Ol Tok Pait Long Kopi

WINIM 1,500,000,000 kap kopi ol man long olgeta hap i save dring long olgeta de! Ol man i wok yet long dring kopi, maski inap planti yia ol saveman i tok, ol man i save dring kopi bai kisim planti kain sik, olsem sik bilong klok, o sik daiabitis, o ol kain kain sik kensa. Tasol yumi laik save, bilong wanem sampela man tasol i lusim pasin bilong dring kopi, na planti i no mekim olsem?

Winim 40 yia nau, ol saveman bilong skelim kopi ol i bin raitim olsem 500 ripot i stori long ol samting i save painim ol man i dring kopi. Tasol ol samting i save painim ol man, em i narapela kain long samting ripot i stori long en. Bilong wanem i olsem? Long wanem, wanpela kap kopi i gat olsem 500 narapela narapela kain marasin i stap insait long en. Tasol planti ripot i stori long wanpela marasin tasol, em marasin kafin.

Taim sampela man i dring kopi, dispela marasin kafin i mekim na ol i no inap slip, na ol i belhat nating, na tingting bilong ol bai i wokabaut. Tasol olsem wanem long sik kensa? Wanpela nius (Which?) i tok: “Sapos wanpela saveman i raitim wanpela ripot na em i tok, marasin kafin inap kamapim sik kensa, orait narapela man bai raitim narapela ripot i tok, dispela tok i no stret.” Olsem na wanpela man i skelim dispela pasin na em i tok, ‘planti man i no strong long lusim pasin bilong dring kopi.’ Ol man i save tu olsem lip ti na mailo na koka kola samting i gat marasin kafin i stap long en. Dispela nius (Which?) i tok olsem, ‘ti i gat planti marasin kafin winim bilong kopi.’

I gat sampela samting hia ol man bilong dring kopi i ken tingim. Wanpela nius (The Times) bilong Landon i kamapim tok bilong wanpela kain dokta bilong Inglan, em i tok: “Kopi ol i boilim stret insait long hatwara, em inap putim sampela gris kolestrol long skin inap olsem 10 pesen samting, winim kopi ol i bin sipim na i no bin stap insait long hatwara.” Ol i tok, dispela kain gris i save kamapim planti kain sik bilong klok. Dispela nius (The Times) i tok: ‘Gutpela sapos ol man i dring kopi ol i wokim nupela, na no ken dring kopi ol i hatim long paia planti taim.’

Olgeta saveman i wanbel long tok olsem ol man i no ken dring planti kopi. Planti dokta i tok, 6-pela kap kopi long wanpela de em inap, na no ken winim dispela skel. Ol man i gat sik long klok o lewa o mak bilong blut i antap, ol i no ken dring planti kopi olsem. Ol meri i gat bel, na ol meri i gat pikinini i stap yet long susu, ol i no ken winim wanpela kap kopi long wanpela de.