Famili Kristen i Save Helpim Ol Lapun

“Nau mi lapun pinis na mi no gat strong moa, orait nogut yu lusim mi na givim baksait long mi.” ​—⁠SONG 71:⁠9.

‘OL I TOK, planti famili bilong ol lapun ol i save mekim nogut long ol.’ (Nius The Wall Street Journal) Na narapela nius (Modern Maturity) i tok: “Long nau ol nius i tokaut olsem ol famili i save mekim nogut long ol lapun bilong ol. Long bipo dispela samting i bin stap hait.” Planti lain i save mekim nogut long ol lapun na i no lukautim ol. Tru tumas, long nau ol man “bai i laikim ol yet tasol, na . . . ol bai i no tok tenkyu long ol manmeri i mekim gutpela pasin long ol. Ol bai i givim baksait long ol . . . Ol bai i no . . . stap pren bilong ol.”​—⁠2 Timoti 3:​1-3.

² Tasol ol Israel i no inap mekim olsem long ol lapun bilong ol. Lo bilong ol i tok: “Yupela i mas aninit long ol lapun na mekim gut long ol. Na yupela i mas aninit long mi, God bilong yupela. Mi Bikpela, mi tok olsem.” Na Sindaun 1:8 i tok: “Yu mas harim tok bilong papamama bilong yu na yu no ken sakim tok bilong tupela.” Na Sindaun 23:22 i tok: “Papa bilong yu i bin kamapim yu na yu mas harim tok bilong en. Na taim mama bilong yu i lapun pinis, yu no ken rabisim em.” Lo Jehova i bin givim long Moses i tok, ol i mas givim biknem long ol lapun. Olsem na yumi save, Jehova i laik bai yumi daun long ol lapun na givim biknem long ol.​—⁠Wok Pris 19:32.

Ol i Bin Lukautim Ol Lapun

³ Ol Israel i mas daun long ol lapun long tok na long pasin bilong ol tu. Josep i bin sori tru long Jekop, em lapun papa bilong em. Em i laik kisim Jekop long Kenan na bringim em long Isip, em longwe inap 300 kilomita, na Josep i salim ol donki bilong karim papa i kam, na “wit na bret na ol kain kain kaikai . . . bilong helpim papa long rot.” Na taim Jekop i kamkamap long Gosen, Josep i go bungim em, “na taim Josep i lukim papa, em i go holim papa na i krai longpela taim tru.” Josep i mekim bikpela pasin sori long lapun papa bilong em!​—⁠Stat 45:23; 46:​5, 29.

⁴ Na yumi ken tingim gutpela pasin bilong Rut tu long lukautim ol lapun. Em i no wanpela Juda, tasol em i mekim pasin sori long tambu mama bilong em Naomi. Em i lusim lain bilong em yet na bai em i ken lukautim lapun Naomi bilong lain Juda, maski em inap lus long painim wanpela man bilong maritim em. Naomi i sori long em na i tokim em long go bek long ples bilong em, tasol Rut i tok, “Yu no ken tokim mi long lusim yu na yu no ken pasim mi long i go wantaim yu. Olgeta ples yu go long en, mi tu bai mi go long en. Olgeta ples yu stap long en, mi tu bai mi stap long en. Lain bilong yu bai i kamap lain bilong mi. Na God bilong yu bai i kamap God bilong mi. Ples yu dai long en, mi tu bai mi dai long en, na ol i ken planim mi long dispela ples. Mi no ken larim wanpela samting i brukim mitupela. Dai tasol i ken brukim mitupela. Tru antap, sapos mi no bihainim olgeta dispela tok nau mi mekim, orait God i ken mekim save tru long mi.” (Rut 1:​16, 17) Na bihain Rut i orait long maritim lapun Boas long lain bilong man bilong Naomi.​—⁠Rut sapta 2 i go inap sapta 4.

⁵ Na Jisas tu i gat dispela pasin. Em i mekim pasin sori long ol man na em i mekim gut bel bilong ol. Em i oraitim sik bilong wanpela rabisman i no inap wokabaut inap 38 yia. Em i helpim ol meri em man bilong ol i dai pinis. (Luk 7:​11-15; Jon 5:​1-9) Taim em i gat bikpela pen na i hangamap long pos, em i stretim tok na bai sampela man i ken lukautim lapun mama i gat 50 krismas samting. Ol tok bilong em i mekim gut bel bilong olgeta man​—⁠ol birua tasol i no amamas long en. Em i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, . . . long wanem, mi save mekim pasin isi long ol man.”​—⁠Matyu 9:36; 11:​28, 29; Jon 19:​25- 27.

Mas Helpim Husat?

⁶ God Jehova na Pikinini bilong em Krais Jisas i tingim tru ol man, olsem na ol Kristen i dediket pinis ol i mas mekim olsem. I gat ol lapun brata sista i stap, na papamama na lapun bubu bilong yumi tu. Olsem wanem? Yumi save tingim ol? Yumi save daun long ol taim yumi helpim ol? Yumi tingim ol i gat planti save na gutpela tingting long ol samting? Ating sampela taim yumi les liklik long sampela toktok o pasin bilong ol, tasol em pasin bilong ol lapun. Taim yumi kamap lapun, bai yumi tu i gat dispela pasin, a?

⁷ Em stori hia long wanpela samting i bin kamap long Midel-Is: I gat wanpela pikinini meri, na mama bilong em, na lapun bubu bilong em. Bubu i wasim plet semen, na plet i pundaun na i bruk. Bubu i bel hevi, na mama i kros long bubu. Mama i salim pikinini meri i go long stua na baim wanpela plet diwai em i no inap bruk. Pikinini i go baim 2-pela plet olsem. Mama i askim em: “Bilong wanem yu baim tupela plet?” Pikinini i tok: “Wanpela i bilong bubu, na wanpela i bilong yu long taim yu yet yu kamap lapun olsem bubu.” Long nau yumi olgeta i save go lapun, na sapos yumi lapun yumi laik bai ol i sori long yumi na ol i no les long helpim yumi, a?​—⁠Song 71:⁠9.

⁸ Planti lapun brata sista i bin stap long tok i tru inap planti yia na mekim ol gutpela wok Kristen. Yumi mas tingim ol na daun long ol, na yumi mas helpim na strongim ol. Wanpela saveman i bin tok: “Ol lapun i bin bihainim stretpela pasin na ol i stap longpela taim long graun. Olsem na ol [man] i givim biknem long ol.” Yumi mas aninit long ol lapun. Sampela i mekim gutpela wok yet olsem painia o wok elda long kongrigesen o wasman bilong raun.​—⁠Sindaun 16:⁠31.

⁹ Pol i tokim Timoti: “Yu no ken krosim ol lapun man. Nogat. Yu mas stretim ol long tok isi, olsem yu stretim papa bilong yu. Na yu mas mekim wankain pasin long ol yangpela man olsem yu save mekim long ol brata bilong yu yet. Na yu mas mekim wankain pasin long ol lapun meri olsem yu save mekim long ol mama bilong yu. Na yu mas mekim wankain pasin long ol yangpela meri olsem yu save mekim long ol susa bilong yu, em long pasin i klin tru long ai bilong God.” (1 Timoti 5:​1, 2) Ol nupela man i kam long kongrigesen, bipo ol i stap namel long ol man i no gat pasin sori, olsem na ol i mas tingim dispela tok bilong Pol. Yupela ol yangpela, no ken bihainim pasin bikhet yu lukim long skul, na no ken bikhet long gutpela tok ol bikpela Witnes i givim long yu bilong helpim yu. (1 Korin 13:​4-8; Hibru 12:​5, 6, 11) Tasol sapos lapun i sik o em i rabis, em wok bilong husat tru long i go pas long helpim em?

Wok Bilong Famili Long Lukautim Lapun

¹⁰ Long lain Kristen bilong pastaim, hevi i bin kamap long wok bilong lukautim meri em man bilong em i dai pinis, olsem na Pol i tok: “Yu mas mekim gutpela pasin long em. Tasol sapos dispela meri i gat ol pikinini bilong em yet o ol tumbuna pikinini, orait . . . namba wan wok bilong ol long ai bilong God em wok bilong lukautim gut dispela mama bilong ol. . . . Ol i ken bekim olgeta hatwok bipo papamama bilong ol i bin mekim bilong helpim ol. God i laikim tumas dispela kain pasin. . . . Sapos wanpela man i no lukautim ol wanblut tru bilong em yet . . . , orait dispela man i lusim pinis bilip bilong em, na em i man nogut tru. Ol haiden yet i no save mekim dispela kain pasin nogut.”​—⁠1 Timoti 5:​3, 4, 8.

¹¹ Sapos ol lapun i sot long ol samting, famili bilong ol i mas lukautim ol long ol dispela samting.a I olsem bekim bilong pasin sori na hatwok papamama i bin mekim long ol inap planti yia. Ating famili bai i gat hevi long mekim, long wanem, taim ol man i go lapun ol i no inap mekim planti samting, na sampela i gat sik na i no inap lukautim ol yet, na sampela i tingim ol yet na oltaim ol i singaut long famili i mas helpim ol long ol samting. Tasol taim yumi stap pikinini, yumi tu i bin mekim olsem, na papamama i bin kam hariap na helpim yumi, a? Tasol nau ol i no inap. Olsem na yumi mas mekim pasin sori long ol na no ken les long ol.​—⁠Lukim 1 Tesalonaika 2:​7, 8.

¹² Pol i tok: “Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela. Sapos wanpela . . . i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela. Yupela i mas givim bel . . . long ol arapela manmeri. Dispela pasin i winim tru olgeta arapela pasin.” Yumi mas bihainim dispela pasin long ol brata sista long kongrigesen, tasol yumi mas bihainim moa yet long famili bilong yumi!​—⁠Kolosi 3:​12-14.

¹³ Yumi mas mekim olsem long lapun papamama na long ol bubu, na yumi mas mekim olsem long ol narapela lapun wanblut. Sampela lapun i no gat pikinini na inap planti yia ol i bin mekim wok misineri o mekim wok olsem wasman bilong raun o wok painia. Ol i bin putim wok bilong Kingdom i go pas long olgeta narapela samting. (Matyu 6:33) Yumi ken tingting long helpim ol dispela lapun tu, a? Sosaiti Was Taua i save lukautim ol lapun bilong Betel. Long hetkota long Betel long Bruklin, na long sampela haus brens bilong Sosaiti, i gat sampela lapun brata sista i stap, na sampela bilong Betel ol i bin lain na long olgeta de ol i amamas long lukautim ol dispela lapun, i olsem ol i papamama o bubu bilong ol. Taim ol i mekim olsem, ol i kisim gutpela save na tingting long ol tok na stori bilong ol dispela lapun.​—⁠Sindaun 22:17.

Kongrigesen Mas Lukautim Ol Lapun

¹⁴ Sampela kantri i save givim skel long ol lapun, olsem pensen, na helpim ol long taim ol i gat sik. Ol Kristen i ken kisim dispela samting sapos ol inap. Bipo i no gat dispela samting, na kongrigesen Kristen i mas mekim. Ol i lukautim ol meri em man bilong ol i dai pinis na ol i stap rabis. Pol i tok: “Long lista . . . raitim nem bilong dispela kain meri . . . i winim 60 krismas pinis na em i . . . gat nem olsem meri bilong mekim ol kain kain gutpela wok . . . olsem bilong lukautim gut ol pikinini bilong en na bilong givim kaikai samting long ol man i kam long narapela ples . . . na bilong helpim ol manmeri i gat hevi, na bilong mekim ol arapela kain gutpela wok.” Em nau, Pol i tok kongrigesen i mas helpim ol lapun. Ol i ken helpim ol meri i save tingting long ol samting bilong spirit na i no gat pikinini bilong lukautim ol.​—⁠1 Timoti 5:⁠9, 10.

¹⁵ Sapos gavman inap helpim ol lapun long skel o pensen samting, lapun i mas raitim planti tok long ol pepa pastaim, na ol wasman bilong kongrigesen i ken stretim rot na bai sampela i ken helpim em long mekim dispela wok na bai em i ken kisim dispela pensen, na ol i ken save, em i kisim stret o nogat, long wanem, sampela taim gavman i apim pensen bilong ol lapun. Na i gat ol narapela samting ol wasman i ken mekim bilong helpim ol lapun. Wanem kain samting?

¹⁶ Long bipo, sapos man bilong narapela hap em i kam long wanpela ples, ol i kisim em i go long haus bilong ol na mekim gut long em. Long nau tu long sampela hap ol i mekim olsem, na ol i givim ti o kopi o kaikai samting long ol. Pol i tok: “Sapos sampela manmeri bilong God i sot long ol samting, orait yupela i mas helpim ol. Sapos ol man bilong narapela ples ol i kamap long yupela, orait yupela i mas lukautim ol gut.” (Rom 12:13) Dispela tok “lukautim ol gut,” long tok Grik ol i kolim phi·lo·xe·niʹa, i olsem “mekim pasin sori long man bilong narapela hap.” Sapos Kristen i mas sori long man bilong narapela hap, em i mas sori moa yet long ol wanlotu bilong em, a? Sapos yu singautim lapun i kam kaikai wantaim yu, em bai amamas. Sapos yu laik bai sampela man i gat save long planti samting na i gat gutpela tingting ol i ken kam long pati bilong yu, orait, singautim ol lapun.​—⁠Lukim Luk 14:​12-14.

¹⁷ I gat planti rot bilong helpim ol lapun. Sapos yumi laik i go long Haus Kingdom long ka, i gat sampela lapun yumi i ken kisim ol i kam wantaim yumi? No ken wetim ol i kam askim yumi pastaim. Na sapos ol i mas baim ol kaikai samting long stua, yumi ken i go mekim dispela wok bilong ol sapos ol i laikim olsem, o ol i ken kam wantaim yumi na mekim. Tasol i mas i gat ples ol i ken malolo sapos ol i laik. Yumi mas mekim gutpela pasin long ol na no ken les, na sapos ol i amamas long samting yumi mekim bilong helpim ol, dispela bai givim amamas long yumi yet.​—⁠2 Korin 1:⁠11.

Ol i Gutpela Samting Bilong Kongrigesen

¹⁸ Sapos i gat sampela waitpela gras o kela i stap long kongrigesen bilong yumi, em gutpela! Yumi ken amamas long dispela. Long wanem, i gat sampela ol yangpela i stap na ol i gat strongpela skin, na i gat sampela ol lapun i stap na ol i gat gutpela save long planti samting. Gutpela save na tingting bilong ol i olsem gutpela kolwara yumi pulim i kam antap long hul wara. Sindaun 18:4 i tok: “Sapos man i gat gutpela tingting i mekim toktok, orait tok bilong en i samting tru na planti gutpela tingting i pulap long dispela tok, olsem wara i pulap long hul wara na i kapsait na i ran i go.” Sapos ol lapun i pilim olsem ol brata sista i amamas long ol i stap namel long ol, ol dispela lapun bai amamas!​—⁠Lukim Song 92:⁠14.

¹⁹ Sampela painia i bin ting ol i mas lusim wok painia na go bek long ples na lukautim papamama i lapun pinis o ol i gat sik. Ol i lusim gutpela wok ol i laikim tumas na bai ol i ken helpim ol lapun i bin helpim ol yet long bipo. Tupela marit i bin wok misineri long wanpela hap, tasol tupela i go bek long ples na wok painia klostu long lapun papamama na bai ol i ken lukautim ol. Tupela i mekim olsem inap 20 yia samting. Inap 4-pela yia i go pinis, tupela i mas putim mama long wanpela haus bilong lukautim ol lapun, na nau man i winim pinis 60 krismas na mama bilong em i gat 93 krismas. Tasol man i go yet long lukim mama long olgeta de. Em i tok: “Mi no inap lusim em. Em mama bilong mi!” Sampela kongrigesen o ol narapela man ol i save lukautim ol lapun na bai pikinini bilong ol i ken i stap yet long wok painia na i no gat wok long lukautim papamama bilong em. Em gutpela wok ol i mekim bilong helpim painia o misineri olsem. Yumi mas tingim ol lapun na lukautim ol, nogut ol i stap nating. Mekim ol samting i kamapim klia olsem yu laikim tumas lapun papamama.​—⁠Kisim Bek 20:12; Efesus 6:​2, 3.

²⁰ Ol lapun i gutpela samting bilong famili na kongrigesen. Jehova i tok: “Bai mi lukautim yupela i go inap yupela i lapun pinis na i gat waitpela gras. . . . Oltaim bai mi karim yupela na lukautim yupela.” Yumi ol Kristen i mas mekim pasin isi long ol lapun brata sista long famili Kristen bilong yumi na lukautim gut ol.​—⁠Aisaia 46:4; Sindaun 16:⁠31.

[Ol Futnot]

Yu Tingim Yet?

◻ Husat long bipo ol i bin helpim ol lapun?

◻ Yumi mas mekim wanem pasin long ol lapun?

◻ Ol wan wan long famili i ken mekim wanem bilong lukautim ol lapun bilong ol?

◻ Kongrigesen i ken mekim wanem bilong helpim ol lapun?

◻ Olsem wanem ol lapun i gutpela samting bilong yumi olgeta?

[Askim Bilong Stadi]

1. Sampela lain i mekim wanem long ol lapun?

2. Olsem Baibel i makim, Jehova i ting olsem wanem long ol lapun?

3. Josep i sori long papa bilong em na em i mekim wanem?

4. Wanem gutpela pasin bilong Rut na yumi tu i ken bihainim?

5. Jisas i mekim wanem pasin long ol manmeri?

6. (a) Yumi mas lukautim gut husat? (b) Wanem sampela askim yumi mas givim long yumi yet?

7. Wanem samting i bin kamap na yumi ken save yumi mas sori long ol lapun?

8, 9. (a) Yumi mas mekim wanem long ol lapun bilong yumi? (b) Ol nupela Kristen i mas ting olsem wanem?

10, 11. (a) Baibel i tok, husat i mas go pas long lukautim ol lapun? (b) Olsem wanem na sampela taim i hatwok long lukautim lapun?

12. Yumi mas bihainim wanem pasin na bai yumi ken lukautim ol lapun na ol narapela insait long kongrigesen?

13. Famili i ken tingting long helpim husat moa?

14. Long kongrigesen Kristen bilong pastaim, ol i bin mekim wanem bilong lukautim ol lapun?

15. Bilong wanem sampela i mas helpim lapun long kisim pensen?

16, 17. Olsem wanem yumi ken mekim gut long ol lapun i stap long kongrigesen?

18. Olsem wanem i gutpela sapos i gat sampela lapun i stap long kongrigesen?

19. Sampela i bin mekim wanem bilong helpim lapun papamama bilong ol?

20. Jehova i mekim wanem long ol lapun na yumi mas bihainim pasin bilong em?

[Piksa long pes 23]

Rut i daun long lapun Naomi na mekim gut long em

[Piksa long pes 24]

Ol lapun i gutpela samting bilong kongrigesen