Revelesen

8 Na taim Pikinini Sipsip i rausim namba 7 gris kandel, i no gat wanpela nois i kamap long heven i go inap olsem hap aua. 2 Na mi lukim dispela 7-pela ensel i sanap i stap long ai bilong God, na God i givim 7-pela trampet long ol.

3 Na narapela ensel i kam na sanap klostu long alta. Em i holim wanpela plet gol bilong kukim paura i gat gutpela smel. Na ol i givim em planti paura bilong em i ken ofaim antap long alta gol i stap long ai bilong sia king, na em i mekim olsem taim God i harim ol beten bilong ol manmeri holi. 4 Na smok bilong paura i gat gutpela smel i lusim han bilong ensel na i go antap long God na beten bilong ol manmeri holi tu i go antap long God. 5 Na wantu dispela ensel i kisim sampela paia long alta na em i pulimapim long plet ol i save kukim paura i gat gutpela smel long en, na em i tromoi dispela paia i go daun long graun. Na tanda i pairap na ol nek i toktok na laitning i sut na graun i guria. 6 Na 7-pela ensel i holim 7-pela trampet, ol i redi long winim ol trampet bilong ol.

7 Namba 1 ensel i winim trampet bilong en. Na ren ais na paia i miks wantaim blut i kamap, na ol dispela samting i pundaun long graun. Na paia i kukim wanpela bilong ol 3-pela hap bilong graun, na paia i kukim wanpela bilong ol 3-pela hap bilong ol diwai, na paia i kukim olgeta grinpela gras samting.

8 Na namba 2 ensel i winim trampet. Na wanpela samting i olsem bikpela maunten i paia em i pundaun i go daun long solwara. Na wanpela bilong ol 3-pela hap bilong solwara i kamap blut. 9 Na wanpela lain bilong ol 3-pela lain bilong ol samting i stap laip* long solwara, ol i dai. Na wanpela lain bilong ol 3-pela lain bot, ol i bagarap.

10 Na namba 3 ensel i winim trampet bilong en. Na wanpela traipela sta i lait olsem lam i lusim skai na i pundaun, na em i pundaun antap long wanpela bilong ol 3-pela hap bilong ol wara na ol hulwara. 11 Na nem bilong dispela sta em Wemwut.* Na wanpela bilong ol 3-pela hap bilong ol dispela wara ol i kamap olsem wara i pait. Na planti i dring long dispela wara na ol i dai, long wanem, wara i kamap olsem wara i pait.

12 Na namba 4 ensel i winim trampet bilong en. Na wanpela bilong ol 3-pela hap bilong san na wanpela bilong ol 3-pela hap bilong mun na wanpela bilong ol 3-pela hap bilong ol sta ol i kisim bagarap. Olsem na wanpela bilong ol 3-pela hap bilong ol i kamap tudak. Na wanpela bilong ol 3-pela hap bilong olgeta de na nait i no gat lait.

13 Na mi lukim wanpela tarangau i flai namel long skai, na mi harim em i singaut strong olsem: “Sori, sori, sori long ol manmeri i stap long graun, long wanem, 3-pela ensel i no winim yet trampet bilong ol, nau ol i redi long winim!”