Ol i Helpim Lain Brata Kristen Long Olgeta Hap

YU BIN harim dispela tok “ol intenesenel sevent” na “ol intenesenel volantia”? Ol Witnes Bilong Jehova em ol i insait long ol dispela lain, ol i givim taim na save bilong ol bilong helpim wok bilong sanapim ol haus bilong prinim na tilim ol buk na nius samting i kamapim tok bilong Baibel long Kingdom. Ol dispela volantia i helpim tu wok bilong sanapim ol Haus Kibung na Haus Kingdom, em ol hap we ol man i save lainim tok bilong Baibel. Long nau, ol dispela volantia i helpim wok bilong sanapim ol haus long 34 kantri, planti em long ol ples we ol i no gat planti wokman na mani samting. Ol dispela wokman i bungim wanem ol hatwok na amamas taim ol i helpim bikpela lain brata long olgeta hap? Ol i pilim olsem wanem long ‘wok bilong God’ ol i mekim? (KTH 7:​9, 15) Bilong painimaut, yumi ken bungim sampela volantia i bin mekim wok long Meksiko.

Ol volantia bilong ol narapela kantri i bin go long Meksiko long namba wan taim long Me 1992. Kwiktaim bihain long ol i kamap, ol i go pas long wok bilong surikim haus brens i go bikpela, em hap we ol i save stiaim wok bilong ol Witnes Bilong Jehova long Meksiko. Bilong surikim brens-ofis i go bikpela, ol i mas sanapim 14 nupela haus, em ol ples slip bilong lain i mekim wok long brens-ofis, wanpela haus bilong prinim ol buk samting, na wanpela haus bilong ol ofis.

Bilong helpim dispela wok konstraksen, winim 730 volantia bilong Kanada, Gret Briten, Yunaitet Stets, na ol narapela kantri i wok bung wantaim planti handet volantia i kam long olgeta hap bilong Meksiko. Na tu, winim 28,000 Witnes bilong 1,600 kongrigesen samting i stap klostu long hap bilong brens-ofis i helpim wok konstraksen long ol wiken. Olgeta i amamas long mekim wok na givim nating save ol i gat bilong mekim wok. Ol i pilim olsem em i wanpela gutpela samting tru long mekim wok bilong Jehova long dispela rot. Kirap long taim wok i kirap na i go, ol i tingim tok holi spirit i kamapim long Song 127:1: “Sapos Bikpela i no wokim haus, ol kamda i wok nating. Sapos Bikpela i no lukautim wanpela taun, orait ol wasman i was nating.”

Ol Hatwok Ol i Bungim

Wanem ol hatwok ol intenesenel volantia i save bungim taim ol i mekim wok long narapela kantri? Mipela i kamapim hia sampela tingting bilong ol. Curtis na Sally, em tupela marit i kam long Yunaitet Stets, ol i bin helpim wok konstraksen long India, Jemani, Meksiko, Paragwai, Rasia, Romenia, Sambia, na Senegal. Curtis i tok: “Namba wan samting i hatwok long mekim em mipela i mas lusim pikinini meri bilong mipela i mekim wok painia [wok autim tok fultaim], na lusim kongrigesen bilong mipela long Minnesota. Mi na meri bilong mi i bin bung wantaim dispela kongrigesen inap 24 yia, na mipela i pilim olsem em i olsem famili bilong mipela.”

Sally i tok: “I hatwok long stap long hap we yu no save gut long sindaun bilong dispela ples, na ating dispela i hatwok moa long ol meri winim man, tasol mi kisim save olsem mi inap mekim sampela senis long sindaun bilong mi. Mi lain long pait wantaim ol binatang nabaut, planti bilong ol!” Em i tok moa: “Long wanpela kantri, mipela 10-pela volantia i yusim wanpela flet i no gat haus kuk na i gat tupela toilet na ples waswas tasol. Long dispela taim mi bin lain long pasin bilong wet na no ken les hariap.”

Wok bilong lainim wanpela nupela tok ples em narapela hatwok em yu mas wok strong long mekim wantaim pasin daun. Sharon, em i bin wok wantaim man bilong em long wok konstraksen long ol narapela kantri, em i tok: “Taim yu no save long tok ples bilong kantri yu wok long en em i hatwok. Long pastaim, i hatwok long go klostu long ol brata na sista spirit bilong yu, taim yu no inap toktok wantaim ol na kamapim ol tingting bilong yu. Dispela i mekim na yu bel hevi. Tasol ol brata mipela i bungim long ol narapela kantri i save isi long mipela na ol i tingim tru mipela, olsem mipela i stap gut o nogat. I no longtaim na mipela i kirap toktok wantaim ol.”

Strongim Bel Bilong Mekim Wok Autim Tok

Taim ol dispela volantia i givim ol yet bilong helpim wok konstraksen, ol i save olsem nambawan bikpela wok bilong ol em wok bilong autim gutnius bilong Kingdom bilong God. Olsem na ol i sapotim tru wok bilong autim tok em kongrigesen ol i bung wantaim i mekim. Åke na Ing-Mari, tupela marit i bin helpim wok konstraksen long Guadelup, Malawi, Meksiko, na Naijiria, ol i tok olsem yu mas strongim bel bilong autim tok long narapela kantri long narapela tok ples.

Ing-Mari i tok: “Pastaim mipela i no toktok tumas wantaim ol man long taim bilong autim tok, long wanem, mipela i save raun tasol wantaim ol asples Witnes. Planti taim mipela i larim ol i toktok, long wanem, mipela i sem long mekim. Tasol long wanpela moning, mipela yet i go autim tok. Maski lek bilong mipela i guria na klok bilong mipela i pam hariap hariap, mipela i go tasol. Mipela i bungim wanpela yangpela meri na em i putim yau long ol tok mi bin redim bilong mekim. Mi ritim wanpela skripsa na tilim sampela nius. Dispela meri i tok: ‘Plis, inap yu bekim askim bilong mi. Mi gat wanpela wanblut i save stadi long Baibel wantaim ol Witnes Bilong Jehova. Olsem wanem mi ken stadi?’ Mi kirap nogut na mi no save bai mi tok wanem. Mi bosim mi yet na tokim em olsem mi ken mekim Baibel-stadi wantaim em.”

Ing-Mari i tok moa: “Tingim amamas na tenkyu bilong mi long Jehova long em i blesim laik bilong mitupela long tokim ol narapela long tok i tru.” Dispela meri i kamap strong na kisim baptais long wanpela kibung distrik long Mexico City. Åke na Ing-Mari i tok long wok autim tok bilong ol olsem: “Mipela i amamas tru long ol wok konstraksen mipela i bin mekim long narapela narapela hap, tasol i no gat wanpela samting inap winim dispela amamas na belgut man i kisim taim em i helpim narapela long kisim tok i tru.”

Pasin Bilong Daunim Laik Bilong Ol Yet

Tru, ol volantia i lusim famili na ol pren ol i daunim laik bilong ol yet bilong helpim ol brata bilong ol long ol narapela kantri, tasol ol i kisim ol bikpela amamas tu. Em wanem ol amamas?

Howard i bin wok wantaim meri bilong em, Pamela, long Angola, Ekwado, El Salvado, Gaiana, Kolambia, Meksiko, na Pueto Riko, em i tok: “Em wanpela gutpela samting tru long bungim ol brata sista long ol narapela kantri, na pilim stret pasin bilong laikim narapela i stap namel long lain brata i stap long olgeta hap. Planti taim yumi ritim ol stori i kamapim dispela pasin, tasol taim yu stap na wok wantaim ol brata bilong narapela ples na sindaun, bai yumi laikim na tingim moa yet bikpela lain brata bilong yumi.”

Gary, em i bin helpim wok konstraksen long Ekwado, Kolambia, Kosta Rika, Meksiko, na Sambia, em tu i pilim olsem dispela samting i bin helpim em tru. Em i tok: “Trening mi kisim insait long ol yia mi bin bung wantaim ol strongpela brata i wok long ol brens long ol kantri ol i bin makim mi long wok long en, i bin helpim mi long winim ol hatwok mi bungim long ol hap mi go long en. Dispela i bin strongim tru bilip, long wanem, em i opim rot long mi ken pilim stret pasin wanbel em oganaisesen bilong Jehova long olgeta hap i kamapim​—⁠pasin wanbel i stap maski i gat kain kain tok ples, skin, o sindaun.”

Nau wok konstraksen long Meksiko i pinis, na long dispela yia ol i dediketim hap bilong brens ol i bin surikim. Pasin bilong ol long laikim tru Jehova i kirapim ol intenesenel sevent na intenesenel volantia long givim bikpela helpim bilong mekim lotu i tru i go bikpela long Meksiko na ol narapela hap. Ol Witnes Bilong Jehova long olgeta hap i amamas long pasin bilong ol long givim ol yet bilong helpim ol brata Kristen bilong ol long olgeta hap.

[Piksa long pes 25]

Ekwado

[Piksa long pes 25]

Kolambia

[Piksa long pes 25]

Angola

[Piksa long pes 26]

Ol i kirap wokim ol nupela haus long brens long Meksiko

[Piksa long pes 26]

Gaden long brens

[Piksa long pes 26]

Daunbilo: Sampela memba bilong Konstraksen Dipatmen long fran bilong hap bilong ol nupela haus

[Piksa long pes 27]

Ol konstraksen volantia i amamas long sapotim wok autim tok bilong ol kongrigesen