Ol Yangpela i Laik Save . . .

Bilong Wanem Papa i Dai?

OLGETA i kirap nogut taim papa bilong Al i go long haus sik, long wanem, ol i ting em i man i gat strongpela skin, no gat sik. Maski papa i slip long haus sik, Al i ting i no longtaim na bai em i kam bek long haus. Tasol sik bilong papa i go bikpela na em i dai. Al i bel hevi tru na em i tok: “Mi no ting strongpela man olsem em inap i dai.”

Papa bilong Kim em i gutpela man Kristen. Bikpela sik i bin kisim em na em i bin slip long haus sik, tasol bihain i olsem em i orait bek. Tasol wanpela de em i stap long rum waswas na em i pundaun na i dai. Kim i tok: “Taim mi lukim em mi save em i dai pinis. Mama na bikbrata bilong mi i mekim ol samting bilong kirapim em; ol i no save gut long mekim, tasol ol i mekim traim. Mi ran i go long rum slip na mi beten olsem: ‘Jehova, no ken larim em i dai. Plis, helpim em long i stap laip.’ Tasol papa i no kisim bek tingting.”

Dai em i samting nogut tru i painim olgeta man. Baibel i tok: “Olgeta samting i kamap long dispela graun, i save kamap long taim bilong em yet. . . . [I gat] taim bilong yumi man i kamap long graun na taim bilong yumi i dai.” (Saveman 3:​1, 2, NW) Sapos yu go bikpela insait long lain Kristen, yu save long tok bilong Baibel long as bilong i dai, na long ol samting i save painim man i dai pinis, na ol man i dai pinis bai kirap bek.a

Tasol sapos papa o mama i dai, bel bilong yu inap bagarap stret. Em bikpela hevi tru na ating em i winim olgeta narapela hevi inap painim yu long taim yu stap laip. Bai yu pilim olsem yu lus na i no gat man bilong helpim yu. Yu yangpela na skin na bel bilong yu i no strong yet olsem bilong man i bikpela pinis, olsem na maski yu inap mekim sampela samting bilong lukautim yu yet, papamama i gat wok yet long helpim yu long planti samting.b

Olsem na yumi no kirap nogut long wanpela ripot i tok, nambawan samting ol yangpela i pret long en em olsem: nogut papa o mama i dai. Wanpela yangpela i tok: “Planti taim mi les long papamama, tasol mi no laik tru bai bagarap i painim tupela. Mi save tingting planti long dispela.”​—The Private Life of the American Teenager.

Olsem na sapos papa o mama i dai, ating bel bilong yu bai pas tru. Ating pastaim bai skin na tingting i olsem i dai na yu no inap krai tu. Dispela i save painim planti man. Taim bikpela hevi i painim wanpela man bilong raitim Song long Baibel, em i tok: “Mi bagarap tru na mi stap nogut, olsem wanpela samting i krungutim mi strong. Bel bilong mi i pilim nogut tru.” (Song 38:8) Wanpela buk (Death and Grief in the Family) i tok: “Taim naip i katim nogut tru skin bilong man o wanpela bun bilong em i bruk, pastaim em i no pilim wanpela samting; i olsem skin i dai. Dispela i lukautim em bambai em i no pilim [wantu] bikpela pen tru bilong dispela. Wankain samting i save kamap long man i hevi long man i dai pinis.” Tasol olsem wanem long bihain, taim tingting bilong yu i kirap na yu pilim tru dispela hevi?

‘Mi Bel Nogut Tru’

Long Luk 8:​52, Baibel i stori long wanpela liklik meri i dai pinis na ol manmeri i “sori tru long dispela pikinini, na ol i wok long krai i stap.” Tru tumas, sapos yumi laikim tumas wanpela man o meri na em i dai pinis, bel bilong yumi i save bagarap​—bai yumi bel hevi, pilim olsem yumi gat asua, tingting planti, na ating bai yumi belhat tu​—em pasin bilong yumi ol manmeri.

Bilong wanem yumi inap belhat? Long wanem, papamama i save sambai long yumi na lukautim yumi na yumi no save pret. Tasol taim wanpela i dai, ating bai yumi pret na tingting planti na pilim olsem ol i ranawe lusim yumi. Tasol i no laik bilong papa o mama na em i dai. Dai em i birua bilong yumi. (1 Korin 15:26) Taim i dai i painim wanpela man o meri yumi laikim tumas, yumi lus tru long em na bel bilong yumi i stap nogut. Yangpela Wendy i gat 18 krismas i tok: “Taim papa bilong mi i dai pinis, mi pilim olsem mi stap wanpis na mi pret. Planti taim mi laik tru bai papa i stap yet wantaim mi bilong helpim mi.” Taim papa o mama i stap yet em i laikim yu tumas, na sambai long yu, na skulim yu, na nau yu lus long ol dispela samting. Ating dispela bai mekim na yu belhat.

Tingim yangpela meri Debbie. Em i pas tru long ankol bilong em. Taim ankol i dai pinis, Debbie i tok: “Mi pilim olsem i no stret em i karim bikpela pen na em i dai, long wanem, em i gutpela man tru, na olgeta man i save laikim em, na em i laikim tumas Jehova. Mi go bikpela long lain Kristen na mi save long as bilong i dai na bilong wanem ol gutpela man tu i karim hevi, olsem na mi kirap nogut long mi belhat olsem.”

Sampela i belhat liklik long papa o mama yet taim em i dai. Yangpela Victoria i tok: “Taim bubu i dai long yia i go pinis, mi belhat tru, na bihain taim bel i kol, mi bel hevi tru.” Sampela ol i kros long God. Yangpela Terri i gat 14 krismas na papa bilong em i kisim hat-atek wantu tasol na em i dai. Terri i tok: “Mi kros tru long God. Bilong wanem papa bilong mi i mas i dai​—mi laikim em tumas na i gat planti samting em i mas mekim bilong helpim mi.”

‘Nau Mi Pilim Olsem Mi Gat Asua’

Na planti yangpela, taim papa o mama i dai, ol i kotim skin bilong ol. Baibel i tok: “Yumi olgeta man yumi bin mekim sin.” (Rom 3:23) Olsem na sampela taim ol yangpela i kros na tok pait wantaim papamama. Tasol taim papa o mama i dai, nau ol i tingim ol kros na tok pait i bin kamap na ol i bel hevi tru.

Tasol yu mas tingim: Maski narapela i laikim tru narapela, sampela taim bai ol i no wanbel na ol i kros. Yangpela Elisa i tok: “Mi laikim tru mama na mi save, em i laikim mi, tasol sampela mun paslain long taim em i gat sik, mitupela i no stap wanbel. Mi save kros long em​—long ol liklik samting nating​—tasol long dispela taim mi ting ol i bikpela samting. Mi tingim wanpela taim mi kros nogut tru long em na mi go long rum bilong mi na mi tingting olsem: ‘Mi laik bai mama i dai.’ Taim sik i kisim em na wantu em i dai, mipela i no bin stretim yet ol kros na hevi. Olsem na nau mi kotim skin bilong mi na pilim olsem mi gat asua.” Maski yu bin mekim wanem tok o kisim wanem tingting, yu no mekim na papa o mama i dai. Yu no gat asua.

Pen Bilong Krai Sori

Tru, yu no gat asua, tasol ating yu krai sori na yu pilim nogut tru. Yu mas save ol manmeri long taim bilong Baibel, em ol i bilip, ol tu i pilim olsem. Josep i save laikim tumas papa bilong em na taim papa i dai, Josep “i pundaun antap long papa na em i krai na em i kis long pes bilong papa.” (Stat 50:1) Krais Jisas tu “i krai” taim em i save pren bilong em Lasarus i dai pinis.​—Jon 11:35.

Sapos yu krai sori long papa o mama, sampela taim bai yu pilim olsem bel bilong yu i pas olgeta; em pasin bilong yumi ol manmeri. Man bilong raitim Song long Baibel i bel hevi na bilong kamapim dispela em i stori olsem: “Mi wokabaut olsem man i sori na i krai long mama i bin dai.” (Song 35:14) Taim bel bilong yu i hevi tru, ating bai yu no inap slip. (Song 119:28) Ating yu bai lusim kaikai o wantu bai yu no inap skul gut. Ating bai yu stap bel hevi.

Na sapos papa o mama i stap yet na ol brata susa bilong yu ol i tingim bel hevi bilong ol yet na ol i no tingting tumas long helpim na strongim yu, bai yu bel hevi moa yet. Kim i stori olsem: “Mipela i planim pinis papa, na mipela i wok long mekim ol samting olsem bipo. Nau mama i kamap het bilong famili. Na taim em i mekim Baibel-stadi wantaim famili, sampela taim em i no inap daunim moa bel hevi bilong em na em i krai nogut tru. Long nait mi harim em i krai na kolim nem bilong papa.”

Bilong Mekim Isi Bel

Wanpela taim profet Jeremaia i tok: “Mi sori na bel hevi nogut tru, na tingting bilong mi i bagarap olgeta.” (Jeremaia 8:18) Ating yu tu yu pilim olsem bel bilong yu i bagarap olgeta na bel hevi bilong yu i no inap pinis. Tasol tingim tok bilong aposel Pol: “Yumi litimapim nem bilong God, em i . . . God bilong mekim isi bel bilong olgeta man i gat hevi. Long olgeta hevi i kamap long mipela, em i save mekim isi bel bilong mipela.” (2 Korin 1:​3, 4) God i mekim bikpela wok bilong mekim isi bel bilong yumi long rot bilong Baibel, em buk bilong em. Na tu, spirit bilong em inap kirapim ol gutpela pren na famili bilong yu long helpim na strongim yu.

I no stret yu kros long God, olsem na yu no ken larim dispela samting i pasim yu long kisim helpim long God bilong mekim isi bel bilong yu. Stretpela man Jop i popaia na ting olsem God i mekim na ol samting bilong em i lus. Em i bel nogut na em i tok: “Bipo mi bin sindaun gut, tasol God i bin kamap na holimpas nek bilong mi na hamaim mi nogut tru, na mi bagarap olgeta.” (Jop 16:​12, 13) Tingting bilong Jop i kranki. God i no as bilong ol hevi i painim em; Satan i as bilong en. Yangpela man Elihu i stretim tingting bilong Jop, em i tok: “God I Gat Olgeta Strong i no inap rongim wanpela man na mekim pasin i no stret.” Bihain Jop i sem long ol tok em i bin mekim na em i tanim bel.​—Jop 34:12; 42:6.

Olsem tasol ating wanpela man i mas helpim yu long kisim stretpela tingting. Kim i tok: “Wanpela elda Kristen em i lapun liklik em i kam toktok wantaim mipela na kirapim mipela long tingim taim bilong kirap bek; em i kaunim sampela tok bilong Baibel long mipela, olsem Jon 5:​28, 29 na 1 Korin 15:20. Em i tok: ‘Papa bilong yupela bai kam bek, tasol yupela i mas i stap gut long God bambai yupela inap lukim em long Paradais.’ Mi no inap lusim tingting long dispela! Na em i tok tu, i no laik bilong God na ol man i dai. Mi save God i no as na papa i dai. Nogat tru.”

Tasol taim Kim i tingim ol dispela tok bilong Baibel, dispela i no pinisim bel hevi bilong em wantu tasol. Nogat. Tasol em i helpim em long daunim bel hevi bilong em. Yu tu yu inap wok long daunim bel hevi bilong yu.

[Ol Futnot]

[Piksa long pes 26]

Taim papa o mama i dai, dispela em i bikpela hevi tru