Olsem Wanem Mi Inap Karim Dispela Hevi?

“MI BIN pilim olsem mi mas pasim dispela hevi long bel bilong mi.” Mike i tok olsem. Em i stori long taim papa i dai na em i ting i no stret em i krai​—⁠em i man na em i mas pasim dispela hevi long bel bilong em. Tasol bihain em i save, dispela tingting i kranki. Olsem na taim bubu man bilong poroman bilong Mike i dai, Mike i save long samting em i mas mekim. Em i tok: “Sapos dispela hevi i bin painim em bipo, bai mi tokim em, ‘Mekim pasin olsem man tru.’ Tasol nau mi kisim pinis gutpela tingting na mi tokim em, ‘Sapos yu laik krai, orait yu krai. Bai mi helpim yu. Sapos yu laik bai mi go, orait bai mi go. Sapos yu laik bai mi stap, orait bai mi stap. Tasol yu no ken pret long krai.’ ”

MaryAnne tu i ting em i mas pasim bel hevi bilong em taim man bilong em i dai. Em i tok: “Mi tingting strong long mi mas i stap olsem gutpela piksa, olsem na mi pasim bel hevi na mi no krai. Tasol bihain mi pilim olsem dispela pasin bilong i stap olsem strongpela meri i no helpim mi. . . . Mi tokim skin bilong mi, ‘Sapos yu laik krai, orait yu krai. No ken mekim olsem yu strongpela meri. Sapos yu kamapim bel hevi bilong yu, bihain bel bilong yu bai orait liklik.’ ”

Em nau, Mike na MaryAnne i wanbel long tok: ‘Sapos yu laik krai, orait yu krai!’ Na tupela i tok stret, long wanem, dispela em i rot bilong oraitim bel bilong yu. Taim yu no pasim bel bilong yu na yu krai, na yu gat stretpela save long ol samting bilong i dai, dispela inap helpim yu.

Tru, yumi no gat wankain pasin long kamapim bel hevi bilong yumi. Na dispela man o meri yumi bin laikim tumas, sapos em i bin dai hariap o em i gat sik inap longtaim, dispela i makim pasin yumi mekim long karim dispela hevi. Tasol yumi ken tok, sapos yu pasim bel bilong yu, dispela inap nogutim skin na tingting bilong yu. Olsem na i gutpela sapos yu kamapim bel hevi bilong yu. Yu ken mekim olsem wanem? Baibel i gat sampela gutpela tok bilong dispela.

Sampela Rot Bilong Mekim

Toktok​—⁠dispela inap helpim yu. Taim tenpela pikinini olgeta bilong Jop i dai, na planti hevi moa i painim em, em i tok: “Mi les pinis long i stap laip. Mobeta mi dai. Olsem na mi mas tokaut long dispela bikpela hevi bilong mi.” (Jop 1:​2, 18, 19; 10:⁠1) Jop i no inap pasim moa dispela bel hevi bilong em. Em i mas autim, olsem “toktok” long en. Wanpela stori (Macbeth) bilong man bilong raitim ol pilai bipo (Shakespeare) i tok, ‘Yu mas autim bel hevi bilong yu, nogut dispela hevi i bagarapim bel bilong yu olgeta.’

Olsem na sapos yu autim bel hevi bilong yu long wanpela “gutpela pren” i save putim gut yau na em i pilim hevi bilong yu, dispela inap oraitim bel bilong yu liklik. (Sindaun 17:17) Na sapos wankain hevi i bin painim dispela pren bilong yu na em i winim dispela bel hevi, ating em inap givim sampela gutpela tok long yu long olsem wanem yu inap winim. Wanpela mama em pikinini bilong em i bin dai, em i bin toktok long narapela meri em wankain hevi i bin painim em. Em i tok: ‘Taim mi save olsem narapela meri i bin kisim wankain hevi na em i lain long karim, na em i kirap na mekim gen ol wok samting em i mas mekim, dispela i strongim bel bilong mi.’

Tasol olsem wanem sapos yu no laik autim bel hevi bilong yu na toktok long en? Taim Sol na Jonatan i dai, Devit i raitim wanpela singsing sori, na long dispela singsing em i kamapim bel hevi bilong em. Bihain ol i putim dispela singsing sori long Baibel, long Namba 2 Samuel. (2 Samuel 1:​17-27; 2 Stori 35:25) Sampela man i kain olsem Devit​—⁠ol i laik raitim sampela tok i kamapim bel hevi bilong ol. Wanpela meri em man bilong em i dai pinis, em i tok em i bin mekim olsem, na sampela de bihain em i kaunim ol dispela tok. Em i tok, dispela i bin helpim em.

Olsem na maski yu kamapim dispela hevi long maus o yu raitim, em inap oraitim bel bilong yu liklik. Na tu, em inap helpim yu long stretim sampela liklik kros. Wanpela mama em pikinini bilong em i dai pinis, em i tok: “Mi na man bilong mi i bin harim stori bilong sampela marit ol i bin katim marit taim wanpela pikinini bilong ol i dai, na mipela i no laik bai dispela samting i painim mipela. Olsem na taim mitupela i kros na narapela i laik putim asua i go long narapela, mitupela i toktok wantaim long dispela hevi na stretim gut dispela tok. Mi ting dispela i bin helpim mitupela long pas gut wantaim.” Olsem na taim yu kamapim bel hevi bilong yu, dispela bai helpim yu long save, maski dispela pikinini i bilong yutupela wantaim, yutupela i gat narapela narapela pasin bilong kamapim bel hevi.

Narapela rot bilong kamapim bel hevi, em krai. Baibel i tok, i gat “taim bilong krai.” (Saveman 3:​1, 4) Taim wanpela i dai na yumi bin laikim em tumas, dispela em i taim bilong krai, a? Krai em i olsem wanpela rot bilong oraitim bel hevi.

Wanpela yangpela meri i stori long taim mama i dai na wanpela pren bilong em i bin helpim em long karim dispela hevi. Em i tok: “Long olgeta taim em i stap bilong helpim mi. Em i krai wantaim mi. Em i toktok wantaim mi. Mi inap kamapim long ples klia bel hevi bilong mi. Mi no sem long krai.” (Lukim Rom 12:15.) Na yu tu yu no ken sem long krai. Olsem yumi tok pinis, i gat planti stori long Baibel long ol bilipman na bilipmeri bilong bipo​—⁠na Krais Jisas tu​—⁠em ol i bin krai sori long wanpela i bin i dai, na ol i no sem long mekim.​—⁠Stat 50:3; 2 Samuel 1:​11, 12; Jon 11:​33, 35.

Sampela taim, wantu bai aiwara i go daun. Wanpela meri em man bilong em i dai pinis, taim em i raun long ol stua bilong baim kaikai (planti taim man bilong em i bin go wantaim em), em bai krai. Na sampela taim em i putim han bilong kisim wanpela kain kaikai man bilong em i bin laikim, na dispela tu i mekim na em i krai. Sapos dispela samting i painim yu, yu no ken kros o ting yu mas pasim bel hevi bilong yu. I stret yu krai taim wanpela i dai na yu bin laikim em tumas.

Taim Bel i Gat Tok

Olsem yumi tok pinis, bel bilong sampela i gat tok taim wanpela long famili i dai. Ating dispela i as na bel bilong bilipman Jekop i bagarap tru taim em i ting “wanpela laion samting” i bin kilim i dai pikinini bilong em, Josep. Jekop yet i bin salim Josep i go bilong lukim ol bikbrata bilong em​—⁠ol i stap orait o nogat. Olsem na ating bel bilong Jekop i kotim em na em i tingting: ‘Bilong wanem mi bin salim Josep wanpela i go? Bilong wanem mi salim em i go long dispela hap em ol laion samting i pulap long en?’​—⁠Stat 37:​33-35.

Ating yu pilim olsem em hap asua bilong yu na dispela poroman marit o pikinini samting em i dai. Tasol yu mas save, dispela pasin bilong bel i gat tok​—⁠maski i gat as bilong en o nogat​—⁠em i wanpela samting i save kamap long kain taim olsem. Tasol yu no ken ting yu mas pasim dispela long bel. Taim yu tokaut olsem bel i kotim yu, dispela bai mekim bel bilong yu i stap isi liklik.

Yu mas save, maski yumi laikim tru wanpela, yumi no inap bosim olgeta samting long i stap bilong em, na yumi no inap pasim rot na bai taim nogut i no ken painim em, long wanem, “taim nogut i save painim yumi olgeta.” (Saveman 9:11) Na i no olsem yu gat tingting nogut na yu no bin helpim em gut. Olsem: Sapos yu no bin hariap long makim taim bilong em i mas i go lukim dokta, i no olsem yu gat laik long sik i kisim em na em i dai, a? Olsem na yu ting yu gat asua long i dai bilong em? Nogat.

Wanpela mama em pikinini meri bilong em i bin kisim bagarap long ka, em i tok: “Bel bilong mi i gat tok, long wanem, mi bin salim em i go. Tasol bihain mi save, dispela tingting i kranki. I no gat rong long mi bin salim em i go wantaim papa long mekim wanpela wok. Em wanpela bagarap i bin painim em na mi no inap pasim.”

Tasol ating bai yu tok, ‘Sori tru, i gat planti samting mi no bin mekim o tokim em long en.’ Tru, tasol i no gat wanpela namel long yumi em i nambawan gutpela papa o mama o pikinini, a? Baibel i tok: “Planti taim yumi save . . . popaia. . . . Na sapos i gat wanpela man i stap, em i no save mekim sampela tok i no stret, orait em i gutpela man tru.” (Jems 3:2; Rom 5:12) Olsem na yu mas save, yu no gutpela olgeta. Sapos yu wok long tingim tingim ol samting yu no bin mekim, dispela i no inap senisim wanpela samting​—⁠ating dispela bai mekim na bel bilong yu i no inap orait hariap.

Tasol sapos i gat as na yu ting yu gat asua, orait tingim wanpela bikpela samting tru inap helpim yu na bai bel bilong yu i no gat tok moa​—⁠em marimari bilong God, em i save lusim rong bilong man. Baibel i tok: “Sapos yu kaunim olgeta sin bilong mipela bai husat inap long winim kot bilong yu? Tasol yu save rausim ol sin bilong mipela.” (Song 130:⁠3, 4) Yu no inap senisim wanpela samting i bin kamap bipo. Tasol yu ken beten askim God long lusim ol rong yu bin mekim bipo. God i tok promis long lusim ol dispela rong bilong yu, orait yu tu yu mas lusim tingting long rong bilong yu, a?​—⁠Sindaun 28:13; 1 Jon 1:⁠9.

Taim Bel Bilong Yu i Kros

Olsem wanem? Yu kros long ol dokta o nes o ol pren, o dispela man o meri i bin i dai? Dispela pasin tu i save kamap taim wanpela long famili i dai. Ating bel bilong yu i bagarap na nau yu kros. Wanpela man bilong raitim buk i tok: ‘Tru, yu no ken kamapim dispela kros i stap long bel​—⁠tasol sapos yu save em i stap, orait yu inap abrusim ol samting nogut dispela kros inap mekim long yu.’

Sapos yu toktok wantaim narapela long dispela kros, ating dispela bai helpim yu. Tru, yu no ken belhat na tok kros na sutim tok long ol man. Baibel i tok, sapos kros i stap longtaim long bel, dispela inap bagarapim man. (Sindaun 14:​29, 30) Tasol sapos yu toktok wantaim wanpela gutpela pren long dispela samting, ating dispela bai mekim gut bel bilong yu. Na sampela i save mekim eksasais na dispela i helpim ol.​—⁠Lukim tu Efesus 4:​25, 26.

Tru, i gutpela yu kamapim bel bilong yu, tasol nogut yu tok kros na sutim tok long wanpela man o meri na tok, em asua bilong em na yu kros. Olsem na taim yu kamapim bel bilong yu, yu no ken mekim olsem yu kros long wanpela man. (Sindaun 18:21) I gat wanpela bikpela samting bilong helpim yu long karim hevi bilong yu, na nau bai yumi toktok long dispela samting.

God Inap Helpim Yu

Baibel i tok: “God i save stap klostu long ol manmeri i gat hevi. Na em i save helpim ol manmeri [bel] bilong ol i bagarap.” (Song 34:18) Tru tumas, sapos yu stap pren bilong God, dispela inap helpim yu long karim hevi bilong yu taim wanpela i dai na yu bin laikim em tumas. Em inap helpim yu olsem wanem? Olgeta tok mipela i mekim long hia, em Baibel i as bilong en. Sapos yu bihainim, em bai helpim yu long karim dispela hevi.

Na yu mas save, beten i gat strong. Baibel i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu.” (Song 55:22) Tru, gutpela pren bilong yu inap helpim yu, tasol dispela “God bilong mekim isi bel bilong olgeta man i gat hevi,” em i winim tru ol man, na em bai helpim yu moa yet taim yu kamapim hevi bilong yu long em, a?​—⁠2 Korin 1:⁠3.

Dispela Man bilong harim beten em i tok promis long givim spirit holi long ol man i askim em na ol i gat gutpela bel. (Song 65:2; Luk 11:13) Na spirit bilong God inap givim wanpela kain strong long yu, em “strong bilong God,” bilong helpim yu long karim hevi bilong olgeta wan wan de. (2 Korin 4:⁠7) Yu no ken lusim tingting: God inap helpim ol gutpela wokman bilong em long karim olgeta hevi i save painim ol.

Wanpela meri em pikinini bilong em i dai, em i tingting bek long taim beten i bin helpim em wantaim man bilong em long karim dispela hevi. Em i tok: “Taim mitupela i stap long haus long nait na mipela pilim olsem mipela i no inap karim dispela hevi, mitupela i save beten wantaim. Taim mipela i go long namba wan miting bilong kongrigesen o namba wan kibung bihain long em i dai, mipela i save beten askim Jehova long strongim mipela. Na taim mipela i kirap long moningtaim na mipela i tingim gen dispela hevi, mipela save beten askim Jehova long helpim mipela. Mi wanpela mi no inap i go insait long haus. Olsem na sapos mi stap wanpis na mi kam bek long haus, mi save beten askim Jehova long mekim bel bilong mi i stap isi liklik.” Dispela bilipmeri em i bilip tru olsem ol dispela beten i bin helpim em, na i stret em i bilip olsem. Na yu tu, sapos yu beten oltaim, ‘bel isi God i save givim yumi, em bai i mekim yu i stap bel isi tru.’​—⁠Filipai 4:​6, 7; Rom 12:⁠12.

Dispela helpim God i save givim long yumi em i helpim tru yumi. Aposel Pol i tok: “Long olgeta hevi i kamap long mipela, [God] i save mekim isi bel bilong mipela. Olsem na mipela inap long mekim isi bel bilong ol man i gat kain kain hevi.” Tru, hevi i no ken tekewe olgeta, tasol God inap helpim yumi long karim. Tasol yu no ken ting bai yu no krai sori moa, o bai yu lusim tingting long dispela man o meri i dai pinis. Nogat. Tasol bel bilong yu inap orait gen. Na dispela hevi i bin painim yu, em bai inapim yu long helpim gut ol narapela i gat wankain hevi, na bai yu pilim tru bel hevi bilong ol.​—⁠2 Korin 1:⁠4.

Tingim Ol Dispela Askim

Bilong wanem em i bikpela samting long krai na kamapim bel hevi bilong yu?

Yu ken mekim wanem bilong kamapim bel hevi bilong yu?

Olsem wanem Baibel inap helpim yu long taim bel bilong yu i gat tok o yu kros?

Sapos yu stap pren bilong God, olsem wanem dispela inap helpim yu long karim hevi taim wanpela long famili i dai?

Wanem sampela gutpela tok bilong helpim yu long karim dispela kain hevi?

[Blok long pes 18]

Sampela Tok Bilong Helpim Yu

Ol pren inap helpim yu: Sapos sampela i laik helpim yu, na yu save i mas i gat sampela bilong mekim olsem, larim ol i mekim. Ating em i wanpela rot bilong ol long kamapim bel bilong ol, olsem ol i pilim tru hevi bilong yu.​—⁠Sindaun 18:⁠24.

Lukautim skin bilong yu: Krai na bel hevi inap pinisim strong bilong yu. Sampela taim skin bilong yu i mas malolo, na eksasais, na yu mas kisim gutpela kaikai bilong strongim skin. Na ating sampela taim yu ken i go lukim dokta.

No ken mekim hariap ol bikpela samting: Sapos yu tingting long baim haus bilong yu i go long ol man, o senisim wok mani bilong yu, yu no ken mekim hariap. Wet pastaim, inap long taim tingting bilong yu i klia. (Sindaun 21:⁠5) Wanpela meri i tok, taim man bilong em i dai, sampela de bihain em i kisim ol samting bilong man bilong em na givim long ol narapela. Tasol bihain em i save, sampela samting em i bin givim long ol, em ol samting em i bin laikim tumas.

No ken les kwik long yu yet: Sampela taim dispela kain bel hevi i save stap longpela taim. Sampela samting inap kirapim yu gen long krai, olsem sampela piksa o singsing o gutpela smel bilong wanpela samting. Sampela saveman i tok, ‘Sampela taim ol i amamas, na wantu ol i bel hevi gen, na sampela taim ol i no laik tingim dispela man o meri i dai pinis, na sampela taim ol bai wok long tingim tingim em.’ Yu mas tingting oltaim long ol gutpela tok promis bilong Jehova.​—⁠Filipai 4:​8, 9.

Mas isi long ol narapela: Sampela i no save wanem tok ol i ken mekim bilong helpim yu. Olsem na ating ol bai popaia long sampela tok na bai yu bel hevi long en.​—⁠Kolosi 3:​12, 13.

Nogut yu kisim marasin o strongpela dring bilong daunim bel hevi: Ol marasin olsem drak, na dring tu, i no inap daunim tru bel hevi bilong yu. Sapos yu mas kisim marasin, dokta i mas givim tok orait pastaim. Yu mas was gut​—⁠planti marasin i gat drak long en. Na tu, em bai mekim na bel hevi bilong yu bai stap longtaim. Wanpela dokta i tok: ‘Yu mas karim dispela hevi inap longtaim liklik, na bihain tingting bai klia na yu ken skelim gut, tasol sapos yu kisim ol drak bilong kilim tingting bilong yu na bai yu no ken tingim moa dispela hevi, dispela bai nogutim yu moa yet na ating hevi bai stap longtaim.’ Bilong daunim tru bel hevi, tingting oltaim long ol gutpela samting Jehova i laik mekim bihain.​—⁠Song 1:2; 119:⁠97.

Kirap gen long mekim ol wok bilong yu: Ating pastaim yu mas subim skin long go long wok, o go baim kaikai samting, o mekim ol narapela wok bilong yu, tasol sapos yu mekim, dispela inap helpim yu gut. Na mekim ol wok Kristen tu.​—⁠Skelim wantaim 1 Korin 15:⁠58.

No ken pret long lusim dispela hevi: Sampela i pret long lusim dispela bikpela bel hevi bilong ol. Ol i ting dispela i makim olsem ol i no laikim moa dispela man o meri i dai pinis. Tasol i no olsem. Sapos yu lusim dispela bikpela bel hevi, nau yu inap tingim ol gutpela samting bilong em na ating dispela tingting bai stap oltaim long bel bilong yu.​—⁠Saveman 3:​1, 4.

No ken tingting planti oltaim: Ating bai yu tingting planti olsem: ‘Olsem wanem long mi nau?’ Tasol Baibel i tok, tingim i stap bilong yu long dispela de tasol. Wanpela meri em man bilong em i dai pinis, em i tok dispela i bin helpim em. Jisas i tokim ol disaipel: “Yupela i no ken tingting tumas long tumora. De tumora em i ken tingting long samting bilong em yet.”​—⁠Matyu 6:​25-34.

[Piksa long pes 15]

Ol stori bilong Baibel i soim yumi, sapos yu raitim sampela tok i kamapim bel hevi bilong yu, dispela bai helpim yu

[Piksa long pes 16]

Maski ol man i bilong wanem wanem lain, ol i save amamas long kisim sampela tok bilong mekim gut bel bilong ol