Bilong Helpim Ol Man i Krai Sori

“God i save stap klostu long ol manmeri i gat hevi.”​—⁠Song 34:⁠18.

TAIM wanpela yu laikim tumas em i dai, ating kain kain filings bai kamap long bel bilong yu, olsem yu no inap bilip olsem em i dai, tingting i pas, yu bel hevi, bel i kotim yu, o yu kros. Olsem yumi stori pinis, ol man i no save kamapim bel sori long wankain pasin. Olsem na ating yu no kisim olgeta dispela filings na ating yu no kamapim bel sori bilong yu long wankain pasin olsem ol narapela. Tasol taim yu mas kamapim bel sori bilong yu, i no gat rong long mekim olsem.

“Krai na Autim Bel Sori Bilong Yu!”

Heloisa, em dispela dokta yumi bin stori long en, em i traim long pasim bel sori bilong em taim mama bilong em i dai. Em i tok: “Pastaim mi krai, tasol i no longtaim na mi kirap pasim bel sori bilong mi​—⁠olsem mi save mekim taim wanpela sikman mi lukautim em i dai. Ating dispela i bin nogutim helt bilong mi. Tok mi laik givim long ol lain em wanpela ol i laikim tumas em i dai, em olsem: Krai na autim bel sori bilong yu! Dispela bai helpim yu.”

Tasol bihain long sampela de na wik, ating yu bai pilim wankain olsem Cecília, em man bilong em i dai long kensa. Em i tok: “Sampela taim mi no amamas long mi yet bikos i olsem mi no mekim samting ol narapela i ting mi mas mekim, olsem ol i ting em taim nau long mi mas lusim bel sori.”

Sapos yu gat kain tingting olsem, orait yu mas tingim olsem i gat narapela narapela wei bilong kamapim bel sori. Sampela i no hatwok tumas long kirap gen long amamas na mekim ol wok samting, tasol sampela nogat. Ol kain lain olsem i no ken hariapim ol yet long lusim bel sori bilong ol, na tu, ol i no ken pilim olsem ol i mas makim wanpela haptaim na ting olsem insait long dispela haptaim ol i mas pilim orait gen.a

Tasol olsem wanem sapos yu pilim olsem bel sori bilong yu i no gat pinis bilong en na dispela i wok long pinisim strong bilong yu? Ating samting yu pilim i wankain olsem stretpela man Jekop. Taim ol i tokim em olsem pikinini man bilong em Josep i dai, em i no laik ol narapela ‘i mekim tok bilong mekim bel bilong em i kamap gutpela.’ (Stat 37:35) Sapos yu gat dispela kain tingting, orait yu ken mekim wanem na bai bel sori i no ken daunim yu olgeta?

Lukautim yu yet. Cecília i tok: “Sampela taim mi taiet nogut tru na mi luksave olsem mi abrusim mak bilong mi long mekim ol samting.” Olsem tok bilong em i kamapim, bel sori inap pinisim tru strong bilong man. Olsem na i gutpela long yu tingim helt bilong yu. Malolo gut na kisim helti kaikai.

Tru, ating yu pilim olsem yu les long kaikai o go baim kaikai na kuk. Tasol sapos yu no kaikai gut, yu inap kisim sik, na dispela bai mekim bel hevi bilong yu i go bikpela moa. Yu mas traim long kisim sampela kaikai na bai yu no sik.b

Sapos inap, mekim sampela eksasais, maski eksasais yu mekim em wokabaut tasol. Eksasais samting inap mekim na yu raun ausait long haus. Eksasais i kamapim wanpela marasin (endorphin), dispela marasin i stap long kru na i helpim man long pilim gutpela.

Larim ol narapela i helpim yu. Dispela i bikpela samting moa yet taim poroman marit i dai. Ating em i bin mekim sampela wok bilong lukautim famili na nau i no gat man bilong mekim ol dispela samting. Olsem, sapos poroman marit i save stretim mani bilong famili, o mekim wok bilong haus, ating pastaim yu bai hatwok long mekim ol dispela samting. Long kain taim olsem, ol pren bilong yu inap givim gutpela tingting long yu bilong helpim yu.​—⁠Sindaun 25:⁠11.

Baibel i tok ol pren tru “i save sambai long helpim yumi long taim bilong hevi.” (Sindaun 17:17) Olsem na no ken stap wanpis na ting olsem yu bai putim hevi long ol narapela. Nogat. Pasin bilong bung wantaim ol narapela i helpim yu long karim hevi bilong dispela taim we yu gat bel sori. Pasin bilong bung wantaim ol arapela i bin strongim tru bel bilong yangpela meri Sally, taim mama bilong em i dai. Em i tok: “Planti pren bilong mi i singautim mi long bung wantaim ol, na dispela i helpim mi tru long karim hevi bilong i stap wanpis. Oltaim mi amamas taim sampela i askim mi olsem, ‘Yu stap orait?’ Mi luksave olsem taim mi stori long mama, dispela i helpim mi na isi isi mi no bel sori tumas.”

Tingim bek. Traim long tingim ol gutpela memori bilong yutupela, ating long rot bilong lukim ol poto. Tru, ating pastaim i hatwok long tingim bek ol gutaim bilong yutupela. Tasol bihain, ol dispela memori inap mekim gut bel bilong yu na i no mekim yu bel hevi.

Ating yu laik raitim sampela stori bilong yu long notbuk. Yu ken raitim sampela gutpela memori yu tingim, ating yu ken raitim tu ol tok em yu ting i gutpela sapos yu bin tokim man yu laikim tumas taim em i stap laip yet. Taim yu ritim ol tok yu bin raitim long notbuk, ating dispela bai helpim yu long kliagut long filings bilong yu. Pasin bilong raitim ol tok long notbuk, dispela em i gutpela rot bilong autim ol filings bilong yu.

Olsem wanem long pasin bilong holim yet sampela samting bilong man i dai pinis bilong tingim em? Ol man i gat kain kain tingting long dispela, na yumi no kirap nogut long en, long wanem, ol man i save kamapim bel sori bilong ol long narapela narapela pasin. Sampela i pilim olsem pasin bilong ol long holim yet sampela samting bilong man i dai pinis, dispela i pasim ol long daunim bel sori. Tasol sampela i ting dispela i helpim ol. Sally i tok: “Mi holim yet planti samting bilong mama na dispela i helpim mi long karim hevi!”c

Bilip long “God bilong mekim isi bel bilong ol man.” Baibel i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu.” (Song 55:22) Pasin bilong beten long God i no samting bilong mekim yu pilim gutpela tasol, nogat. Em pasin bilong toktok wantaim ‘God bilong mekim isi bel bilong ol man long olgeta kain taim na long olgeta pen na hevi i kamap long yumi.’​—⁠2 Korin 1:​3, 4.

Ol tok bilong Baibel i nambawan gutpela samting bilong mekim gut bel bilong ol man. Aposel Pol i tok: “Mi bilip na wet long God . . . olsem bai i gat kirap bek bilong ol man i dai pinis, em ol stretpela man na ol man nogut wantaim.” (Aposel 24:15) Taim yumi tingim tok promis bilong Baibel long kirap bek, dispela inap mekim gut bel bilong yumi taim yumi bel sori long wanpela yumi laikim tumas em i dai.d Dispela tok promis i mekim gut bel bilong Lauren taim yangpela brata bilong em i dai long eksiden. Em i tok: “Maski bel bilong mi i bagarap stret, mi save ritim yet Baibel, sampela taim mi ritim wanpela ves tasol. Mi makim ol ves i strongim bel bilong mi na mi save ritim ol dispela ves gen na gen. Tok Jisas i mekim long Marta bihain long Lasarus i dai i mekim gut bel bilong mi. Jisas i tokim Marta: ‘Brata bilong yu bai kirap bek.’ ”​—⁠Jon 11:⁠23.

“No Ken Larim Dispela i Bosim Laip Bilong Yu”

Taim yu mekim ol samting bilong winim bel sori maski i hatwok, dispela bai helpim yu long amamas gen na kirap mekim ol wok samting. No ken pilim nogut long dispela na ting yu givim baksait long man yu laikim tumas husat i dai o yu lusim tingting long em. Yu no inap tru long lusim tingting long wanpela yu laikim tumas. Ating sampela taim samting i kamap na i kirapim yu long tingim samting yupela i bin mekim wantaim na i bagarapim bel bilong yu, tasol isi isi dispela bel hevi bai pinis.

Ating yu inap tingim bek ol samting i mekim yu amamas na bel hevi wantaim. Ashley, em yumi stori pinis long em, em i tok: “Mi inap tingim de paslain long Mama i dai, long dispela de i luk olsem em i orait liklik. Planti de em i bin stap tasol long bet, tasol long dispela de em i kirap lusim bet. Taim susa bilong mi i wok long komim gras bilong Mama, mipela tripela i lap long sampela samting. Mi lukim Mama i smail, inap longpela taim mi no lukim em i smail olsem. Em i amamas tasol long stap wantaim tupela pikinini meri bilong em.”

Na tu, yu inap tingim bek gutpela skul yu bin kisim long wanpela yu laikim tumas taim em stap laip yet. Olsem: Sally i tok: “Mama em i wanpela gutpela tisa. Em i save givim ol gutpela skultok we i no strong tumas, na em i bin lainim mi long pasin bilong wokim ol gutpela disisen bilong mi yet. Mi no mekim tasol samting papa o mama i tokim mi long mekim.”

Taim yu tingim ol gutpela memori bilong man yu laikim tumas, dispela samting tasol inap helpim yu long kirap gen long amamas na mekim ol wok samting. Dispela samting i bin kamap long Alex. Em i tok: “Bihain long papa i dai, mi pasim tok olsem mi bai mekim samting em i bin skulim mi long en​—⁠olsem oltaim mi mas amamas long laip bilong mi. Long ol lain em papa o mama bilong ol i dai, mi laik tok olsem long ol: Bai yu sori yet long papa o mama i dai, tasol no ken larim dispela i bosim laip bilong yu. Yu ken krai na bel sori, tasol no ken lusim tingting olsem yu mas mekim ol samting na bai yu amamas long laip bilong yu.”

[Ol Futnot]

[Rait long pes 8]

“Maski bel bilong mi i bagarap stret, mi save ritim yet Baibel, sampela taim mi ritim wanpela ves tasol”​—⁠Lauren

[Blok/Piksa long pes 7]

TAIM BEL I GAT TOK

Ating yu pilim olsem em hap asua bilong yu na dispela poroman marit o pikinini samting em i dai. Tasol yu mas save, dispela pasin bilong bel i gat tok​—⁠maski i gat as bilong en o nogat​—⁠em i wanpela samting i save kamap long kain taim olsem. Tasol yu no ken ting yu mas pasim dispela long bel. Taim yu tokaut olsem bel i kotim yu, dispela bai mekim bel bilong yu i stap isi liklik.

Yu mas save, maski yumi laikim tru wanpela, yumi no inap bosim olgeta samting long i stap bilong em, na yumi no inap pasim rot na bai taim nogut i no ken painim em, long wanem, “taim nogut i save painim yumi olgeta.” (Saveman 9:11) Na i no olsem yu gat tingting nogut na yu no bin helpim em gut. Olsem: Sapos yu no bin hariap long makim taim bilong em i mas i go lukim dokta, i no olsem yu gat laik long sik i kisim em na em i dai, a? Olsem na yu ting yu gat asua long i dai bilong em? Nogat.

Wanpela mama em pikinini meri bilong em i bin kisim bagarap long kar, em i tok: “Bel bilong mi i gat tok, long wanem, mi bin salim em i go. Tasol bihain mi save, dispela tingting i kranki. I no gat rong long mi bin salim em i go wantaim papa long mekim wanpela wok. Em wanpela bagarap i bin painim em na mi no inap pasim.”

Tasol ating bai yu tok, ‘Sori tru, i gat planti samting mi no bin mekim o tokim em long en.’ Tru, tasol i no gat wanpela namel long yumi em i nambawan gutpela papa o mama o pikinini, a? Baibel i tok: “Planti taim yumi save . . . popaia. . . . Na sapos i gat wanpela man i stap, em i no save mekim sampela tok i no stret, orait em i gutpela man tru.” (Jems 3:2; Rom 5:12) Olsem na yu mas save, yu no gutpela olgeta. Sapos yu wok long tingim tingim ol samting yu no bin mekim, dispela i no inap senisim wanpela samting​—⁠ating dispela bai mekim na bel bilong yu i no inap orait hariap.e

[Futnot]

[Piksa long pes 6]

Sampela taim, lapun papa o mama i krai sori i mas mekim gut bel bilong pikinini i gat bikpela krismas

[Piksa long pes 9]

Raitim sampela tingting long notbuk, lukim ol poto, na larim ol narapela i helpim yu, em ol rot i helpim yu long karim hevi bilong bel sori