Sampela Tok i Kam Long Olgeta Hap
Planti Man i Dai
Long 1965 samting, long olgeta 10-pela 10-pela man em ol man i kilim ol i dai, polis i painim 9-pela na putim ol long kot, tasol long nau long olgeta 10-pela 10-pela, ol i painim 7-pela tasol. Long Amerika long 1991 namba bilong ol man i kilim i dai narapela man i go antap tru. Nius i tok moa olsem, long olgeta hap graun dispela pasin bilong kilim i dai narapela man long Amerika i winim ol narapela kantri long hap bilong Wes. I olsem long olgeta 100,000 man, ol man i kilim i dai 10-pela. Long Inglan long olgeta 100,000 man, ol i kilim i dai 5-pela. Long Japan long olgeta 100,000 man, ol i kilim i dai wanpela. Olsem na long Amerika long olgeta 22 minit ol man i kilim i dai wanpela man long rot bilong gan, o naip, o pasim nek bilong em, o paitim em. Polis i gat bikpela wok tru. Wanpela nius (Time) i tok, taim ol polis samting i bungim pinis namba bilong ol manmeri em ol man i bin kilim ol i dai, ating dispela namba inap 25,000 samting.
Bagarap Long Haus Lotu Long Meksiko
I no longtaim i go pinis na wanpela bagarap i kamap long haus lotu Pentikostal long wanpela taun (El Charquillo) long Meksiko. Ol man i go lotu long nait na taim ol i lotu i stap, ges bilong sampela lam i lus. Ol man i pulim dispela win nogut na 30 bilong ol i dai. Wanpela nius (The Christian Century) i kamapim tok bilong 3-pela man i bin insait long dispela haus lotu taim dispela bagarap i kamap, na ol i tok, taim dispela hevi i kamap, pasto i no laik bai ol i lusim haus lotu, maski sampela i pilim sik, na ai bilong ol i raun, na sampela em skin bilong ol i hap i dai. Dispela 3-pela man i tok, pasto i tok ol i no sik, nogat, em Krais i stap wantaim ol o spirit bilong God i go insait long skin bilong ol na ol i pilim olsem ol i sik.
Pasim Strongpela Hat Taim Yu Kikim Wilwil
Long 1991 long hap wes bilong Jemani, 710 man i kikim wilwil ol i dai long bagarap i painim ol, na narapela 64,000 i bin kisim bagarap. Wanpela nius (Rheinische Post) i tok, insait long 5-pela yia wanpela man bilong saiens (Dietmar Otte) i bin skelim 1,200 man i save kikim wilwil na ol i bin kisim bagarap. Long dispela 1,200 man, 600 i kisim bagarap long het bilong ol. Olsem na dispela saveman i ting sapos ol dispela man i bin pasim strongpela hat long het bilong ol, planti ol inap abrusim bagarap, o bagarap i no bikpela tumas. Wanpela toksave i bin kamap long wanpela nius (The Journal of the American Medical Association) i tok, long 1984 i go inap 1988 long Amerika, klostu wan milion man bilong raun long wilwil i bin kisim bagarap long het bilong ol. Insait long dispela wan milion man, 2,985 i bin dai. Dispela nius i tok moa olsem: ‘Long olgeta hap bilong graun long olgeta de i gat wanpela man i dai long bagarap taim em i raun long wilwil i dai, na long olgeta 4-pela 4-pela minit i gat wanpela i kisim bagarap long het bilong em.’ Sapos ol pikinini i pasim strongpela hat taim ol i kikim wilwil em i gutpela moa, long wanem, taim pikinini i painim bagarap long het, dispela i moa nogut long bagarap em bikpela man i painim.
Holim Nating Nem Kristen
Long Frans i gat inap 45 milion man ol i tok ol i bilong lotu Katolik. Tasol planti bilong ol i ting lotu em i bilong taim pikinini i baptais, o wanpela i marit, o wanpela i dai. I no longtaim tumas na wanpela nius (Madame Figaro) i helpim wanpela lain long skelim dispela samting, na ol i kisim save olsem: Long Frans long olgeta 3-pela 3-pela man i tok em bilong lotu Katolik, 2-pela i no kisim komyunio. Na long olgeta 5-pela 5-pela, i gat 4-pela i no go long konpesio. Na long olgeta 10-pela 10-pela i gat wanpela tasol i save go olgeta taim bilong mekim Misa. Ol i skelim pasin bilong ol dispela man long beten na ol i kisim save olsem: Long olgeta 100 100 man i gat 36 i save beten wan wan taim tasol, na 34 i no save beten. Dispela nius (Madame Figaro) i kamapim sampela tok moa long save dispela lain i kisim taim ol i skelim ol Katolik long Frans, na nius i tok: ‘Lotu Katolik i gat ol bilip ol i bin kamapim long bipo, na dispela i no inap helpim ol man long nau.’
Ol Inap Bagarapim Yet Ol Man
Saut Afrika na Namibia i bin pait, na tupela yia bihain long pait sampela pikinini i dai, long wanem, long taim bilong pait ol i bin planim ol liklik bom insait o antap long graun na planti ol i stap yet. Long Disemba 1991 wanpela nius (Lesotho Today) i tok, televisen na ol nius i bin tokaut olsem ol man i mas was gut, long wanem, ol dispela liklik bom i stap hait yet. Tasol winim 40 manmeri i bin dai insait long 18 mun na inap 100 manmeri i bin kisim bagarap. Wanpela mama i gat 8-pela pikinini, tasol 3-pela i dai long ol dispela liklik bom, na mama i tok: ‘Tupela yia bihain long pait i pinis, ol samting bilong pait i wok yet long kilim i dai ol pikinini bilong mipela.’ Gavman i bin rausim planti tausen bilong ol dispela liklik bom, tasol ating ol bai hatwok long painim olgeta na pinisim, long wanem, planti i stap long bikpela hap graun na sampela moa i stap hait insait tru long graun.
Narapela Kain Pasin Stil
Long sampela yia nau narapela kain pasin stil i bin kamap long Florida long Amerika. Sampela man i putim klos bilong meri na ol i go insait long ol stua bilong planti taun, em ol stua i salim klos bilong meri, na ol i stilim planti ol klos. Wanpela nius (The Wall Street Journal) i tok, ol polis i ting i gat olsem 100 man i mekim olsem. Wanpela polis i tokim dispela nius (Journal) olsem: Long 1991 dispela ol stilman i bin giaman na putim klos bilong meri na go insait long 25 stua bilong wanpela taun tasol na stilim ol klos, pe bilong ol klos em K400,000. Insait long 8-pela mun ol i mekim pasin stil 6-pela taim long wanpela stua. Olsem na papa bilong dispela stua i banisim windo bilong stua long ain, tasol ol dispela stilman i no tingim. Ol i bin draivim ka bilong ol i go long dispela windo bilong traim long brukim windo na go insait. Polis i hatwok tru long holim ol dispela man. Plisman i tokim dispela nius (Journal) olsem: ‘Sapos long yia 1971 samting ol man i bin putim klos bilong meri, kwiktaim ol man inap luksave olsem ol i no meri, tasol nau pasin bilong olgeta man na meri i narapela kain long putim klos, olsem na i hatwok long save em man o meri.’
Bagarap i Kisim Kopi Long Brasil
Long olgeta hap graun pe bilong kopi i go daun. Tasol nau long Brasil i gat narapela hevi i kamap. Wanpela nius (New Scientist) i tok, long nambawan ples long Brasil long kamapim kopi, i gat planti milion liklik grasopa bilong graun i kamap, na ol dispela samting i wok long bagarapim kopi. Ol dispela grasopa bilong graun i karamapim ol bikpela gaden kopi na putim kiau bilong ol long rop bilong ol diwai kopi. Orait, taim kiau i bruk, pikinini grasopa i save kaikai ol rop bilong diwai kopi, olsem na diwai i dai. Long ol plantesen em planti bilong dispela grasopa bilong graun i stap long en, ol i kisim liklik kopi tasol, na 60 pesen i lus. Kirap long 1986 i kam inap long nau dispela hevi long grasopa bilong graun i wok long go moa nogut. Dispela nius (New Scientist) i tok, lain bilong lukautim kopi long Brasil (Brazilian Coffee Institute) i tok, em asua bilong ol man long bagarapim win na wara na graun, olsem na nau planti milion grasopa bilong graun i kamap. Na tu, ol man i bin kilim planti pisin na animal, olsem animal armadilo, em ol samting i save kaikai grasopa bilong graun. Ol dispela animal i no planti nau, olsem na nau planti grasopa bilong graun i kamap.
Rot Bilong Pinisim Pasin Stil Long Stua
Long Biktaun Iwaki long Japan papa bilong wanpela stua buk em i les tru long ol man i kam na stilim ol buk. Olsem na em i tingim nupela rot bilong pinisim pasin stil long stua bilong em. Wanpela nius (Mainichi Daily News) bilong Tokyo i tok, em i gat 5-pela video-kamera long stua bilong em, na husat husat i kam insait long stua, dispela ol kamera i kisim piksa bilong em. Ol dispela video i soim 9-pela manmeri, 5-pela bilong ol i pikinini, i wok long stilim ol buk. Olsem na papa bilong stua i bin tokaut olsem ol man i laik baim dispela video-kaset ol i ken kisim long K2 tasol. Em i putim wanpela toksave long stua bilong em olsem: ‘Yu inap baim video-kaset i kamapim ol man i bin stil long dispela stua.’ Gavman i tokaut long papa bilong stua olsem, dispela pasin i no gutpela tumas, tasol papa bilong stua i tok, em bai wok yet long salim ol dispela video-kaset. Em i tok: ‘Ol i mas lain olsem, pasin stil i no stret.’ Ol namba wan video-kaset em i salim, ol man i baim wantu tasol, na pasin stil long stua bilong em i pinis.
Ol i Tanim Tok Bilong Baibel Long Sampela Tok Ples Moa
Wanpela nius bilong Jemani (Wetterauer Zeitung) i kamapim tok bilong Baibel Sosaiti bilong Jemani olsem: Long 1991 ol man i tanim sampela hap bilong Baibel long 32 nupela tok ples. Olsem na nau yumi inap kisim Baibel o sampela hap bilong Baibel long 1,978 tok ples. (Narapela nius i tok, em 1,982 tok ples.) Ol i bin tanim Baibel olgeta long 322 tok ples, na Nupela Testamen long 758 tok ples na sampela hap moa bilong Baibel long 898 tok ples. Long Afrika sampela hap bilong Baibel i stap long 566 tok ples bilong ol, na long Esia long 490 tok ples, na long Not na Sentral na Saut Amerika long 411 tok ples, na long ol hap bilong Pasifik long 321 tok ples, na long Yurop long 187 tok ples.