Gutpela Kofi—Ol i Kisim Long Diwai na Wokim Dring Long En
WANPELA MAN LONG BRASIL I RAITIM DISPELA STORI BILONG KIRAP!
OL MAN bilong Finlan i tok, em nambawan dring bilong ol. Long planti man long Itali, pasin bilong wokim dispela dring em bikpela samting. Long Frans, Jemani, Meksiko, na Yunaitet Stets, na long planti narapela kantri, ol man i mas kisim dispela dring wantaim kaikai bilong moningtaim. Ti em i namba wan dring ol man i save laikim tru, na dispela dring em i namba tu dring ol i save laikim. Em wanem dring? Long olgeta 3-pela 3-pela man, wanpela bai tok—em kofi tasol!
Maski yu yet i gat wanem kain tingting long kofi, planti man i save laikim dispela dring. Ol i save mekim wanem bambai ol man inap kisim gutpela kofi? Kofi i save kamap we? Ol i save mekim wanem ol samting long pikinini kofi bilong kamapim kofi bilong dring? Kain kain kofi i narapela narapela olsem wanem? Wanem ol samting i makim pe bilong kofi i bikpela o liklik? Na wanem samting i mekim na kofi i gutpela, na i gat gutpela swit long en?
Kofi i Kam Long We?
Bilong wokim kofi, ol i save kukim pikinini bilong diwai kofi long aven. Lip bilong diwai kofi i grinpela na em i save kamap long ol hap i hat liklik. Taim diwai i putim plaua, ol naispela waitpela plaua i gat gutpela smel olsem plaua jasmin i pulap long en. Bihain long sampela de tasol, ol liklik grinpela pikinini kofi i kisim ples bilong ol dispela plaua, na isi isi ol i wok long i go bikpela na kala bilong ol i senis. Pastaim ol i grinpela, na taim ol i mau pinis ol i braunpela, o retpela, o yelopela.
I gat 70 narapela narapela kain diwai kofi, sampela i liklik na sampela i longpela inap 12-pela mita. Tasol tupela kain diwai kofi tasol i save kamapim klostu olgeta (98 pesen) kofi ol man i save dring, wanpela em Arabika, na narapela em Robasta. Ol man i bin mekim ol samting long dispela tupela kain diwai kofi bilong kamapim ol narapela diwai kofi em ol i save karim planti pikinini moa, na ol i ken stap gut long taim bilong san na ren, na ol inap sakim planti sik, olsem wanpela kain sik ol i kolim kofi ros. Gutpela kofi i save kam long ol diwai Arabika, em ol i planim long ol maunten. Longpela bilong ol dispela diwai em 4-pela i go inap 6-pela mita, tasol ol man i save katim ol han bilong ol dispela diwai bambai longpela bilong en i stap olsem 4-pela mita. Long diwai Robasta ol i wokim paura kofi bilong tanim kwiktaim wantaim hatwara. Dispela kofi i gat bikpela hap marasin kafin long en na i no gat bikpela swit bilong en.
Kamapim Gutpela Kofi
Orait, ol i mas mekim wanem bilong kamapim gutpela kofi? Ol i mas mekim bikpela wok! Pastaim ol i planim pikinini diwai long ples bilong planim na lukautim ol nupela diwai. Long dispela ples, ol diwai inap kisim hap lait bilong san inap long skel bilong ol. Bihain long 6-pela mun, ol i planim ol liklik diwai long graun em ol i bin putim marasin long en bambai graun i gat gris long en. Ol i planim ol liklik diwai kofi, tasol ol i no lainim stret; lain kofi i baut liklik olsem mak bilong maunten. Na ol i no planim klostu klostu bambai ol diwai i gat spes bilong i go bikpela, na ol man inap lukautim ol diwai na graun ol diwai i stap long en, na ol i no hatwok long kisim kofi.
Bilong ol diwai kofi i ken karim planti pikinini, ol man i mas lukautim ol diwai long yia olgeta. I gat wok bilong rausim gras nogut i laik kisim gris bilong graun, na wok bilong putim marasin long ol diwai bilong pasim ol sik na ol binatang, olsem binatang bin-bora na sik kofi ros.
Inap tupela yia i mas pinis pastaim, na nupela diwai kofi i kirap karim pikinini. Wok i go bikpela long dispela taim bilong kisim kofi. Em gutpela long kisim long han olgeta wan wan kofi i mau, olsem ol i save mekim long Kalombia na Kosta Rika.
Pikinini kofi ol i bin kisim long han ol i save putim long wanpela masin bilong rausim mit i karamapim ol pikinini kofi. Bihain ol i putim kofi long ol tang, na ol i stap long ol tang wanpela i go inap 3-pela de, na insait long dispela hap taim marasin i stap long kofi i mekim na mit i stap yet long en i save sting. Bihain ol i wasim kofi bilong rausim ol liklik hap mit i stap yet. Bilong mekim kofi i go drai ol i putim sampela long ol tebol samting i stap long san, na sampela insait long wanpela masin i gat hatpela win long en. Bihain wanpela masin i save rausim skin bilong kofi i drai pinis. Pasin bilong larim kofi i sting pastaim, na ol i mekim wok long kofi i mau gut, dispela tupela samting i mekim na ol inap kamapim gutpela kofi i no pait.
Brasil i save kamapim planti kofi, winim ol narapela kantri, na long dispela hap planti man i gat gaden kofi ol i save rausim olgeta kofi long han long wankain taim, maski ol i mau o nogat. Long nau sampela man i gat gaden kofi i save mekim wok long masin samting bilong kisim kofi bambai ol i ken kamapim planti gutpela kofi. Wanpela rot bilong kisim kofi em man i save mekim wok long wanpela kain tul i wok long win o ges samting. Dispela tul i gat longpela han, na ol “pinga” bilong en i save meknais na i seksekim han bilong diwai kofi, na kofi i mau pinis, em tasol i save pundaun long graun.
Ol i mas kisim kofi i bin pundaun long graun, na long han o masin ol i rausim ol lip, na pipia, na ol liklik stik i pas long en. Ol i putim ol dispela kofi long ol bikpela basket em ol inap pulimapim 60 lita kofi long en. Ol i wasim ol dispela kofi long dram simen o long wanpela kain masin i bilong mekim dispela wok. Wok bilong wasim kofi i mekim na kofi i mau pinis i no pas moa wantaim ol olpela kofi i drai pinis na i sting liklik.
Taim ol i wasim pinis kofi, ol i putim long wanpela bikpela plua simen i stap ausait na larim i stap 15 i go inap 20 de bambai san i ken mekim drai. Insait long dispela hap taim, ol i save tanim kofi long olgeta 20 minit samting bambai kofi olgeta i drai gut. Sampela taim ol i mekim wok long ol masin bilong draim kofi bambai kofi i drai hariap. Ol i mas was gut taim ol i mekim dispela wok, nogut ol i mekim kofi i go drai tumas, na bai ol pikinini kofi i bruk, na nau ol i no inap wokim gutpela kofi long en. Taim kofi i gat liklik wara (11 o 12 pesen) i stap yet long en, wanpela masin bai rausim skin bilong en. Ol i putim ol dispela kofi long ol bek i kain olsem bek kopra; ol inap putim 60 kilo kofi long wanpela bek. Nau ol i kisim kofi i go long faktori, na long dispela hap ol i skelim kofi i wanem kain, na mekim ol narapela samting long en.
Wok Bilong Skelim Kofi i Wanem Kain
Ol wokman bilong faktori ol i rausim wan wan bek kofi long ol trak. Taim ol wokman i no putim yet ol bek kofi long wanpela hap, wanpela man i save sutim longpela hap ain i gat sap i go insait long olgeta wan wan bek na kisim sampela kofi. Ol i bungim ol dispela kofi man i kisim long olgeta bek kofi bilong wanpela trak, na ol i putim nem long en na makim kofi em wanem kain.
Taim ol i kisim pinis sampela kofi long ol bek, ol i bungim ol kofi bilong narapela narapela trak na mekim sampela samting moa long en bambai kofi i ken kamap gutpela moa. Pastaim kofi i save go long wanpela masin i rausim pipia, na bihain kofi i save go long wanpela masin i gat hul hul na dispela masin i tilim kofi i go long narapela narapela hap, olsem ol pikinini kofi i bikpela i go long narapela hap na ol liklik i go long narapela hap. Bihain kofi i go long wanpela tebol i save seksek, na dispela i tilim pikinini kofi—kofi i hevi i go long narapela hap na kofi i no hevi tumas long narapela hap. Bihain long dispela, ol i putim kofi i go long narapela masin i save rausim ol blakpela o grinpela kofi, em ol inap bagarapim swit bilong kofi. Ol i putim ol narapela kofi i go long wanpela bikpela rum, na bihain ol i putim insait long ol bek kofi. Ol bek i gat kofi em bikpela bilong en i wankain na ol i gutpela wantaim, ol i redi bilong salim long ol kampani i save maketim kofi i go long ol narapela kantri, o long ol man bilong ples i laik baim kofi.
Ol i mekim wanem long ol dispela liklik hap kofi ol i bin kisim pastaim long ol wan wan bek kofi? Ol i skelim em i wanem kain kofi, olsem em i gutpela tru o olsem wanem bambai ol i ken save hamas mani ol man i gat gaden kofi ol i ken kisim long kofi bilong ol. Pastaim ol i glasim gut 300 gram kofi bambai ol i ken save long ol samting nogut i stap long dispela kofi. Ol samting nogut i olsem: Kofi i blakpela, o grinpela, o i bruk, o i gat sampela pipia, olsem hap skin bilong kofi, o ol liklik stik, o ol liklik ston. Bihain long dispela, ol i putim kofi long sampela masin i gat ol hul hul long en na dispela i save tilim kofi—kofi i bikpela i go long narapela hap, na kofi i liklik i go long narapela hap.
Nau ol i traim swit bilong kofi long maus. Ol i kukim hap kofi long aven na memeim i go liklik, na putim liklik kofi insait long sampela glas. Ol i tanim kofi wantaim hatwara, na man i gat save long kofi em i harim smel i kamap long olgeta wan wan glas. Taim kofi i go kol liklik na meme bilong en i go daun long as bilong glas, nau em i mekim wok long wanpela kain spun bilong kisim liklik kofi. Em i putim kofi i go insait long maus bilong em na kwiktaim em i spetim, na hariap em i kisim kofi bilong narapela glas na i mekim wankain samting. Taim em i traim pinis kofi bilong olgeta wan wan glas, em i save makim wanem kofi i no pait (gutpela long maus na swit liklik), na wanem kofi i pait liklik (i sol).
Man i traim kofi em i mas i gat gutpela save long kofi, na maus bilong em i mas pilim gut swit bilong ol samting bambai em i ken save gut long swit bilong narapela narapela kofi. Pasin bilong traim kofi i helpim ol long makim pe bilong kofi, na tu, em i bikpela samting bilong helpim narapela wok bilong kamapim gutpela kofi.
Bungim na Kukim Kofi
Ol i bungim narapela narapela kain kofi em ol i no kukim yet bilong kamapim gutpela kofi i swit, na i gat gutpela smel, na gutpela kala long en. Ol man i mekim dispela wok, ol i hatwok long kamapim kofi em oltaim swit na smel bilong en i gutpela.
Bihain long dispela, ol i kukim ol pikinini kofi long aven, dispela samting tu i bikpela samting bilong kamapim gutpela kofi. Taim ol i kukim kofi, ol marasin samting i stap insait long kofi i save senis, na dispela i save kamapim gutpela smel bilong kofi. Ol inap kukim kofi long laik bilong ol yet bilong kamapim kofi i braunpela liklik, o braunpela olgeta, o blakpela liklik bilong kamapim kofi em swit bilong en i narapela narapela. Tasol sapos ol i kukim kofi tumas, skin bilong kofi bai lait, long wanem, ol gutpela wel bilong en i lus. Dispela bai mekim na kofi i pait long maus na i no gat gutpela smel.
Na tu, bilong kamapim gutpela kofi, em bikpela samting long wilwilim gut kofi. Pasin bilong wokim kofi bilong dring i makim wanem kain kofi bai ol i mekim wok long en—bikpela o liklik kofi. Olsem: Ol i save mekim wok long kofi ol i bin wilwilim liklik sapos ol bai mekim wok long laplap o pepa bilong sipim kofi. Na taim ol i wokim kofi bilong ol Turki em ol i no save sipim, ol i save wilwilim kofi i go liklik tru.
Taim ol i wilwilim kofi pinis, ol i putim kofi long karamap bilong en na salim i go long ol stua samting. Kofi ol i putim long plastik karamap i stap gut inap 60 de, tasol kofi ol i putim long karamap i pas strong na i no gat win insait long long en bai stap gut inap wanpela yia. Taim yu opim karamap bilong kofi, em gutpela long putim kofi insait long wanpela glas samting em maus bilong en i pas strong, na putim long bokis ais.
Wokim ‘Gutpela Kap Kofi’
Taim ol i mekim pinis wok bilong planim, lukautim, kisim kofi long gaden, skelim kofi i wanem kain, bungim narapela narapela kain wantaim, kukim, na wilwilim, yu ken mekim samting yu bin wet long en—yu ken wokim ‘gutpela kap kofi’! I gat planti narapela narapela pasin bilong wokim kofi na ol narapela narapela samting bilong wokim kofi long en, olsem kofi bilong ol Turki, na masin bilong sipim kofi, na moka bilong ol Itali, na planti moa. Tasol bilong wokim kofi, yu ken putim 6-pela i go 8-pela bikpela spun kofi long wanpela lita wara. Wokim kofi em inap long ol man i laik dring long dispela taim stret. Yu no ken mekim wok gen long meme bilong kofi, na taim yu mekim wok pinis long sospen bilong wokim kofi, na long samting bilong sipim kofi, yu mas wasim hariap ol dispela samting.
Long narapela taim yu sindaun na amamas long dring kofi em yu save laikim—maski em kafesinyo bilong Brasil, o tinto bilong Kalombia, o espreso bilong Itali, o kofi yu yet yu save wokim, tingim bikpela wok ol man i bin mekim bilong kamapim gutpela kofi—em ol i bin kisim long diwai na wokim dring long en.
[Piksa long pes 20]
Long ples bilong planim na lukautim ol diwai kofi, ol liklik diwai i kisim hap lait bilong san inap long skel bilong ol
[Piksa long pes 20]
Ol diwai kofi i bikpela pinis
[Piksa long pes 21]
Ol i rausim kofi long han bilong diwai
[Piksa long pes 21]
Wanpela man bilong kisim kofi long Brasil, em i rausim ol lip na pipia long kofi
[Piksa long pes 22]
Bilong makim kofi i gutpela olsem wanem, ol i skelim 300 gram kofi
[Piksa long pes 22]
Man bilong traim swit bilong kofi em i mas i gat gutpela save long dispela wok