Sapta 16

I Stret Mi Bel Hevi Olsem?

PAPA bilong Mitsel i dai pinis na Mitsel i tingting bek long taim papa i bin i dai na Mitsel i tok: “Bel bilong mi i pas tru, na mi no inap tingting stret. . . . Mi wok long tokim skin bilong mi, ‘Papa i no i dai.’ ”

Ating dispela kain hevi i bin painim yu tu. Ating wanpela man yu laikim tumas​—olsem papa o brata o susa o wanpela gutpela poroman​—em i dai pinis. Yu bel hevi tru long dispela samting, tasol yu bel nogut tu, na tingting bilong yu i paul, na yu tingting planti. Yu laik krai na yu wok long pasim, tasol yu no inap. O yu pasim dispela hevi i stap long bel bilong yu.

Taim yumi laikim tumas wanpela man na em i dai, bel bilong yumi i save bagarap olsem. Em pasin bilong yumi ol manmeri. Krais Jisas tu, taim em i harim tok long wanpela gutpela poroman bilong em i dai, em “i krai” na “bel bilong en i [pas] tru.” (Jon 11:​33-36; lukim tu 2 Samuel 13:​28-39.) Em nau, yu save i no yu wanpela tasol i krai na bel hevi long kain taim olsem, na dispela save inap helpim yu long karim dispela hevi na strongim bel.

I No Bilip

Pastaim ating bai tingting bilong yu i no wok stret, na long bel yu laik bai dispela samting i olsem wanpela driman nogut yu kisim long nait, na long moningtaim bai yu kirap na yu lukim ol samting i stap olsem tasol na man i no bin i dai. Mama bilong yangpela meri Sindi em i dai long sik kensa. Sindi i stori na em i tok: “Mi no stretim yet tingting bilong mi long dispela samting. Long tingting bilong mi i olsem mama i stap yet na em i no i dai. Sampela taim wanpela samting i kamap, em mitupela mama i bin stori wantaim long en taim em i stap yet, na mi tokim skin bilong mi, ‘Mi mas tokim mama long dispela samting.’ ”

Taim wanpela wanblut o gutpela poroman em i dai, pastaim i hatwok long bilip long dispela samting. Yu laik ting olsem dispela samting i no bin kamap tru na em i no i dai. Olsem na ating bai yu ting yu lukim em long rot o long wanpela bas samting. Na sapos pes bilong wanpela man i wankain liklik olsem bilong em, bai yu ting, em tasol, em i stap laip yet. I hatwok long bilip olsem em i dai pinis, long wanem God i bin wokim yumi bilong i stap laip, i no bilong i dai.​—Stat 1:28; 2:9.

“Olsem Wanem Em Inap Mekim Olsem long Mi?”

Taim kain hevi olsem i kamap, yu no ken kirap nogut sapos sampela taim yu bel nogut liklik long dispela man i dai. Sindi i tok: “Mipela i no save mama bai dai, olsem na taim em i dai, sampela taim mi pilim olsem em i bin ranawe lusim mipela.”

Taim brata o susa i dai, sampela i kisim kain tingting olsem tu. Yangpela meri Karen em i tok: “Taim sista bilong mi i dai, mi olsem bel nogut long em. Mi save dispela tingting i no stret, tasol mi no inap daunim bel bilong mi. Mi tingting olsem: ‘Bilong wanem em i dai na i lusim mi i stap wanpis?’ ” Taim brata o susa i dai, sampela yangpela i bel nogut, long wanem ol i tingim bikpela hevi dispela i givim long papamama na ol narapela long famili. Na sampela i bel nogut long wanem, taim brata o susa i no i dai yet na em i gat bikpela sik, olgeta famili i wok long helpim em na ol i tingim em tasol. Na sampela taim, sapos wanpela pikinini i dai, orait papamama i tingting strong long ol i mas lukautim gut narapela pikinini bilong ol, na ol i putim planti tambu long em, nogut wanpela bagarap i painim em. Tasol dispela yangpela i no laik bai papamama i pasim em olsem, na em i bel nogut long brata o susa bilong em i dai pinis.

“Sori! Sapos . . . ”

Taim wanpela bilong famili i dai, sampela taim bel bilong famili i gat tok. Bai ol i kotim skin bilong ol na ol i ting olsem: ‘Ating mipela i no bin lukautim em gut, na ating i gat sampela samting moa mipela inap mekim. Sapos mipela i bin kisim em i go long narapela dokta, ating dokta inap oraitim em . . . ’ Na sampela i save tok: ‘Sori! Sapos mipela i no bin tok pait planti taim . . . ’ ‘Sori! Sapos mi bin wok strong moa long mekim gut long em . . . ’ ‘Sori! Sapos mi yet mi bin i go long stua na em nogat, dispela bagarap bai no inap painim em.’ Em ol i save kotim skin bilong ol olsem.

Mitsel i tok: ‘Mi no bin mekim gut tumas long papa, na mi bin les kwik long em, na mi no bin helpim em gut long ol wok bilong haus, olsem na nau bel bilong mi i kotim mi long dispela samting.’ Na yangpela meri Elisa i tok: “Bikpela sik i bin painim mama na em i dai hariap, na mitupela i no bin toktok wantaim na stretim sampela hevi i stap namel long mitupela. Nau bel bilong mi i gat tok long dispela samting. Mi no bin givim sampela gutpela tok long em bilong mekim gut bel bilong em, na mi tingim ol tok kros na pasin bikhet mi bin mekim, na ol samting i no stret mi bin mekim tu na mi bin givim hevi long em.”

Em nau, ol i pilim olsem ol i gat asua. Sindi i tok: “Mi tingim bek olgeta kros bilong mitupela mama, na mi tingim pasin bikhet mi bin mekim na mi givim bikpela hevi long em. Mi tingim bek ol dispela samting na bel bilong mi i gat tok long en, na mi ting, ol dispela hevi mi bin givim long em i as bilong dispela bikpela sik i bin painim em na em i dai.”

“Bai Mi Tok Wanem long Ol Poroman Bilong Mi?”

Wanpela mama, em man bilong em i dai pinis, em i save pikinini man bilong em i sem, long wanem em i no gat papa. Mama i tok: “Joni i no laik tokim ol narapela pikinini olsem papa bilong em i dai pinis; em i sem long tokim ol. Tasol em i no amamas long dispela pasin bilong em.”

Wanpela buk (Death and Grief in the Family) i stori long dispela samting na i tok: “Planti yangpela [em brata o susa bilong ol i dai pinis] ol i save ting olsem: ‘Bai mi tok wanem long ol poroman bilong mi?’ Ol i ting ol dispela poroman i no inap pilim dispela hevi bilong ol. Na taim ol i laik toktok long dispela samting, sampela taim ol poroman i save lukluk tasol long ol o lukluk long ol olsem ol i narapela kain. . . . Olsem na nau ol i bel hevi na ol i sem, long wanem ol i ting ol i narapela kain long ol poroman bilong ol.”

Tasol yu mas save, sampela ol i no save bai ol i givim wanem kain tok long yu bilong mekim gut bel bilong yu. Olsem na ol i pasim maus i stap. O ol i lukim bikpela hevi i bin painim yu na ol i save, dispela kain hevi inap painim ol tu. Ating long dispela as tasol na sampela poroman i abrusim yu liklik.

Bilong Karim Dispela Hevi

Taim yu save ol narapela tu i save bel hevi olsem yu long kain taim olsem, dispela inap helpim yu long karim dispela hevi. Tasol sapos yu giamanim bel bilong yu na yu wok long ting olsem man i no i dai, bel hevi bilong yu bai stap longtaim. Wanpela yangpela man, em Devit, i dai pinis na famili bilong em i mekim wanpela samting bilong helpim ol long karim dispela hevi. Mama i tok: “Nau, taim mipela i sindaun bilong kisim kaikai, mipela i no sindaun long ples bilong mipela yet long tebol; mipela save senis senis, na papa i save sindaun long sia bilong Devit, nogut sia bilong Devit i stap nating na mipela lukim na sori gen long em.”

Taim papa o brata samting i no i dai yet, ating yu bin popaia long sampela tok samting yu bin mekim o yu no bin mekim, tasol bilong helpim yu long daunim bel hevi bilong yu, yu mas save, i no long dispela as na dispela man yu laikim tumas i dai. Baibel i tok: “Planti taim yumi [olgeta i] . . . save popaia.”​—Jems 3:2.

Kamapim Bel Bilong Yu

Wanpela dokta (Earl Grollman) em i tok: ‘Taim wanpela long famili i dai, yu save bai yu bel hevi na ating bai yu bel nogut tu, tasol yu no ken pasim dispela hevi long bel bilong yu. . . . Long kain taim olsem yu mas kamapim bel bilong yu long narapela man.’ Yu no ken lusim ol narapela man na i stap wanpis.​—Sindaun 18:1.

Dispela dokta i tok, sapos yu pasim bel hevi i stap long bel bilong yu na yu no kamapim long wanpela man, dispela em i no rot bilong pinisim dispela bel hevi bilong yu. Nogat. Bel hevi bilong yu bai stap yet. Orait dispela dokta i makim wanem rot bilong helpim man i gat dispela kain bel hevi? Em i tok, ‘Yu mas painim wanpela gutpela pren i save putim gut yau na yu ken kamapim bel bilong yu long em, na em inap pilim tru olsem bikpela bel hevi bilong yu i wankain tasol olsem bilong ol narapela man long kain taim olsem.’ Yu ken toktok wantaim papa o mama, o wanpela brata o susa bilong yu, o wanpela gutpela pren, o wanpela elda long kongrigesen Kristen​—ol inap helpim yu na strongim bel bilong yu.

Na olsem wanem sapos yu laik krai? Dispela dokta i tok, ‘Krai em i gutpela rot bilong helpim sampela long karim hevi bilong ol na mekim gut bel bilong ol, maski ol i man o meri o pikinini; i olsem dispela i daunim bel hevi liklik na bel i ken i stap isi liklik.’

Narapela i Helpim Narapela Insait long Famili

Long kain taim olsem, papamama inap helpim yu gut long karim dispela bel hevi bilong yu​—na yu yet yu inap helpim papamama long karim dispela hevi. Wanpela yangpela man bilong Englan, nem bilong em Daral, em i dai taim em i gat 23 krismas. Tupela susa bilong em, em Jen na Sera, tupela i mekim wanem bilong helpim papamama long karim dispela bikpela hevi? Jen i stori long dispela na em i tok: ‘Mipela 4-pela tasol i stap, olsem tupela pikinini na papamama, olsem na oltaim mi wok wantaim papa na mekim olgeta samting wantaim em na helpim em, na Sera i mekim olsem long mama. Olsem na i no gat wanpela i stap wanpis.’ Na Jen i stori moa, olsem: “Bipo mi no bin lukim papa i krai. Tasol nau em i krai sampela taim, na mi ting i gutpela em i mekim olsem. Na mi amamas long mi bin i stap wantaim em na mi inap mekim gut bel bilong em.”

Wanpela Bilip i Strongim Bel

Devit em i wanpela manki bilong Englan, na susa bilong em, nem bilong em Janet, em i gat wanpela kain sik na em i dai taim em i gat 13 krismas tasol. Devit i tok: “Samting i bin helpim mi gut long karim dispela bikpela hevi bilong mi em wanpela hap tok bilong Baibel ol i bin kaunim taim mipela i bung na ol i mekim tok bilong planim em. Dispela tok i olsem: ‘[God] i makim pinis wanpela de bilong em bai i kotim ol manmeri. . . . Na em i bin makim wanpela man bilong bosim dispela kot. Dispela man i bin dai na God i kirapim em bek long matmat. Olsem na yumi ken bilip tru long God.’ Man i mekim tok em i stori long dispela hap tok em i kaunim, olsem ‘bilip.’ Em i tok yumi ken bilip tru olsem God bai kirapim bek ol man i dai pinis, long wanem em i bin kirapim Jisas long matmat. Taim mipela planim pinis susa bilong mi, mi tingim dispela tok na em i strongim tru bel bilong mi.”​—Aposel 17:31; lukim tu Mak 5:​35-42; 12:​26, 27; Jon 5:​28, 29; 1 Korin 15:​3-8.

Tok promis bilong Baibel olsem ol man i dai pinis bai ol i lusim matmat na kirap bek, dispela tok promis i no inap pinisim bel hevi bilong yu olgeta. Tru yu no inap lusim tingting long dispela man yu laikim tumas na em i dai. Tasol ol tok promis bilong Baibel inap strongim bel bilong yu na isi isi bai bel hevi bilong yu i pinis.

Toktok Wantaim long Ol Dispela Askim

◻ Sapos wanpela long famili o gutpela poroman i dai, bai yumi bel hevi tasol o olsem wanem? Wanem as bilong dispela?

◻ Taim yangpela i bel hevi long man i dai pinis, em i ken mekim wanem bilong karim dispela hevi?

◻ Sapos wanpela poroman bilong yu i bel hevi long man i dai pinis, yu ken mekim wanem bilong strongim bel bilong em?

[Rait long pes 128]

‘Long tingting bilong mi i olsem mama i stap yet. Sampela taim wanpela samting i kamap na mi ting mi mas tokim mama long dispela samting’

[Rait long pes 131]

“Mipela i no save mama bai dai, olsem na taim em i dai, sampela taim mi pilim olsem em i bin ranawe lusim mipela”

[Piksa long pes 129]

“Mi no ting dispela hevi inap painim mi!”

[Piksa long pes 130]

Taim yumi laikim tumas wanpela man na em i dai, i mas i gat wanpela bilong sori long yumi na em i ken sambai long yumi