God i Save Tingim Ol Lapun

YUMI no ken kirap nogut long planti manmeri i save mekim nogut long ol lapun. Long bipo yet Baibel i tok profet olsem long “taim bilong las de” bilong dispela pasin nogut bilong graun, ol manmeri bai i “laikim ol yet tasol, . . . ol bai i no save long pasin bilong i stap pren bilong ol arapela.” (2 Timoti 3:​1-3) Tok Grik ol i tanim olsem “stap pren bilong ol arapela” em i makim tu pasin bilong laikim ol narapela insait long famili. Olsem Baibel i tok profet long en, long nau yumi no save lukim tumas dispela kain pasin insait long famili.

Tasol God Jehova i narapela kain long ol man i save mekim nogut long ol lapun. Em i save tingim tru ol lapun. Tingim tok Baibel i mekim long dispela samting.

“Helpim Ol Meri, Man Bilong Ol i Dai Pinis”

Pasin bilong God Jehova long tingim ol lapun i kamap klia long Ol Skripsa Hibru. Long Song 68:​5, Devit i tok God “i save helpim ol meri, man bilong ol i dai pinis,” em planti ol i lapun.a Sampela Baibel i tanim dispela tok “helpim” olsem “man bilong sambai,” “man bilong lukautim,” na “man bilong pait long helpim narapela.” Tru tumas, Jehova i save tingim ol lapun. Baibel i tok, sapos ol man i mekim nogut long ol lapun, Jehova bai belhat. (Kisim Bek 22:​22-24) Ol meri, man bilong ol i dai pinis​—na olgeta lapun i stap gut long God​—God na ol wokman bilong em i save tingim tru ol. Sindaun 16:31 (NW) i kamapim tingting bilong God Jehova na ol manmeri bilong em, olsem: “Waitpela gras bilong man i gutpela samting tru taim em i bihainim stretpela pasin.”

Lo Jehova i bin givim long lain Israel i tok olsem ol manmeri i mas rispek long ol lapun. Em i tokim ol Israel: “Yupela i mas aninit long ol lapun na mekim gut long ol. Na yupela i mas aninit long mi, God bilong yupela. Mi Bikpela, mi tok olsem.” (Wok Pris 19:32) Olsem na long Israel, ol man i laik pas gut wantaim God Jehova ol i mas rispek long ol lapun. Man i no inap tok em i laikim tru God sapos em i mekim nogut long ol lapun.

Ol Kristen i no stap aninit long Lo Bilong Moses. Tasol ol i stap aninit long “lo bilong Krais,” na dispela i save stiaim pasin na tingting bilong ol, na long mekim pasin laikim na tingim papamama na ol lapun. (Galesia 6:2; Efesus 6:​1-3; 1 Timoti 5:​1-3) Na bel bilong ol Kristen yet i kirapim ol long mekim pasin sori long ol lapun, na i no olsem God i tok ol i mas mekim na long dispela as tasol ol i mekim olsem. Aposel Pita i tok: “Yupela i mas wok strong moa long laikim ol na givim bel bilong yupela olgeta long ol.”​—1 Pita 1:22.

Disaipel Jems i kamapim narapela as na yumi mas lukautim ol lapun. Em i tok: “Pasin bilong Kristen i stap stret olgeta na i no gat asua long ai bilong God Papa bilong yumi, em i olsem. Yumi mas tingting long ol pikinini, papamama bilong ol i dai pinis, na long ol meri, man bilong ol i dai pinis, na yumi mas helpim ol long karim ol hevi bilong ol. Narapela samting tu, yumi mas lukautim gut wokabaut bilong yumi yet, bai pasin bilong dispela graun i no ken mekim yumi i kamap doti long ai bilong God.” (Jems 1:27) Tok bilong Jems i kamapim wanpela bikpela samting. Em i kirapim yumi long tingim olsem ol dispela lain i bikpela samting tru long Jehova.

Yumi no ken mekim nogut long ol lapun, tasol i no dispela samting tasol. Yumi mas soim olsem yumi tingim ol​—yumi mas mekim sampela wok bilong helpim ol. (Lukim blok “Ol Wok i Soim Pasin Laikim,” long pes 6-7.) Jems i tok: “Sapos man i bilip nating na bilip bilong en i no kamapim gutpela pasin tu, orait bilip bilong dispela man i olsem em i dai pinis.”​—Jems 2:26.

Mekim Gut Bel Bilong Ol

Yumi ken kisim narapela tingting moa long tok bilong Jems. Em i tok ol Kristen i mas lukautim ol meri, man bilong ol i dai pinis, na “helpim ol long karim ol hevi bilong ol.” Tok Grik ol i tanim olsem “hevi” i makim ol hevi na pen em ol hatwok long sindaun bilong yumi i save kamapim. Yumi save planti lapun namel long yumi ol i save karim dispela kain hevi. Planti i bel hevi long i stap wanpis. Sampela i bel hevi long ol i no inap mekim planti samting olsem bipo ol i bin mekim. Na sampela i wok strong yet long wok bilong God, ol tu inap bel hevi. Tingim John,b em i bin autim tok bilong Kingdom Bilong God inap foti yia pinis, na inap 30 yia em i bin insait long spesel fultaim sevis. Nau John i gat 80 krismas samting na em i tok sampela taim em i bel hevi. Em i tok: “Planti taim mi save tingting bek na mi tingim ol planti popaia mi bin mekim. Oltaim mi save tingting olsem em bai gutpela tru sapos mi bin mekim gutpela wok moa, winim wok mi bin mekim.”

Tasol ol dispela lapun i ken i stap bel isi, long wanem, ol i save olsem maski Jehova i nambawan olgeta, em i no ting yumi mas mekim olgeta samting i nambawan olgeta. Tru, em i save long ol popaia bilong yumi, tasol Baibel i tok: “Sapos yu kaunim olgeta sin bilong mipela bai husat inap long winim kot bilong yu?” (Song 130:3) Tru tumas, Jehova i no save lukluk long ol popaia bilong yumi​—em i save lukim bel bilong yumi. Olsem wanem yumi inap save long dispela?

King Devit i bin mekim rong na planti popaia, tasol spirit bilong God i bin kirapim em long raitim ol tok i stap long Song 139:​1-3, olsem: “Bikpela, yu skelim pinis bel bilong mi, na yu save tru long mi. Yu save long olgeta samting mi save mekim. Yu stap longwe, tasol yu save long olgeta tingting bilong mi. Yu save lukim mi long taim mi mekim wok na long taim mi slip. Yu save long olgeta pasin bilong mi.” Ol fama i save sipim wit na rausim ol pipia na larim wit tasol i stap, na olsem tasol Devit i laik tokim yumi, Jehova i save long pasin bilong sipim na rausim ol popaia bilong yumi long tingting bilong em na tingim tasol ol gutpela wok bilong yumi.

Papa bilong yumi long heven i gat pasin marimari, em i save tingim na amamas long ol gutpela wok bilong yumi sapos yumi stap gut long em. Baibel i tok, em i ting i no stret liklik sapos em i lusim tingting long ol wok yumi bin mekim na pasin bilong yumi long laikim tumas nem bilong em.​—Hibru 6:10.

‘Ol Samting Bilong Bipo i Pinis Olgeta’

Baibel i soim yumi olsem, em i no laik bilong God long ol man i go lapun na karim hevi. Taim tupela tumbuna bilong yumi bilong pastaim​—em namba wan man na meri​—​ol i bin bikhet long Man Bilong Wokim ol, long dispela taim tasol ol manmeri i kirap kisim pen na hevi bilong i go lapun. (Stat 3:​17-19; Rom 5:12) Tasol dispela samting i no ken i stap oltaim.

Olsem yumi stori pinis, planti pasin nogut na hevi i kamap long nau​—na pasin bilong mekim nogut long ol lapun​—ol i olsem mak i kamapim klia olsem yumi stap long “taim bilong las de.” (2 Timoti 3:1) God i tingting pinis long rausim ol samting nogut em sin i save kamapim, wantaim pasin bilong go lapun na dai. Baibel i tok: “[God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—KTH 21:4.

Long nupela taim God bai kamapim, kain kain pen bilong ol lapun bai i pinis olgeta. Na pasin bilong mekim nogut long ol lapun, dispela tu bai i pinis olgeta. (Maika 4:4) Na ol manmeri i dai pinis na i stap long tingting bilong God, ol bai kirap bek na i stap laip gen, na bai ol tu i gat rot long i stap oltaim oltaim long Paradais long graun. (Jon 5:​28, 29) Long dispela taim bihain em bai i klia tru olsem God Jehova i save tingim tru ol lapun na olgeta man i save bihainim tok bilong em.

[Ol Futnot]

[Blok/Ol Piksa long pes 6, 7]

Ol Wok i Soim Pasin Laikim

Namel long ol Witnes Bilong Jehova, ol elda i save go pas long tingim gut ol lapun. Ol i pilim tru tok bilong aposel Pita, em i tok: “Yupela i mas lukautim gut ol manmeri bilong God. Ol i stap olsem ol sipsip long han bilong yupela.” (1 Pita 5:2) Wanpela hap wok bilong lukautim ol manmeri bilong God, em pasin bilong helpim ol lapun. Tasol wanem ol samting i insait long dispela wok?

Ol elda i no ken les hariap, ol i mas go lukim ol lapun planti taim na toktok wantaim ol na skelim gut ol samting ol i mas kisim helpim long en. Ating sampela i mas baim kaikai samting bilong ol, o klinim haus, o kisim ol i go long ol miting Kristen, o ritim Baibel na ol narapela buk Kristen long ol, na planti samting moa. Sapos inap, ol elda i mas stretim gut rot na bai kongrigesen i ken mekim tru ol dispela wok.c

Tasol olsem wanem sapos bikpela hevi i painim wanpela lapun brata o sista insait long kongrigesen, na ating em i mas kisim helpim long mani? Orait pastaim ol elda i mas painimaut olsem dispela lapun i gat sampela pikinini o narapela wanblut i ken helpim em o nogat. Dispela bai i stret wantaim tok i stap long 1 Timoti 5:4: “Sapos dispela meri [wanpis] i gat ol pikinini bilong em yet o ol tumbuna pikinini, orait . . . namba wan wok bilong ol long ai bilong God em wok bilong lukautim gut dispela mama bilong ol. Long dispela pasin ol i ken bekim olgeta hatwok bipo papamama bilong ol i bin mekim bilong helpim ol. God i laikim tumas dispela kain pasin.”

Ating wanpela i mas helpim lapun long skelim olsem em inap kisim pensen o narapela kain helpim long gavman. Ating sampela long kongrigesen inap helpim em long dispela. Sapos lapun i no inap kisim helpim long gavman, orait ol elda i mas skelim olsem lapun inap kisim helpim long kongrigesen o olsem wanem. Sampela lapun long kongrigesen Kristen long bipo ol inap kisim dispela kain helpim, olsem aposel Pol i tokim wanwok Timoti: “Long lista bilong ol meri man bilong ol i dai pinis, yu ken raitim nem bilong dispela kain meri tasol, em meri i winim 60 krismas pinis na em i bin i stap meri bilong wanpela man tasol na em i gat nem olsem meri bilong mekim ol kain kain gutpela wok . . . olsem bilong lukautim gut ol pikinini bilong en na bilong givim kaikai samting long ol man i kam long narapela ples na bilong wasim lek bilong ol Kristen na bilong helpim ol manmeri i gat hevi, na bilong mekim ol arapela kain gutpela wok.”​—1 Timoti 5:​9, 10.

[Futnot]

[Piksa long pes 5]

Dorkas i save helpim ol meri, man bilong ol i dai pinis, na ol i sot long ol samting.​—Aposel 9:​36-39