Sampela Tok i Kam Long Olgeta Hap
Misin Yuniterian i Orait Long Tupela Man i Marit
Wanpela nius (Christian Century) i tok: Misin Yuniterian em i namba wan misin bilong Yunaitet Stets long tokaut olsem misin i orait long tupela man i marit o tupela meri i marit. Planti bilong ol man i bin go long kibung bilong dispela lotu, em wanpela kibung i save kamap long olgeta yia, ol i bin vot bilong “tokaut olsem marit bilong tupela man o tupela meri, em narapela i pilim olsem em i laik stap wantaim narapela, em i gutpela samting.” Dispela nius bilong lotu i tok, “long lo bilong misin olgeta wan wan kongrigesen bilong ol 1,040 kongrigesen, ol i ken pasim tok long ol bai orait long marit bilong tupela man o tupela meri o nogat, na ol bai wokim dispela kain marit long haus lotu bilong ol o nogat.”
Kaunim Buk i Daunim Pasin Raskol
Nius The Independent bilong Briten i tok: Long Bratfot, Inglan, gavman i kamapim wanpela wok bilong helpim ol skulmanki long kaunim gut buk na samting dispela wok i bin kamapim i gutpela tru. Olsem: Ol i tok dispela wok i bin helpim ol pikinini long kaunim gut buk, na tu, pasin raskol i no planti olsem bipo! John Watson em bos bilong dispela wok (Better Reading Partnership), em i tok: “Mipela i save ol yangpela i brukim haus na stil em ol yangpela i no kam olgeta taim long skul—ol i save ranawe long skul. Sapos ol pikinini inap kaunim buk, dispela i save helpim ol long givim bel moa long skul na ol i no ken tingting tumas long ranawe long skul. Na taim ol i no raun nating long rot, ol i no tingting tumas long brukim ol haus na stil.”
I No Gutpela Long Toktok Olsem Pikinini
Taim ol pikinini i kirap nupela long toktok, ol man i amamas long narapela kain toktok bilong ol, na planti papamama i save bekim tok long pikinini long wankain pasin. Tasol nius Veja i bin kamapim tok bilong Eliane Regina Carrasco, em wanpela savemeri bilong toktok long Brasil, na dispela meri i tok, dispela inap mekim na ol pikinini i no lain gut long kolim tok. Carrasco i tok: Taim papamama i bihainim pasin kranki bilong pikinini long kolim tok, dispela i “strongim samting i no stret.” Em i tok, dispela inap mekim na pikinini bai hatwok long toktok gut. Na em i tok, sapos ol pikinini i no inap toktok gut, i stap bilong ol wantaim ol narapela i no gutpela tumas. “Planti taim ol kain pikinini olsem ol i stap wanpis, ol i pret, na ol i no stap bel isi, ol i wok long abrusim wanpela samting em inap mekim na ol narapela i [tok bilas] long ol.” Carrasco i tok, em pasin bilong ol liklik pikinini long kolim kranki sampela tok, na yumi no gat wok long stretim tok bilong ol long olgeta taim. Tasol i bikpela samting long kolim stret ol tok taim yumi toktok wantaim ol pikinini, na yumi mas tingim: “Ol i gat tingting na save na ol inap lain long ol samting.”
Rot Bilong Makim Pikinini Em Man o Meri
Nius Popular Science i tok, ‘long nau ol saientis inap skelim spem long melek bilong papa bilong makim stret olsem pikinini man o pikinini meri bai kamap, long wanem, samting i stap long spem bilong papa em yet i makim olsem pikinini meri o pikinini man bai kamap.’ Pastaim ol saientis i putim liklik hap pen long spem bilong melek bilong kamapim kala. Bihain ol i mekim wok long masin lesa bilong sutim lait bilong save long spem X (i kamapim meri) na spem Y (i kamapim man). Wanpela kompyuta i kisim dispela save, na wanpela tul ol i save ‘mekim wok long en long laboritori bilong glasim blut, em i save sutim strongpela paua i go long spem X na em i sutim liklik paua i go long spem Y. Bihain ol i mekim wok long wanpela samting ol i kolim teminel, em samting i gat tupela kain paua, wanpela paua i save pulim spem X i go long wanpela hap, na narapela paua i save pulim spem Y i go long narapela hap.’ Wanpela saientis i bin kamapim dispela save bilong helpim wok bilong ol fama i gat bulmakau na sipsip samting, na em i tok, long olgeta taim ol i mekim wok long dispela rot long ol animal, klostu olgeta taim em i wok gut. Bihain ol i save makim wanem spem ol i laik mekim wok long en—spem bilong man o spem bilong meri bilong bungim kiau bilong mama, na taim “pikinini i blut yet, ol i putim em insait long bilum long bel bilong mama.” Tasol maski dispela pasin i bin wok long ol animal, inap long nau, em i bin wok wanpela taim tasol bilong kamapim wanpela pikinini.
Saina i Wok Long Stretim Hevi Long Wara Nogut
Wanpela mausman bilong lain National Environmental Protection Agency long Saina, em i tok: “Wara nogut em i wanpela bikpela hevi long Saina, na wok bilong stretim i wanpela wok ol i mas mekim hariap.” Olsem na nius China Today i tok, gavman bilong Saina i wok long mekim sampela samting long ol wara na raunwara bilong Saina, em dispela hevi i bikpela tru long ol, na ol dispela wara i no ken bagarap moa. Olsem: Long Saina i no gat narapela wara i bagarap tru olsem wara Huai, olsem na bilong bosim ol pipia na marasin nogut i save go insait long en, gavman i bin “pasim 999 liklik faktori long ples daun Huai, em ol faktori bilong wokim pepa.” Inap 154 milion manmeri i sindaun long ples daun Huai, na em i wanpela bikpela hap long Saina bilong kamapim rais na paua samting.
Ol Paitman “Holi”
Nius Compass Direct i kamapim stori bilong Willy Fautré olsem: Misin Otodoks Bilong Romenia “i laik kamap gen olsem misin bilong kantri, na bilong mekim olsem misin i bin kirapim wanpela wok nogut bilong daunim ol narapela lotu.” Fautré i tok moa: “Ol bikman na pris bilong misin Otodoks long Romenia” ol i bin makim sampela lain long “mekim pasin birua na pretim ol liklik lain lotu na ol i no inap mekim samting bilong lotu i stret ol i mekim.” Asbisop bilong Sukava na Radauts, em i bin kolim ol program bilong redio ol misin talatala i save kamapim olsem “samting nogut bilong bagarapim bilip bilong ol tumbuna bilong yumi.” Na em i bin salim pas i go long presiden bilong lain i save bosim ol program bilong redio na televisen long Romenia, na em i tok: “Mipela i askim yu long pasim ol dispela program o pasim ol liklik, long wanem, ol i samting nogut na wok bilong ol, em long pulim ol man long kantri bilong yumi yet long bihainim narapela lotu.”
Ol i Pulim Taim Bilong Dring Kopi
Sampela wokman i mekim narapela samting bilong dring kopi long 10 klok moningtaim. Planti bilong ol i lusim ples wok olgeta. Sampela liklik haus kaikai i save wokim ol nambawan kopi na dispela i pulim planti wokman long lusim ofis bilong i go baim kopi ol i save laikim. Nius The Wall Street Journal i tok, em nau, dispela i mekim na ‘taim bilong malolo bilong dring kopi, em i kamap taim bilong lusim ples wok bilong i go dring kopi.’ Tasol ol bos i tingting planti long dispela pasin bilong ol wokman long pulim taim bilong dring kopi. Nius Journal i tok, bilong pasim planti wokman long mekim olsem, sampela bisnis i bin putim long ol ofis bilong ol, masin bilong wokim kopi ol i kolim kapusino.
Ol Animal i Laik Pinis Em i Bikpela Hevi Moa
Nius New Scientist i tok, “hevi bilong ol animal i laik pinis i winim hevi bilong ol pisin i laik pinis.” Dispela save i bin kamap long lista bilong wanpela lain (World Conservation Union). Lista i tok, long olgeta hap inap 11 pesen bilong ol kain kain pisin i laik pinis olgeta, na inap 25 pesen bilong ol kain kain animal i laik pinis. Dispela hevi i bikpela moa long ol lain animal olsem monki—inap 46 pesen bilong ol i laik pinis. Namba 2 lain, em ol animal i save raun long nait kain olsem mumut—inap 36 pesen bilong ol i laik pinis. Namba 3 lain, em sampela kain pik na antelop—inap 33 pesen bilong ol i laik pinis. I no gat narapela lain pisin i laik pinis olsem pisin kren—inap 26 pesen bilong ol i laik pinis olgeta. Wanpela as na planti animal i laik pinis, winim namba bilong ol pisin i olsem: Taim ples tru bilong ol animal i pinis, ol i no inap mekim olsem ol pisin, ol i no gat rot long lusim hap bilong ol na i go sindaun long narapela hap.
Spot Olimpik na Pasin Bilong i Stap Rabis
Wanpela nius bilong Swiselan (ENI Bulletin) i tok: “Ol medal em sampela kantri i save winim long ol spot Olimpik, na bikpela mani ol kantri i save tromoi bilong wokim ol stediam samting bilong ol man bilong resis, na mani ol bisnis i tromoi long spot Olimpik bilong strongim bisnis bilong ol, i save kamapim sampela askim long wok bilong ol kantri long pinisim pasin bilong i stap rabis.” Greg Foot bilong lain World Vision bilong Ostrelia, em i tok: ‘I no olsem yumi no ken amamas o litimapim nem bilong ol man i gat save na strong long resis samting, nogat; tasol yumi mas tingting gut olsem: Yumi skelim stret ol samting o nogat taim yumi tromoi mani long kamapim kaikai i nambawan bilong ol man bilong resis, em kaikai bilong strongim skin, tasol planti milion manmeri i no gat inap kaikai bilong givim strong long ol bilong wokabaut.’ Insait long tupela wik spot Olimpik i bin kamap long Atlanta, inap 490,000 pikinini long olgeta hap, ol i bin dai long hangre o long wanpela sik maski i gat rot bilong pasim dispela sik.