Revelesen
10 Na mi lukim narapela strongpela ensel i lusim heven* na i kam daun. Em i pasim klaut olsem klos bilong en na wanpela renbo i stap long het bilong en. Pes bilong en i kain olsem san, na tupela lek bilong en i olsem strongpela pos na i luk olsem paia. 2 Na long han bilong en, em i holim wanpela liklik skrol i op i stap. Na em i putim lek i stap long han sut bilong en antap long solwara, na em i putim lek i stap long han kais bilong en antap long graun. 3 Na em i singaut strong kain olsem laion i save singaut strong. Na taim em i singaut, 7-pela tanda i toktok.
4 Taim 7-pela tanda i toktok, mi redi long raitim ol tok bilong ol, tasol mi harim wanpela nek long skai* i tok: “No ken tokaut long ol samting 7-pela tanda i toktok long en, na yu no ken raitim.” 5 Na dispela ensel mi lukim i sanap i stap long solwara na long graun, em i apim han sut bilong en i go long heven. 6 Na em i tok tru antap long nem bilong dispela Man i save stap oltaim oltaim, em man i bin wokim skai na olgeta samting i stap long en, na graun na olgeta samting i stap long en, na solwara na olgeta samting i stap long en, em i tok olsem: “God bai i no wet moa. 7 Tasol long taim namba 7 ensel i redi long winim trampet bilong en, orait long dispela taim truim bilong tok hait holi bilong God i kamap. Dispela tok hait holi em gutnius God i bin autim long ol profet, em ol wokboi bilong en.”
8 Na dispela nek mi bin harim long skai,* em i toktok gen long mi olsem: “Yu go kisim dispela skrol i op i stap long han bilong dispela ensel i sanap long solwara na graun.” 9 Na mi go long ensel na mi tokim em long givim mi dispela liklik skrol. Na em i tokim mi: “Yu kisim na kaikai, na long bel bilong yu, em bai pait, tasol long maus em bai swit olsem hani.” 10 Na mi kisim dispela liklik skrol long han bilong ensel na mi kaikai. Long maus bilong mi em i swit olsem hani, tasol taim mi kaikai pinis, em i pait long bel bilong mi. 11 Na ol i tokim mi: “Yu mas mekim tok profet gen long ol samting bai kamap long ol lain pipol, long ol kantri, na long ol manmeri bilong kain kain tokples, na long planti king.”