Hap Bodi i Bagarap Tasol Em i Amamas Long Mekim Wok

TAIM yu bungim Leonardo, yu no inap ting em wanpela man i save mekim wok konstraksen. Em i no inap mekim wok moa long tupela han bilong em, long wanem, tupela han bilong em i bin bagarap long wanpela eksiden i bin kamap long ples wok bilong em. Maski hap bodi bilong em i bagarap, Leonardo i givim bel olgeta long mekim wok konstraksen long Acajutla, long El Salvador, olsem yu ken lukim long dispela piksa.

Bilong insait long mekim wok konstraksen, Leonardo i wokim ol tul bilong em yet. Em i subim han bilong em i go insait long wanpela hap ain i pas long savol na savolim graun i go insait long wilbaro. Bilong holim strong, em i wokim ol ring long han bilong wilbaro na bai em yet i ken pusim wilbaro. Wanem samting i kirapim em long insait long dispela wok?

Leonardo i laik helpim wok bilong sanapim wanpela Haus Kingdom, em ples wanpela kongrigesen bilong ol Witnes Bilong Jehova long dispela hap inap bung long en bilong mekim lotu. I gat planti as na em inap eskius long em i no ken insait long dispela wok. Em i mekim wok mani fultaim, tupela han bilong em i bagarap, na em i holim pinis wok olsem wanpela kongrigesen sevan long kongrigesen em i save go long en. Tasol em i laik mekim wok inap long strong bilong em bilong mekim laik bilong God long hap i gat wok konstraksen i stap long en.

Olsem wanem? Yu gat wankain tingting long mekim laik bilong God? Leonardo inap givim eskius olsem em i no gat tupela han bilong mekim wok, tasol nogat. Em i yusim tingting na save bilong em long wokim ol tul bilong em yet na bai em i ken mekim wok. Sapos i no gat ol dispela tul em i no inap long mekim dispela wok. Em i mekim wok bilong God wantaim “tingting” olgeta bilong em. (Matyu 22:37) Maski hap bodi i bagarap o nogat, ol manmeri husat i insait long wok konstraksen bilong sanapim ol Haus Kingdom bilong ol Witnes Bilong Jehova long olgeta hap bilong graun ol i amamas long mekim wok volantia. Ol Witnes i amamas long yu kam long ol miting bilong ol.