakgalhamanan. Xla «ni lakaskin pi wi tiku namalakgsputukan, wata lakaskin pi putum latamanin kamakgxtakgkgolh tuku nitlan tlawamakgolh» (2 Ped. 3:9).