Aisaia
10 Sori tru long ol man husat i save kamapim ol lo i givim hevi long ol arapela,+
Ol man em oltaim ol i save raitim ol lo bilong daunim ol arapela,
2 Na bai ol i no ken harim kot bilong ol rabisman,
Na pasim ol taranguman namel long ol manmeri bilong mi long kisim stretpela kot,+
Ol i kisim ol samting bilong ol wido
Na ol i stilim ol samting bilong ol pikinini i no gat papa!*+
3 Bai yupela i mekim wanem long de bilong kisim panismen,+
Long taim bagarap i kam long wanpela longwe ples?+
Bai yupela i ranawe i go long husat long kisim helpim,+
Na bai yupela i lusim ol mani kago* bilong yupela long wanem hap?
4 Yupela bai i no inap mekim wanpela samting, nogat, bai yupela i sindaun i go daun namel long ol kalabusman
O dai wantaim ol man em ol i kilim i dai.
Long olgeta dispela samting, belhat bilong em bai no inap pinis,
Em i apim han bilong em i go antap na han i stap yet olsem bilong mekim save long ol.+
5 “Lukim! Asiria,+
Em stik mi yusim bilong kamapim belhat bilong mi,+
Na mi yusim stik i stap long han bilong em bilong givim panismen!
6 Bai mi salim em i go pait long dispela lain apostet,+
Long ol manmeri husat i bin mekim mi i belhat tru;
Bai mi tokim em long kisim planti gutpela samting long ol na stilim planti samting,
Na krungutim ol olsem graun malumalum long ol strit.+
7 Tasol em bai no gat tingting long mekim ol dispela samting
Na bel bilong em bai no kirap long mekim plen bilong mekim olsem;
Long wanem, long bel bilong em, em i laik bagarapim na pinisim ol olgeta,
Long pinisim planti lain manmeri, i no sampela tasol.
8 Bikos em i tok,
‘Ating ol prins bilong mi, olgeta i no king, a?+
9 Ating Kalno+ i no wankain long Karkemis,+ a?
Ating Hamat+ i no wankain long Arpat,+ a?
Ating Samaria+ i no wankain long Damaskus,+ a?
10 Han bilong mi i holimpas pinis ol kingdom i save lotuim ol yusles god,
Em ol imis bilong ol i planti moa winim ol imis bilong Jerusalem na Samaria!+
11 Ating bai mi no mekim wankain samting long Jerusalem na ol imis bilong em,
Olsem mi bin mekim long Samaria na ol yusles god bilong em, a?’+
12 “Taim Jehova i pinisim olgeta wok bilong em long Maunten Saion na long Jerusalem, Em* bai mekim save long king bilong Asiria, long wanem, long bel, king i bikhet na ting em i moa yet, na pasin bilong em long lukluk i gat pasin hambak long en.+ 13 Bikos em i tok,
‘Bai mi mekim dispela samting long strong bilong han bilong mi
Na long savetingting bilong mi, long wanem, mi gat gutpela tingting.
Bai mi rausim baundri bilong ol lain manmeri+
Na kisim ol gutpela gutpela samting bilong ol,+
Na olsem man i gat bikpela strong, mi bai daunim ol manmeri.+
14 Olsem man i putim han i go insait long haus bilong pisin,
Han bilong mi bai kisim ol gutpela samting bilong ol lain manmeri;
Na olsem man i save bungim ol kiau em pisin i lusim i stap
Mi bai bungim olgeta samting long graun!
I no gat wanpela pisin bai paitim paitim ol wing bilong em yet o opim maus bilong em o singaut.’”
15 Olsem wanem? Tamiok inap litimapim em yet winim man husat i yusim em long katim samting?
Olsem wanem? So inap litimapim em yet winim man husat i yusim em long katim samting?
Na stik wokabaut+ inap muvim i go i kam man husat i holim em i go antap?
O wanpela stik inap apim i go antap man husat i holim em?
16 Olsem na Bikpela, Jehova, bosman bilong bikpela lain ami,
Bai mekim na ol patpela manmeri bilong em* i kamap bun nating,+
Na Asiria bai i no gat glori moa. I olsem paia i kukim em na pinisim em olgeta.+
17 Lait bilong Israel+ bai kamap wanpela paia,+
Na God Holi bilong em bai kamap paia i lait;
Paia bai lait bikpela tru na kukim ol gras nogut bilong em* na ol liklik nil diwai bilong em insait long wanpela de tasol.
18 God bai pinisim tru ol naispela bikbus na lain prut diwai bilong Asiria;
Na bai em i luk olsem wanpela sikman em isi isi em i wok long kamap bun nating tru.+
19 Na olgeta arapela diwai long bikbus bilong em
Bai i no planti tumas na wanpela liklik mangi inap kaunim ol.
20 Long dispela taim, ol manmeri i stap yet long Israel,
Na lain bilong Jekop em ol i bin abrusim bagarap,
Ol i no inap kisim sapot moa long dispela man husat i bin daunim ol;+
Tasol bai ol i kisim sapot long Jehova,
Em God Holi bilong Israel. Ol bai mekim olsem long pasin i tru.
21 Liklik hap lain tasol bai kam bek,
Em liklik hap lain bilong Jekop, ol bai kam bek long God i Gat Strong.+
22 O Israel, maski ol manmeri bilong yu
Ol i planti olsem wesan bilong nambis,
Liklik hap lain tasol bilong ol bai kam bek.+
23 Tru tumas, Nambawan Bikpela, Jehova, bosman bilong bikpela lain ami, i tingting pinis long pinisim ol olgeta,
Na em bai mekim olsem long olgeta hap.+
24 Olsem na Nambawan Bikpela, Jehova, bosman bilong bikpela lain ami, i mekim dispela tok: “Yupela ol manmeri bilong mi i stap long Saion, yupela i no ken pret long Asiria, em man husat i bin paitim yupela long stik+ na apim stik wokabaut bilong em long mekim save long yupela olsem Isip i bin mekim long yupela.+ 25 Long wanem, liklik taim nau bikpela kros bilong mi bai pinis; na belhat bilong mi bai go stret long ol bilong bagarapim ol.+ 26 Jehova, bosman bilong bikpela lain ami, bai swingim wip long em,+ wankain olsem em i bin mekim taim em i daunim Midian long bikpela ston bilong Orep.+ Em bai holim stik na makim antap long solwara, em bai apim i go antap olsem em i bin mekim long Isip.+
27 Long dispela taim, hevi em i putim long solda bilong yupela bai raus,+
Na hap plang* em i putim long nek bilong yupela bai raus,+
Oil bai mekim na dispela hap plang i bruk.”+
28 Em i kamap pinis long Aiat;+
Em i abrusim pinis Mikron;
Na long Mikmas,+ em i lusim ol kago bilong em.
29 Ol i kam brukim pinis wara long hap we wara i no dip tumas;
Long nait, ol i slip long Geba;+
30 O pikinini meri bilong Galim, krai na singaut bikpela!
O Laisa, putim gut yau!
O tarangu Anatot!+
31 Matmena i ranawe pinis.
Ol manmeri bilong Gebim i go painim ples hait.
32 Nau long dispela de, em bai stop long Nop.+
Em i brukim han na soim long maunten bilong pikinini meri bilong Saion,
Em liklik maunten bilong Jerusalem.
33 Lukim! Bikpela, Jehova, bosman bilong bikpela lain ami,
I wok long katim ol brens bilong diwai na ol i pundaun na pairap bikpela tru;+
Em i katim ol longpela diwai,
Na ol diwai i stap antap tru, em i daunim ol i kam daun.
34 Em i katim ol bikpela diwai bilong bikbus long wanpela ain tul,*
Na wanpela strongpela man bai mekim na Lebanon i pundaun.