Mipela i Meri Bilong Pait Wantaim Bulmakau
OL DISPELA bulmakau man i traipela samting tru. Hevi bilong ol wan wan em inap olsem 450 kilogram samting. Mi wantaim tupela sista bilong mi, mipela i save pait wantaim ol yangpela bulmakau man, tasol skin bilong ol i bikpela pinis, na kom bilong ol i traipela nogut stret. Tru mipela inap tok olsem mipela i no laik pait wantaim ol dispela traipela bulmakau, tasol sapos mipela i mekim olsem, ol dispela bikpela lain i bung bilong lukim mipela ol i tromoi mani pinis bilong kam insait na lukim mipela i pait wantaim ol bulmakau, na sapos mipela i no mekim, bai ol i bel hevi o kros samting. Olsem na mipela i wokabaut i go insait long ples bilong pait wantaim bulmakau.
Ating yu kirap nogut long mipela 3-pela meri i mekim dispela wok bilong pait wantaim ol bulmakau, a? Ating yu laik save, wanem samting i bin kirapim mipela long mekim olsem? Mipela i no mekim bilong kamapim tingting olsem ol meri inap tru long mekim dispela wok, wankain olsem ol man i save mekim, nogat. Em i wanpela wok mani bilong mipela.
Taim mipela i yangpela yet, mipela i lusim ples bilong mipela long hap bilong not long Spen na mipela i go long biktaun Madrit bilong painim wok. Mipela painim painim, nogat. Wanpela wantok bilong mipela bipo em i man bilong pait wantaim ol bulmakau, em i tokim mipela long kisim dispela kain wok. Olsem na taim mipela i no inap kisim wanpela wok, mipela i bihainim tok bilong em. Mipela i kisim wanpela nem olsem Las Meigas (olsem Marilameri), long wanem bai ol man inap save long as ples bilong mipela long Spen, na tu, mipela i laik mekim long ol bulmakau olsem marilaman i save mekim, na mipela inap winim ol. Orait mipela i wok strong long lain inap tupela yia, na nau mipela i kirap mekim tru dispela wok bilong pait wantaim ol bulmakau.
Bagarap na Dai Inap Painim Mipela
Mipela i save pait wantaim ol yangpela bulmakau i gat 2-pela o 3-pela krismas, na ol i no gat bikpela strong wankain olsem ol bulmakau i bikpela pinis. Tasol ol i gat bikpela strong, na ol inap tanim nabaut hariap tru. Olsem na mipela inap tru long kisim bagarap, wankain olsem ol man i save pait wantaim ol bulmakau i bikpela pinis. Tasol mipela i no kisim bikpela bagarap—ol liklik bagarap tasol i painim mipela, olsem wanpela bun long lek daunbilo i bruk, na bulmakau i katim sampela hap skin long lek bilong mipela, na kain liklik bagarap olsem. Na wan wan taim mipela i mas pait wantaim ol traipela bulmakau i bikpela pinis, tasol mipela i no kisim bagarap liklik, nogat.
Insait long yia, i gat ol mun bilong mekim ol dispela pait. Planti taim mipela i save pait 4-pela taim long moningtaim na 4-pela taim long apinun. Bihain mipela i no hatwok long kilim i dai bulmakau em mipela i pait long en—em i olsem samting nating long mipela. Insait long 8-pela yia mipela 3-pela i kilim i dai 1,500 bulmakau long ol narapela narapela hap bilong Spen na Potugal na Frans. Bikpela tingting bilong mipela, em mipela i laik kisim wanpela kontrak bilong i go long Saut Amerika. Long dispela hap bai mipela i kisim bikpela mani moa yet long mekim dispela wok, na bai mipela inap baim wanpela bikpela hap graun na lukautim ol bulmakau bilong pait na baim i go long ol man bilong mekim dispela wok.
Pastaim mipela i bin kisim dispela wok long wanem mipela i sot long mani, tasol bihain mipela i kisim amamas long raun long planti hap, na mipela i kisim biknem na bikpela mani long dispela rot bilong pait wantaim bulmakau, na dispela i mekim na mipela i amamas long mekim dispela wok, maski mipela inap kisim bagarap long en. Tru sampela taim mipela i harim olsem wanpela man bilong pait wantaim bulmakau em i bin kisim bagarap na em i dai, na inap sampela de mipela i pret na tingting planti, nogut mipela tu i kisim bagarap. Tasol kwiktaim dispela pret i pinis na mipela i redi long pait gen. Taim mipela laik i go insait long ples bilong bungim bulmakau na mekim pait, mipela i save tok, “Yumi mas pait yet i go!”
Narapela Kain Pait
Orait, long 1984 wanpela samting i kamap na tingting bilong mi wantaim tupela sista bilong mi, em Milagros na Elda, i senis na mipela i kirap skelim laik bilong mipela na wok mani bilong mipela. Samting i kirapim mipela long mekim olsem, em mipela tripela wantaim i kirap stadi long Baibel wantaim ol Witnes Bilong Jehova. Mipela i amamas tru long lainim ol tok bilong Baibel long Kingdom bilong God na long tok promis bilong God long kamapim Paradais long graun long bihain. Taim mipela i kisim save long ol dispela samting, em nau, mipela i mas skelim wanpela bikpela samting na i hatwok long mipela i mekim olsem. Mipela i mas skelim wok mani bilong mipela—em i stret wantaim ol tok bilong Baibel mipela i lainim, o olsem wanem?
Bihain tupela samting i kamap ples klia na mipela i save mipela i no inap holim moa dispela wok bilong mipela long pait wantaim bulmakau. Wanpela samting, em mipela i lukim pasin bilong ol manmeri i sindaun lukim dispela pait—bel bilong ol i kirap tru na ol i singaut singaut na i laik lukim blut i ron, kain olsem ol man bilong Rom i bin mekim bipo long ol bikpela pilai bilong ol. Mipela i tingting, i no stret long ol meri Kristen i stap long kain ples olsem.
Namba tu samting em olsem: Klostu olgeta man bilong pait wantaim ol bulmakau ol i save singaut long wanpela “santu” bilong lukautim ol, long wanem planti ol i bilong lotu Katolik. Long rum slip bilong ol long haus pasindia, mi bin lukim ol i putim wanpela liklik alta bambai ol i ken mekim beten; ol i bilip olsem dispela bai helpim ol long abrusim bagarap taim ol i pait wantaim bulmakau. Tasol nau mipela i save, i no stret long mipela i beten askim Jehova long lukautim mipela taim mipela i mekim dispela wok, long wanem mipela i mekim nogut long ol animal na givim bikpela pen long ol, na long laik bilong mipela yet mipela i putim skin bilong mipela long rot bilong kisim bagarap bambai mipela i ken kisim bikpela mani na amamasim ol manmeri i bung bilong lukim mipela. Mipela i tingim ol dispela samting na nau mipela i pasim tok long lusim dispela wok bilong pait wantaim bulmakau.
Em nau, taim mipela i pasim tok pinis long mekim olsem, dispela kontrak mipela i bin wet long kisim bilong i go mekim dispela wok long Saut Amerika, em i kamap pinis long mipela. Nau mipela i gat rot bilong kamap manimeri stret! Tasol mipela i no senisim tingting bilong mipela. Mipela i strong yet long lusim dispela wok. Olsem na long Oktoba 3, 1985, mipela i mekim laspela wok bilong mipela long pait wantaim bulmakau. Orait wanpela yia bihain long dispela, mipela i kisim baptais, na nau mipela i taitim bun na wok strong long mekim narapela kain pait, em pait bilong spirit bilong holimpas bilip.—1 Timoti 6:12.
Mipela tripela sista i wok wantaim yet, tasol nau mipela i wok mani long wanpela haus kaikai. Mipela i amamas tru long mipela i painim pinis wanpela gutpela samting moa yet, winim biknem na bikpela mani—em mipela i pas gut wantaim dispela God i gat olgeta strong, na mipela inap tingim na wetim gutpela taim bai kamap bihain. Mipela i tingting long dispela nupela taim God bai kamapim, em mipela inap long mekim gut long ol bulmakau man na holim ol, maski ol i wel long bus; long wanem, long dispela taim bihain olgeta man na animal “bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long [Jehova]. Dispela save bai inapim olgeta hap graun olsem solwara i inapim mak bilong en olgeta.” (Aisaia 11:9)—Em stori bilong Pilar Vila Cao.
[Piksa bilong Pilar, Milagros, na Elda Vila Cao long pes 22]
[Piksa bilong Pilar, Milagros, na Elda Vila Cao long pes 23]