Sampela Tok i Kam Long Olgeta Hap
40,000 Pikinini i Bagarap Long Olgeta De
Wanpela nius bilong Paris (International Herald Tribune) i kamapim tok bilong dairekta bilong wanpela lain bilong Yunaitet Nesen (UNICEF), em i tok, “Hangre, o bikpela san, o narapela samting i save bagarapim graun, i no bin kilim i dai 40,000 pikinini long olgeta wan wan de. Tasol bikpela sik na hangre, dispela tupela samting i kilim i dai ol dispela bikpela lain pikinini long olgeta wan wan de.” Dispela nius i kamapim tok bilong bikpela bung bilong UNICEF na em i tok, as bilong dispela hevi em olsem: Planti man long ol kantri i no gat planti wok bisnis o mani samting, ol i ting pikinini i kisim sik na i dai em i “samting olgeta pikinini i kisim na i no gat rot long abrusim dispela samting.” Ol i kamapim dispela bikpela bung, long wanem ol i ting insait long 10-pela yia antap, inap olsem 1,500 milion pikinini bai kamap na ol i laik helpim sindaun bilong ol dispela pikinini. Dispela nius (Tribune) i tok, “ol dispela pikinini bai kamap long graun em i bikpela lain tru na yumi mas lukautim gut ol.”
“Klos Pait Bilong Nau”
Pasin raskol i kamap bikpela tru long biktaun Nu Yok olsem na planti man i baim ol klos samting em inap pasim katres bilong gan. Wanpela nius (Daily News) i tok, “ol man i tromoi bikpela mani long baim klos pait bilong lukautim skin bilong ol yet na pikinini bilong ol na bilong dok bilong ol tu.” Ol man inap baim kot ren long K1,000, na ambrela long K1,000 i go inap K2,000, na kolsiot long K800 i go inap K2,500, na kolsiot ol i wokim long skin bilong sampela animal ol inap baim long K12,000 i go inap K80,000. Insait long ol dispela klos ol i putim narapela kain laplap ol i kolim Kevlar. Em i no hevi, tasol strong bilong en i winim ain na em inap pasim katres bilong gan. Dispela nius (Daily News) i tok, ol dispela kain klos samting em “klos pait bilong nau yu mas pasim sapos yu wokabaut long ol rot bilong Nu Yok.”
“Rait Nating”
Wanpela nius (Diario Las Américas) ol i raitim long tok Spen na ol i wokim long Maiami, long hap bilong Florida long Amerika, i tok, gavman bilong Meksiko em i kamapim wanpela lo olsem man i no ken smok long ol ples em planti man i stap long en. Gavman i putim dispela lo bilong helpim ol man i no save smok, na dispela lo i tok ol man i ken smok long sampela hap tasol. Dispela nius (Diario) i tok moa olsem: Sampela man i ting dispela “tok em i wanpela rait nating tasol na i no gat strong, long wanem, sapos man i smok em i no ken baim kot, na ol polis i no ken strong long ol man i mas bihainim dispela tok.” Na dispela nius i tok, planti man i no bilipim dispela tok bilong gavman na ol i no bihainim.
Ol i No Laik Bai Ol Man i Kamap Planti
Long nau long olgeta hap graun i gat 5,300 milion manmeri i stap. Ol man i ting taim yia 2000 i kamap dispela namba bai go antap olsem 6,250 milion. Wanpela nius bilong Saut Amerika (Visión) i tok, ol kantri i no gat planti wok bisnis long en bai ol i kisim bikpela hevi tru taim lain bilong ol i go bikpela moa. Ol dispela nupela pikinini bihain ol bai kamap, 90 pesen bilong ol bai kamap long ol kantri i no gat planti wok bisnis long en. Dispela nius (Visión) i tok, long olgeta hap bilong graun, insait long 20 biktaun i gat bikpela lain i stap, 17 bilong ol dispela biktaun i stap long ol kantri i no gat planti wok bisnis long en. Sampela saveman i tok, taim yia 2025 i kamap, bai i gat 740 milion manmeri i stap long Saut Amerika. Ol man i kamap planti long Bolivia, Kosta Rika, Gwatemala, Nikaragua, Paragwai, Veneswela—em ol kantri long Saut Amerika. Tasol long kantri Ajentina, na Kuba, na Yurugwai long Saut Amerika i no gat planti man i kamap. Dispela nius (Visión) i tok, “namel long 1985 na 1990 lain bilong Saut Amerika i go bikpela olsem 20.77 pesen.”
Ol i No Skelim Gut Ol Samting
Wanpela nius bilong Saut Amerika (Visión) em i kamapim tok bilong Mariano Grondona na i tok, bikpela beng (World Bank) i tok, 1,100 milion manmeri long olgeta hap graun i stap rabis. Long olgeta wan wan de ol dispela manmeri i save kisim klostu wan kina tasol long wok mani bilong ol. Long Saut Amerika i gat 450 milion manmeri i stap na klostu 90 milion i stap rabis. Na dispela man Grondona i tok, Saut Amerika “i no skelim gut ol hevi samting bilong ol manmeri.” Na em i tok, Saut Amerika i gat planti maniman na planti rabisman i stap wantaim, winim ol narapela kantri.
Ol Liklik Pikinini i Gat Bikpela Bel Hevi
Wanpela nius bilong Kolombia (El País) i tok, long ples Kali 29 pesen bilong ol pikinini ol i bringim i kam long klinik ol i gat sampela sik long tingting, na dokta i mas helpim ol. Sampela saveman i ting planti as bilong dispela em ol hevi i kamap insait long famili na pikinini i pilim nogut, na em i bel hevi, na em i no lain kwik long wanpela samting, o em i no slip gut, na sampela samting moa. Dispela nius i tok moa olsem, dispela ol sik long tingting i painim planti pikinini i no winim yet 9-pela krismas. Ol man i skelim dispela samting i tok, sapos papa o mama i no wanbel gut wantaim liklik pikinini olsem bebi, ating em tu inap kisim bikpela bel hevi.
Toksave Bilong Ol Man i Dring Kofi
Insait long tupela yia ol saveman i glasim 45,589 man i save dring kofi. Wanpela nius (The New England Journal of Medicine) i tok, ol i no painim olsem kofi i save givim sik bilong klok long man. Long nau sampela ol narapela saveman i skelim dispela samting na ol i painim olsem pasin bilong dring kofi i save kamapim sik long klok bilong man, tasol dispela lain em pastaim yumi kamapim tok bilong ol, ol i tok, nogat. Presiden bilong wanpela asosiesen i save skelim ol sik bilong klok bilong man (American Heart Association), em i tingim dispela 2-pela yia ol i bin skelim pasin bilong dring kofi na sik bilong klok na em i tok: ‘Mi amamas long toksave long sikman, i orait sapos em i laik dring kofi.’ Tasol nau sampela saveman moa i skelim dispela samting na ol i painim olsem ol man i save dring planti kofi, winim 4-pela kap long olgeta wan wan de, ol inap kisim sik long klok.
Ol Pikinini Bilong Rot
Wanpela nius (The Toronto Star) i tok, “polis na wanpela lain olsem welfe i ting 10,000 pikinini i no gat ples slip na ol i raun nating long ol rot bilong Metro Toronto.” Ol man i save skelim dispela hevi i tok, klostu olgeta, olsem 90 pesen, bilong olgeta yangpela meri i save slip long rot ol i bin tok, “taim ol i no kisim yet 12-pela krismas wanpela wanlain o wantok i bin bagarapim em.” Ripot i tok planti bilong ol dispela pikinini i bin ranawe, long wanem “hevi i bin kamap insait long famili—olsem papamama i paitim em nogut tru, o wanpela insait long famili i bin mekim pasin sem long em, o papamama i dring—olsem na ol dispela pikinini i ting, ol hevi inap painim ol taim ol i raun long rot i no winim ol dispela bikpela hevi ol i bin painim long haus.” Ol saveman i pret na ting dispela lain pikinini bilong rot bai mekim na sik AIDS bai go bikpela tru long lain bilong ol yangpela. Dispela nius i tok moa olsem, “long olgeta tupela tupela bilong ol dispela yangpela i save mekim pasin pamuk, wanpela i bin slip wantaim 10-pela man. Na 30 pesen bilong ol manki, ol wan wan i bin pamuk wantaim 50 meri. Planti yangpela pamukmeri i save singautim pe (olsem 70 pesen) na ol yangpela pamukman i save singautim pe (olsem 50 pesen) i tok ol i bin slip wantaim planti poroman, winim 100.”