Sampela Tok i Kam long Olgeta Hap
Kibung Long Mosambik
Inap planti yia gavman i bin tambuim wok bilong ol Witnes Bilong Jehova long Mosambik, tasol nau gavman i pinisim sampela tambu; olsem na ol Witnes i amamas long gavman i larim ol i lotu long ples klia. Wanpela kibung i bin kamap long ples Maputo, em biktaun bilong Mosambik. Ol i kibung long wanpela stediam inap long 4-pela de. Nem bilong dispela kibung em “Gutpela Tok Ples” Kibung Distrik. Wanpela nius (Tempo) ol i save wokim long tok ples Maputo, i stori long dispela kibung na i tok, inap olsem 6,000 manmeri i bin i stap bilong harim namba wan tok bilong dispela kibung. Ol tok bilong dispela kibung i bin kamap long tok ples Potyugal na Songa. Dispela nius i tok moa olsem, wok bilong dispela kibung em i bilong ‘strongim pasin wanbel bilong ol dispela Kristen, maski ol i gat narapela narapela tok ples na dispela samting i save brukim ol lain man. Na dispela nius i tok, ‘ol Witnes Bilong Jehova long olgeta hap bilong graun i wok long strongim dispela pasin wanbel bilong Kristen, maski ol i bilong wanem ples, o wanem lain, na ol i bin skul gut o nogat, na ol i gat wanem kain sindaun.’
Sik AIDS Long Esia
Long mun Februeri, 1990, i gat 2,000 manmeri i kisim sik AIDS long Esia. I no longtaim i go pinis na Yunaitet Nesen i kamapim ripot bilong wanpela lain bilong helpim ol man long abrusim ol sik, em Wol Helt Oganaisesen (WHO), na dispela ripot i tok olsem inap 500,000 manmeri long Esia i kisim jem nogut (HIV) bilong sik AIDS. Narapela nius (Asiaweek) i tok, ‘Namba bilong ol man i gat sik AIDS long Esia bai i kamap bikpela moa yet.’ Na dispela lain Wol Helt (WHO) i tok, bilong pasim dispela sik, ol i mas skulim ol man long ol samting ol i mas mekim bilong abrusim sik AIDS.
Ol Man Bilong Wok Politik Ol i Smok
Gavman bilong Meksiko i bin kamapim wanpela lo bilong lukautim ol man i no save smok. Wanpela nius bilong Sentral Amerika (Vision) i tok, nau i gat lo na man i no inap smok long ol haus buk, na ol klinik bilong helpim ol sikman, na haus piksa, na ol PMV samting, na ol ofis bilong gavman em ol manmeri i save kam long en. Gavman i putim dispela tambu tu long ol haus kaikai samting, olsem i mas i gat wanpela hap long en bilong man i no save smok em inap sindaun na kaikai, na smok bilong ol man i no ken bagarapim em. Man i brukim dispela lo, em i mas baim kot long K30 samting. Tasol dispela nius i tok moa olsem, taim ol i kamapim dispela lo, em i no bilong ol man bilong politik long haus palamen ol i mas bihainim, nogat; long wanem ol dispela man Meksiko ol i man bilong smok na ol i no inap daunim laik long smok taim ol i wok long ofis bilong ol long haus palamen.
Ol Pikinini i Sindaun Tasol
Planti ol pikinini i gat 10-pela krismas i go inap 15 krismas ol i gat televisen bilong ol yet. Na tu, ol i gat ol pilai bilong kompyuta, na long olgeta 3-pela 3-pela bilong ol dispela pikinini, wanpela i gat telefon bilong em yet. Wanpela nius bilong gavman bilong Japan long 1990 (White Paper on Young People) i bin tok olsem. Planti bilong ol yangpela, taim ol i gat malolo ol i stap tasol long haus na lukim televisen, o kaunim ol komik, o wokim ol pilai long video samting, na ol i no save pilai ausait. Dispela nius bilong gavman i ting dispela ol samting i nogutim pikinini, na dispela pasin bilong i stap tasol long haus na i no toktok samting, i no gutpela, long wanem ol i no lain long toktok gut wantaim ol narapela man, na ol i no lain long toktok wantaim famili bilong ol yet. Na tu, ol i no insait long wanpela wok bilong dispela ples ol i stap long en. Ripot i tok, klostu olgeta pikinini long Japan, inap olsem 90 pesen, i tok ol i no inap kamapim ol tingting i stap long bel bilong ol.
Bikpela Hangre, Tasol Kaikai i No Sot
Wanpela man bilong Frans (Jaques Chonchol) em i gat wok long skelim strong bilong mani, na pe bilong ol samting i go antap, na ol kain wok olsem bilong mani, na em i tok, ‘Wanpela lain (World Bank) i save helpim ol kantri i sot tru long mani samting i tok, nau long dispela taim pasin bilong sot tru long kaikai i go bikpela tru. Dispela em i wanpela bikpela hevi tru long Sentral na Saut Amerika. Em i bin tok olsem long wanpela bung, olsem skul, i bin kamap long Sau Paulo long Brasil. As tok bilong dispela bung ol i mekim i olsem: ‘Bikpela Hangre—Em Wanpela Hevi Bilong Stretim Namel Long 1990 na 1999.’ Tasol ol i no kamapim sampela rot bilong helpim ol 1,116 milion manmeri bilong olgeta hap em ol i sot long kaikai. Wanpela nius (O Estado de S. Paulo) i tok, ‘Ol saveman i tok, as bilong dispela hevi i no olsem i no gat kaikai—graun i save kamapim planti kaikai bilong inapim olsem 5 tausen milion man. Tasol ol man i no gat mani bilong baim ol kaikai samting.’ Ating bikpela hangre i kamap long sampela hap, long wanem, gavman i pasim sampela rot bilong helpim ol man. Ol dispela gavman i no gat mani, long wanem ol i gat bikpela dinau long ol narapela kantri. Na dispela man bilong Frans i kamapim narapela as bilong dispela hevi na em i tok olsem: ‘Hangre i go bikpela moa, long wanem, planti man i lusim ples na ol i go sindaun long ol biktaun.’
Ol i Sindaun Wantaim Tasol Ol i No Marit
Wanpela nius bilong Paris (Le Monde) i tok, pasin bilong marit tru i go liklik long Frans. Long 1970 samting na i kam inap long nau, planti man na meri i laik sindaun nating wantaim na ol i no laik marit. Wanpela lain long Frans i save skelim ol manmeri i marit, na dispela lain i tok, planti bilong ol dispela marit em pastaim ol i bin sindaun nating wantaim; sampela i bin sindaun nating wantaim inap planti yia na bihain ol i marit. Planti man na meri i ting, sapos ol i sindaun wantaim pastaim na bihain ol i marit, bai marit bilong ol i ken i stap gutpela. Tasol dispela kain tingting i no stret. Dispela nius i tok moa olsem: ‘Man na meri i sindaun nating wantaim na bihain ol i marit, marit bilong ol i no save stap gut. Dispela kain pasin olsem stap wantaim pastaim na bihain marit, i no gutpela, na planti bilong ol i brukim marit.’ Ol man i save skelim dispela samting ol i tok, ol man na meri i stap wantaim paslain long ol i marit, planti bilong ol i save katim marit, winim ol man na meri i marit na ol i no bin sindaun wantaim paslain long ol i marit.
Ol Man Bilong Kisim Rat
Ol man bilong wokim gaden long Nadu, long India, olsem ol fama, ol i gat hevi long planti rat i kamap na ol i bin mekim wok long kain kain marasin i gat gip bilong stretim dispela hevi na pinisim ol dispela rat. Tasol ol i no win, olsem na ol fama i singautim wanpela lain, em ol Irula, bilong mekim dispela wok bilong pinisim ol rat. Wanpela nius (India Today) i mekim dispela stori. Long namba wan yia bilong ol Irula i kirapim dispela wok, ol i bin kisim inap 140,000 rat long hap graun i bikpela olsem 40,000 hekta. Na nius i tok, ‘Ol Irula i no mekim wok long ol marasin i gat gip long en, nogat; ol i mekim wok long narapela kain pasin bilong ol.’ Ol i save putim wanpela samting bilong pasim maus bilong hul bilong ol rat na ol i kisim ol rat. Ol i kisim planti rat tru, olsem na ol i tingting long tanim mit bilong rat i kamap kaikai bilong ol kakaruk na ol pis, na tu, ol inap mekim wok long skin bilong ol dispela rat. Dispela nius i tok moa olsem, dispela pasin bilong ol Irula bilong kisim ol rat em i gutpela, long wanem, ol i no ken tromoi bikpela mani long ol samting bilong kilim ol rat.
Ol i Hait na Salim Ol Pisin i Go
Wanpela lain (The World Wildlife Fund) i tok, ol man i bin hait na kisim olsem 225,000 pisin na salim i go long ol narapela kantri. Pe bilong olgeta em inap olsem K50 milion samting. Sampela bilong ol dispela pisin, ol man i kisim long pasin hait i go long ol narapela kantri, na sampela ol i bin giaman long wokim ol pas bilong tok orait long kisim ol pisin long olgeta yia. Ol man i kisim ol kalangar long bus bilong Afrika, Indonesia, Meksiko, Saut Amerika, na ol i baim i go long liklik pe, inap olsem sampela kina tasol. Wanpela nius (The Wall Street Journal) i tok: ‘Taim ol dispela pisin i go kamap long ol dispela kantri, olsem long hap bilong Yurop o Amerika samting, pe bilong sampela pisin i antap tru. Pe bilong wanpela kain pisin (ol i kolim Imperial Amazon bilong Dominika) long ol ailan Karibian, em i olsem K100,000 long wanpela.’ Ol i tok, nau i no gat planti kalangar i stap long bus na klostu ol i pinis. Na planti tru bilong ol dispela pisin ol i bin kisim hait, ol i dai pinis taim ol i no kamap yet long ol hap ol i mas i go long en, long wanem ol man i no bin lukautim gut ol.