Ol Meri i Bin Mekim Bikpela Wok

LONG program bilong dediketim brens-ofis bilong ol Witnes Bilong Jehova long Simbabwe long Disemba 12, 1998, ol i kamapim gut bikpela wok ol meri Kristen i bin mekim bilong sanapim dispela brens-ofis. Ol i sanapim brens-ofis insait long 4-pela yia, na ol volantia bilong planti kantri na planti handet volantia bilong Simbabwe tu, ol i givim taim, na strong, na save, na mani samting bilong ol bilong sanapim dispela gutpela brens-ofis em yu inap lukim long piksa hia.

Long dispela piksa, yu ken lukim 6-pela haus slip i stap baksait tru em bikpela bilong ol i wankain. Bikpela haus i stap klostu long ol i gat rum kaikai, haus kuk, na ples bilong wasim laplap long en. Inap 61 rum slip i stap long ol haus slip, na inap 200 manmeri inap sindaun long rum kaikai. Long daunbilo long han kais, em haus ol ofis i stap long en. Long namel em rot bilong i go insait long brens-ofis, na long han sut em haus ol buk na nius samting i stap long en, na program bilong dediketim brens-ofis i kamap long dispela hap.

Dispela gutpela brens-ofis long Simbabwe, long sauten Afrika, em i wanpela tasol bilong planti brens-ofis ol Witnes Bilong Jehova i bin sanapim, kirap long taim wok bilong sanapim ol brens-ofis na Haus Kingdom samting i kamap long olgeta hap, long Novemba 1985. Nius Kirap! bilong Februeri 8, 1992, i toktok long dispela wok long stori “Nupela Kain Pasin Bilong Sanapim Haus.”

Kirap! i stori long wok bilong ol meri long dispela samting, olsem: “Planti ol i lain long pasim waia long ol ain na helpim ol brata long lainim na makim gut ol tail long plua na penim ol samting. Na ol narapela i save mekim wok olsem bilong klinim ol rum slip samting bilong ol wokman. Ol i mekim gutpela wok insait long dispela wok konstraksen long ol narapela narapela hap bilong graun.”

Long program bilong dediketim brens-ofis long Simbabwe, tupela brata i bosim dispela wok, em George Evans na James Paulson, ol i tok olsem wok bilong ol meri long sanapim brens long Simbabwe i wankain olsem wok bilong ol meri long sanapim haus lotu bilong Israel long bipo. Baibel i stori long ol Israel olsem: ‘Olgeta man na meri i gat save long wokim ol kain kain samting, ol i kam.’​—⁠Kisim Bek 35:​21, 22.

Brata Evans na brata Paulson ol i mekim wok long dispela stori bilong Baibel bilong kamapim klia gutpela wok ol meri i save mekim. Ol i kamapim tok bilong Baibel: “Olgeta meri i save pinis long wokim tret, ol i kisim blupela na retpela gras bilong sipsip na wokim tret.” Tru tumas, ol meri tu ol i amamas long mekim wok. “Olgeta man na meri bilong Israel i laik givim samting long Bikpela, ol i bringim bilong mekim ol wok Bikpela i bin tokim Moses long mekim.”​—⁠Kisim Bek 35:​25, 26, 29.

Ol brata i bosim wok bilong sanapim brens long Simbabwe, ol i stori long dispela wok, olsem: ‘Ol meri i bin mekim ol wankain wok olsem ol man i mekim.’ Ol i pasim waia long ol ain na mekim wok long ol bikpela masin. Brata Paulson i tok, ol meri i klinim gut tru ol trak bilong wokim simen na ol narapela bikpela masin ol i bin mekim wok long en. Na em i tok, dispela em i wanpela samting planti man i no save mekim.

Tru tumas, yumi amamas tru long planti tausen meri ol i bin wok wantaim ol man long wokim ol brens-ofis na Haus Kingdom bilong ol Witnes Bilong Jehova long olgeta hap!

[Piksa long pes 24]

Brens-ofis long Simbabwe