Rot Bilong Daunim Bel Hevi

“Olgeta pikinini man na pikinini meri bilong [Jekop], ol i kam na mekim ol toktok bilong mekim bel bilong en i kamap gutpela gen. Tasol em i no laik tru na i tok olsem, ‘Mi mas krai long em inap mi go i stap wantaim em long ples bilong ol man i dai pinis.’ Olsem na Jekop i krai tasol i stap.”​—STAT 37:​35.

GUTPELA man Jekop i bel hevi nogut tru taim pikinini man bilong em i dai. Em i ting em bai krai i go inap long taim em yet i dai. Olsem Jekop, ating yu tu i pilim olsem hevi bilong yu long wanpela long famili i dai em i bikpela tru na i no inap pinis. Olsem wanem? Bikpela bel hevi bilong yu i makim olsem yu no gat strongpela bilip long God? Nogat tru!

Baibel i stori long Jekop olsem em i man bilong bilip. Baibel i mekim gutpela tok long Jekop, wantaim bubu bilong em Abraham na papa bilong em, Aisak, long strongpela bilip bilong ol. (Hibru 11:​8, 9, 13) Wanpela taim Jekop i pait wantaim wanpela ensel inap nait olgeta bilong God i ken givim blesing long em! (Stat 32:​24-​30) Olsem na yumi ken save Jekop i pas gut wantaim Jehova. Orait, yumi inap lainim wanem samting long pasin bilong Jekop long krai sori? Maski yu gat strongpela bilip long God, i no gat rong long kamapim bel hevi bilong yu na krai sori. Em pasin bilong yumi ol man long krai sori taim wanpela yumi laikim tumas em i dai.

Taim Man i Krai Sori

Long planti man, taim wanpela long famili i dai, dispela i mekim ol i bel hevi tru. Tingim Leonardo. Taim em i gat 14 krismas, papa bilong em i dai long wanpela sik bilong klok. Leonardo i no inap lusim tingting long dispela taim anti bilong em i tokim em long dispela samting. Pastaim em i no bilip dispela samting i bin kamap. Em i lukim bodi bilong papa bilong em long taim bilong fiuneral, tasol em i hatwok long bilip olsem em i dai pinis. Inap 6-pela mun, Leonardo i no inap krai. Planti taim em i wet long papa i pinis long wok na kam bek long haus. Inap wanpela yia em i no bilip olsem papa bilong em i bin i dai. Taim em i kliagut pinis, orait nau em i pilim olsem em i stap wanpis tru. Ol liklik samting, olsem kam bek long haus na i no gat man long haus, dispela i kirapim em long tingim papa bilong em. Long kain taim olsem, em i save krai nogut tru. Em i bel hevi stret long Papa i lusim em!

Olsem stori bilong Leonardo i kamapim, taim wanpela long famili i dai, man inap bel hevi tru. Tasol gutpela samting i olsem: I gat rot bilong daunim dispela hevi. Tasol ating sampela hap taim i mas lus pastaim long mekim olsem. Yumi ken tok piksa olsem: Taim bikpela sua i kamap long skin, ating sampela hap taim i mas lus long sua i drai. Na olsem tasol, bilong krai sori bilong yu i ken pinis, ating sampela mun, o sampela yia, o planti yia i mas lus. Tasol bikpela bel hevi yu pilim long pastaim, dispela bai wok long pinis, na bihain bai yu pilim gen olsem i stap bilong yu i gat as bilong en.

I go inap long taim dispela samting i kamap, ol i tok pasin bilong krai sori taim wanpela i dai dispela inap helpim man long pilim orait gen na lain long mekim sampela senis. Yumi mas kirap gen long mekim ol samting, maski dispela man i no stap. Pasin bilong krai inap helpim yu long kamapim bel hevi bilong yu. Tru, yumi no gat wankain pasin long kamapim bel hevi bilong yumi. Tasol sapos yu no kamapim bel hevi bilong yu, dispela inap nogutim tingting, bel, na skin bilong yu. Orait, olsem wanem yu inap kamapim bel sori bilong yu long ol gutpela rot? Baibel i mekim sampela gutpela tok long dispela.a

Daunim Bel Hevi

Ol lain em wanpela bilong famili bilong ol i dai ol i luksave olsem pasin bilong toktok inap helpim ol long daunim bel hevi. Tingim ol tok em Jop, em wanpela man Baibel i stori long em, i mekim. Olgeta 10-pela pikinini bilong em i dai na kain kain narapela hevi tu i bin painim em. Em i tok: “Mi les pinis long i stap laip. Mobeta mi dai. Olsem na mi mas tokaut long dispela bikpela hevi bilong mi.” (Jop 1:​2, 18, 19; 10:1) Lukim, Jop i “tokaut” long ol hevi bilong em.

Paulo, em mama bilong em i bin dai, em i tok: “Wanpela samting i bin helpim mi, em taim mi toktok wantaim narapela long mama bilong mi.” Olsem na pasin bilong toktok wantaim wanpela gutpela pren, dispela inap daunim bel hevi bilong yu. (Sindaun 17:17) Taim mama bilong Yone i dai pinis, em i askim ol bratasista Kristen long kam planti taim lukim em. Em i tok: “Taim mi toktok wantaim ol, dispela i daunim bel hevi bilong mi.” Ating yu tu, sapos yu kamapim tingting bilong yu long narapela i putim gut yau, dispela bai helpim yu.

Raitim sampela tok, dispela tu inap oraitim bel bilong yu liklik. Sampela i hatwok long kamapim bel hevi bilong ol long maus, ol i raitim sampela tok long pepa bilong kamapim bel hevi bilong ol. Taim Sol na Jonatan i dai, gutpela man Devit i raitim wanpela singsing sori na long dispela singsing em i kamapim bel hevi bilong em. Bihain ol i putim dispela singsing sori long Baibel, long Buk 2 Samuel.​​—2 Samuel 1:17–​27.

Krai tu i wanpela rot bilong kamapim bel hevi. Baibel i tok, i gat “taim bilong krai.” (Saveman 3:​1, 4) Tru tumas, taim wanpela yumi laikim tumas em i dai, dispela em i “taim bilong krai.” No ken sem long krai. Baibel i stori long planti gutpela man na meri i bin krai bilong kamapim bel hevi bilong ol. (Stat 23:2; 2 Samuel 1:​11, 12) Jisas Krais “i krai” taim em i kam klostu long matmat bilong gutpela pren bilong em Lasarus, em nau tasol em i dai.​​—Jon 11:​33, 35.

Ating sampela taim yu bai krai na sampela taim bel bilong yu i no stap isi. Tasol tingim, yu no ken sem long krai. Planti manmeri i bilip long God ol i bin luksave olsem taim ol i krai, dispela i stret na inap oraitim bel hevi bilong ol.

Go Klostu Long God

Baibel i tok: “Yupela i mas i go klostu tru long God, na em bai i kam klostu tru long yupela.” (Jems 4:8) Beten em wanpela rot bilong go klostu long God. Em inap helpim tru yumi! Baibel i mekim dispela gutpela tok promis: “God i save stap klostu long ol manmeri i gat hevi. Na em i save helpim ol manmeri bilip [“bel,” NW] bilong ol i bagarap.” (Song 34:18) Na narapela gutpela tok promis i olsem: “Olgeta hevi yu karim, em yu mas putim long han bilong Bikpela, bai em i karim na bai em i strongim yu.” (Song 55:22) Tingim: Olsem yumi stori pinis, planti i bin luksave olsem taim ol i kamapim bel bilong ol long wanpela gutpela pren, dispela i bin helpim ol. Tasol God i winim tru ol gutpela pren, olsem na i gutpela sapos yumi kamapim bel bilong yumi long dispela God em i bin tok promis long mekim gut bel bilong yumi.​​—2 Tesalonaika 2:​16, 17.

Paulo, em yumi stori pinis long em, em i tok: “Taim mi no inap karim moa bikpela bel hevi, mi save brukim skru na beten long God. Mi singaut long em long helpim mi.” Paulo i bilip strong olsem ol beten bilong em i bin helpim tru em. Sapos yu tu i wok long beten, ating bai yu luksave olsem “God bilong mekim isi bel bilong olgeta man i gat hevi” em bai strongim bel bilong yu na bai yu inap karim bel hevi bilong yu.​​—2 Korin 1:​3, 4; Rom 12:12.

Bilip Bilong Kirap Bek

Jisas i tok: “Kirap bek, em mi yet. Na laip, em mi yet. Na man i bilip long mi, maski sapos em i dai, em bai i stap laip yet.” (Jon 11:25) Baibel i tok ol man i dai pinis ol bai kisim laip gen.b Taim Jisas i stap long graun, em i kamapim klia olsem em inap kirapim bek man i dai pinis. Wanpela taim, em i kirapim bek wanpela meri i gat 12-pela krismas. Papamama bilong em i pilim olsem wanem? Ol “i kirap nogut” na ol i amamas tru. (Mak 5:​42) Taim Kingdom i bosim graun, King Jisas Krais long heven bai kirapim bek planti manmeri moa yet, ol bai kisim laip gen long graun we gutaim na stretpela pasin tasol bai stap long en. (Aposel 24:15; 2 Pita 3:​13) Man! Tingim bikpela amamas tru bai kamap taim ol man i dai pinis i kirap bek na bung gen wantaim famili bilong ol!

Claudete, em pikinini man bilong em i dai taim balus i bagarap, em i putim piksa bilong pikinini bilong em, Renato, long dua bilong frits. Planti taim em i lukim dispela piksa na em i tokim em yet, ‘Bai yumi bung gen long taim bilong kirap bek.’ Leonardo i piksaim long tingting papa bilong em i kisim laip gen long nupela taim God i tok promis pinis long kamapim. Tru tumas, bilip bilong kirap bek i mekim isi bel bilong ol na bilong planti moa em wanpela long famili bilong ol i bin i dai. Dispela bilip inap mekim isi bel bilong yu tu!

[Ol Futnot]

[Blok/Piksa long pes 7]

“God Bilong Mekim Isi Bel Bilong Olgeta Man”

“Yumi litimapim nem bilong God, em i . . . Papa bilong yumi, na em i as bilong olgeta pasin marimari na pasin sori. Em i God bilong mekim isi bel bilong olgeta man i gat hevi.”​​—2 Korin 1:3.

Dispela ves bilong Baibel i kamapim klia olsem God inap helpim ol gutpela wokboi bilong em long karim olgeta kain hevi. Wanpela rot long Jehova i mekim olsem, em long rot bilong wanpela pren o wanblut i gat wankain bilip.

Leonardo, em papa bilong em i dai pinis, em i tingim bek samting i bin strongim na mekim isi bel bilong em. Em i kam kamap long haus na em i tingim i no gat wanpela i stap long haus, na em i kirap long krai nogut tru. Em i go long wanpela pak klostu na i sindaun long wanpela fom. Taim em i wok long krai i stap, em i beten askim God long helpim em. Orait nau, wanpela trak i kam na i stop. Leonardo i luksave olsem draiva em wanpela brata Kristen. Dispela brata i bin wok long kisim ol kago i go givim long ol man na em i bin popaia na bihainim narapela rot. Brata i stap liklik wantaim Leonardo na dispela i mekim isi bel bilong em.

Wanpela taim, wanpela man, em meri bilong em i dai pinis, em i bel hevi long em i stap wanpis. Em i wok long krai i stap, long wanem, i luk olsem i stap bilong em i no gat as bilong en. Em i beten strong askim God long helpim em. Taim em i beten i stap, telefon i ring. Em tumbuna pikinini meri bilong em. Man i tingim bek dispela samting na i tok: “Sotpela tok mitupela i mekim wantaim i strongim bel bilong mi. Mi pilim olsem taim em i ring, dispela i bekim bilong beten bilong mi.”

[Blok long pes 9]

Mekim Isi Bel Bilong Ol Arapela

“Long olgeta hevi i kamap long mipela, [God] i save mekim isi bel bilong mipela. Olsem na mipela inap long mekim isi bel bilong ol man i gat kain kain hevi, olsem God i save mekim isi bel bilong mipela.”​​—2 Korin 1:4.

Planti trupela Kristen i bin ekspiriensim dispela tok. Wanpela long famili bilong ol i bin i dai na narapela i bin mekim isi bel bilong ol, na nau ol yet inap strongim na mekim gut bel bilong ol narapela.

Tingim Claudete, em i save go lukim ol narapela bilong toktok wantaim ol long Baibel. Taim pikinini man bilong em i no dai yet, em i save go lukim wanpela meri em pikinini man bilong em i bin i dai long sik lukimia. Dispela meri i amamas long ol dispela visit, tasol em i pilim olsem Claudete i no inap pilim tru bel hevi bilong em. Tasol liklik taim bihain long pikinini bilong Claudete i dai, dispela meri i go lukim Claudete na i tokim em olsem em i kam lukim em na bai em i ken save olsem nau pikinini man bilong Claudete i dai, Claudete i bilip strong yet long God o nogat. Em i kirap nogut olsem Claudete i holim yet strongpela bilip, na nau dispela meri i save stadi wantaim Claudete long Baibel na dispela i mekim isi bel bilong em.

Taim papa bilong Leonardo i dai pinis, Leonardo i kirap lain long mekim tok ples bilong ol yaupas na bai em inap autim gutpela tok bilong Baibel long ol yaupas na mekim isi bel bilong ol. Dispela wok bilong helpim ol yaupas i bin helpim em yet. Em i tok: “Wanpela samting i bin helpim mi long daunim bel hevi bilong mi, em bikpela laik bilong mi long helpim ol yaupas long kisim save long God. Mi bin lusim bikpela hap taim na strong long helpim ol. Pastaim mi bel hevi, tasol taim mi lukim namba wan Baibel sumatin bilong mi i kisim baptais, dispela i givim bikpela amamas long mi! Em namba wan taim mi amamas tru bihain long papa bilong mi i dai.”​​—Aposel 20:35.

[Piksa long pes 5]

Autim bel hevi bilong yu long narapela, dispela inap oraitim bel bilong yu liklik

[Piksa long pes 6]

Ritim ol tok i stori long kirap bek, dispela inap mekim isi bel bilong yu

[Piksa long pes 6]

Raitim sampela tok i kamapim bel hevi bilong yu, dispela inap helpim yu

[Piksa long pes 8, 9]

Jisas i tok promis long em bai kirapim bek ol man i bilip long em