Hibru
Pas i Go Long Ol Hibru
1 Long bipo, long planti taim na long kain kain rot God i bin givim tok long ol tumbuna bilong yumi long rot bilong ol profet. 2 Tasol long pinis bilong dispela taim nau God i toktok long yumi long rot bilong Pikinini bilong em. Em dispela pikinini em i makim bilong kisim olgeta samting bilong em. Na long rot bilong em God i mekim i kamap ol samting long heven na long graun.* 3 Dispela pikinini i kamapim glori bilong God na em i piksa tru bilong em. Tok bilong em i gat pawa na long dispela tok em i mekim olgeta samting i stap strong. Na taim em i mekim yumi i kamap klin pinis long ol sin bilong yumi, em i sindaun long han sut bilong God i gat biknem tru na i stap long heven. 4 Olsem na em i winim ol ensel, em i kisim wanpela nem i gutpela moa winim nem bilong ol.
5 Wanem taim God i bin tokim wanpela ensel olsem: “Yu pikinini bilong mi, nau mi kamap papa bilong yu”? o “Mi yet bai kamap papa bilong em, na em yet bai kamap pikinini bilong mi”? 6 Na taim em i salim gen Fesbon bilong em i kam long graun, em i tok: “Olgeta ensel bilong God i mas brukim skru long em.”
7 Na tu, em i stori long ol ensel bilong en olsem: “Em i mekim ol ensel bilong en i kamap strongpela olsem win,* na ol wokman* bilong en i kamap olsem hatpela paia.” 8 Tasol em i stori long Pikinini olsem: “God em i sia king bilong yu inap oltaim oltaim, na stik* bilong wok king bilong yu, em i stik bilong stretpela pasin. 9 Yu bin laikim tru stretpela pasin, na yu bin heitim tru pasin bilong sakim lo. Dispela i as na God, em God bilong yu, em i bin kapsaitim oil bilong amamas long yu moa yet winim ol arapela king.”* 10 Na em i tok moa olsem: “Bikpela, bipo tru yu bin wokim as bilong dispela graun, na long han bilong yu, yu bin wokim skai. 11 Graun na skai bai pinis, tasol yu bai i stap oltaim. Na graun na skai bai kamap olpela wankain olsem klos i save kamap olpela. 12 Na yu bai rolim skai na graun olsem yu rolim longpela laplap o klos. Na skai na graun bai i gat senis bilong ol, tasol yu save stap wankain tasol, na laip bilong yu i no inap pinis.”
13 Tasol em i bin tok long wanem ensel olsem: “Yu sindaun long han sut bilong mi i go inap long taim mi putim ol birua bilong yu aninit long lek bilong yu”? 14 Olgeta ensel ol i spirit na ol i mekim wok holi. God i save salim ol i go bilong helpim ol man em bai kisim bek ol.