Kaikai Bilong Yu Em Inap Kilim Yu i Dai?

‘Bikpela hap (olsem 95 pesen) bilong wanpela bikpela rop i karim blut i go long klok em i pas. I no longtaim na yu inap kisim hat-atek.’

JOE i gat 32 krismas. Em i kirap nogut long harim dokta i tok olsem taim em i glasim em bilong painimaut as bilong pen long bros bilong em. Klostu 50 pesen bilong ol man em sik bilong klok i kilim ol i dai, ol i no save ol i gat dispela sik.

Tasol wanem samting i mekim na Joe i kisim dispela sik? Joe i tok: ‘Inap 32 yia mi bin kaikai olsem planti manmeri bilong Amerika ol i save kaikai, em “planti abus na planti kaikai ol i wokim long susu.” Wanpela samting i no bin kamap klia tru i olsem: Kaikai bilong ol Amerika inap givim sik long mi.’

Kaikai Bilong Yu na Sik Bilong Klok

Olsem wanem? Kaikai bilong Joe i no gutpela? Ol kaikai bilong em i gat bikpela hap kolestrol na gris. Taim Joe i yangpela i kam inap long taim em i bikpela, ol samting em i bin kaikai i bin wok long givim sik long klok bilong em. Long olgeta 10-pela bikpela sik i save kilim i dai ol man long Yunaitet Stets, ol kaikai i gat bikpela gris tumas i as bilong 5-pela. Namba wan bikpela sik bilong kilim i dai ol man em sik bilong klok.

Long 7-pela kantri ol i bin glasim 12,000 man i gat 40 i go inap 49 krismas, na ol i kisim save olsem kaikai inap kamapim sik bilong klok. Save ol i kisim i narapela kain tru, olsem: Inap 20 pesen bilong ol kalori ol man bilong Finlan i save kaikai em i gris na dispela i kamapim bikpela kolestrol long blut bilong ol, tasol inap 5 pesen bilong ol kalori ol man bilong Japan i save kaikai em i gris na ol i no gat bikpela kolestrol long blut. Na planti bilong ol dispela man bilong Finlan ol i kisim hat-atek, winim namba bilong ol man bilong Japan i kisim hat-atek inap 6-pela taim!

Tasol nau long Japan planti man i gat sik bilong klok; bipo nogat. Inap sampela yia planti man moa long dispela hap ol i baim ol kaikai bilong Wes olsem hambega samting, olsem na pasin bilong ol Japan long kaikai planti gris olsem gris bilong bulmakau, sipsip, pik samting, em i bin go antap inap 800 pesen. Long nau mak bilong kolestrol long blut bilong ol manki bilong Japan em i bikpela tumas, winim ol manki bilong Amerika em ol i gat wankain krismas! Em nau, gris na kolestrol long kaikai inap kamapim sik bilong bagarapim man na ol inap kamapim tru sik bilong klok.

Wok Bilong Kolestrol

Kolestrol em i wanpela waitpela gris i bikpela samting bilong helpim yumi long i stap laip. Kolestrol i stap long ol sel bilong man na animal. Lewa bilong yumi i save kamapim kolestrol, na sampela kaikai bilong yumi i gat bikpela hap kolestrol na sampela i gat liklik hap kolestrol. Blut i save kisim kolestrol i go long ol sel long rot bilong ol samting ol i kolim lipoprotin, em kolestrol na gris na protin wantaim. I gat tupela kain lipoprotin bilong karim bikpela kolestrol bilong blut; em ol lipoprotin LDL na ol lipoprotin HDL.

Ol lipoprotin LDL i gat bikpela gris kolestrol. Taim ol i raun insait long blut ol i save go insait long ol sel long rot bilong ol liklik samting i pas long arere bilong ol sel. Long dispela hap strong bilong ol i pinis na sel yet i mekim wok long ol. Klostu olgeta sel long bodi i gat ol dispela kain liklik samting na ol i save pulim sampela LDL. Tasol lewa em i bilong helpim ol dispela liklik samting i pas long arere bilong ol sel long rausim long blut inap 70 pesen bilong LDL.

Tasol ol lipoprotin HDL i save pulim bikpela hap kolestrol. Taim ol i raun insait long blut ol i wok long pulim ol hap kolestrol i stap nating na kisim i go long lewa. Lewa i wok long pinisim strong bilong kolestrol na rausim long bodi. Olsem na Man bilong wokim yumi em i bin wokim yumi gutpela tru inap long bodi bilong yumi i ken mekim wok long kolestrol em i mas kisim na rausim kolestrol i stap nating.

Hevi i save kamap taim blut i gat planti lipoprotin LDL long en. Dispela i mekim na strongpela gris inap kamap long arere bilong ol rop bilong blut. Taim strongpela gris i kamap planti, ol rop bilong blut i go liklik, olsem na blut i gat oksijen long en i no inap ran gut long ol dispela rop. Em nau, sik atherosclerosis i kamap. Isi isi dispela sik i nogutim skin bilong man na planti yia bihain man i save em i gat sik. Wanpela mak bilong en em pen i save kamap long bros (angina pectoris) olsem Joe i bin kisim.

Taim wanpela bikpela rop i karim blut i go long klok em i pas olgeta, long wanem, wanpela liklik hap blut i kamap strong, hap bilong klok i save kisim blut long dispela rop em i save dai. Em nau, wantu tasol na man i kisim hat-atek; planti man i dai long hat-atek. Na maski wanpela bikpela rop i karim blut i go long klok i pas liklik tasol, dispela inap kilim sampela liklik hap skin insait long klok, tasol i no olsem man bai kisim pen long dispela. Sapos sampela bikpela rop i karim blut i pas long ol narapela hap bilong bodi, dispela inap kamapim sik strok o sua nogut long lek o bagarapim wok bilong kidni tu.

Olsem na ol dokta samting ol i save tok olsem, lipoprotin LDL em i no gutpela kolestrol na lipoprotin HDL em i gutpela kolestrol. Sapos dokta i glasim blut bilong wanpela man na i gat bikpela hap LDL long en o HDL i no inap, em inap kisim sik bilong klok.a Sapos dokta i kisim liklik hap blut bambai em i ken glasim, man inap save em bai kisim hat-atek o nogat longpela taim paslain long em i kisim sik (angina pectoris) olsem pen long bros samting. Olsem na i bikpela samting long was gut long mak bilong kolestrol long blut. Orait, nau yumi ken tingim kaikai bilong yumi na olsem wanem dispela inap mekim na kolestrol i no ken kamap bikpela long blut o em i no ken go daun tumas long en.

Kolestrol Long Blut na Kaikai

Kolestrol i wanpela gris i stap long ol kaikai olsem abus, kiau, pis, kakaruk, na ol kaikai ol i wokim long susu bilong bulmakau olsem bata samting. Tasol ol kaikai ol i wokim long ol samting bilong gaden ol i no gat kolestrol.

Skin yet i save kamapim kolestrol em i mas kisim, olsem na samting yumi kaikai na i gat kolestrol long en, dispela i givim sampela kolestrol moa long skin. Klostu olgeta kolestrol long kaikai bilong yumi i save go long lewa. Taim kolestrol i kamap long lewa, lewa i save mekim wok long en na lewa i no kamapim planti kolestrol bilong en yet. Dispela i mekim na mak bilong kolestrol long blut i stret.

Tasol olsem wanem sapos kaikai bilong yumi i gat planti tumas kolestrol na lewa i no inap mekim wok hariap long en? Bikpela hap kolestrol bai go stret long ol sel bilong ol bikpela rop i karim blut. Taim em i mekim olsem, strongpela gris i kamap planti na ol rop i go liklik na blut i gat oksijen long en em i no inap ran gut long ol dispela rop. Na bikpela sik tru i save kamap taim skin i wok yet long kamapim wankain mak bilong kolestrol em i save kamapim long olgeta taim na yumi wok long kisim ol kaikai i gat bikpela kolestrol long en. Long olgeta 5-pela 5-pela manmeri long Yunaitet Stets, wanpela i gat dispela hevi.

Olsem na yu gat gutpela tingting sapos yu no kisim planti kaikai i gat kolestrol long en. Tasol wanpela kain gris (saturated), em narapela samting long kaikai em inap senisim tru mak bilong kolestrol long blut.

Gris na Kolestrol

I gat tupela kain gris: Gris nogut (saturated) na gris i gutpela liklik (unsaturated). Sampela gris i gutpela liklik olsem gris monounsaturated na polyunsaturated. Taim yumi kaikai gris nogut, mak bilong kolestrol long blut i save go bikpela. Dispela kain gris i mekim olsem long 2-pela rot: Em i save kamapim bikpela kolestrol moa long lewa na daunim ol liklik samting bilong LDL long ol sel bilong lewa, olsem na LDL i no inap raus hariap long blut.

Gris nogut i stap long ol kaikai olsem bata, yelopela hap bilong ol kiau, susu, aiskrim, abus, na kakaruk samting. Na bikpela hap bilong en i stap long sokolat, kokonas, wel bilong kokonas, sampela kain majarin, na wel bilong welpam. Dispela kain gris i strong maski em i no stap long bokis ais.

Tasol gris i gutpela liklik i olsem wel i no strong taim em i no stap long bokis ais. Ol kaikai i gat gris olsem monounsaturated o polyunsaturated long en, em inap helpim mak bilong kolestrol bilong blut long i go daun sapos yu kaikai dispela olsem senis bilong ol kaikai i gat gris nogut long en.b I gat bikpela hap gris polyunsaturated long wel bilong kon na long wel bilong pikinini bilong sanplaua, na dispela kain gris i save daunim gutpela kolestrol na kolestrol nogut, tasol bikpela hap gris monounsaturated long wel bilong oliv na long wel ol i kolim kanola, ol i save daunim tasol kolestrol nogut, ol i no save mekim olsem long gutpela kolestrol.

Tasol skin bilong yumi i mas kisim sampela gris. Sapos nogat, yumi no inap kisim vaitamin A, D, E, na K. Tasol gris skin i mas kisim i liklik tasol, na yumi inap kisim taim yumi kaikai ol samting bilong gaden, na ol bin, wit na rais samting, na prut. Olsem na sapos yumi no kisim planti kaikai i gat gris, dispela i no save pasim skin long kisim ol gutpela marasin samting em i mas kisim.

Lusim Bikpela Hap Gris na Kolestrol

Olsem wanem? Olgeta taim mak bilong kolestrol bilong blut bai go antap sapos man i kisim ol kaikai i gat bikpela gris na kolestrol? I no olsem. Thomas, em yumi bin toktok long em long namba wan stori, em i bin askim dokta long glasim blut bilong em bihain long em i bin toktok wantaim Kirap! Em i kisim save olsem mak bilong kolestrol long blut bilong em i orait. I olsem lewa bilong em inap bosim mak bilong kolestrol.

Tasol dispela i no makim olsem Thomas i no ken kisim sik. Long dispela taim ol lain bilong skelim dispela samting ol i kisim save olsem, kolestrol yumi kisim long kaikai em inap kamapim sik bilong klok maski em i no mekim wanpela samting long kolestrol bilong blut bilong yumi. Dokta Jeremiah Stamler bilong Yunivesiti Notwesten, em i tok: “Ol kaikai i gat planti kolestrol long en i save kamapim sik bilong klok maski mak bilong kolestrol bilong blut bilong sampela manmeri i no bikpela. Olsem na olgeta manmeri i mas tingting gut na no ken kisim planti kaikai i gat kolestrol long en maski mak bilong kolestrol bilong blut i antap o nogat.”

Na yumi mas tingim gris long kaikai tu. Sapos blut i gat planti gris tumas, long wanem, man i bin kisim kaikai i gat gris i gutpela liklik o gris nogut long en, dispela bai mekim ol retpela sel long blut bilong em i pas wantaim. Taim blut i strong olsem, em i no inap ran long ol liklik rop bilong blut, olsem na ol liklik hap skin insait long bodi i no inap kisim ol gutpela marasin ol i mas kisim. Na ol sel i pas wantaim na wokabaut long ol rop bilong blut, ol i paulim wok bilong oksijen na oksijen i no inap kamap gut long arere bilong ol rop bilong blut. Dispela i save bagarapim ol rop bilong blut na i no hatwok long strongpela gris i ken kamap. Tasol i gat narapela samting nogut sapos yumi kisim ol kaikai i gat bikpela gris tumas.

Sik Kensa na Kaikai

Dokta John A. McDougall i tok: “Olgeta kain gris​—⁠maski em gris i gutpela liklik o gris nogut​—⁠ol i save helpim sampela kain sel bilong sik kensa long kamap.” Wanpela lain i bin glasim sik kensa i save kamap long ol rop bilong bel na long susu, na save ol i kisim long dispela long ol kantri bilong Wes, em ol hap ol i save kaikai planti gris, na long ol kantri i stap rabis, dispela i mekim na ol i tingting planti. Olsem: Long Yunaitet Stets, sik kensa long rop bilong bel em i namba 2 bikpela sik kensa i save painim ol man na meri wantaim, na sik kensa long susu em i namba wan bikpela sik kensa i save painim ol meri.

Wanpela lain (American Cancer Society) i tok, taim sampela lain manmeri i lusim as ples na ol i go sindaun long wanpela kantri em planti manmeri long en i gat sik kensa, bihain namba bilong ol manmeri long ol dispela lain i kisim sik kensa i wankain olsem ol lain bilong dispela ples yet sapos ol i bihainim nupela sindaun na kisim pasin bilong ol long kaikai. Wanpela buk bilong dispela lain i tok: “Ol Japan i go sindaun long Hawaii ol i wok long kisim sik kensa olsem ol man bilong Wes i save kisim, olsem: Planti i kisim sik kensa long ol rop bilong bel na long susu, na wan wan tasol i kisim sik kensa long bel. Tasol long Japan, planti i kisim sik kensa long bel na wan wan tasol ol i kisim long ol rop bilong bel na long susu.” Olsem na sampela samting i makim olsem kaikai em inap kamapim sik kensa.

Sapos ol kaikai yu save kisim i gat planti gris na kolestrol na ol kalori long en, yu mas mekim sampela senis. Gutpela kaikai inap helpim skin long i stap strong na no ken sik tumas, na em inap stretim sampela sik yu bin kisim, long wanem, yu no bin kaikai gut. Taim yumi tingim bikpela mani wanpela man i mas tromoi sapos dokta i mas katim em bilong stretim klok​—⁠em olsem 40,000 dola samting long Yunaitet Stets​—⁠ating yumi gat laik long kisim gutpela kaikai, a?

Sapos yu tingting gut long ol kaikai yu kisim, yu inap lusim skin, na skin bai pilim olsem em i strong moa, na yu inap helpim skin long abrusim o stretim sampela bikpela sik. Stori i kamap bihain long dispela bai toktok long dispela samting.

[Ol Futnot]

[Sat long pes 8]

Sampela bikpela rop i karim blut: (1) op olgeta, (2) pas liklik, (3) klostu i pas olgeta