Strongpela Laik Bilong Adryana
ADRYANA, em wanpela liklik meri i gat 6-pela krismas na i save stap long Tulsa, Oklahoma, long Amerika, na em i gat strongpela laik long wanpela samting. Wankain olsem samting man bilong raitim song, em Devit, i singsing long en: “Mi bin askim God long wanpela samting tasol, na mi laikim tumas bai em i mekim olsem. Mi askim em bai mi ken i stap long haus bilong em inap olgeta de mi gat laip. Mi laik amamas long em i gutpela tumas long mi. Na mi laik askim em long soim mi gutpela rot.”—Song 27:4.
Taim Adryana i gat sikspela mun tasol, ol dokta i painimaut olsem em i gat sik neuroblastoma, we samting olsem buk i wok long gro insait long ol rop wailis bilong bodi bilong em. Dispela sik nogut i mekim na tupela lek bilong em i dai. Ol dokta i mekim planti operesen long em, na inap wanpela yia ol i putim em long marasin kimoterapi.
Papa bilong Adryana, husat i no gat wankain bilip olsem Adryana na mama bilong em, em i stretim rot wantaim wanpela lain husat i save mekim samting bilong amamasim ol pikinini i gat bikpela sik na bai pikinini i ken visitim wanpela pak i gat nem long mekim ol kain kain pilai samting bilong amamas. Paslain long dispela lain i mekim ol samting, ol i inteviuim Adryana. Em i tok amamas long ol i tingim em, tasol em i tokim ol olsem em i laik visitim Betel long New York, em ples we ol i save bosim wok ol Witnes Bilong Jehova i save mekim long olgeta hap bilong graun. Taim Adryana i kisim save long samting papa i askim dispela lain long en, em i beten long Jehova long opim rot na bai em i ken visitim Betel. Maski ol dispela lain i bin ting olsem Betel i no gutpela ples tumas bilong amamasim ol pikinini, ol i orait long strongpela laik bilong Adryana, na papa bilong em tu i orait long dispela samting.
Adryana wantaim mama, susa bilong em, na wanpela pren, ol i go long New York bilong visitim Betel. Dispela em i namba wan taim bilong em long visitim Betel. Adryana i tok: “Jehova i harim beten bilong mi. Mi save em bai larim mipela i go lukim Betel. Mi lukim ol i wokim ol buk na nius na Baibel olsem wanem. Dispela em i gutpela samting tru winim wanpela pak i gat ol pilai bilong amamas long en.”
Adryana i amamas long Jehova i “gutpela tumas” long em na em i laikim tumas wok ol i mekim long dispela hap bilong bosim wok ol wokboi bilong Jehova i mekim long nau. Mipela i tok welkam long yu tu i ken kam visitim Betel. Hetkota bilong ol Witnes Bilong Jehova i stap long New York na i gat ol brens ofis i stap long sampela narapela hap bilong graun.