Sampela Tok i Kam Long Olgeta Hap
Bikpela Pe Bilong Pasin Bilong Kisim Drak
Ripot bilong gavman bilong Amerika i tok, long 1995 ol manmeri bilong Amerika i tromoi 57.3 bilion dola bilong baim ol drak. Bikpela hap bilong dispela mani ol i tromoi bilong baim koken, na long hap mani i stap ol i baim ol narapela drak olsem heroin, na mariwana, na sampela drak moa. Nius Associated Press i tok, dairekta bilong lain White House Office of National Drug Control Policy, em Barry McCaffrey i tok, long dispela mani ol man i tromoi bilong baim ol drak ol inap baim skul koles bilong wan milion manmeri inap 4-pela yia, o long baim 83 bilion lita susu bilong ol bebi i sot long kaikai. Na tu, pe bilong dispela pasin bilong kisim ol drak bai bikpela moa sapos ol i bungim pe bilong ol narapela samting dispela pasin i save kamapim. Olsem: Pasin raskol i go bikpela, na i stap bilong ol man i kisim drak na famili bilong ol i bagarap, na planti manmeri moa i kisim sik hepataitis na sik AIDS.
Lo Ol Man i Lusim Tingting Long En
Yu inap kolim hamas lo bilong Tenpela Lo bilong Baibel? Long Rio de Janero wanpela lain i kisim save olsem, long olgeta 4-pela 4-pela manmeri bilong Brasil, wanpela i no inap kolim wanpela bilong ol dispela lo! Nius Veja i tok, long ol manmeri ol inap kolim wanpela bilong ol dispela lo, inap 42 pesen bilong ol i kolim lo, “No ken kilim i dai ol arapela manmeri” o “No ken stil.” Ol narapela i tingim lo, “No ken aigris long meri bilong narapela man” (38 pesen), “Yumi mas aninit long papamama” (22 pesen), na “No ken giaman na kotim nating ol arapela manmeri” (14 pesen). Inap 13 pesen tasol bilong ol dispela manmeri inap tingim namba tri lo: “No ken kolim nating nem bilong God.”
Traim Save Bilong Pikinini Taim Em i Liklik
Ol saveman i wok long skelim save bilong man, nau ol i ting kirap long taim mama i karim pikinini i go inap long taim em i gat 3-pela krismas, dispela hap taim em i bikpela samting tru bilong helpim kru bilong pikinini long kamap gutpela. Na ol i ting, sapos sampela samting i kirapim tingting long wok, dispela bai mekim na ol liklik rop wailis i pas gut long kru long dispela taim. Nius Modern Maturity i tok, sampela papamama i traim save bilong ol pikinini paslain tru long ol i go long skul bilong ol liklik pikinini bilong helpim ol long skul gut na winim ol narapela. Tasol siaman bilong dipatmen bilong dokta bilong ol pikinini, long Boston University School of Medicine, em Dokta Barry Zuckerman, em i tingting planti long ol papamama i ting “ol i mas kirapim tingting bilong bebi long olgeta taim” bilong kamapim “bebi i winim tru ol narapela bebi.” Profesa bilong ol pikinini, Richard Weinberg i tok: “Planti taim, pasin bilong subim pikinini long resis wantaim ol narapela taim ol i liklik yet i no save kamapim ol samting papamama i laik em i kamapim. Larim ol pikinini bilong yu i amamas taim ol i liklik yet.”
Ol Man Bilong Raitim Gen Ol Tok Ol i Was Gut Tru
Bos bilong lain Institute for New Testament Research, long Munste, Jemani, em Profesa Barbara Aland i tok, ol man i raitim raitim gen ol tok bilong Ol Skripsa Grik bilong Baibel, ol i was gut tru bambai ol i no senisim sampela tok. Nius Westfälische Nachrichten i tok: “Wan wan taim tasol ol i popaia o misin i kirapim ol long senisim sampela tok.” Kirap long 1959 dispela lain i bin glasim gut inap 5,000 olpela rait ol man i bin raitim long han. Ol dispela rait i bilong yia 500 i go inap yia 1500 samting, na ol yia paslain long dispela taim. Inap 90 pesen bilong ol olpela rait ol i bin putim long ol film olsem bilong kamera tasol film i liklik tru. Bilong wanem ol man bilong raitim raitim gen ol tok bilong Baibel ol i was gut tru, nogut ol i popaia? Nius i tok: “Long wanem, ol i ting ol i man bilong raitim raitim gen ol tok, na ol i no man bilong kamapim Baibel.”
I Gat Kafin Long En o Nogat?
Ol man i no inap dring ol samting i gat marasin kafin long en, planti taim ol i dring ol samting i no gat kafin long en. Tasol olsem wanem? Taim yu laik dring kopi i no gat kafin long en, ol bai givim kain kopi olsem long yu? Ripot i stap long wanpela nius (The New York Times) i tok, long olgeta 3-pela 3-pela man, wanpela bai kisim kopi i no gat kafin long en. Lain U.S. Food and Drug Administration i tok, kopi ol i tok i no gat kafin long en, i gat 2-pela i go inap 5-pela miligram kafin long en. Tasol ol i traim kopi bilong 18 narapela narapela haus kaikai samting long Nu Yok, na ol i kisim save olsem, long wanpela kap kopi ol man i tok i no gat kafin long en, i gat 2.3 miligram i go inap long 114 miligram kafin long en! Lain National Coffee Association i tok, long wanpela kap kopi ol man i tok i gat kafin long en, em i gat namel long 60 na 180 miligram kafin long en.
Long Olgeta Hap Ol i Katim na Rausim Bikbus
Nius Jornal da Tarde i tok: “Ol man i bagarapim pinis bikpela hap bikbus bilong graun.” Bikbus bilong pastaim tru i olsem 80 milion skwe kilomita, tasol nau inap 30 milion skwe kilomita tasol i stap. Lain World Wildlife Fund (WWF) i kisim save olsem, long hap bilong Esia ol man i bin katim na rausim bikpela hap bikbus, winim ol narapela kantri, na inap 88 pesen bilong gras na liklik diwai samting i bin karamapim graun i bagarap pinis. Long Yurop inap 62 pesen bilong gras na liklik diwai samting i bagarap olgeta, na long Afrika inap 45 pesen, na long Latin-Amerika inap 41 pesen, na long Not Amerika inap 39 pesen. Amasonia em i namba wan bikpela bikbus bilong graun, na winim 85 pesen bilong bikbus bilong bipo tru i stap yet. Nius O Estado de S. Paulo i kamapim tok bilong Garo Batmanian bilong lain WWF, em i tok: “Brasil inap abrus yet long mekim wankain rong olsem ol narapela kantri i bin mekim long bikbus.”
Ol i Stilim Ol Gutpela Samting
Nius World Press Review i tok, wanpela nius long Kanada i tok, “ol lain raskol bilong planti kantri i laik kisim ol gutpela gutpela samting bilong Mesopotemia. Pait i bin kamap long Irak long 1991 i mekim na i no hatwok long stilim ol dispela samting.” Long 1996, ol stilman i brukim Haus Tumbuna Bilong Babilon long san, na ol i kisim ol hap ston i gat narapela kain rait long ol. I no gat planti bilong ol dispela samting bilong bipo i stap, sampela hap ston i bilong taim bilong Nebukatnesar Namba 2, na long ol maket bilong salim ol piksa samting, ating pe bilong ol dispela samting em 735,000 dola. Narapela hap ol stilman i save go long en, em wanpela taun bilong bipo yet, Al-Hada. Nius i tok, gavman i laik lukautim ol dispela gutpela samting bilong bipo i stap yet, olsem na ol i pasim long brik na simen ol dua na ol liklik rot i go long taun.
Misin Katolik i Laik Ol i Lusim Rong Bilong En
Misin Katolik long Frans i wokim wanpela pepa (Declaration of Repentance) na askim God na ol Juda long lusim rong bilong misin. Misin Katolik i no bin ‘tingim’ ol Juda taim gavman bilong Frans long Visi i bin mekim nogut tru long ol. Long 1940 i go inap long 1944, ol i holim planti Juda, winim 75,000 na rausim ol long Frans, na salim ol i go long ol banis kalabus nogut tru bilong ol Natsi. Wanpela nius bilong Frans (Le Monde) i tok, long pepa Asbisop Olivier de Berranger i ritim, misin i tok, em i bin larim pasin bilong tingim ol samting bilong en tasol i “haitim pasin Baibel i tok yumi mas mekim, olsem tingim tru olgeta manmeri God i wokim i kamap olsem em.” Sampela pris long Frans ol i bin mekim tok bilong helpim ol Juda, tasol planti pris i bin helpim gavman long Visi na ol samting gavman i mekim. Sampela tok bilong dispela pepa i olsem: “Misin i mas luksave olsem, taim ol man i bin mekim nogut tru long ol Juda, na ol bikman long Visi i bin tokim ol man long mekim kain kain samting bilong daunim ol Juda, misin i no bin kros long dispela. Ol i bin pasim maus tasol, na wan wan taim tasol sampela i bin mekim tok bilong helpim ol . . . Nau mipela i tokaut stret olsem, mipela i bin mekim rong taim mipela i pasim maus. Na tu, mipela i luksave olsem misin long Frans i no bin mekim wok bilong en long skulim bel bilong ol man.”
Binatang Wivel i Bagarapim Ol Diwai
Kirap long taim wanpela binatang ol i kolim olsem ret pam wivel i kamap long Arebian Peninsula inap 20 yia i go pinis, dispela liklik binatang i bin digim ol hul insait long planti tausen diwai det na bagarapim ol. Nius The Economist i tok: “Ol man i pret olsem prut det—dispela prut i bin stap olsem ‘prut bilong laip’ long Arebia inap 5,000 yia—em inap pinis olgeta.” Dispela binatang, longpela bilong en inap 5 sentimita tasol, em i save digim ol liklik rot insait long namel long diwai na isi isi diwai i dai. Ol marasin bilong kilim binatang i no inap pinisim ol, olsem na long dispela hap ol i wok yet long kamap planti hariap.
Ol Wokman i Lapun Liklik i Gutpela
Nius The Times bilong Landon i tok, ol wokman i winim 47 krismas i save was gut na mekim stret olgeta wok long moningtaim, winim ol yangpela wanwok bilong ol. Long apinun ol samting i senis—ol yangpela i save wok gut na ol man i lapun liklik, nogat. Olsem na Tom Reilley, bilong John Moores Yunivesiti long Livapul em i tok, i gutpela sapos ol bos i makim ol wokman i lapun liklik long wok long moningtaim, na ol yangpela long wok long apinun na long nait. Ol man i mekim tok long bung bilong lain British Medical Association i tok, ol supamaket na ol narapela stua i laik givim wok long ol man i lapun liklik. Bilong wanem? Long wanem, ol i save tingim ol man i kam baim ol samting, na ol i gat save long mekim ol samting maski i no gat wanpela rait bilong toksave long wok bilong dispela samting. Nius i tok: “Na tu, ol i save bihainim gutpela pasin ating kampani yet i no save bihainim moa.”