Ol Yangpela i Laik Save . . .

Bilong Wanem Mama i Gat Bikpela Sik?

Papa bilong Al em i dai long sik kensa.a Ol i bin lainim Al long tok promis bilong Baibel olsem ol daiman bai kirap bek, olsem na em inap karim dispela bikpela hevi. Tasol taim ol dokta i tok mama bilong Al em i gat sik kensa, tingting bilong em i bagarap gen. Al i pret nogut tru, nogut mama tu bai i dai. Em i askim em yet olsem: ‘Bilong wanem mama bilong mi em i sik?’

DOKTA Leonard Felder i tok: “Long famili bilong 60 milion manmeri bilong Amerika . . . i gat wanpela man i sik o skin bilong em i bagarap.” Felder i tok moa: ‘Long olgeta 4-pela 4-pela man bilong Amerika, wanpela man i save mekim wok mani em i gat wok tu long lukautim papa o mama o narapela man bilong famili i gat sik.’ Olsem na sapos yu mas lukautim wanpela long famili, i no yu wanpela tasol i karim dispela hevi. Tasol taim sik i painim wanpela long famili, dispela i mekim na yu pret na bel bilong yu i bagarap. Olsem wanem yu inap karim dispela hevi?

Bilong Wanem Mama i Sik?

Sindaun 15:13 i tok: “Sapos bel bilong man i hevi, bai tingting bilong en i bagarap.” Taim papa o mama bilong yu em i sik, kain kain tingting bai i kamap long bel bilong yu. Olsem: Yu inap ting olsem em asua bilong yu na mama i sik. Ating yu na mama i no bin stap gut wantaim, o ating wan wan taim yupela i bin tok pait. Nau mama bilong yu i sik, na yu inap ting olsem em asua bilong yu. Tru, ol tok pait bilong famili inap bagarapim tingting, tasol dispela bai kamapim bikpela sik wan wan taim tasol. Ol hevi na ol liklik tok pait i save kamap insait long ol gutpela famili Kristen tu. Olsem na i no gat as na bel bilong yu i kotim yu olsem em asua bilong yu na mama i sik.

Sin bilong tupela tumbuna bilong yumi, em Adam na Iv, i mekim na papa o mama bilong yu em i sik. (Rom 5:​12) Dispela sin bilong pastaim i as na “olgeta samting God i bin wokim, olgeta i pilim pen olsem meri i laik karim pikinini. Na olgeta i krai nogut i stap, i kam inap long nau.”​—⁠Rom 8:​22.

Bel i Bagarap

Maski dispela samting i as bilong sik bilong mama, ating yu tingting planti. Mama bilong Terri em i gat sik lupus, em wanpela sik i save bagarapim tru skin bilong man. Terri i tok: “Taim mi no stap long haus, mi save tingting planti, mama i stap orait o nogat. Mi no inap putim gut tingting long ol samting. Tasol mi no laik em i tingting planti, olsem na mi no save kamapim wari bilong mi.”

Sindaun 12:25 i tok: “Sapos man i save wari oltaim, em bai i bel hevi tru na tingting bilong en bai i bagarap.” Planti yangpela em papa o mama bilong ol em i sik, ol i save bel hevi. Terri i tok, em i bel hevi stret taim em i lukim olsem mama i no inap mekim ol liklik wok. Hevi bilong ol yangpela i go bikpela moa, long wanem, ol yangpela​—⁠planti taim em ol pikinini meri​—⁠ol i mas kirap na mekim ol narapela wok tu. Profesa Bruce Compas i tok: “Ol pikinini meri i mas mekim ol wok bilong lukautim famili, olsem klinim haus na lukautim ol yangpela brata na susa. Ol i no inap karim dispela hevi, na dispela i save pasim ol long kisim sampela skul na long bung wantaim ol narapela yangpela.” Sampela yangpela i laik stap wanpis, na harim musik i save mekim man i bel hevi.​—⁠Sindaun 18:⁠1.

Planti yangpela i pret long papa o mama bai i dai. Terri i no gat ol brata na susa, na papa bilong em i no stap wantaim ol. Long olgeta taim mama bilong Terri i go long haus sik, Terri i krai na em i pret long mama bai i no kam bek. Terri i tok: “Mitupela tasol i stap. Na mi no laik nambawan gutpela pren bilong mi em i lusim mi.” Yangpela meri Martha, em tu i tok: “Mi gat 18 krismas, tasol mi pret yet long papa o mama bai i dai. Sapos dispela samting i kamap, bai mi bel hevi tru na pilim olsem mi stap wanpis.” Sampela narapela samting i save painim ol yangpela em papa o mama i sik em olsem: Ol i no slip gut, ol i driman nogut, o ol i gat pasin kranki long kaikai.

Ol Samting Yu Inap Mekim

Tru, nau i luk olsem i stap bilong yu i hatwok tru, tasol yu inap karim dispela hevi! Toktok wantaim papamama bilong yu long ol samting yu pret na tingting planti long en. Sik bilong papa o mama i bikpela olsem wanem? Sik bilong em inap pinis o nogat? Sapos sik bilong em i no inap pinis, yupela i bin mekim wanem bilong stretim rot bambai yu ken i stap gut? Yu inap kisim wankain sik long bihain? Tru, papamama i hatwok long toktok long ol dispela samting, tasol sapos yu toktok isi na long gutpela pasin yu askim ol long helpim yu, ating bai ol i wok strong long helpim na strongim yu.

Kamapim tu ol gutpela tingting bilong yu long papamama. Al i tok, em i no bin mekim olsem taim em i kisim save olsem mama bilong em i laik i dai long sik kensa. Em i tok: “Mi no bin tokim em olsem mi laikim em tru. Mi save em i laik mi tokim em olsem, tasol mi yangpela na mi sem long kamapim bel bilong mi long em. Bihain liklik em i dai, na bel bilong mi i kotim mi, long wanem, mi no bin tokim em olsem mi laikim em tru taim rot i op long mi ken mekim olsem. Mi bel hevi long dispela, long wanem, mama i bikpela samting long mi, winim ol narapela man.” Tokim papamama bilong yu olsem yu laikim ol tru.

Sapos yu inap, kisim save long sik bilong papa o mama. (Sindaun 18:15) Ating dokta i save lukautim famili bilong yupela em i ken helpim yu long kisim save long dispela sik. Taim yu gat save long sik bilong papa o mama, dispela bai helpim yu long pilim hevi bilong em, na yu no les kwik long em. Na dispela save i ken helpim yu long redi long ol senis em inap kamap long skin bilong em, olsem ol mak long hap bilong skin em dokta i bin katim, o gras i lus, o skin i no strong moa.

Olsem wanem? Papa o mama i slip long haus sik? Orait, strongim em na kamapim pasin bilong amamas taim yu go lukim em. Toktok long ol gutpela samting. Stori long em long wok bilong skul na long ol wok Kristen. (Skelim wantaim Sindaun 25:25.) Sapos yu sindaun long wanpela kantri em ol wanblut i mas givim kaikai long sikman na wasim ol samting bilong em, orait, mekim wok bilong yu na no ken toktok planti long en. Taim yu pasim ol klinpela klos na komim gut gras, dispela bai amamasim papa o mama bilong yu, na tu, ol lain i wok long haus sik na ol dokta bai kisim gutpela tingting long yu. Dispela inap mekim na ol dokta i mekim gut wok bilong ol long lukautim papa o mama bilong yu.b

Olsem wanem? Papa o mama i slip long haus bilong kamap strong gen? Orait, mekim ol samting yu inap mekim bilong helpim wok bilong lukautim em. Redi long mekim ol wok bilong haus. Bihainim pasin bilong Jehova na amamas long givim strong na taim bilong yu long mekim ol samting. (Jems 1:⁠5) Wok strong long kamapim gutpela tingting na no ken toktok planti.

Tru, i gat ol wok bilong skul yu mas mekim yet. Makim taim bilong mekim dispela, long wanem, em i bikpela samting yu kisim skul. Sapos yu inap, makim hap taim bilong malolo na bilong painim amamas. (Saveman 4:⁠6) Dispela bai givim nupela strong long yu na helpim yu long mekim gut wok bilong yu long helpim papa o mama. Na no ken stap wanpis. Kisim helpim ol narapela Kristen i ken givim long yu. (Galesia 6:⁠2) Terri i tok: “Kongrigesen i kamap olsem famili bilong mi. Oltaim ol elda i redi long toktok wantaim mi na long strongim mi. Mi no inap lusim tingting long dispela samting.”

Holimpas Stretpela Tingting

Bihainim yet stretpela tingting long ol samting bilong spirit, dispela em i nambawan bikpela samting. Givim bel long ol wok bilong spirit, olsem pasin bilong stadi long Baibel, go long ol miting, na autim tok long ol narapela man. (1 Korin 15:58) Long ol mun bilong malolo long skul, Terri i mekim bikpela wok moa long autim tok olsem wanpela painia haptaim. Em i tok: “Oltaim mama i kirapim mi long redim ol tok bilong ol miting i laik kamap long Haus Kingdom na long i go long ol dispela miting. Dispela i helpim mitupela wantaim. Em i no inap i go long olgeta miting maski em i gat laik long i go, olsem na mi putim gut yau bambai mi inap kamapim ol tok bilong miting long em long bihain. Em i wetim mi long givim kaikai bilong spirit long em taim em i no inap i go long miting.”

Wanpela stori long nius The New York Times i kamapim gut dispela samting taim em i stori long wanpela meri i wok welfe, na dispela meri i “save kirap nogut long lukim olsem ol pikinini inap kamap bikpela na kisim tingting bilong man i bikpela pinis na i stap amamas, maski sik bilong papa o mama i putim bikpela hevi long ol.” Em i tok: “Ol i lain long mekim sampela wok samting em ol i no bin save ol inap long mekim . . . Sapos ol inap winim dispela hevi, bai ol inap winim planti kain kain hevi samting.”

Yu tu inap winim dispela taim bilong hevi. Mama bilong Terri em i kamap orait liklik na em inap lukautim em yet. Ating bihain, papa o mama bilong yu tu bai i kamap orait gen. Tasol long nau, yu no ken lusim tingting olsem Pren bilong yu long heven, em Jehova, em bai helpim yu. Em i save “harim beten” bilong ol man, na bai em i harim yu taim yu singaut long em bilong em i ken sambai long yu. (Song 65:⁠2) Bai em i givim “bikpela strong” long yu na long gutpela papa o mama bilong yu bambai yupela inap karim dispela hevi.​—⁠2 Korin 4:7; Song 41:⁠3.

[Ol Futnot]

[Rait long pes 20]

“Taim mi no stap long haus, mi save tingting planti, mama i stap orait o nogat”

[Ol Piksa long pes 21]

Taim yu kisim save long sik bilong papa o mama, yu inap helpim em gut moa yet