Ol Pikinini Afganistan i Laik Lukim Wanpela Fam
LONG nau i gat kain kain nupela samting i kamap na ol taun i kamap bikpela, olsem na planti pikinini i no save lukim ol fam na ol kain kain animal bilong en. Na ol pikinini Afganistan ol i no bin lukim wanpela fam kain olsem bilong Amerika. Wanpela lain pikinini ol i no gat papamama, na pait long hap bilong ol i bin bagarapim tru ples, ol i amamas tru long i go lukim Wastaua Fam long Walkil, em olsem 2-pela aua samting sapos yu draiv long ka, lusim Nu Yok na i go long hap bilong not.
Ol dispela pikinini i no save long tok Inglis, olsem na i gat sampela man bilong tanim tok ples Afgan i bin kam tu, bambai ol i ken helpim ol pikinini long save long olgeta samting i stap long dispela gutpela fam na ol haus faktori samting bilong wokim ol buk em ol Witnes Bilong Jehova yet i wok long en. Winim wan tausen manmeri ol i wok olsem volantia long ol Wastaua Fam, na ol i save slip long dispela ples.
Bilong kirapim dispela raun bilong ol, pastaim ol i dring ti na kaikai biskit samting, na bihain ol i go lukim ol traipela masin bilong wokim ol Wastaua na Kirap! long 4-pela kala. Wanpela man bilong lukautim ol na soim ol samting long ol em i tok: “Mi kirap nogut long ol i amamas long lukim ol dispela traipela haus faktori samting, long wanem, laik tru bilong ol em bilong lukim ol animal long fam.”
Na em i tok moa: “Bihain liklik ol i go lukim ol pikinini bulmakau, na ol i holim ol animal na rabim han long ol na givim kaikai long ol tu. Em i gutpela samting tru bilong lukim—ol pikinini i ran i go kisim ol grinpela gras samting bilong givim long ol dispela animal. Na long haus kakaruk, olgeta ol inap holim pikinini kakaruk. Na ol i tok, namba wan kaikai bilong ol Amerika em ol i save laikim tru, em ‘Kentucky Fried Chicken!’ ”
Nau belo i kamap, na ol i kaikai rais na kakaruk wantaim ol bikpela lain bilong Wastaua Fam long ples kaikai bilong ol. Bihain lain bilong fam ol i kam na bungim ol dispela yangpela em ol i bin kam long longwe hap tru bilong lukim fam. Na dispela pasin i kamapim klia olsem ol i save laikim tru ol pikinini.
Long apinun ol pikinini i go pilai antap long ol trakta na ol i amamas long holim stia bilong en. Na olgeta ol i laik kalap long hos, olsem na long dispela de ol inapim dispela laik bilong ol. Na yu ting wanem narapela samting ol i amamas tru long lukim? Em haus paia bilong Wastaua Fam i gat ol samting bilong mekim dai paia, wantaim traipela retpela paia-ka. Man, ol i amamas tru na yu inap lukim long pes bilong ol taim ol i kalap long paia-ka na ol i wokim belo bilong en. Tru tumas, ol pikinini long olgeta hap ol i laikim wankain samting—na kala na krai bilong ol samting tu!
Bihain ol i kamapim tingting bilong ol long ol samting ol i raun na lukim. Ahmad em i bikpela manki liklik na em i tok: “Mi amamas tru long lukim ol samting long haus faktori bilong wokim ol buk samting, na tu, mi laikim pasin bilong beten paslain na bihain long kaikai—na olgeta olgeta kaikai tu!” Na olgeta ol i laikim tumas ol animal, na ol i amamas long kalap long hos na raun liklik.
Dispela liklik stori i kamapim klia olsem sapos yumi mekim pasin sori long ol pikinini i no gat papamama o long ol narapela man, em gutpela pasin Kristen na em inap helpim ol long kisim save olsem Jehova em God bilong sori. Baibel i tok: “Yumi mas tingting long ol pikinini, papamama bilong ol i dai pinis, na long ol meri man bilong ol i dai pinis, na yumi mas helpim ol long karim hevi bilong ol.” (Jems 1:27)—Wanpela man i salim dispela stori i kam.