Ol Yangpela i Laik Save . . .

Mi Ken Bihainim Wanem Kain Tingting Long Papa o Mama i Bin Lusim Mipela?

“Taim Papa i tok promis bai em i kam na kisim mitupela susa bilong mi bilong raun wantaim em, mama i save bilasim mipela, na mipela wetim papa. Wanpela aua i go na narapela aua gen i go. Bihain nau, Mama bai i tok, ‘Em taim pinis bilong slip nau.’ Nau mitupela i save krai na tok, ‘Papa bai kam, em bai kam!’ Long de bihain gen, bai mitupela i wet yet long papa bai i kam, tasol nogat. Dispela samting i save kamap planti taim.”​—An.a

SAPOS yu olsem An na papamama i brukim marit bilong tupela, nau yu inap save bilong wanem Jehova, em Man bilong wokim marit, Em i no laik tru long pasin bilong katim marit. (Lukim Malakai 2:16.) Pasin bilong brukim marit i nogutim olgeta wan wan insait long famili​—maski papa o mama i bin mekim pasin nogut na i stret wantaim tok bilong Baibel long poroman i ken katim marit bilong tupela.

Nau papamama i katim marit, tasol nogut yu ting dispela samting i stretim pinis ol hevi bilong yu, nogat. Nau bai yu mas tingim gut sampela samting olsem: Yu bai painim rot yet bilong lukim dispela papa o mama i lusim famili o nogat? Yangpela meri, nem bilong em Meg, taim em i skelim dispela samting em i tok i hatwok tru long mekim olsem. Em i tok: “Mi bel hevi tru long wanem papamama i katim marit, olsem na mi pasim bel bilong mi na mi no laik tokaut long en. Inap longtaim liklik bel bilong mi i no pilim moa wanpela samting bilong dispela hevi bilong ol. I olsem papa em i dai pinis.” Na yangpela man Maik i tok olsem: “Taim papa na mama i katim marit, mi no laikim moa papa bilong mi. Na dispela tingting i stap long bel bilong mi inap longpela taim. Mi belhat, long wanem em i lusim mama wantaim 4-pela pikinini, na em i no laik helpim tumas mama long mani samting bilong lukautim mipela.”

Toktok Gut Wantaim, No Ken Pasim Rot

Nau planti samting i no kamap gutpela long i stap bilong yu na yu tingting planti long en. Olsem na bel bilong yu i no gutpela long papa o mama em i bin lusim yupela, na yu no laik harim tok bilong em o sori long em​—yu larim belhat na bel nogut bilong yu i bosim yu. Sapos yu holim yet dispela kain tingting nogut long bel bilong yu, em inap bagarapim yu long bihain. Na dispela bai i no inap helpim yu long i stap olsem pren bilong dispela papa o mama. Dispela pasin bai wok long bagarapim gutpela pasin bilong yu na bai yu hatwok tru long stretim bek long bihain.

Baibel i tok olsem pikinini i mas aninit long papamama na bihainim tok bilong ol. (Skelim Luk 18:20.) Na ol saveman i tok, taim papamama i brukim marit na wanpela bilong tupela i lusim haus, yu mas wok strong bambai yu inap i stap gutpela wantaim dispela papa o mama.b Dokta Robert E. Gould i tok long wanpela nius (Seventeen) olsem, sapos pikinini i go lukim dispela papa o mama inap planti taim liklik em i gutpela, long wanem dispela bai i mekim isi bel na tingting bilong em na em i no ken bel hevi tumas long papamama i katim marit. Tupela savemeri, em Wallerstein na Kelly, tupela i tok tu olsem ol yangpela i stap gutpela yet taim papamama i katim marit, ol i bin pas gut wantaim na dispela samting i helpim ol long i stap gutpela nau long dispela taim bilong hevi. Tasol olsem wanem na yu inap pas gut wantaim dispela papa o mama em i bin lusim haus o em i bin brukim lo bilong marit?

Gutpela Tingting​—Em As Bilong Gutpela Sindaun

Ating pastaim bai yu kros na belhat long samting papa o mama i mekim. Tasol sapos yu wok strong long save long as bilong dispela samting tupela i mekim, em nau pasin bilong bihainim gutpela tingting em inap long daunim belhat bilong yu. Long Sindaun 19:11 Baibel i tok olsem: “Man i gat gutpela tingting, em i no inap kros kwik. Nambawan pasin bilong en i olsem. Em i no save tingim rong narapela man i mekim long em.” Taim man bilong mekim rong i tok sori na em i senisim tingting bilong em, dispela inap helpim yu. Taim yu kisim gutpela tingting, bai yu save olgeta man i save popaia. I no olsem yu wok long helpim dispela papa o mama hia em i bin mekim rong na ol i katim marit; na yu no ken ting olsem yu wok long giamanim dispela papa o mama yu stap wantaim em, nogat. I olsem nau yu wok long kisim stretpela tingting moa long em.

Taim papa o mama i lusim haus, planti yangpela i pilim olsem em i no laikim ol​—na ol i ting ‘sapos em i laikim mipela, bilong wanem em i lusim haus na i go?’ Pastaim yu mas save dispela hevi i kamap namel long papa na mama na i no samting bilong yu. Na taim em i lusim yupela pinis ating sampela taim bai yu pilim olsem em i givim baksait olgeta long yu, tasol nogat. Dokta Gould i tok moa olsem: “Pastaim yet papamama i laikim yu tru na bai ol i laikim yu yet long bihain tu, maski nau tupela i katim marit.”

Ating sampela taim bai yu tingting: ‘Olsem wanem na em i no save kam lukim mipela planti taim liklik?’ Em i makim taim bilong kam lukim yu, tasol inap planti wik bihain em i kam, na yu ting em i les long lukim yu. Tasol ating em i tingting planti long pasin em i bin mekim na em i save dispela i bagarapim stret bel bilong famili. Olsem na i hatwok long em i kam lukim yu. Tingim taim yu bagarapim bel bilong wanpela gutpela pren bilong yu, bihain ating yu sem na yu hatwok long toktok gen wantaim long em, a? Baibel i tok long Sindaun 18:19: “Sapos yu mekim brata bilong yu i bel nogut long yu, orait em bai i . . . olsem ol manmeri i pasim dua bilong banis bilong taun na ol arapela man i no inap i go insait.”

Nau bel bilong dispela papa o mama i gat tok long pasin em i bin mekim olsem, na em i sem long i kam lukim famili bilong em gen. Na sapos em i gat pasin antap dispela inap pasim em tu. O sapos em i kisim nupela poroman marit pinis, bai em i sem long lukim poroman marit bilong em bilong pastaim. Na tu dispela haus long bipo em haus bilong tupela, tasol nau i narapela kain. I gat dispela ol as na ol narapela samting moa i mekim, olsem na i hatwok long papa o mama long kam na lukim yu. Tasol yu inap mekim wanem samting bilong helpim em? Baibel i tok long Rom 12:18 olsem: “Yupela yet i no ken tingting long kros na pait. Oltaim yupela i mas painim rot bilong i stap wanbel wantaim olgeta man.” Orait, olsem wanem yu inap i stap wanbel wantaim dispela papa o mama i bin lusim haus?

Wanpela samting i olsem: Yu no ken ting em i mas lusim bikpela hap taim wantaim yu. Sapos yu ting em i mas mekim olsem, na dispela samting i no kamap olsem yu bin tingting long en, bai yu bel hevi long dispela. Olsem na wanem liklik hap taim em inap lusim long i stap wantaim yu, yu mas amamas tasol long en.

Ating nau yu tingting planti: ‘Bai mipela i stori long wanem samting?’ Tru, taim yu stap wantaim em, pastaim bai yu hatwok long toktok wantaim em. Tasol i gat planti samting long i stap bilong yu em i laik kisim save long en​—olsem long ol poroman bilong yu, o long wok bilong yu long skul i kamap olsem wanem, na long ol samting yu save mekim bihain long skul i pinis long apinun samting. Na i gat planti samting moa yu ken askim em long en. Hevi bilong papamama i mekim na i olsem yupela i stap longwe long narapela narapela. Olsem na yu mas kisim tingting bilong “man i gat gutpela tingting” olsem Sindaun 20:5 i tok. Em inap “pulim dispela tingting i kam antap.” Taim yutupela i toktok wantaim, tromoi planti askim long em​—dispela em rot bilong kisim save long nupela sindaun bilong em o long nupela kain wok bilong em o long ol narapela samting em i save amamas long mekim, o long ol kain pilai em i save laikim na ol nupela pren bilong em. Tasol sapos inap long nau bel bilong yu i hevi yet long pasin em i bin mekim, orait ating bihain yutupela i ken toktok gut wantaim long pasin isi na stretim dispela hevi.

Bosim Gut Tingting

Papa bilong yangpela man Randi, em i save dring planti na em i save paul wantaim kain kain meri. Em i save lusim famili bilong em na i go stap nabaut nabaut na bihain em i kam bek. Em i mekim olsem i go na bihain em i katim marit wantaim mama bilong Randi. Tasol Randi i tok: “Maski em i lusim mipela, mi givim bel tru long em, na klostu em i kamap olsem god bilong mi.” Olsem na yu mas was gut long dispela kain tingting kranki, nogut yu tu yu mekim olsem.

Dispela kain pasin bilong givim bel long narapela i no nupela samting i kamap. Nogat. Long Amerika, inap 90 pesen bilong ol pikinini em papamama i katim marit, ol i stap wantaim mama tasol ol i go lukim papa long sampela taim. Olsem na nau mama em i gat bikpela wok tru bilong lukautim ol pikinini. Maski em i kisim sampela mani long gavman o long papa bilong ol pikinini bilong helpim em long lukautim ol, long wanem pe em i kisim long wok i no inap long lukautim ol​—mama na pikinini i sot yet long samting bilong skin na ating papa em i gat planti samting. Nau wanem samting i kamap? Pikinini i save amamas long raun wantaim papa long wanem papa i baim planti gutpela presen samting bilong em! Taim em i stap wantaim mama, planti taim ol i mas was gut long liklik mani bilong ol na no ken tromoi nating o baim planti samting tumas. Na olgeta taim mama bai i tokim em long wanem samting em i mas mekim na ol samting em i no ken mekim. Olsem na sori tumas, sampela yangpela ol i lusim papa o mama Kristen na ol i go i stap wantaim papa em i gat planti samting bilong skin na em i save larim ol long mekim laik bilong ol yet tasol.​—Lukim Sindaun 19:4.

Sapos nau yu laik tingting long yu bai stap wantaim husat​—papa o mama​—orait skelim gut wanem ol samting em i gutpela samting. Man bilong wokim yu em i makim ol gutpela samting yu mas kisim​—em ol gutpela pasin na ol tok bilong skulim na stretim yu. I no gat narapela samting papamama i ken givim long yu bilong helpim yu long kisim pasin i gutpela na stretpela tingting. Taim papa o mama i givim tok long yu bilong skulim na stretim yu, dispela i soim olsem em i laikim yu tru.​—Lukim Sindaun 4:13; 13:24.

Tingim Jehova em i Man bilong wokim yu; em i putim pinis ol lo bilong makim wanem pasin i stret na wanem pasin i no stret, maski papa o mama i larim yu long mekim sampela samting i no stret. Tom i tok: “Mama i no save tambuim mipela long lukim papa. Long olgeta Fraide taim mipela i go lukim em, mama bai tokim mipela, ‘Yu no ken lusim tingting olsem yu wanpela Kristen na Jehova em i lukim olgeta samting yu mekim.’ Na dispela tok bilong mama i strongim mi long sanap strong long bilip taim mi raun wantaim papa.”

Maski yu wok strong tru long amamasim bel bilong papa o mama, sampela taim yu no inap. Tasol yu no ken les. Ol dispela tok nau yu kaunim long dispela nius i bilong helpim yu long pas gut wantaim papa o mama. Ol man i save senisim tingting na pasin bilong ol na papa o mama tu inap mekim olsem. Na tu, bai yu amamas long save yu bin ‘painim rot bilong i stap wanbel wantaim’ em. Na em gutpela samting tru taim papa bilong yu Jehova i amamas long yu. Long Sindaun 27:​11, Baibel i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” Taim yu bihainim ol lo bilong God na wok strong long kamapim gutpela tingting na lusim rong bilong papamama na stap gut wantaim, em nau Jehova em i amamas long dispela. Jehova em i Pren bilong yu na em i wanpela Papa na em i no inap long lusim tingting long yu.

[Ol Futnot]

[Piksa long pes 27]

Sapos sampela taim yu mas lusim mama na i go stap liklik taim wantaim papa, ating em i olsem wanpela bikpela traim long yu