Helpim Ol Pikinini i No Gat Papamama na Ol Meri Wanpis Long Karim Hevi
I no hatwok long luksave olsem yumi stap long graun i no gat pasin sori long en. Aposel Pol i stori long ol man bilong “taim bilong las de” na i tok: “Planti hevi nogut tru bai i kamap. Ol man bai i laikim ol yet tasol, na ol . . . i no save long pasin bilong i stap pren bilong ol arapela.” (2 Timoti 3:1-3) Ol dispela tok i stret tru, a?
PASIN bilong ol man long taim bilong yumi i mekim na planti man i no gat pasin sori. Planti man i no save tingim i stap bilong narapela man, na sampela i no tingim i stap bilong ol wanfamili bilong ol yet.
Dispela i mekim na i stap bilong planti man i kamap nogut moa, em ol man i stap rabis, long wanem, sampela senis i bin kamap long sindaun bilong ol. Ol pait, bikpela win na guria samting, ol man i mas ranawe i go long narapela hap, ol dispela samting i mekim na namba bilong ol meri em man bilong ol i dai pinis na pikinini i no gat papamama em i wok long i go bikpela. (Saveman 3:19) Ripot bilong wanpela lain (United Nations Children’s Fund) i tok: “Pait i mekim na winim wan milion [pikinini] i no gat moa papamama o ol i no i stap moa wantaim famili bilong ol.” Ating yu save tu long bikpela lain mama em ol i singel, o man bilong ol i bin lusim ol, o ol i katim marit, na ol i hatwok tru long lukautim ol pikinini na mekim bikpela long ol. I stap bilong sampela meri olsem i nogut moa, long wanem, kantri bilong ol i gat bikpela hevi bilong mani, na dispela i mekim na planti manmeri i stap rabis tru.
Olsem na yu ting ol lain i karim ol bikpela hevi, bihain ol inap kisim ol gutpela samting? Wanem samting inap helpim ol meri, man bilong ol i dai pinis, na ol pikinini, papamama bilong ol i dai pinis, bambai ol hevi bilong ol i no ken bikpela tumas? Wanpela taim bai kamap na i no gat dispela hevi moa?
Gutpela Pasin Sori Bilong Ol Man Bilong Bipo
Pasin bilong lukautim ol meri em man bilong ol i dai pinis, na ol pikinini, papamama bilong ol i dai pinis, long ol samting bilong skin na spirit, em i wanpela bikpela hap bilong lotu long taim bilong ol man i raitim Baibel. Taim ol i kamautim kaikai long gaden o kisim ol prut samting, ol Israel i no ken go bek na kisim ol samting ol i bin lusim long gaden. Ol samting ol i lusim long gaden ol i mas larim i stap bilong “ol manmeri bilong ol arapela lain na ol pikinini, papa bilong ol i dai pinis, na ol meri, man bilong ol i dai pinis, ol i ken kisim.” (Lo 24:19-21) Lo Bilong Moses i tokaut klia: “Yupela i no ken mekim nogut long meri, man bilong en i dai pinis, o long pikinini, papa i dai pinis.” (Kisim Bek 22:22, 23) Ol dispela meri na pikinini em Baibel i tok long ol, ol i makim ol manmeri i stap rabis. I stret Baibel i tok olsem, long wanem, taim man marit o papa o papamama i dai, ating famili bai sot long ol samting bilong skin. Jop i tok: “Mi bin helpim ol rabisman taim ol i singaut bilong kisim helpim. Na taim mi lukim ol pikinini, papa bilong ol i dai pinis, na i no gat man bilong helpim ol, mi yet mi bin helpim ol.”—Jop 29:12.
Taim kongrigesen Kristen i nupela yet, bikpela samting bilong lotu i tru em pasin bilong lukautim ol man i karim pen na hevi o i sot long ol samting, long wanem, papamama o poroman marit i dai. Disaipel Jems i tingim i stap bilong kain manmeri olsem na i tok: “Pasin bilong Kristen i stap stret olgeta na i no gat asua long ai bilong God Papa bilong yumi, em i olsem. Yumi mas tingting long ol pikinini, papamama bilong ol i dai pinis, na long ol meri, man bilong ol i dai pinis, na yumi mas helpim ol long karim ol hevi bilong ol. Narapela samting tu, yumi mas lukautim gut wokabaut bilong yumi yet, bai pasin bilong dispela graun i no ken mekim yumi i kamap doti long ai bilong God.”—Jems 1:27.
Jems i no toktok tasol long ol pikinini i no gat papamama na ol meri em man bilong ol i dai pinis. Em i tingim tu ol man i stap rabis olgeta. (Jems 2:5, 6, 15, 16) Aposel Pol i gat wankain pasin bilong tingim ol narapela. Taim em na Barnabas i kisim wok bilong autim tok, wanpela samting ol brata i tokim ol long mekim em ol i mas “helpim ol rabisman.” Bel bilong Pol i no kotim em, olsem na em inap tok: “Bipo yet mi bin amamas long mekim dispela kain wok, na mi wok strong yet long mekim.” (Galesia 2:9, 10) Stori bilong kongrigesen Kristen long taim kongrigesen i nupela yet i tok: “I no gat wanpela man namel long ol em i sot long kaikai samting. . . . Ol aposel i save tilim long ol manmeri i sot long ol samting.” (Aposel 4:34, 35) Em nau, pasin bilong lukautim ol pikinini, papamama i dai pinis, na ol meri, man bilong ol i dai pinis, na ol man i stap rabis, dispela pasin i bin kamap insait long lain Israel bilong bipo na kongrigesen Kristen tu i kisim dispela pasin.
Tru, ol i no inap givim planti samting bilong helpim ol man i sot, na ol i givim ol samting long skel bilong wan wan kongrigesen. Ol i no tromoi nating mani, na ol man ol i helpim ol i sot tru. No gat wanpela Kristen i ken kisim helpim sapos em i no sot, na ol i no ken putim bikpela hevi tumas long kongrigesen. Tok bilong Pol long 1 Timoti 5:3-16 i kamapim klia dispela samting. Ol dispela tok i kamapim klia olsem sapos ol wanblut bilong man i sot long ol samting ol inap helpim em, orait em wok bilong ol long mekim olsem. Ol meri em man bilong ol i dai pinis i sot long ol samting, ol i mas inapim sampela mak bambai ol inap kisim helpim. Olgeta dispela samting i kamapim gutpela tingting bilong Jehova long stretim ol samting bilong lukautim ol man i sot. Na tu, em i soim olsem kongrigesen i mas bihainim stretpela tingting bambai no gat wanpela inap kisim nating gutpela helpim kongrigesen i save givim sapos em i no gat wok long kisim.—2 Tesalonaika 3:10-12.
Lukautim Ol Pikinini i No Gat Papamama na Ol Meri Wanpis Long Nau
Ol kongrigesen bilong ol Witnes Bilong Jehova i save bihainim ol lo bilong stiaim tingting em ol wokboi bilong God i bin bihainim long bipo, na ol i tingim na givim helpim long ol man i karim hevi. Pasin bilong laikim tru ol brata, em wanpela mak bilong ol olsem Jisas i bin tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Sapos sampela ol i sot, o bikpela win o guria samting i kamap, o pait o hevi insait long kantri i bagarapim sindaun bilong ol, orait ol brata long olgeta hap ol i wok strong long painim rot bilong helpim ol long ol samting bilong spirit na skin. Nau yumi ken skelim sampela stori bilong nau i kamapim ol samting ol brata i mekim bilong helpim ol narapela.
Pedro i no inap tingim tumas mama bilong em, mama i dai taim Pedro i gat wanpela krismas na hap tasol. Taim Pedro i gat 5-pela krismas, papa tu i dai. Olsem na Pedro i stap wantaim ol brata bilong em. Ol Witnes Bilong Jehova i bin go lukim papa bilong ol, olsem na ol Witnes i kirap stadi long Baibel wantaim Pedro na ol bikpela brata bilong em.
Pedro i tok: “Long wik antap, mipela i kirap go long ol miting. Taim mipela i bung wantaim ol brata, mipela inap pilim pasin sori ol i mekim long mipela. Kongrigesen i kamap ples mi ken stap gut long en, long wanem, ol brata sista i mekim pasin sori long mi, ol i olsem papamama bilong mi.” Pedro i tingim wanpela elda Kristen i singautim Pedro long kam long haus bilong em. Pedro i toktok na painim amamas wantaim dispela famili. Pedro i tok: “Mi save tingim tru ol dispela gutpela samting mipela i bin mekim.” Pedro i kirap autim tok long bilip bilong em taim em i gat 11-pela krismas na em i kisim baptais taim em i gat 15 krismas. Ol brata sista long kongrigesen i helpim ol bikpela brata bilong em, na ol tu i kamap strong long ol samting bilong spirit.
I gat stori bilong David tu. Taim marit bilong papamama bilong em i bruk, ol i lusim em na susa bilong em. Tupela bubu na wanpela anti i lukautim na mekim bikpela long ol. David i tok: “Taim mi na susa i bikpela liklik, mipela i luksave long sindaun bilong mipela na bel bilong mipela i bagarap stret na i no stap isi. Mipela i mas kisim samting bilong strongim mipela. Anti bilong mi i kamap wanpela Witnes Bilong Jehova, olsem na mi na susa i kisim save long tok i tru bilong Baibel. Ol brata i mekim pasin sori na pasin pren long mipela. Ol i laikim mipela tru, na ol i kirapim mipela long putim ol mak na mekim yet wok bilong Jehova. Taim mi gat 10-pela krismas, wanpela kongrigesen sevent i kam kisim mi bilong mekim wok autim tok wantaim em. Wanpela narapela brata i givim mani bilong lukautim mi long taim bilong kibung. Narapela brata i helpim mi bilong mi ken givim kontribiusen taim mi go long Haus Kingdom.”
David i kisim baptais taim em i gat 17 krismas, na bihain em i kirap mekim wok long brens-ofis bilong ol Witnes Bilong Jehova long Meksiko. Long nau tu em i tok: “Sampela elda i wok long skulim mi na givim gutpela tok bilong stretim mi. Dispela samting i mekim na mi bel isi liklik na mi no pilim olsem mi stap wanpis.”
Abel em i elda long wanpela kongrigesen long Meksiko i gat sampela meri em man bilong ol i dai pinis na ol i mas kisim helpim. Abel i tok: “Mi bilip tru olsem nambawan bikpela helpim ol meri wanpis i mas kisim em narapela i mas strongim bel bilong ol. Sampela taim ol i bel hevi, ol i pilim olsem ol i stap wanpis olgeta. Olsem na em i bikpela samting long strongim ol na putim yau long tok bilong ol. Mipela [ol elda bilong kongrigesen] i save go lukim ol planti taim. Em i bikpela samting long makim taim bilong helpim ol long karim hevi bilong ol. Dispela i mekim na ol i stap gut long ol samting bilong spirit.” Tasol sampela taim yumi mas helpim ol long ol samting bilong skin tu. Abel i tok: “Nau mipela i wok long sanapim haus bilong wanpela sista em man bilong em i dai pinis. Mipela i wok long sampela Sarere na sampela apinun namel long wik bilong sanapim haus bilong em.”
Wanpela narapela elda i stori long em i bin helpim ol pikinini, papamama bilong ol i dai pinis, na ol meri em man bilong ol i dai pinis, na em i tok: “Mi ting yumi mas mekim bikpela pasin sori Kristen long ol pikinini i no gat papamama, winim ol meri wanpis. Mi lukim olsem ol dispela kain pikinini i hariap moa long pilim olsem ol narapela i sakim ol, winim ol pikinini na yangpela i gat papa na mama. Planti taim yumi mas kamapim long ol olsem yumi laikim ol tru. Em i gutpela pasin long go toktok wantaim ol bihain long miting bilong save ol i stap orait o nogat. I gat wanpela brata i marit em papamama bilong em i dai taim em i liklik pikinini yet. Oltaim mi save tok apinun long em long ol miting, na em i save holimpas mi taim em i lukim mi. Dispela i strongim pasin bilong laikim tru ol brata.”
Jehova “i Save Helpim Ol Rabisman”
Bilong ol meri, man bilong ol i dai pinis, na ol pikinini, papamama bilong ol i dai pinis, ol inap karim hevi bilong ol, em i bikpela samting long ol i bilip tru long Jehova. Baibel i tok long Jehova olsem: “Em i save lukautim ol man bilong narapela ples i stap long graun bilong yumi. Na em i save helpim ol meri, man bilong ol i dai pinis, na ol pikinini, papa bilong ol i dai pinis.” (Song 146:9) Kingdom bilong God long han bilong Jisas Krais, em tasol bai pinisim tru olgeta dispela kain hevi. Man bilong raitim Song i tok profet long wok king bilong Mesaia: “Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.”—Song 72:12, 13.
Pinis bilong pasin nogut bilong dispela graun i wok long kam klostu, olsem na ol hevi i save painim ol Kristen bai go bikpela moa. (Matyu 24:9-13) Long olgeta de ol Kristen i mas tingim tru narapela narapela na “holim strong pasin bilong laikim tru arapela.” (1 Pita 4:7-10) Ol man Kristen, na ol elda, i mas tingim tru na mekim pasin sori long ol pikinini em papamama bilong ol i dai pinis. Na ol strongpela meri long kongrigesen inap helpim tru ol meri em man bilong ol i dai pinis na mekim gut bel bilong ol. (Taitus 2:3-5) Olgeta i ken helpim na kamapim klia olsem ol i tingim tru ol man i karim hevi.
Taim ol Kristen tru i “lukim narapela brata i sot long ol samting” ol i save “sori long dispela brata.” Ol i tingting strong long bihainim tok bilong aposel Jon: “Ol liklik pikinini bilong mi, yumi no ken laikim ol brata long tok tasol o long maus tasol. Nogat. Yumi mas givim bel bilong yumi tru long ol na mekim gutpela pasin long ol.” (1 Jon 3:17, 18) Olsem na “yumi mas tingting long ol pikinini, papamama bilong ol i dai pinis, na long ol meri, man bilong ol i dai pinis, na yumi mas helpim ol long karim ol hevi bilong ol.”—Jems 1:27.
[Rait long pes 11]
“Yumi no ken laikim ol brata long tok tasol o long maus tasol. Nogat. Yumi mas givim bel bilong yumi tru long ol na mekim gutpela pasin long ol.”—1 Jon 3:18
[Ol Piksa long pes 10]
Ol Kristen tru i save helpim ol pikinini, em papamama bilong ol i dai pinis, na ol meri, man bilong ol i dai pinis, long ol samting bilong skin na bilong spirit na bel