Ol Bikpela Tok Bilong Baibel

Bihain long 4026 B.C.E.

Satan i sutim tok long Jehova olsem em i nogat rait long bosim ol man na em i no bosim ol man long stretpela pasin. Jehova i tok promis long em bai kirapim bek wanpela “pikinini,” na dispela pikinini bai krungutim het bilong snek, em Satan. (Stat 3:1-5, 15) Tasol Jehova i larim sampela haptaim i lus na bai ol man i ken bosim wokabaut bilong ol yet aninit long wok bos bilong Satan.

1943 B.C.E.

Jehova i tok promis long Abraham olsem dispela pikinini bai kamap long lain tumbuna “pikinini” bilong em.—Stat 22:18.

Bihain long 1070 B.C.E.

Jehova i tokim King Devit na pikinini bilong em Solomon olsem “pikinini” bilong promis bai kamap long lain tumbuna pikinini bilong ol.—2 Samuel 7:12, 16; 1 King 9:3-5; Aisaia 9:6, 7.

29 C.E.

Jehova i tokaut olsem Jisas em dispela “pikinini” husat bai kisim ples bilong Devit na sindaun long sia king bilong en.—Galesia 3:16; Luk 1:31-33; 3:21, 22.

33 C.E.

Satan i mekim ol samting bilong pasim dispela “pikinini” bilong promis taim em i kirapim ol man long kilim Jisas i dai. Jehova i kirapim bek Jisas na em i go long heven. God i amamas long pe Jisas i givim na dispela i opim rot long God i ken lusim rong bilong ol lain tumbuna pikinini bilong Adam, na ol inap kisim laip oltaim.—Stat 3:15; Aposel 2:32-36; 1 Korin 15:21, 22.

Klostu long 1914 C.E.

Jisas i tromoi Satan i kam daun long graun. Satan i save olsem em i gat sotpela taim tasol long i stap.—Revelesen 12:7-9, 12.

Bihain

Jisas bai larim Satan i stap kalabus inap 1,000 yia na bihain em bai krungutim het bilong Satan, dispela i makim olsem em bai pinisim Satan olgeta. Ol samting Jehova i tingting pinis long mekim long graun na long ol manmeri bai kamap tru, em bai stretim bek gutnem bilong em na kamapim olsem pasin bilong em long bosim ol man i stret.—Revelesen 20:1-3, 10; 21:3, 4.