Ol Samting i Senis
OL I TOK, inap long yia 2000 bai i gat planti man moa i kamap long graun, wankain olsem ol man i stap long Saina. Planti bilong ol bai sindaun long ol biktaun. Ol i tok, long 15 yia bihain, ol man i sindaun long ol biktaun bai planti tumas, winim ol man i sindaun long hap bilong bus. Wanpela nius (International Wildlife) i tok, “ol man i go pulap pulap long ol biktaun na ol dispela biktaun i go bikpela bikpela, na dispela i save bagarapim win na wara na pinisim ol hap graun i gutpela bilong wokim gaden, na i save pinisim ol bus tu, long wanem, ol i mas katim ol diwai bilong kisim paiawut na wokim ol haus samting; na ol kain kain pasin nogut na pasin raskol na ol sik i save kamap bikpela long ol dispela biktaun, na ol manmeri i pilim olsem ol i no gat rot moa bilong helpim sindaun bilong ol.”
Long hap bilong Amerika long nau, planti liklik taun na ples i gat wan wan manmeri tasol i sindaun long en. Long hap bilong wes long Amerika, long wanpela traipela hap graun (Great Plains) i gat planti liklik taun i stap, tasol nau planti ol i stap nating na i no gat man long en. Long Not Dakota tu, planti manmeri ol i lusim pinis ol ples, na sampela i gat wankain tingting olsem i kamap long wanpela nius (The Wall Street Journal) i tok, dispela traipela hap graun (Great Plains) bai kamap olsem ples kunai gen olsem long bipo, taim ol fama i no sindaun yet long en. Bilong wanem i olsem? Sampela saveman i tok, ol i no lukautim gut graun, na ol i sot long wara, na sampela taim i no gat ren inap longtaim, na sampela taim ol kaikai samting ol fama i kamapim, pe bilong en i go daun olgeta.
Em nau, ol dispela hevi i kamapim klia olsem ol man i no bosim gut dispela graun, na ol i no bosim gut ol man tu. Baibel i tok stret, olsem: “Mipela man i no inap bosim wokabaut bilong mipela yet.” (Jeremaia 10:23) Tasol Man bilong wokim yumi em inap tru long kamapim wanpela gavman bilong bosim gut graun. Em i tok promis pinis olsem liklik taim nau na olgeta hap bilong graun bai kamapim gutpela kaikai, na ol man bilong i stap isi ol bai sindaun long en na wokim ol gaden samting, na pasin bilong bagarapim graun i no ken i stap moa.—Buk Song 67:6; 72:16; Aisaia 65:21-23.