2 Korin
Namba 2 Pas i Go Long Ol Korin
1 Mi Pol, long laik bilong God yet mi stap wanpela aposel bilong Krais Jisas. Brata bilong yumi, Timoti, em i stap wantaim mi. Dispela pas i go long kongrigesen* i stap long Korin na olgeta manmeri holi i stap long olgeta hap bilong Akaia.*
2 Bikpela pasin helpim na bel isi bilong God, Papa bilong yumi, na bilong Bikpela Jisas Krais i ken i stap wantaim yupela.
3 Yumi litimapim nem bilong God na Papa bilong Bikpela bilong yumi Jisas Krais. Em Papa bilong marimari na God bilong mekim isi bel bilong ol man long olgeta kain taim. 4 Long olgeta pen na hevi i kamap long yumi, em i save mekim isi bel bilong yumi. Olsem na yumi inap mekim isi bel bilong ol arapela man em ol i gat kain kain hevi, olsem God i save mekim isi bel bilong yumi. 5 Yumi bilip long Krais na yumi karim pen na hevi moa yet. Na tu, long rot bilong Krais, God i mekim isi bel bilong yumi moa yet. 6 Sapos mipela i karim pen na hevi, em bilong mekim isi bel bilong yupela na bilong God i ken kisim bek yupela. Na sapos God i mekim isi bel bilong mipela, em bilong mekim isi bel bilong yupela na bai yupela inap sanap strong na karim ol wankain hevi olsem mipela i save karim. 7 Olsem na mipela i gat strongpela bilip olsem yupela bai i stap strong. Mipela i save, yupela i karim pen wantaim mipela, olsem na yupela bai kisim bel isi wantaim mipela tu.
8 Ol brata, mipela i laik bai yupela i save long pen na hevi i bin painim mipela long provins Esia.* Mipela i karim bikpela hevi i winim strong bilong mipela, na mipela i ting laip bilong mipela bai lus. 9 Mipela i pilim wankain olsem man em jas i tok long em i mas i dai. Dispela i bin kamap bai mipela i no ken bilip long mipela yet, nogat, mipela i mas bilip long God, em dispela man husat i save kirapim bek ol man i dai pinis. 10 Em i bin kisim bek mipela long dai. Na mipela i bilip long em olsem em bai kisim bek mipela gen long bihain. 11 Yupela inap helpim mipela tu long rot bilong ol prea we yupela i beten strong. God bai harim ol beten em planti manmeri i mekim bilong tingim mipela. Dispela bai mekim na planti manmeri bai tenkyu long God long ol samting em i mekim bilong helpim mipela.
12 As na mipela i amamas em olsem, long dispela graun na moa yet namel long yupela, mipela i bin bihainim pasin holi na pasin bilong givim bel tru em God i as bilong en. Mipela i no bihainim savetingting bilong dispela graun, nogat, mipela i bihainim bikpela pasin helpim bilong God. Maus bilong bel bilong mipela i tokaut tu long dispela samting. 13 Mipela i raitim ol tok long yupela em yupela i save pinis na i kliagut long en. Em ol tok mi bilip olsem yupela bai kliagut yet long en i go inap long pinis. 14 Sampela bilong yupela i luksave pinis olsem mipela i stap olsem samting yupela i ken amamas long en, wankain olsem yupela bai stap olsem samting mipela i ken amamas long en long de bilong Bikpela bilong yumi Jisas.
15 Mi bilip long dispela samting na mi bin tingting long kam lukim yupela namba 2 taim bai yupela i ken amamas gen. 16 Mi bin tingting long stap liklik wantaim yupela na bihain go long Masedonia, na taim mi lusim Masedonia mi laik kam bek long yupela na yupela i ken lusim mi long hap rot i go long Judia. 17 Taim mi bin tingting long mekim olsem, yupela i ting mi bin mekim nating ol dispela tok, a? Yupela i ting ol samting mi tingting long mekim, mi bihainim ol laik bilong skin na mi makim ol dispela samting? Yupela i ting mi save tok “Yes,” na bihain gen tok “Nogat,” a? 18 Yupela i ken bilip long God olsem, tok mipela i mekim long yupela i no Yes na Nogat wantaim. 19 Mi na Silvanus,* na Timoti, mipela i autim tok namel long yupela long Krais Jisas, pikinini bilong God. Em i no kamap Yes na Nogat wantaim. Tasol long em, Yes em i Yes tasol. 20 Maski i gat hamas tok promis bilong God i stap, olgeta i kamap Yes long rot bilong Jisas. Olsem na long rot bilong em yumi tok “Amen” long God, bai yumi ken givim glori long God. 21 Tasol man husat i strongim tok olsem yupela na mipela i bilong Krais, na man husat i bin makim yumi, em God. 22 Em i putim mak long yumi na i givim holi spirit bilong i stap long bel bilong yumi. Long dispela rot em i strongim tok bilong em olsem em bai givim yumi ol gutpela samting bai kamap bihain.
23 Long ai bilong God mi mekim tok tru antap long laip bilong mi olsem, mi no kamap yet long Korin, long wanem, mi no laik mekim yupela i bel hevi moa. 24 I no olsem mipela i stap bos bilong bilip bilong yupela, nogat. Bilip bilong yupela i mekim na yupela i sanap strong. Tasol mipela ol wanwok bilong yupela bilong mekim yupela i amamas.