Nupela Kain Pasin Bilong Sanapim Haus

PLANTI manmeri i save kirap nogut taim ol i lukim wanpela kain haus bilong ol Isip (ol i kolim Pyramid) na Bikpela Banis bilong Saina. Na long nau ol man i wokim ol haus i go antap tru inap olsem 400 mita samting. Tasol yumi kirap nogut tu long lukim sampela nupela pasin bilong wokim ol bikpela haus.

Wanpela lain i givim taim na strong bilong ol long wokim ol bikpela bikpela haus long olgeta hap graun na ol i no kisim pe long mekim dispela wok. Planti ol i bilong ol dispela hap yet. Tasol bilong wokim ol kain bikpela haus olsem i mas i gat planti moa bilong helpim ol, olsem na planti bilong ol narapela kantri i save baim rot bilong ol yet bilong i kam long dispela longwe ples bilong mekim wok. Planti ol i mekim olsem long taim bilong malolo bilong ol​—na sampela i askim bos long kisim malolo long wok mani, na long dispela hap taim ol i lusim wok, bikpela hap pe bilong ol i lus.

Nambawan ofis bilong lain Witnes Bilong Jehova long Nu Yok i kirapim dispela wok konstraksen bilong helpim ol lain bilong ol long ol narapela kantri bilong wokim ol bikpela haus olsem brens-ofis samting, na ol i mekim wok olsem volantia​—long laik bilong ol yet ol i kam wok, na ol i no kisim pe long en. Kirap long Novemba long yia 1985, long taim ol i kamapim dispela wok bilong intenesenel konstraksen, inap olsem 3,000 manmeri i bin baim rot bilong ol yet na ol i go long ol dispela longwe hap i gat wok konstraksen long en​—inap olsem 30 hap olgeta, olsem long Not na Saut Amerika, Ostrelia, Afrika, Yurop, na sampela ol ailan.

Long nau i gat olsem 600 manmeri ol i mekim wok insait long 25 kantri olsem volantia na ol i no kisim pe long en. Na inap 400 bilong ol i wok inap wanpela o sampela yia samting bilong mekim dispela wok, olsem na ol i kisim nem olsem Intenesenel Wokman. Na sampela i stap inap 2-pela wik i go inap 3-pela mun.

Yu ting bilong wanem ol dispela manmeri i givim nating taim na save bilong ol long dispela wok konstraksen na ol i no singaut long pe? Na ol i ting wanem samting em i bikpela samting tru na i stret long ol i mas lusim sampela samting bilong mekim dispela wok?

Truim Bilong Tok Profet Bilong Baibel

Planti manmeri ol i givim bel tru long insait long intenesenel konstraksen, na as bilong dispela i olsem: Inap 1,900 yia bipo, ol aposel bilong Krais Jisas i askim em olsem: “Wanem mak bai i kamap pastaim, na mipela i ken save, yu laik i kam bek na dispela graun i laik pinis?” Pastaim Jisas i tok bai i gat ol pait na bikpela hangre na sik na guria i kamap, na Jisas i tok: “Na bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”​—Matyu 24:​3, 14.

Olsem na dispela lain i volantia long mekim wok ol i pilim tru olsem, long nau truim bilong tok bilong Jisas i wok long kamap. Olsem na ol i amamas long mekim wok i helpim wok autim tok bilong Kingdom paslain long pinis bilong dispela taim nau i stap. Dispela wok konstraksen i bilong helpim ol Witnes bilong ol narapela hap bilong wokim ol nupela brens-ofis na haus faktori bilong wokim ol buk na nius samting bilong autim tok bilong Kingdom.

Wok Bilong Kingdom i Kamap Bikpela Tru

Long yia 1990, ol i bin wokim inap olsem 678,509,507 nius Wastaua na Kirap! Ol dispela nius i kamapim klia olsem Kingdom bilong God tasol bai helpim tru ol manmeri, na ol Witnes Bilong Jehova i wokim ol dispela nius long ol masin samting bilong ol yet. Long olgeta wan wan de ol i wokim inap olsem 2 milion nius! Na tu, ol i wokim planti milion Baibel, buk, buklet, na ol narapela nius samting na ol i salim i go long ol narapela narapela hap.

Nambawan ofis bilong ol Witnes Bilong Jehova long Bruklin na Walkill, long Nu Yok ol i gat ol bikpela bikpela haus faktori samting bilong wokim ol buk na nius samting. Tasol long ol yia namel long 1950 i go inap 1960 samting, ol i kamapim sampela nupela haus faktori bilong wokim ol buk samting long ol narapela kantri ausait long Amerika. Na long yia 1970 samting, ol i kirap long wokim ol nius Wastaua na Kirap! long Jemani, Saut Afrika, Kanada, Inglan, Swiselan, Denmak, Swiden, Finlan, Frans, long masin ol Witnes Bilong Jehova yet i wok long en.

Bihain long 1972 na 1973, ol i kirap long wokim ol dispela nius long ol narapela kantri olsem: Japan, Brasil, Ostrelia, Gana, Naijiria, Filipin. Long ol yia bihain, wok bilong Kingdom i wok long kamap bikpela moa yet, olsem na ol i kirapim wok bilong konstraksen bilong wokim ol nupela haus brens, na ol i gat ol nupela gutpela masin bilong mekim wok long en. Orait, yumi ken skelim lista daunbilo bilong save olsem wok bilong Kingdom i go bikpela hariap tru, na yumi ken save long ol brens-ofis ol i bin wokim, i gat ol nupela masin bilong wokim ol nius Wastaua na Kirap! samting, na wanem taim ol i dediketim ol dispela brens-ofis:

Kantri Grik, Janueri 16, 1979; Swiden, Disemba, 23, 1980; Brasil, Mas 21, 1981; Kanada, Oktoba 10, 1981; Itali, Epril 24, 1982; Ripablik bilong Korea, May 8, 1982; Japan, May 15, 1982; Ostrelia, Mas 19, 1983; Denmak, Me 21, 1983; Spen, Oktoba 9, 1983; Netelan, Oktoba 29, 1983; Jemani, Epril 21, 1984; India, Janueri 20, 1985; Saut Afrika, Mas 21, 1987.

Na ol i bin dediketim sampela nupela haus brens, na ol i bin skruim ol hap bilong sampela olpela haus brens i go bikpela na ol i dediketim​—olsem long Aivori Kos, Februeri 27, 1982; Tahiti, Epril 15, 1983; Inglan, Oktoba 2, 1983; Finlan, Me 5, 1984; Nowe, Me 19, 1984; Matinik, Ogas 22, 1984; Peru, Janueri 27, 1985; Meksiko, Epril 13, 1985; Veneswela, Epril 21, 1985; Frans, Me 4, 1985.

Tru i gat sampela wok long konstraksen em ol man i no Witnes ol i kam na mekim, na ol Witnes i mas baim ol long mekim ol dispela wok. Tasol olgeta narapela wok em ol Witnes yet i mekim. Inap planti tausen manmeri ol i kam bung na wok, maski sampela bilong ol i no gat gutpela save long sampela wok bilong konstraksen.

Nau wok autim tok bilong ol Witnes i go bikpela tru, olsem na ol i mas wokim tu planti ol haus faktori bilong wokim ol buk samting bilong helpim moa wok bilong autim tok. Olsem wanem ol i inap wokim hariap ol dispela haus brens na faktori samting?

Dispela Bikpela Lain i Mekim Gutpela Wok

Bilong helpim dispela wok konstraksen long olgeta hap bilong graun, ol i kirapim nupela kain wok volantia, na ol i kirap pinis long mekim wok. Wanpela wasman bilong dispela wok i tok: “Long taim bilong wok konstraksen i mas i gat ol wokman i gat save long ol kain kain wok, olsem wok kamda na wok plama samting, na long mekim wok long taim stret ol i laikim. I olsem: Yu no laik kisim man bilong mekim wok long kapa long taim yu laik stretim na putim ol samting bilong as bilong haus, a? Olsem na ol i kamapim wanpela dipatmen long Bruklin, Nu Yok, bilong lukautim wok bilong konstraksen long olgeta hap bilong graun.”

Planti taim ol i singaut long Bruklin long salim ol man i gat gutpela save long ol wok bilong konstraksen, olsem na Bruklin i mekim wok olsem bilong skelim na makim gut husat brata em inap tru long mekim gutpela wok, na ol i salim em i go long dispela hap ol i singaut long sampela wokman. Na ol i save skelim gut ol samting bilong konstraksen long olgeta hap graun, olsem long Meksiko, taim ol i laik pinisim wok long nupela haus slip bilong ol wokman, ol i askim Bruklin long salim sampela man bilong katim na lainim ol kapet long plua. Orait, wantu tasol na ofis long Bruklin i toksave long brens bilong Meksiko olsem ol i painim pinis sampela man long mekim dispela wok, na ol i amamas long kam volantia long wok. Na long Janueri bilong 1989, taim ol i dediketim dispela hap bilong haus brens, ol i lainim pinis ol kapet long plua na i gutpela tru.

Winim Mak

Sapos wanpela man i laik insait long dispela wok bilong intenesenel konstraksen, olsem wok volantia, orait em i mas winim mak long ol samting bilong spirit. Em i mas wanpela Witnes Bilong Jehova i dediket na baptais pinis. Long Amerika sapos wanpela i laik mekim dispela wok, orait pastaim em i mas wok long haus brens o haus faktori long nambawan ofis long Nu Yok na bai ol i lukim na skelim pasin bilong em long wok na save bilong em. Sapos em i winim dispela mak, bihain bai ol i askim em long wokim pepa aplikesen bilong dispela wok bilong intenesenel konstraksen. Sapos Bruklin i singautim sampela man long mekim dispela wok, planti taim ol i no save singautim ol meri bilong ol, nogat. Tasol ol meri tu ol inap wokim wanpela pepa aplikesen bilong mekim wok.

Ol Witnes long ol narapela kantri inap kisim pepa aplikesen long brens-ofis long hap bilong ol yet. Bihain ol i salim pepa i go long Bruklin long dipatmen i lukautim wok bilong wokim ol bikpela haus brens samting long olgeta hap. Na bihain bai ol i toksave long dispela man i bin salim pepa long ol sapos ol i orait long em i ken insait long dispela wok.

Ol Meri Tu i Mekim Gutpela Wok

Tru, planti meri ol i no save tumas long olkain wok bilong konstraksen, tasol ol i lain long pasim waia long ol ain na helpim ol brata long lainim na makim gut ol tail long plua na penim ol samting. Na ol narapela i save mekim wok olsem bilong klinim ol rum slip samting bilong ol wokman. Ol i mekim gutpela wok insait long dispela wok konstraksen long ol narapela narapela hap bilong graun.

Meri bilong wanpela man em tupela wantaim i insait long dispela wok konstraksen long Poto Riko, em i bin salim pas long ofis long Bruklin na i tok, ‘Long Janueri 1, 1991, mipela kamap long dispela hap bilong wok. Mi wok wantaim lain i pasim waia long ol ain. Bipo mi no bin mekim dispela kain wok. Mipela mas brukim baksait na mekim wok long ol plaias bilong pasim ol waia long ol ain​—na mipela mekim i go inap de olgeta!

“Long namba wan de mi kirap wok, strongpela hat mi mas putim long het em i wok long pundaun. Tasol mi lain long putim gut na nau mi wok gut. Skin long han bilong mi i solap na sua i kamap, olsem na oltaim i gat 5-pela o 6-pela plasta bilong karamapim skin. Mi lain long kisim ol mak bilong haus long piksa na makim long graun long sok na putim ol ain mipela pasim pinis long waia. Em i gutpela wok tru. I no olsem ol wok mi save mekim long haus bilong mi yet​—olsem klinim haus, wokim kaikai, wasim ol klos, na ol narapela wok olsem. Mi save ol dispela hap ain mipela pasim em i bilong i go insait long ol banis bilong haus na bai dispela haus brens i stap inap longtaim. Dispela tingting i strongim bel bilong mi!”

Amamas Tru Long Mekim Dispela Wok

Wanpela wasman bilong dispela lain konstraksen i tok, ‘Dispela em i nambawan samting tru. Ol manmeri i kisim malolo long wok mani bilong ol na ol i go long ol dispela longwe hap, na ol yet i baim rot bilong ol. Na long ol dispela hap ating ol i mas mekim planti wok moa na ol i lusim bikpela hap taim moa, winim ol aua ol i save lusim bilong wok long hap bilong ol yet. Na taim ol i go bek long ol hap bilong ol, ol i salim pas i kam na tok tenkyu long mipela long ol inap insait long dispela gutpela wok!’

Wanpela pas i tok: “Mipela laik tok tenkyu long mipela i bin wok inap 3-pela mun long Filipin, na mipela amamas tru long wok long dispela hap. Long san olgeta mipela wok i go na long apinun skin bilong mipela i les tru, tasol mipela i gat strong long spirit, long wanem mipela i poroman wantaim gutpela lain manmeri. Mipela amamas long save gut long ol narapela man ol tu i kam bilong wok, na mipela i kirap nogut long pasin bilong ol man bilong dispela hap yet em mipela bin wok wantaim ol. Tru tumas, mipela laikim tumas ol, na ol i kamap olsem famili tru bilong mipela.”

Tupela marit ol i bin i go long Ekwado na ol i rait olsem: “Mipela i no kaikai planti kaikai bilong stua i gat suga samting, na mipela lain long waswas long liklik wara tasol na waswas long kolwara. Mipela i givim strong bilong mipela long mekim gut wok, tasol mipela i kisim ol samting i winim tru samting mipela i givim. Tru ol brata bilong yumi long Ekwado ol i stap rabis tru long ol samting bilong skin, tasol ol i no rabis o slek long ol samting bilong spirit, na ol i givim bel tru long mekim wok autim tok. Mipela i pilim tru dispela gutpela wok mipela inap insait long en.”

Sanapim Banis Bilong Haus

Ol i mekim wok long wanpela nupela rot, olsem wokim ol banis samting long graun na sanapim long ples bilong en stret. Pastaim ol i makim ol ain na bihain ol i kapsaitim simen long en bilong wokim ol banis bilong haus. Sampela banis simen i bikpela tru​—i go antap inap 3-pela plua samting na hevi bilong en i olsem 20 ton samting. Ol i wokim ol dispela banis long plua em ol i putim pinis o long wanpela hap bilong wokim ol dispela kain samting, na bihain ol i sanapim long ples stret bilong en.

Ol i hipim inap 6-pela o 8-pela bilong ol dispela banis ol i wokim pinis, olsem slipim narapela antap long narapela. Na ol i larim i stap inap 7-pela de inap long ol i drai pinis​—na ol i strongpela tru. Orait nau traipela masin krein i pulim i go na sanapim long hap bilong haus ol i mas i stap long en. Ol i wokim planti banis bilong haus olsem, na i bilong sanapim long insait o ausait bilong haus, na ol i wokim planti tru bilong ol haus i go antap inap planti plua. Olsem long taim ol i wokim haus brens long Filipin​—ol i bin wokim na sanapim inap sampela handet banis long dispela rot. Dispela banis simen i wel gut na ol i penim tasol.

Dispela rot i sotim taim bilong wokim haus, na ol wokman i no hatwok tumas long wokim. Taim ol Witnes i wokim nupela haus faktori bilong ol long Inglan, wanpela nius bilong wok bisnis (Concrete) i tok: “Dispela nupela pasin ol i mekim wok long en i gutpela tru, long wanem em inapim mak bilong haus ol i laik wokim . . . Na tu, ol i no winim bikpela hap taim na tromoi bikpela mani long wokim.”

Na dispela nius i stori moa olsem: “Long dispela rot ol inap sanapim hariap ol bikpela banis bilong haus, na tu, ol man bilong dispela hap yet i mekim wok, olsem na i nogat hatwok long en, na i no gat bikpela pe bilong wokim ol dispela haus.” Olsem na em i gutpela rot tru long mekim dispela wok konstraksen!

Ol Ofis Bilong Wokim Piksa Bilong Haus

Ol i wokim ol piksa bilong haus na makim olgeta wok samting bilong intenesenel konstraksen long nambawan ofis bilong ol Witnes Bilong Jehova long Bruklin long Nu Yok. Winim wan handet wokman long nambawan ofis, em ol i gat save long dispela wok, ol i wokim ol piksa bilong haus na makim bikpela bilong en na antap bilong en na stail samting bilong en. Wok i go bikpela long planti hap, olsem na bilong helpim dispela wok ol i kirapim sampela ofis olsem long Japan na Ostrelia na long sampela hap bilong Yurop.

Long yia 1987, ol i kamapim wanpela nupela kompyuta CAD (Computer Aided Design) bilong redim ol piksa ol i makim pinis long pepa samting, na i gat ol narapela liklik masin olsem tu. Ol i bungim olgeta wantaim na ol inap makim piksa bilong haus samting na ol i no moa raitim long han. Ol i mekim wok long planti kompyuta CAD, winim 65, long Bruklin na long ol narapela brens-ofis.

Long dispela masin yu inap putim piksa bilong ol narapela haus samting bilong bipo long kompyuta na yu inap kamapim bek na bungim na stretim wantaim nupela piksa nau yu wokim. Dispela i helpim ol tru long wokim planti ol piksa samting, na wokim mak bilong ol dispela haus na bai pasin bilong wokim i wankain.

Ol Nupela Haus Ol i Wokim Long Nau

Taim dispela ofis bilong wokim ol piksa bilong haus long Bruklin i kamap bikpela, em nau wok bilong makim ol wokman bilong intenesenel konstraksen tu i go bikpela. Yumi ken tok olsem ol i bin kirapim dispela wok long yia 1985, taim ol man bilong narapela narapela kantri i kam helpim wok bilong wokim nupela brens-ofis long Panama. Bihain dispela wok i go bikpela taim ol i laik helpim wok bilong skruim haus brens bilong Peru i go bikpela, na ol i wokim haus brens long Kosta Rika na long Naijiria. I no longtaim bihain long dispela na Bruklin i kirap salim ol wokman bilong helpim wok konstraksen long ol narapela hap bilong graun.

Dispela lain wokman bilong ol narapela narapela hap, ol i helpim tru wok bilong sanapim planti nupela haus brens na skruim hap bilong sampela haus brens i go bikpela, olsem ol i mekim long yia 1986 samting. Inap 5-pela yia i go pinis ol i bin wokim na dediketim pinis sampela brens-ofis long ol hap olsem Panama, Kosta Rika, Sili, Meksiko, Nu Silan, Haiti, Laibiria, Ostria, Ekwado, Papua Niugini, Gana, Hawaii, Potyugal, Hong Kong, Saiprus, Peru, El Salvado, Morisas, Japan, Honduras, Gwatemala, Naijiria, Ajentina, Ostrelia, Nu Kaledonia, Fiji, Filipin, Grik.

Long Naijiria, ol i sanapim haus brens long wanpela graun em i bikpela olsem 57 hekta, na ol i wokim wanpela faktori tu, na haus slip bilong 400 manmeri i wok long brens-ofis, na planti ol narapela ofis samting, na ples bilong putim ol ka samting long en, na em i kamap olsem wanpela liklik taun. Ol samting bilong wokim ol dispela haus ol i kisim long Amerika. Ol dispela samting i planti tru, na ol i pulimapim long 347 bikpela bokis ain.

Sampela taim ol lotu ol i kolim Kristen i birua long dispela wok bilong ol Witnes. Long 1989 long kantri Grik, ol bikman bilong lotu ol i laik pasim wok bilong ol Witnes long wokim ol nupela haus long dispela hap, olsem na ol i kisim lain bilong ol i kam long 40 bas bambai ol i ken pasim dispela wok, tasol ol polis i save gavman i tok orait long ol Witnes i mekim dispela wok na ol i helpim ol Witnes. Na ol Witnes i sanapim wanpela brens-ofis wantaim traipela nupela faktori na 22 nupela haus slip inap long 170 manmeri i slip long en, na ol i pinisim na dediketim long yia 1991.

Wanpela bisop bilong Evreux long Frans, nem bilong em Jaques Galliot, em i laik pasim ol Witnes long wokim nupela brens-ofis long Louviers. Em i tok, wok autim tok bilong ol Witnes i soim olsem ol i ‘daunim ol narapela manmeri.’ Tasol sampela i no wanbel long tok bilong bisop. Maski bisop i birua tru long dispela samting, ol i tok, ‘Mipela i no laik pasim ol long dispela wok bilong ol.’ Ol i ting i stret ol Witnes i wokim ol haus faktori samting long dispela hap tu, olsem ol i mekim long ol narapela hap.

Nau dispela bikpela lain volantia bilong wokim ol dispela haus ol i wok i stap long ol hap olsem Kolambia, Poto Riko, Sambia, Brasil, Inglan, Kanada, Dominikan Ripablik, Ekwado, Polan, Gwadelup, Tailan, ol ailan Liwat, Bahama, Westen Samoa, Tahiti, Ailan Solomon, Veneswela, Ripablik bilong Korea, Saut Afrika, Jemani. Ol i makim pinis sampela wok olsem bai kamap long hap bilong Frans, Spen, Meksiko, Sri Lanka, Taiwan, Suriname; long ol dispela hap ol bai wokim nupela haus brens o skruim olpela haus brens i go bikpela.

Skelim Ol Samting Bilong Bihain

Taim Lain Bilong Bosim Ol Witnes i makim olsem ol i mas skruim haus brens bilong Jemani i go bikpela tru inap olsem 50 pesen long 1988, sampela i ting dispela i bikpela tumas. Tasol long 1989 i go 1990 samting, gavman bilong Polan na Hangri na Is Jemani na Romenia i orait long wok autim tok bilong ol Witnes na i no gat tambu. Na long Mas 27, 1991 gavman bilong Rasia i rausim tambu long wok bilong ol Witnes na i tok ol i olsem wanpela lotu stret.

Winim 250,000 manmeri long ol kantri bilong Is Yurop i bin bung long wanpela kibung distrik bilong ol Witnes Bilong Jehova long 1990 na ol i amamas tru long kisim ol buk samting i kamapim ol tok bilong Baibel. Wanpela buk (1991 Britannica Book of the Year) i tok, ‘insait long tupela mun tasol, brens-ofis bilong Wes Jemani i salim inap 275 ton buk samting na 115 ton Baibel i go long kantri Is Jemani.’ Olsem na brens-ofis long Jemani i mekim bikpela wok long dispela traipela hap ol i bin skruim long en.

Redim Ol Samting Bilong Bihain

Jisas i bin tok profet long autim ‘dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.’ Em i bikpela wok tru long mekim olsem. (Matyu 24:14) Ol Kristen tru long olgeta hap graun i wok strong long mekim dispela wok. Ol i stretim gut ol samting bambai ol inap bringim dispela gutnius i go long ol man bilong olgeta hap.

Bilong mekim gut dispela wok, lain Witnes Bilong Jehova i wokim planti haus faktori bilong wokim planti Baibel na buk na nius long hetkota long Bruklin, Nu Yok. Nau ol i wokim wanpela traipela haus i go antap inap 30 plua, em i stap long namba 90 Sands Strit, em haus slip bilong inap olsem wan tausen manmeri em ol i wok long nambawan ofis, na ol i ting ol bai pinisim dispela haus long 1993.

Tasol nau ol i mekim wanpela bikpela wok konstraksen tru, winim ol dispela narapela wok. Dispela i kamap klostu long hap ol i kolim Pateson, lusim Biktaun Nu Yok i go inap olsem 110 kilomita samting. Wanpela nius (The New York Times) em i tok, ‘taim ol Witnes Bilong Jehova i pinis long wokim ol dispela samting olsem long 1996 samting, insait long dispela hap taim ol i bin wokim inap 6-pela traipela haus, i gat 2-pela o 5-pela plua samting i go antap, na i gat 624 rum slip na ol narapela rum, na 450 ples bilong putim ol ka, na i gat wanpela haus kain olsem haus pasindia i gat 144 rum slip long en na haus kuk na wanpela traipela ples kaikai em inap long 1,600 manmeri i ken sindaun wantaim, na wanpela haus i gat ol ofis long en, na wanpela haus skul, na sampela haus olsem woksop bilong stretim ol samting o mekim ol narapela wok.

Tru tumas, yumi kirap nogut long ol dispela gutpela wok ol i mekim long olgeta hap​—na ol volantia yet i lukautim na mekim ol dispela wok! Olsem na em i wanpela nupela samting tru long wok bilong intenesenel konstraksen!

[Piksa long pes 21]

Pasim waia long ol ain​—em hap wok bilong konstraksen

[Ol Piksa long pes 23]

Ol i wokim ol banis simen, na narapela i slip antap long narapela. Taim ol i drai na strong pinis, ol i sanapim long ples bilong ol stret

[Ol Piksa long pes 24]

Long Bruklin ol i skelim piksa bilong nupela haus brens ol i laik wokim long Polan. Ol i putim piksa bilong haus long kompyuta

[Ol Piksa long pes 25]

Em piksa bilong ol haus brens ol i laik wokim long Poto Riko na Sambia na ol ailan Liwat

[Piksa long pes 26]

Em ol lain volantia i mekim wok konstraksen long wanpela kantri long Yurop