2 Korin

2 Mi wokim tingting pinis olsem mi no ken mekim yupela i bel hevi taim mi kam lukim yupela gen. 2 Sapos mi mekim yupela i bel hevi, orait husat i stap bilong mekim mi amamas? I no gat narapela lain i stap, ol lain mi bin mekim ol i bel hevi, ol tasol i stap. 3 Olsem na mi bin raitim pas long yupela, na taim mi kam, mi no ken bel hevi long ol man em mi mas amamas long ol. Long wanem, mi gat bilip olsem ol samting mi amamas long en yupela tu i save amamas long en. 4 Taim mi raitim pas long yupela, mi wari tru na bel bilong mi i hevi stret na mi krai planti. I no olsem yupela i mas bel hevi long dispela, tasol mi laik bai yupela i save olsem mi laikim yupela tru.

5 Sapos wanpela man i bin mekim ol arapela i bel hevi, em i no mekim mi bel hevi, nogat. Tasol em i mekim yupela olgeta i bel hevi. Mi no laik mekim strongpela tok tumas long dispela samting. 6 Strongpela tok em planti bilong yupela i bin givim long kain man olsem, em inap long em. 7 Olsem na nau yupela i mas redi long fogivim em na mekim isi bel bilong en. Nogut dispela man i bel hevi tru na dispela i daunim em olgeta. 8 Olsem na mi laik strongim yupela long soim em olsem yupela i laikim em tru. 9 Na mi raitim dispela pas bilong save olsem yupela i bihainim tok o nogat. 10 Sapos yupela i lusim rong bilong wanpela man, orait mi tu mi lusim. Tasol mi yet, taim mi lusim rong bilong wanpela, mi mekim olsem bilong helpim yupela, na mi mekim long ai bilong Krais. 11 Nogut Satan i giamanim yumi na i winim yumi. Yumi save long ol trik bilong em.

12 Taim mi kam kamap long Troas bilong autim gutnius bilong Krais, rot i op long mi* long mekim wok bilong Bikpela. 13 Tasol bel* bilong mi i no stap isi, long wanem, mi no lukim brata bilong mi Taitus. Olsem na mi tok gutbai long ol na mi go long Masedonia.

14 Yumi tenkyu long God, em i save bringim yumi i go olsem lain i win na mats i go wantaim Krais. Na save bilong en i stap olsem wanpela naispela smel, na long wok bilong mipela dispela naispela smel i kamap long olgeta hap! 15 Long God yumi stap olsem naispela smel taim yumi tokaut long Krais namel long ol man em God bai kisim bek ol na ol man em ol bai kisim bagarap. 16 Long ol man em ol bai kisim bagarap dispela smel i olsem smel bilong dai na i bringim dai i kam. Tasol long ol man em God bai kisim bek ol, dispela smel i olsem smel bilong laip na i givim laip. Na husat i winim mak inap long ol i ken mekim kain wok olsem? 17 Mipela yet i winim mak long mekim dispela wok. Tasol mipela i no mekim wok bisnis long tok bilong God olsem planti man i save mekim, nogat. Mipela ol disaipel bilong Krais na mipela i pilim tru ol dispela tok mipela i autim, na mipela i stap olsem man God i salim i kam, na olsem man i stap long ai bilong God.