Ol Yangpela i Laik Save . . .

Mi Inap Stap Olsem Wanem Insait Long Famili i No Wanbel Long Lotu?

“Taim mipela wok long kamap bikpela i hatwok tru. Papa em i no laikim tru lotu bilong mipela olsem na planti taim hevi i kamap.”​—Teri.

OLSEM WANEM? Yu stap long wanpela famili em i no wanbel long lotu? Sapos olsem, yu inap save ol samting long sindaun bilong yu em i hatwok tru. Ating papa o mama bai larim narapela i bihainim lotu bilong em yet, tasol olsem buk bilong S. Sandmel (When a Jew and a Christian Marry), i tok: “Taim papa i larim mama i bihainim lotu bilong em yet, olsem wanem long ol pikinini? Bai em i larim pikinini i go wantaim mama long lotu bilong em? Planti taim ol i no larim dispela samting i kamap.”

Gutpela yu skelim sampela samting inap kamap, sapos papa o mama em wanpela witnes bilong Jehova. Dispela papa o mama em i gat bikpela wok tru bilong “stretim gut ol pikinini bilong [em] na skulim ol long tok bilong Bikpela” na ating em i mas putim lo long sampela samting ol pikinini i laik bihainim olsem: long ol yangpela man na meri i wokabaut wantaim, na long bihainim ol gutpela pasin, na insait long ol pilai spot bilong skul samting, na ol gutpela wok em i ken mekim long taim bilong malolo bilong em, na long ol kain wok em i laik mekim long bihain samting. (Efesus 6:4) Papa o mama i no Witnes ating em bai larim pikinini i bihainim tingting bilong em yet long ol dispela samting.

Long Sande long apinun ating Mama i laik bai yu go wantaim em long ol miting Kristen. Na ating Papa i laik bai yu stap wantaim em long haus na lukim kikbal samting long televisen. Yangpela man Dak em i tok, “Sampela taim mi sori long papa. Wok bilong papa em bilong baim ol samting i go long ol narapela man o long ol kampani samting. Olsem na insait long wik samting mipela i no save lukim em tumas. Na long Sande, famili i lusim em wanpela i stap long haus na ol i go long ol miting. Olsem na wan wan taim mi lusim miting bilong i stap wantaim em long haus.”

Jisas i save dispela samting inap kamap. Em i tok: “Mi kam bilong mekim pasin birua i kamap. Man bai birua long papa bilong en, na pikinini meri bai i birua long mama bilong en, na maritmeri bai i birua long tambu meri bilong en. Ol famili bilong man yet bai i kamap birua bilong en.” (Matyu 10:​35, 36) I no olsem Jisas i laik bai ol famili i bruk, tasol em i save taim sampela long famili i kisim save long tok i tru bilong Baibel bai i gat ol hevi i kamap, long wanem ol narapela i no wanbel wantaim em. Orait, i gat wanpela askim i kamap olsem: Yu ken mekim wanem sapos kain samting olsem i painim yu?

Abrusim Ol Hevi

Pastaim, tingim gut wok bilong yu em i no bilong amamasim papa o mama wanpela tasol, nogat; pastaim yu mas amamasim God! Em i laik bai yu “mas lotu long strong bilong Holi Spirit na long pasin i tru.” (Jon 4:24) Tasol bilong mekim olsem insait long ol famili i no wanbel long lotu i gat sampela hevi yu mas abrusim.

No ken larim wanpela samting i senisim bilip bilong yu​—Wanpela yangpela man em papamama i bin katim marit na papa bilong em i no wanpela Witnes, tasol taim em i go lukim papa, papa i save putim ol traim long em na bai em i sakim tok i tru na givim baksait long God. Em i mekim olsem bilong subim pikinini bilong em long insait long ol bikpela kaikai i makim ol bikpela de bilong ol na i no bilong ol Kristen. Na yangpela man hia em i tok: “Em i mekim olsem na mi no amamas.” Tasol tok bilong Jisas i kirapim tingting bilong yumi, em i tok: “Man i laikim tumas papa o mama bilong en, na i no laikim mi moa yet, em i no inap i stap pren bilong mi.” (Matyu 10:37) Olsem na yu mas sanap strong yet long bilip bilong yu! Sapos papa o mama em i kisim yu i go long wanpela bung em i no stret long ol Kristen i ken mekim, orait long pasin isi yu ken tokim em yu no inap insait long dispela samting. Tasol sapos em i no harim yu, yu mas kamapim klia long em olsem yu no laik larim wanpela samting i bagarapim bilip bilong yu. Nau papa o mama em i lukim bel bilong yu i strong pinis long bihainim dispela tingting, olsem na em bai i no traim yu moa long narapela samting.

Tasol yu mas tingim gut. Long Filipai 4:​5, Baibel i tok olsem: “Yupela i mas isi isi long olgeta man na larim ol i lukim dispela gutpela pasin bilong yupela.” Insait bilong dispela tok “isi isi” em i olsem yu wanbel wantaim ol narapela o yu mekim samting bilong tingim ol narapela man. Ating yu inap stretim ol samting bilong yu na yu inap lusim sampela hap taim wantaim dispela papa o mama bilong yu em i no bilip. Olsem bai em i no ken ting olsem yu no tingim em. Na tu, yu gat wok bilong tingim papa na mama wantaim.​—Efesus 6:1.

Yu laik stap olsem man bilong helpim narapela​—Tasol nogut yu ting olsem brata bilong yu em i bihainim papa long lotu bilong em, olsem na yu mas bihainim mama long lotu bilong em. Olsem wanem? Yu ting dispela em i gutpela as bilong painim wanem rot i gutpela bilong yu ken lotu long God? Olsem wanem sapos lotu bilong mama em i no trupela lotu o i no bihainim ol lo bilong Baibel? Long Sindaun 23:​23, Baibel i tok olsem: “Yu mas strong long kisim save long ol [tok] i tru na long gutpela tingting na long olkain gutpela save. Yu no ken tromoi ol dispela gutpela [tok].”

Bihainim man i olsem gopas​—Ating yu save pas gut wantaim bikpela brata o susa, na papamama i no tumas. Olsem na nau yu pilim olsem yu mas bihainim em long lotu bilong em. Yangpela man Roberto em i tok olsem: “Mi stap long wanpela bikpela famili na mi bin kisim dispela kain tingting.” Tasol taim bikbrata bilong em i givim baksait long tok i tru na em i lusim haus, Roberto i slek long ol samting bilong spirit. Na em i tok moa olsem: “Dispela samting i bagarapim tru bel bilong mi.” Olsem na maski yu save pas gut wantaim dispela brata o susa bilong yu, em i longlong tingting sapos yu larim em i pulim yu na yu no lotu moa long God.

‘Brukim tupela na win’​—Dak i tok: “Klostu mi laik winim 19 krismas na papa em i kirapim mi long poroman wantaim ol yangpela meri. Mama em i wanpela Kristen i baptais pinis, na em i nolaik tru long dispela samting. Wantu mi kirap long bihainim tingting bilong papa, tasol long bel bilong mi, mi save tok bilong mama em i stret.” Taim papamama i bihainim narapela narapela tingting long ol pasin pikinini i mas bihainim, nau rot i op long pikinini bambai em inap kirapim papa o mama long birua long narapela. Olsem na taim pikinini i laikim wanpela samting em i no hatwok long kisim, long wanem oltaim bai em i go long dispela papa o mama em i save larim em i mekim ol samting long laik bilong em yet.

Taim yu sori long papa o mama na narapela nogat, dispela inap long kamapim hevi long famili. Na taim yu kisim tok orait long papa o mama long mekim wanpela samting yu save em i no stret long mekim, yu save dispela samting i no ken i stap hait long ai bilong God. Jems 4:17 i tok: “Tingim gut. Sapos yu save pinis long wanpela gutpela pasin yu mas mekim, tasol yu no mekim, orait yu mekim sin.” Na maski long grisim papa o mama em i save larim yu long bihainim laik bilong yu yet. Yu mas wok strong long bihainim tok bilong dispela papa o mama em i opim ‘rot bilong laip’ long yu.​—Sindaun 6:23.

Makim Lotu Bilong Yu Yet

Sampela yangpela manmeri i no save gut husat inap soim ol long gutpela rot​—olsem wanem bai yu inap long save? Baibel i stori long wanpela yangpela man Timoti, em i bikpela insait long famili i no wanbel long ol samting bilong lotu. Baibel i tok em i “pikinini bilong wanpela Juda meri, em i Kristen. Na papa bilong en i bilong ol Grik.” (Aposel 16:​1) Ating sampela taim Timoti tu i bin pilim ol dispela hevi bilong famili i no stap wanbel long ol samting bilong lotu. Tasol Timoti em i amamas long lotu bilong mama bilong em na bihain em i kamap poroman bilong aposel Pol na i raun wantaim em long autim tok bilong Baibel. (Aposel 16:​2, 3) Dispela i no olsem Timoti em laikim moa yet mama bilong em na papa i no tumas. Nogat.

Aposel Pol i tokim Timoti olsem: “Tasol yu, yu mas holim strong dispela tok yu bin kisim na yu save bilip strong long en. Yu save gut long mipela ol manmeri i bin skulim yu long dispela tok. Na yu save, taim yu bin i stap liklik pikinini yet, yu stat long kisim save long ol buk i gat tok bilong God. Dispela ol buk ol inap long givim gutpela tingting long yu, na bai yu bilip long Krais Jisas, na bai God i kisim bek yu.” (2 Timoti 3:​14, 15) Olsem na yumi ken tok, Timoti em i bin stadi gut long Tok bilong God na bihain em i tingim wanem lotu em i laik bihainim! Na tu, mama wantaim bubu bilong em na aposel Pol, ol i bin kirapim em long bilip strong.

Yu no ken ting olsem yu sori long papa o mama, olsem na bai yu bihainim em long lotu; mobeta yu skelim gut bilip bilong papamama wantaim long “tok bilong Baibel.” Long wanem yu yet yu mas painim rot bilong God i ken kisim bek yu, na i no wok bilong papa o mama long mekim olsem!​—Filipai 2:12.

Helpim Papa o Mama i No Bilip

Nau bel bilong yu i amamas, long wanem yu painim pinis lotu i tru. Tasol yu gat wanem tingting long papa o mama em i no bilip? Aposel Pol i kirapim ol Kristen marit long helpim poroman bilong ol i no bilip, olsem: “Yu meri, bai yu inap helpim man bilong yu na em i kamap Kristen, o nogat, em yu no save. Na yu man, bai yu inap helpim meri bilong yu na em i kamap Kristen, o nogat, em yu no save tu.” (1 Korin 7:​12-16) Dispela tok inap kirapim ol pikinini bilong helpim papamama i no bilip.

Taim yu mekim gutpela pasin na yu daun long papamama, dispela inap helpim papa o mama long luksave long pasin bilong ol Kristen tru. (Skelim 1 Pita 3:​1, 2.) Tu, taim yu sanap strong long tok i tru, i no olsem yu sakim papa o mama i no bilip. Olsem na mas mekim gut long em na bihainim ol tok bilong em​—dispela i soim long ples klia yu laikim em moa yet.

Long Saveman 3:​7 Baibel i tok, i gat “taim bilong pasim maus na taim bilong toktok.” Sapos rot i op bilong yu ken toktok wantaim papa o mama long bilip bilong yu, em gutpela yu mekim! Long Sindaun 3:​27, Baibel i tok olsem: “Sapos wanpela man i sot long samting na em i askim yu long givim em, yu no ken tok, ‘Nogat.’ ” Yu mas mekim gutpela pasin long ol na mekim long pasin isi. Na maski long daunim papa o mama long wanem yu gat bikpela save long tok bilong Baibel. Yu no save, ating gutpela pasin bilong yu inap helpim em. Yangpela man, nem bilong em Jei, em i tok olsem: “Inap longpela taim tru papa bilong mi em i birua long mipela. Olsem na mipela i ting em i no inap long senis, tasol bihain em i lusim dispela tingting na em kirap bihainim bilip bilong mipela.” Inap long taim papa bilong Jei i dai long sampela yia i go pinis, papa i bin mekim wok olsem elda Kristen.

Na sapos papa o mama i no senisim pasin na tingting bilong em, tingim tok i stap long Buk Song 27:​10, em i tok olsem: “Maski papa na mama i givim baksait long mi, Bikpela bai i lukautim mi.” Na insait long kongrigesen Kristen i gat ol gutpela pren ol bai i sambai long yu, na ol ‘i winim pasin namel long tupela brata.’ (Sindaun 18:24) Ol dispela pren na papa o mama i bilip ol inap helpim yu tru long sanap strong long tok i tru.

[Piksa long pes 29]

Taim yu kirapim papa o mama long birua long narapela, ating yu inap kisim ol samting yu laikim, tasol dispela bai kamapim planti hevi moa insait long famili