Askim

Kristen i mas abrusim ol dring na kaikai i gat kafin long en o nogat?

Baibel i no tambuim Kristen long dring kofi, ti, mailo, na ol koldring samting i gat kafin long en. Tasol Baibel i gat sampela stiatok em ol inap helpim yumi long bihainim savetingting taim yumi wokim ol disisen. Orait pastaim yumi ken skelim as na sampela man i save abrusim ol dring na kaikai i gat kafin long en.

Wanpela as, em sampela i ting kafin i olsem wanpela drak inap mekim sampela samting long tingting bilong man. Na tu, kafin inap kalabusim man na em i hatwok long lusim. Wanpela buk bilong ol man bilong wokim marasin i tok: “Sapos man i kisim planti kafin inap longpela taim, dispela inap kalabusim em na em i mas kisim oltaim. Na sapos man i lusim kafin hariap, em bai kisim nogut long en, olsem het i pen, ol liklik samting bai skrapim bel kwiktaim, bel i no stap isi, tingting planti, na airaun.” Ol dispela samting kafin i save mekim taim man i lusim hariap, ol i tingting long putim long wanpela buk bilong ol dokta (Diagnostic and Statistical Manual of Mental Disorders) wantaim ol samting ol narapela drak i save mekim taim man i lusim drak. Olsem na sampela Kristen i pilim olsem i no stret long kisim ol samting i gat kafin long en, long wanem, ol i laik abrusim pasin bilong kalabus long wanpela drak, na ol i laik bosim gut skin bilong ol.​—Galesia 5:23.

Sampela i bilip olsem kafin inap givim sik long man o long pikinini i stap yet long bel bilong mama. Ol Kristen i mas laikim tru God ‘long bel bilong ol’ olgeta, olsem na ol i no save bihainim wanpela pasin i sotim laip bilong ol. Na Jisas i tok ol i mas laikim tru ol narapela man, olsem na ol i save abrusim ol samting inap long nogutim pikinini i stap yet long bel.​—Luk 10:​25-​27.

Yu ting i gat as na ol i mas tingting planti long helt bilong ol? Sampela dokta i ting kafin i save kamapim sampela kain sik, tasol sampela i no ting olsem. Na sampela lain i gat wok long skelim dispela samting, ol i tok kofi i save helpim skin. Long 2006, nius Time i tok: “Pastaim, ol saveman i ting [kafin] inap kamapim sik kensa long rop bilong pispis, na hai blut presa, na ol narapela sik. Tasol save ol i kisim long nau i makim olsem ol dispela tok i kranki, na tu, ol i kisim save olsem kafin inap helpim skin long sampela samting. Ol i tok, i luk olsem kafin inap helpim yumi long sakim sik bilong lewa, sik pakinson, sik suga, sik alsaima, ol liklik ston i kamap long rop bilong bel, sik bilong bel hevi, na ating sampela kain sik kensa tu.” Wanpela nius i stori long pasin bilong dring samting i gat kafin long en na i tok: “Samting yumi mas mekim i klia tru​—yumi mas kisim long skel tasol.”

Olgeta wan wan Kristen i mas tingim ol nupela save ol i kisim long kafin na ol stiatok bilong Baibel long dispela samting, na ol i mas wokim disisen bilong ol yet. Olsem: Sapos wanpela meri Kristen i gat bel, ating em i laik lusim ol samting i gat kafin long en long dispela taim sapos em i ting dispela inap nogutim pikinini i stap yet long bel. Sapos long olgeta de Kristen i dring kofi samting i gat kafin long en na wanpela taim em i no inap kisim, na nau bel i skrap kwik o em i pilim sik, ating i gutpela long em i lusim ol samting i gat kafin, o lusim inap liklik taim. (2 Pita 1:​5, 6) Ol narapela Kristen i mas rispek long samting em i tingting pinis long mekim, na ol i no ken strong long kamapim tingting bilong ol.

Maski yu wokim wanem kain disisen long pasin bilong dring na kaikai ol samting i gat kafin long en, yu mas tingim tok bilong Pol: “Sapos yupela i kaikai na dring o yupela i mekim narapela samting, yupela i mas mekim dispela olgeta samting bilong givim biknem long God.”​—1 Korin 10:31.