Olsem Wanem? Kofi i Mekim Mak Bilong Kolestrol i Go Antap?

WANPELA MAN LONG BRASIL I RAITIM DISPELA STORI BILONG KIRAP!

OL SAVEMAN bilong wanpela yunivesiti (Wageningen Agricultural University) long Netelan i tok, sapos yu dring kofi ol i no bin sipim, dispela bai mekim mak bilong kolestrol long skin bilong yu i go antap.

Bikpela tok em “ol i no bin sipim.” Bilong wanem dispela i bikpela samting? Nius Research Reports bilong wanpela lain (Netherlands Organization for Scientific Research) i tok, pikinini kofi i gat wanpela marasin long en ol i kolim kafestol na dispela marasin i save mekim mak bilong kolestrol i go antap. Taim man i kapsaitim hatwara long kofi ol i memeim pinis, marasin kafestol i save kamaut long kofi. Wankain samting i save kamap taim ol i boilim kofi planti taim olsem ol i save mekim bilong wokim kofi bilong Turki, o taim ol i sipim kofi long samting ol i wokim long ain, olsem sospen bilong ol Frans bilong wokim kofi na ol i no sipim long pepa. Taim ol i no sipim kofi long wanpela kain pepa, marasin kafestol i save go long kofi.

Insait long wanpela kap kofi em ol i no bin sipim, i gat 4-pela miligram marasin kafestol, na dispela inap mekim mak bilong kolestrol i go antap inap wan pesen. Kofi espreso tu i gat marasin kafestol long en, long wanem, ol i no save sipim dispela kofi long pepa. Tasol sapos yu dring liklik kap espreso tasol, mak bilong kolestrol i no go antap tumas. Long liklik kap espreso i gat liklik marasin kafestol long en, ating wanpela o tupela miligram tasol. Tasol nius Research Reports i tok, sapos man i dring 5-pela liklik kap espreso long wanpela de, dispela inap mekim mak bilong kolestrol i go antap inap 2 pesen.

Bikpela samting em olsem: Kofi ol i sipim long pepa i no gat marasin kafestol long en.