KRAI
א [Aleph]*
1 O Jerusalem, bipo em i wanpela taun i gat planti manmeri, tasol nau em i sindaun wanpis!+
Bipo em i gat planti manmeri moa winim ol arapela kantri, tasol nau em i kamap olsem wanpela wido meri!+
Bipo em i wanpela prinses namel long ol arapela provins, tasol nau em i kamap wanpela wokmeri nating!+
ב [Beth]
2 Em i save krai nogut tru long nait,+ na aiwara bilong em i save ran i go daun long wasket bilong em.
Ol man em i save poromanim, ol i no stap bilong mekim isi bel bilong em.+
Olgeta pren bilong em i givim baksait long em;+ ol i kamap birua bilong em.
ג [Gimel]
3 Juda i go olsem kalabus+ na ol i givim pen long em na mekim em i wok hat tru olsem sleiv.+
Em i stap namel long ol arapela kantri;+ em i no gat ples bilong malolo.
Ol birua bilong em i ranim em na holimpasim em taim em i karim bikpela hevi.
ד [Daleth]
4 Ol rot i go long Saion i krai sori, long wanem, i no gat man i wokabaut i kam long bikpela bung.+
Olgeta geit bilong em i stap nating;+ ol pris bilong em i bel hevi tru.
Ol yangpela meri* bilong em i wok long krai sori, na em i pilim nogut tru.
ה [He]
5 Nau ol birua bilong em i kamap bosman* bilong em; ol birua bilong em i no wari long wanpela samting.+
Jehova i givim em dispela hevi, long wanem, em i bin mekim planti sin.+
Ol birua i kisim ol pikinini bilong em i go kalabus.+
ו [Waw]
6 Biknem bilong pikinini meri bilong Saion i no stap moa.+
Ol hetman bilong em i olsem ol dia i no gat gutpela gras bilong kaikai,
Na bun bilong ol i slek tru taim ol i ranawe long ol birua.
ז [Zayin]
7 Taim em i bagarap i stap na em i no gat haus bilong i stap long en, Jerusalem i tingim
Olgeta samting i dia tumas em i bin i gat long bipo.+
Taim ol birua i kisim ol manmeri bilong em, i no gat man i helpim em,+
Ol birua i lukim em na ol i lap nogut tru long em i kisim bagarap.+
ח [Heth]
8 Jerusalem i mekim planti sin tru.+
Olsem na em i kamap olsem wanpela stingpela samting.
Bipo ol arapela lain i bin givim ona long em, tasol nau ol i lukim em i stap as nating na ol i rabisim em.+
Em i pilim pen+ na em i sem na haitim pes bilong em.
ט [Teth]
9 Doti bilong em i stap insait long sket bilong em.
Em i no tingting long bihain.+
Bagarap bilong em i nogut tru; i no gat man i mekim gut bel bilong em.
O Jehova, lukim pen na hevi mi karim, long wanem, birua bilong mi i litimapim tru em yet.+
י [Yod]
10 Birua i kisim olgeta gutpela gutpela samting bilong em.+
Jerusalem i bin lukim ol man bilong ol arapela kantri i go insait long ples holi bilong em,+
Em lain yu bin tambuim ol long bung wantaim ol manmeri bilong yu.
כ [Kaph]
11 Olgeta manmeri bilong em i bel hevi tru; ol i wok long painim bret.+
Ol i givim ol gutpela samting bilong ol i go bilong kisim kaikai, na bai ol i ken stap laip.
O Jehova, lukim, mi kamap olsem wanpela rabismeri.*
ל [Lamed]
12 Yupela ol lain i wokabaut long rot, ating yupela i ting dispela i samting nating, a?
Lukim!
Mi karim bikpela pen tru, i no gat wanpela i bin karim kain pen olsem long bipo,
Jehova i belhat nogut tru na mekim mi karim dispela pen.+
מ [Mem]
13 God i salim paia i kam daun na i kukim olgeta bun bilong mi.+
Em i taitim umben bilong holimpas lek bilong mi; em i fosim mi long tanim i go bek.
Em i mekim mi kamap wanpela meri i stap wanpis.
Oltaim mi pilim sik.
נ [Nun]
14 God i pasim olgeta sin bilong mi long nek bilong mi wankain olsem wanpela hap plang ol i pasim long nek bilong animal. Em i pasim dispela sin long han bilong em yet.
Em i putim ol long nek bilong mi, na strong bilong mi i pinis olgeta.
Jehova i putim mi long han bilong ol man em mi no gat strong long pait long ol.+
ס [Samekh]
15 Jehova i bin rausim olgeta strongpela man long mi.+
Em i singautim ol man long kam bung na pait long mi na bagarapim ol yangpela man bilong mi.+
Jehova i krungutim yangpela pikinini meri bilong Juda insait long tang ston bilong krungutim greip.+
ע [Ayin]
16 Ol dispela samting i mekim na mi krai;+ aiwara bilong mi i ran i go daun.
Na i no gat wanpela man i stap klostu bilong mekim gut bel bilong mi o givim nupela strong long mi.
Ol pikinini man bilong mi i bel hevi bikos ol birua i winim mi pinis.
פ [Pe]
17 Saion i opim tupela han bilong em;+ tasol i no gat man bilong mekim gut bel bilong em.
Jehova i tokim olgeta birua bilong Jekop i stap klostu long kam pait long Jekop.+
Ol birua i lukim Jerusalem olsem wanpela stingpela samting.+
צ [Tsade]
18 Pasin Jehova i mekim long mi i stret olgeta,+ long wanem, mi bin sakim ol tok* bilong em.+
Yupela olgeta manmeri, harim, na lukim pen mi karim.
Ol birua i kisim ol yangpela meri* bilong mi na ol yangpela man bilong mi i go kalabus.+
ק [Qoph]
19 Mi bin singautim ol man mi bin poromanim, tasol ol i givim baksait long mi.+
Long taun, ol pris na ol hetman bilong mi i dai,
Taim ol i wok long painim kaikai bilong ol i ken stap laip.+
ר [Resh]
20 O Jehova, lukim, mi karim bikpela hevi tru.
Insait* bilong mi i tanim tanim.
Bel bilong mi i bagarap olgeta, long wanem, mi bin bikhet tru.+
Long ausait, bainat i kilim i dai ol pikinini bilong mi;+ insait long haus, ol man i wok long dai tu.
ש [Shin]
21 Ol manmeri i bin lukim mi bel hevi; tasol i no gat wanpela i mekim gut bel bilong mi.
Olgeta birua bilong mi i bin harim tok long dispela bagarap i painim mi.
Ol i amamas, long wanem, yu givim dispela hevi long mi.+
Tasol wanpela taim bai kamap we yu bai mekim samting yu bin promis long mekim long ol.+ Na long dispela taim ol bai kamap wankain olsem mi.+
ת [Taw]
22 Mi laik yu mas tingim olgeta pasin nogut bilong ol, na yu mas mekim save tru long ol,+
Olsem yu bin mekim save tru long mi bikos long ol sin bilong mi.
Mi bel hevi moa yet, na bel bilong mi i bagarap.
א [Aleph]
2 Sori tru, belhat bilong Jehova i olsem klaut i karamapim pikinini meri bilong Saion!
Em i tromoi gutpela bilas bilong Israel long skai i kam daun long graun.+
Long taim God i belhat, em i no tingim ples bilong em long putim lek.+
ב [Beth]
2 Jehova i bagarapim olgeta haus bilong Jekop na i no sori liklik.
Em i belhat na brukim ol strongpela banis bilong pikinini meri bilong Juda.+
Em i daunim i go daun long graun na semim tru dispela kingdom+ na ol hetman bilong em.+
ג [Gimel]
3 Em i belhat nogut tru na brukim olgeta strong* bilong Israel.
Em i rausim rait han bilong em taim birua i kam bilong pait.+
Em i belhat long Jekop na belhat bilong em i olsem wanpela paia i wok long kukim olgeta samting i stap klostu.+
ד [Daleth]
4 Em i taitim banara bilong em olsem wanpela birua; rait han bilong em i redi long pait olsem wanpela birua;+
Em i wok long kilim i dai olgeta manmeri i dia tumas long ai bilong mipela.+
Em i kapsaitim belhat bilong em olsem paia+ i go insait long haus sel bilong pikinini meri bilong Saion.+
ה [He]
5 Jehova i kamap olsem wanpela birua;+
Em i daunim Israel.
Em i bagarapim olgeta taua bilong dispela meri;
Em i bagarapim olgeta strongpela banis bilong en.
Na em i mekim pikinini meri bilong Juda i bel hevi tru na krai sori moa yet.
ו [Waw]
6 Em i bagarapim tru haus bilong em+ olsem man i brukim haus win long gaden.
Em i pinisim tru* bikpela bung bilong em.+
Jehova i mekim na ol man long Saion i no tingim moa ol bikpela bung na ol sabat,
Na em i belhat nogut tru na em i sakim king na pris.+
ז [Zayin]
7 Jehova i sakim pinis alta bilong em;
Em i givim baksait pinis long ples holi bilong em.+
Em i putim ol banis bilong ol strongpela taua bilong Saion long han bilong birua.+
Ol i bin singaut bikmaus insait long haus bilong Jehova,+ wankain olsem long taim bilong bikpela bung.
ח [Heth]
8 Jehova i tingting pinis long bagarapim banis bilong pikinini meri bilong Saion.+
Em i pulim pinis rop bilong mesarim ol samting.+
Han bilong em i no bin surik bek long bringim bikpela bagarap.
Em i mekim na graun ol i hipim i go antap klostu long banis na banis i krai sori.
Na ol i no gat strong moa.
ט [Teth]
9 Ol geit bilong em i pundaun i go insait long graun.+
God i brukim na bagarapim ol ba bilong geit bilong em.
Na king na ol hetman bilong em i stap namel long ol kantri.+
I no gat man i bihainim lo;* ol profet bilong em tu i no lukim ol visen i kam long Jehova.+
י [Yod]
10 Ol hetman bilong pikinini meri bilong Saion i pasim maus tasol na sindaun i stap long graun.+
Ol i tromoi das long het bilong ol na ol i pasim ol laplap bilong sori.+
Na ol yangpela meri* bilong Jerusalem i daunim het bilong ol i go daun long graun.
כ [Kaph]
11 Mi krai moa yet na ai bilong mi i pen.+
Insait* bilong mi i tanim tanim.
Lewa bilong mi i bruk olgeta* bikos pikinini meri bilong* lain bilong mi i bagarap pinis,+
Na ol pikinini na ol bebi i airaun na pundaun long ol ples bung bilong taun.+
ל [Lamed]
12 Na ol i wok long askim ol mama bilong ol olsem, “Kaikai na wara i stap we?”+
Na ol i airaun na pundaun olsem man i kisim bagarap na i pundaun long ples bung bilong taun,
Na mama bilong ol i holim ol na isi isi laip bilong ol i lus.
מ [Mem]
13 O pikinini meri bilong Jerusalem, bai mi yusim wanem eksampel bilong soim bagarap i painim yu?
O bai mi tok yu wankain olsem husat?
O yangpela pikinini meri bilong Saion, bai mi inap skelim yu wantaim husat na bai mi ken strongim bel bilong yu?
Bagarap bilong yu i bikpela tru olsem solwara.+ Na husat inap mekim yu i kamap orait gen?+
נ [Nun]
14 Ol visen em ol profet bilong yu i lukim na i tokim yu long en, i giaman na i no gat as bilong en,+
Na ol i no tokaut long rong bilong yu bilong helpim yu long abrusim kalabus,+
Tasol ol i wok long tokim yu long ol giaman visen na ol i giamanim yu.+
ס [Samekh]
15 Ol man i wokabaut long rot i lukim yu na ol i tok bilas long yu na paitim han bilong ol.+
Ol i kirap nogut na wisil+ na ol i tantanim het bilong ol long pikinini meri bilong Jerusalem, na ol i tok:
“Ating em dispela taun tasol ol man i bin kolim nambawan taun tru na i naispela moa, a? Em dispela taun tasol olgeta manmeri bilong graun i laikim tumas, a?”+
פ [Pe]
16 Olgeta birua bilong yu i rabisim yu.
Ol i wisil na kaikaim tit bilong ol na tok: “Mipela i bagarapim em pinis.+
Mipela i wok long wetim dispela de long kam!+ Na nau, em i kamap pinis na mipela yet i bin lukim!+
ע [Ayin]
17 Dispela samting Jehova i bin tingting long mekim nau em i mekim pinis;+ em i mekim samting em i bin tok long mekim,+
Em samting bipo yet em i bin tok long en.+
Em i bagarapim tru dispela taun na em i no sori long em.+
Em i bin kirapim birua bilong yu long daunim yu na birua i amamas long dispela; em i mekim ol birua bilong yu i kamap strong moa.
צ [Tsade]
18 O banis bilong pikinini meri bilong Saion, ol manmeri i bel hevi tru na ol i krai long Jehova.
Long san na nait aiwara bilong ol i ron i go daun olsem bikpela wara i tait.
Yu no ken malolo liklik, no ken larim ai bilong yu* i malolo.
ק [Qoph]
19 Yu kirap! Singaut long nait, long taim ol wasman i stat long mekim wok.
Na long ai bilong Jehova, kamapim olgeta bel hevi bilong yu olsem yu kapsaitim wara.
Tingim laip bilong ol pikinini bilong yu na apim han bilong yu long God.
Ol dispela pikinini i hangre na ol i airaun na pundaun long olgeta kona bilong strit.*+
ר [Resh]
20 O Jehova, lukluk i kam na lukim dispela lain manmeri bilong yu em yu bin mekim nogut tru long ol.
Ating ol meri bai wok yet long kaikaim ol pikinini ol i bin karim, a?+
Na bai ol i wok yet long kilim i dai ol pris na ol profet long ples holi bilong Jehova, a?+
ש [Shin]
21 Ol liklik mangi na ol lapun man i dai na slip nabaut long ol rot.+
Ol yangpela meri* na ol yangpela man i dai long bainat.+
Long taim yu belhat, yu bin kilim ol i dai; yu pinisim ol na yu no sori long ol.+
ת [Taw]
22 Yu singautim ol samting bilong pretim mi i kam long olgeta hap, olsem bikpela lain manmeri i kam long taim bilong bikpela bung.+
Long de bilong belhat bilong Jehova, i no gat man inap ranawe o abrusim bagarap;+
Ol pikinini mi bin karim na mekim bikpela long ol, birua bilong mi i bin pinisim ol tru.+
א [Aleph]
3 Mi dispela man husat i bin lukim pen na hevi i kamap bikos God i belhat tru na em i bin mekim save long mipela.
2 Em i rausim mi na mekim mi wokabaut long tudak, na mi no wokabaut long lait.+
3 Tru tumas, long de olgeta, han bilong em i mekim save long mi.+
ב [Beth]
4 Em i mekim bodi na skin bilong mi i go slek tru;
Em i brukim ol bun bilong mi.
5 Em i wokim banis i raunim mi; em i mekim ol gras i gat posin i gro raunim mi,+ na mekim kain kain hevi i raunim mi.
6 Em i fosim mi long sindaun long ol ples tudak, olsem ol man em bipo tru ol i bin dai pinis.
ג [Gimel]
7 Em i wokim wol na banisim mi, olsem na mi no inap ranawe;
Em i kisim ol hevipela kopa sen na pasim mi long en.+
8 Na taim mi krai long em i helpim mi, em i pasim yau long prea bilong mi.+
9 Em i pasim rot bilong mi long ol traipela ston ol i bin katim;
Em i mekim na ol rot bilong mi i hatwok tru long wokabaut gut long en.+
ד [Daleth]
10 Em i wet long bagarapim mi olsem wanpela bea, na olsem wanpela laion i hait na wet i stap bilong holimpasim abus.+
11 Em i subim mi i go lusim rot na em i brukbrukim nabaut bodi bilong mi i go liklik liklik;*
Em i mekim na mi stap nogut tru.+
12 Em i taitim banara bilong em na makim spia long mi bilong sutim mi.
ה [He]
13 Em i kisim ol spia* long paus bilong em na sutim ol kidni bilong mi.
14 Olgeta manmeri i wok long lap long mi, na long de olgeta ol i wok long singsing na tok bilas long mi.
15 Em i givim mi ol samting i pait na pulapim mi wantaim wemwut.*+
ו [Waw]
16 Em i brukim tit bilong mi long ol liklik liklik ston;
Em i subim mi i go daun long sit bilong paia.+
17 Yu tekewe bel isi long mi; mi lusim tingting pinis long ol gutpela samting.
18 Olsem na mi tok: “Biknem bilong mi na ol samting mi ekspektim long Jehova i pinis.”
ז [Zayin]
19 Tingim pen na hevi bilong mi na taim mi no gat hap bilong stap long en,+ na tingim taim mi bin kaikai wemwut* na kaikai i gat posin.+
20 Yu bai tingim mi na bai yu lindaun na helpim mi.+
21 Mi tingim gen dispela long bel bilong mi; olsem na mi bai wet i stap.+
ח [Heth]
22 Jehova i gat gutpela pasin laikim,* olsem na yumi no bagarap olgeta,+
Pasin marimari bilong em i no inap pinis.+
23 Marimari bilong em i save kamap nupela long olgeta moning;+ oltaim yumi inap tru long trastim em.+
24 Mi bin tok olsem: “Jehova em skel bilong mi,+ olsem na mi bai wetim em i stap.”+
ט [Teth]
25 Jehova i save mekim gutpela pasin long man i bilip na wetim em,+ na long man i wok long painim em.+
26 I gutpela long man i stap isi na wet+ long Jehova i kisim bek em.+
27 I gutpela long man i karim hevi long taim em i stap yangpela yet.+
י [Yod]
28 Taim God i larim hevi i painim man, orait dispela man i mas stap wanpis na pasim maus tasol.+
29 Em i mas daunim tru em yet na putim pes bilong em i go daun long das;+ ating gutpela samting inap kamap.+
30 Em i ken tanim wasket bilong em i go long man i laik paitim em; em i ken larim man i toknogutim em.
כ [Kaph]
31 Long wanem, Jehova i no inap givim baksait long yumi inap oltaim oltaim.+
32 Em i mekim yumi stap bel hevi, tasol em bai mekim tu pasin marimari long yumi, olsem i stret wantaim gutpela pasin laikim* bilong em i pulap tru.+
33 Long wanem, long bel bilong em, em i no laik givim hevi o mekim ol man i stap bel hevi.+
ל [Lamed]
34 Man i krungutim olgeta kalabusman bilong graun aninit long lek bilong em,+
35 Man i pasim narapela man long kisim stretpela kot long ai bilong God Antap Tru,+
36 Man i giaman na paulim kot bilong narapela man
—Jehova i no save orait long ol dispela kain pasin.
מ [Mem]
37 Sapos Jehova i no tok, orait husat inap tok na samting i kamap?
38 Ol samting nogut na ol gutpela samting wantaim i no save kam aut
Long maus bilong God Antap Tru.
39 Wai na man* i save komplein long ol samting nogut sin bilong em i kamapim?+
נ [Nun]
40 Yumi mas skelim gut olgeta pasin na wokabaut bilong yumi,+ na yumi mas go bek long Jehova.+
41 Yumi mas pilim tru long bel na apim han wantaim na beten long God long heven,+ olsem:
42 “Mipela i bin mekim sin na bikhet,+ na yu no fogivim mipela.+
ס [Samekh]
43 Yu bin belhat long mipela na yu pasim rot bilong mipela;+
Yu bin ranim mipela na kilim mipela i dai na yu no sori liklik.+
44 Yu pasim rot i go long yu wantaim klaut, olsem na beten bilong mipela i no inap go long yu.+
45 Yu mekim mipela i kamap olsem ol pipia na olsem rabis samting namel long ol manmeri.”
פ [Pe]
46 Olgeta birua bilong mipela i rabisim mipela.+
47 Olgeta taim ol samting i kamap bilong mekim mipela i pret nogut tru na mekim mipela i pundaun,+ na mipela i bagarap olgeta na stap nogut tru.+
48 Mi lukim pikinini meri bilong lain bilong mi i stap nogut tru, na aiwara i kapsait i kam daun olsem wara long ai bilong mi.+
ע [Ayin]
49 Oltaim aiwara i ran i kam daun long ai bilong mi, na mi no malolo liklik long krai,+
50 I go inap Jehova long heven i lukluk i kam daun na lukim mipela.+
51 Mi lukim ol pikinini meri bilong biktaun bilong mi i painim taim nogut, na mi bel hevi moa yet.+
צ [Tsade]
52 Mi no gat asua, tasol ol birua bilong mi i laik kilim mi i dai na ol i ranim mi olsem man i ranim pisin.
53 Ol i tromoi mi i go daun long wanpela bikpela hul bilong pinisim laip bilong mi; ol i wok long tromoi ston long mi.
54 Wara i karamapim het bilong mi, na mi tok: “Mi pinis nau!”
ק [Qoph]
55 Mi stap long as bilong dispela bikpela hul na mi singaut long nem bilong yu, O Jehova.+
56 Harim singaut bilong mi; no ken pasim yau bilong yu long singaut bilong mi long kisim helpim.
57 Yu bin kam klostu long mi long taim mi singaut long yu. Yu bin tok: “Yu no ken pret.”
ר [Resh]
58 O Jehova, yu bin sambai long mi long kot, na yu bin kisim bek mi na mi stap gut.+
59 O Jehova, yu bin lukim ol dispela man i mekim nogut long mi; plis, helpim mi long winim kot.+
60 Yu bin lukim ol i birua moa yet long mi, na yu lukim ol plen ol i mekim long bagarapim mi.
ש [Sin] o [Shin]
61 O Jehova, yu bin harim ol tok bilas bilong ol, na ol plen ol i mekim long bagarapim mi.+
62 Na yu harim long maus bilong ol birua bilong mi, ol i toktok isi isi namel long ol yet long de olgeta bilong bagarapim mi.
63 Lukim ol! Maski ol i sindaun o sanap, ol i save tok bilas long mi long ol singsing bilong ol.
ת [Taw]
64 O Jehova, yu bai bekim pe i stret long pasin ol i mekim.
65 Yu bai mekim tok long bagarap i ken painim ol long rot bilong mekim bel na tingting bilong ol i strong olgeta.
66 Jehova, yu bai belhat tru long ol na ranim ol na pinisim ol olgeta, na bai i no gat wanpela i stap long graun.
א [Aleph]
4 Sori tru, gutpela gol i save lait, nau em i no lait moa!+
Sori tru, ol ston bilong ples holi+ i slip nabaut long olgeta kona bilong strit!*+
ב [Beth]
2 Bipo ol pikinini man bilong Saion, ol i dia tumas olsem gutpela gol,
Tasol sori tru, nau ol i kamap olsem ol sospen graun,
Em hanwok bilong man bilong wokim sospen graun!
ג [Gimel]
3 Ol jekol* i save givim susu long ol pikinini bilong ol,
Tasol pikinini meri bilong lain bilong mi i mekim pasin nogut tru,+ wankain olsem ol ostris long ples drai nating.+
ד [Daleth]
4 Tang bilong bebi i pas long maus bilong em bikos em i nek drai.
Ol liklik pikinini i raun na askim long bret,+ tasol i no gat man i givim bret long ol.+
ה [He]
5 Ol manmeri em bipo ol i save kaikai ol gutpela kaikai, nau ol i hangre tru na slip nabaut long ol strit.+
Ol man em bipo ol i save werim ol klos i gat bikpela pe,+ nau ol i slip antap long sit bilong paia.
ו [Waw]
6 Panismen* bilong pikinini meri bilong lain bilong mi i bikpela tru winim panismen em Sodom i bin kisim long ol sin bilong em.+
Kwiktaim em i pundaun, na i no gat han bilong helpim em.+
ז [Zayin]
7 Ol Nasarait*+ bilong em i klin tru olsem waitpela sno, na i wait moa winim milk.
Bodi bilong ol i ret moa winim ol korol; lukluk bilong ol i lait olsem ston sapaia ol i bin polisim.
ח [Heth]
8 Tasol nau lukluk bilong ol i kamap tudak moa winim blakpela sit bilong paia;
Taim ol i wokabaut long rot, ol man i no luksave moa long ol.
Skin bilong ol i go liklik na i pas long ol bun bilong ol+ na i kamap olsem diwai i drai olgeta.
ט [Teth]
9 Ol man i dai long bainat, ol i winim ol man i dai long bikpela hangre,+
Ol man em isi isi strong bilong ol i pinis, i olsem bainat i sutim ol, bikos kaikai i sot long gaden.
י [Yod]
10 Ol meri i gat pasin sori, long han bilong ol yet ol i boilim ol pikinini bilong ol.+
Ol i kaikaim ol dispela pikinini long taim ol i krai sori long bagarap i painim pikinini meri bilong lain bilong mi.+
כ [Kaph]
Na em i kirapim paia long Saion na paia i kukim ol faundesen bilong taun olgeta.+
ל [Lamed]
12 Ol king na olgeta manmeri bilong graun i no bilip
Olsem ol birua inap kam insait long banis bilong Jerusalem.+
מ [Mem]
13 Dispela samting i kamap, long wanem, ol profet bilong em i bin mekim sin na ol pris bilong em i bin mekim rong,+
Ol i kapsaitim blut bilong ol stretpela manmeri insait long em.+
נ [Nun]
14 Ol i wokabaut nabaut long ol rot olsem ol aipas.+
Blut i pas long ol na ol i kamap doti tru,+
Olsem na i no gat wanpela man i laik tatsim klos bilong ol.
ס [Samekh]
15 Ol manmeri i singaut long ol olsem: “Yupela go! Yupela i no klin! Yupela go! Yupela go! No ken tatsim mipela!”
Long wanem, ol profet na ol pris i no gat haus moa na ol i wok long raun raun nabaut.
Ol manmeri bilong ol arapela kantri i tok olsem: “Ol i no ken stap hia wantaim yumi.*+
פ [Pe]
16 Jehova yet i rausim ol i go nabaut;+
Em bai no inap tingim ol moa.
Ol man bai no rispektim ol pris moa,+ na ol bai no inap tingim moa ol lapun.”+
ע [Ayin]
17 Ai bilong mipela i pen long lukluk nating na i no gat wanpela i helpim mipela.+
Mipela i wok long painim helpim long wanpela kantri we i no inap helpim mipela.+
צ [Tsade]
18 Ol birua i putim was long bagarapim mipela,+ olsem na mipela i no inap wokabaut long ol pablik ples.
Pinis bilong mipela i kam klostu; ol de bilong mipela i sot pinis, long wanem, pinis bilong mipela i kamap nau.
ק [Qoph]
19 Ol man i wok long ranim mipela, ol i spit moa winim ol tarangau i flai long skai.+
Ol i ranim mipela long ol maunten; ol i hait long ples nating bilong holimpasim mipela.
ר [Resh]
20 Dispela man em Jehova i bin anointim,* em i olsem win mipela i save pulim long nus,+ ol i holimpasim em insait long traipela hul,+
Mipela i bin tok long dispela man olsem: “Yumi bai stap gut aninit long lukaut bilong em taim yumi sindaun namel long ol manmeri bilong ol arapela kantri.”
ש [Sin]
21 O pikinini meri bilong Idom, yu belgut na amamas+ olsem bipo yu save stap long graun bilong Us.
Tasol was gut, yu tu bai dring long dispela kap,+ na yu bai spak na rausim klos bilong yu na stap skin nating.+
ת [Taw]
22 O pikinini meri bilong Saion, panismen yu bin kisim long ol rong bilong yu i pinis nau.
Em bai no inap kisim yu i go olsem kalabusman gen long narapela ples.+
Tasol em bai tingim ol rong bilong yu, O pikinini meri bilong Idom.
Em bai kamapim ples klia ol sin bilong yu.+
5 O Jehova, plis tingim ol samting nogut i bin kamap long mipela.
Lukim, mipela i sem moa yet long ai bilong ol arapela manmeri.+
2 Ol man mipela i no save long ol, ol i kisim graun bilong mipela, na ol man bilong narapela ples i kisim ol haus bilong mipela.+
3 Mipela i kamap olsem ol pikinini i no gat papa; ol mama bilong mipela i stap olsem ol wido.+
4 Bipo ol paiawut na wara i bilong mipela yet. Tasol nau, sapos mipela i laik dring wara na kisim paiawut, mipela i mas baim.+
5 Ol man i ranim mipela, ol i kam klostu pinis;
Mipela i taiet tru, tasol ol i no larim mipela i malolo.+
6 Mipela i putim han i go aut long Isip+ na Asiria,+ bilong kisim sampela bret moa bilong kaikai.
7 Ol tumbuna papa bilong mipela i bin mekim sin ol i no stap moa, tasol mipela i mas karim hevi long ol rong ol i bin mekim.
8 Nau ol wokboi i bosim mipela; i no gat man bilong kisim bek mipela long han bilong ol.
9 Mipela inap lusim laip bilong mipela taim mipela i go painim bret,+ bikos ol man i holim bainat i stap long ples nating.
10 Mipela i hangre moa yet, olsem na skin bilong mipela i kamap hat nogut tru olsem hatpela aven.+
11 Ol i reipim ol maritmeri long Saion na ol yangpela meri* long ol taun bilong Juda.+
12 Ol i hangamapim ol hetman bilong mipela long wanpela han,+ na ol i no soim rispek long ol lapun.+
13 Ol yangpela man i karim ol ston bilong wilwilim wit, na ol liklik mangi i karim ol bandel paiawut i hevi tumas.
14 Ol lapun man i no stap moa long ol geit bilong taun;+ ol yangpela man i no pilaim musik moa.+
15 Amamas bilong mipela i pinis olgeta; mipela i lusim pasin bilong danis na mipela i krai sori tasol.+
16 Kraun i stap long het bilong mipela i pundaun pinis. Sori tru long mipela, bikos mipela i bin mekim sin!
17 Olsem na lewa bilong mipela i pen,+
Ol dispela samting i kamap long mipela, olsem na ai bilong mipela i no inap lukluk gut,+
18 Maunten Saion i stap nating,+ olsem na ol foks* i raun nabaut long en.
19 Tasol yu, O Jehova, yu sindaun long sia king bilong yu inap oltaim.
Wok king bilong yu i bilong oltaim oltaim.+
20 Wai na yu lusim tingting long mipela inap oltaim na yu givim baksait long mipela inap longpela taim tru?+
21 Plis bringim mipela i kam bek long yu, O Jehova, na mipela bai redi tasol long kam bek long yu.+
Na yu ken mekim mipela i stap gut gen olsem bipo.+
22 Tasol yu givim baksait olgeta long mipela.
Na yu belhat moa yet long mipela.+
Sapta 1-4 em ol singsing bilong krai sori i bihainim alfabet bilong Hibru.
Tok Hibru i makim meri i no bin slip wantaim man.
Hib., “het.”
Long hia Jerusalem i olsem wanpela meri.
Hib., “maus.”
Tok Hibru i makim meri i no bin slip wantaim man.
Hib., “Ol bel rop.”
Hib., “olgeta kom.”
O, “bagarapim.”
O, “instraksen.”
Tok Hibru i makim meri i no bin slip wantaim man.
Hib., “Ol bel rop.”
Hib., “liva bilong mi i kapsait i go daun long graun.”
Em i wanpela stail bilong raitim poem we i makim ol manmeri, na ating i kamapim sori o i pilim hevi bilong narapela.
Hib., “pikinini meri bilong ai bilong yu.”
Hib., “long het bilong olgeta strit.”
Tok Hibru i makim meri i no bin slip wantaim man.
O ating, “mekim mi i stap nating.”
Hib., “ol pikinini man.”
Wemwut em wanpela kain gras i gat posin na i pait.
Wemwut em wanpela kain gras i gat posin na i pait.
Lukim “Gutpela pasin laikim” long Dikseneri.
Lukim “Gutpela pasin laikim” long Dikseneri.
Hib., “man i gat laip.”
Hib., “long het bilong olgeta strit!”
Jekol em wanpela kain wel dok.
Hib., “Rong.”
Wanpela man o meri husat i bin promis long givim em yet long God. Lukim “Nasarait” long Dikseneri.
O, “stap long hia olsem ol man bilong narapela ples.”
Lukim “Anointim” long Dikseneri.
Tok Hibru i makim meri i no bin slip wantaim man.
Em wanpela animal i kain olsem dok.