Papamama i Lainim Mipela Long Laikim Tru God

Em stori bilong Elizabeth Tracy

Long moningtaim ol man i bin kirapim sampela lain long mekim nogut long mipela, na nau ol dispela man i holim gan na tokim papamama long lusim ka. Ol i lusim mi na susa bilong mi long ka, na mipela i tingting, bai mipela i lukim gen papamama bilong mipela o nogat. Wanem samting i bin kamap na dispela samting nogut i painim mipela klostu long Selma, Alabama, Amerika, long 1941? Na olsem wanem ol samting papamama i bin lainim mipela long en i kirapim ol man long mekim olsem?

PAPA bilong mi, em Dewey Fountain, na wanpela wanblut i mekim bikpela long em long wanpela fam long Teksas, long wanem, papamama bilong em ol i dai taim papa i liklik yet. Bihain em i go wok long wanpela hap ol i save kisim wel bilong wokim disel long en. Long 1922, em i gat 23 krismas na em i maritim wanpela naispela yangpela meri bilong Teksas, em Winnie, na papa i kirap stretim rot bilong sindaun gut long wanpela hap na kamapim famili.

Em i wokim haus long is Teksas klostu long liklik taun Garison. Long dispela hap em i planim planti samting, olsem kapok na kon. Em i lukautim tu kain kain animal bilong fam. Bihain, mipela ol pikinini i kamap​—⁠Dewey, em mama i karim long Me 1924, Edwena long Disemba 1925, na long Jun 1929 em i karim mi.

Lainim Tok i Tru Bilong Baibel

Papamama i bilong lotu Sios Bilong Krais, olsem na ol i ting ol i save long Baibel. Tasol long 1932, G. W. Cook i givim buk Deliverance na buk Government, em Sosaiti Was Taua i wokim, long brata bilong papa, em Monroe Fountain. Monroe i laik stori long papamama bilong mi long ol samting em i lain long en, olsem na planti taim em i kam long taim mipela i kaikai long moningtaim, na em i ritim wanpela stori bilong Wastaua, na bihain em i “popaia” na lusim dispela nius long haus bilong mipela. Bihain, papamama i ritim dispela nius.

Long wanpela Sande moning, Ankol Monroe i singautim papa long kam long wanpela haus i stap klostu bilong stadi long Baibel. Em i tokim papa olsem Mista Cook inap bekim olgeta askim bilong papa long Baibel. Taim papa i kam bek long haus, em i tokim famili olsem: “Mi kisim bekim long olgeta askim bilong mi, na sampela save moa! Mi bin ting mi gat save long Baibel, tasol taim Mista Cook i stori long bikpaia, tewel, na long laik bilong God long graun, na olsem wanem Kingdom bilong God bai kamapim dispela laik, mi kirap tingting olsem mi no gat save liklik long Baibel!”

Haus bilong mipela i olsem wanpela ples bung. Ol wanblut na pren ol i kam lukim mipela, na ol i wokim loli na popkon, na ol i singsing taim mama i paitim piano. Tasol isi isi ol i lusim ol dispela samting na ol i kirap long toktok long Baibel. Mipela pikinini i no klia long olgeta samting ol i toktok long en, tasol pasin bilong papamama long laikim tru God na Baibel i stap long ples klia, olsem na mipela olgeta pikinini i kisim wankain pasin bilong laikim tru God na Tok bilong em.

Ol narapela famili tu i singautim ol man long kam long haus bilong ol long toktok long Baibel long olgeta wik, na planti taim ol i toktok long wanpela stori bilong nius Wastaua. Taim ol miting i kamap long haus bilong ol famili i stap long taun Apelbi na Nakadoses, mipela planti i kalap long ka Model A Fod bilong mipela na go long miting, maski em taim nogut bilong ren samting.

Ol i Bihainim Tok Ol i Lainim

I no longtaim na papamama i save olsem ol i mas mekim sampela samting. Man i laikim tru God em i mas tokim ol narapela long ol samting em i lainim. (Aposel 20:35) Tasol papamama i save sem na ol i gat pasin daun, olsem na ol i hatwok long autim bilip bilong ol long ol narapela. Tasol pasin bilong laikim tru God i kirapim ol long autim tok, na dispela i helpim ol long lainim mipela long bilip tru long Jehova. Papa i tok olsem: “Jehova i mekim ol fama i kamap man bilong autim tok!” Long 1933, papamama i kisim baptais long wanpela liklik raunwara klostu long Hendeson, Teksas, bilong makim olsem ol i dediket pinis long Jehova.

Long kirap bilong yia 1935, papa i raitim pas i go long Sosaiti Was Taua, na kamapim planti askim long laip oltaim ol Kristen i wet long kisim. (Jon 14:2; 2 Timoti 2:​11, 12; KTH 14:​1, 3; 20:⁠6) Presiden bilong Sosaiti Was Taua long dispela taim, em Joseph F. Rutherford, em yet i bekim pas bilong papa. Em i no bekim ol askim bilong papa, tasol Brata Rutherford i singautim papa long kam long kibung bilong ol Witnes Bilong Jehova long Wosington, D.C., long mun Me.

Papa i tingting, ‘mipela i no inap i go! Mipela i gat fam na mipela i bin planim kaikai inap olsem 26 hekta. Mipela i mas kisim kaikai long gaden na kisim kaikai i go long haus maket long taim bilong kibung.’ Tasol bihain liklik, bikpela tait i rausim ol samting i pasim mipela long i go long kibung​—⁠ol gaden, ol banis, na ol bris. Olsem na mipela i kalap wantaim ol narapela Witnes long wanpela bas bilong skul ol i baim, na raun long en inap 1,600 kilomita i go long hap not-is, long ples kibung i kamap long en.

Long kibung papamama i amamas tru long harim tok i kamapim klia husat em i bikpela lain “manmeri” em ol bai abrusim “bikpela hevi.” (KTH 7:​9, 14) Papamama i wet long kisim laip oltaim long Paradais long graun, na dispela i kirapim ol long mekim wok i go inap long ol i dai. Ol i kirapim mipela pikinini long “kisim dispela laip em i laip tru,” em laip oltaim long graun Jehova i laik givim long yumi. (1 Timoti 6:​19; Song 37:29; KTH 21:​3, 4) Maski mi gat 5-pela krismas tasol long dispela taim, mi amamas tru long stap wantaim famili bilong mi long dispela gutpela kibung.

Taim mipela i lusim kibung na kam bek long haus, mipela i planim gen gaden, na bihain mipela i kisim planti kaikai tru, winim ol narapela yia. Dispela i helpim papamama long save olsem pasin bilong bilip tru long Jehova i gat blesing bilong en long olgeta taim. Ol i kirap mekim bikpela wok bilong autim tok, na ol i lusim inap 52 aua long olgeta mun long mekim dispela wok. Na bihain, long taim bilong planim nupela gaden, papamama i salim olgeta samting bilong fam! Papa i baim sampela man long wokim haus-ka bilong mipela i ken stap long en​—⁠bikpela bilong en i olsem 6 x 2.4 mita​—⁠na em i baim nupela ka Fod bilong pulim dispela haus-ka. Ankol Monroe i salim ol samting bilong em, na em tu i stap wantaim famili bilong em long wanpela haus-ka.

Lainim Mipela Long Tok i Tru

Long Oktoba 1936, papamama i kirap mekim wok painia, em wok bilong autim tok long olgeta de. Mipela famili olgeta i kirap autim tok long ol ples bilong is Teksas, em wan wan taim tasol ol Witnes i bin autim tok bilong Kingdom long en. Inap wanpela yia, mipela i raun long planti ples, na mipela i amamas long mekim olsem. Long tok na pasin bilong ol, papamama i lainim mipela long bihainim pasin bilong ol Kristen bilong bipo, em ol i bin givim strong bilong ol long autim tok i tru bilong Baibel long ol narapela man.

Mipela pikinini i pilim tru gutpela pasin bilong mama long daunim laik bilong em yet na em i lusim haus bilong em. Tasol i gat wanpela samting em i no inap lusim, em masin bilong samapim klos. Na gutpela tru em i no lusim dispela samting. Em i gat save long samapim ol klos, olsem na oltaim mipela inap pasim ol gutpela klos. Long olgeta kibung, mipela i gat ol nupela naispela klos bilong pasim.

Mi inap tingim taim Herman G. Henschel wantaim famili bilong em i kam long hap bilong mipela long trak bilong Sosaiti Was Taua i gat bikmaus long en. Ol i putim trak long hap em planti manmeri i sindaun long en, na ol i putim plet i gat sotpela tok bilong Baibel long en, na bihain ol i go lukim ol man long haus bilong ol bilong givim sampela save moa long ol. Dewey i laikim pikinini man bilong Herman, em Milton. Long dispela taim Milton i gat 15 krismas samting. Nau Milton em i presiden bilong Sosaiti Was Taua.

Long kibung bilong Kolambas, Ohaio, long 1937, Edwena i kisim baptais, na ol i singautim papamama long mekim wok painia salim. Long dispela taim, ol painia salim i save autim tok inap 200 aua long olgeta mun. Taim mi tingting bek long dispela taim, mi save olsem gutpela pasin bilong mama i bin helpim mi tru long helpim man bilong mi long mekim ol wok Kristen bilong em.

Taim papa i kirapim Baibel-stadi wantaim wanpela famili, em i kisim mipela ol pikinini i go wantaim em bambai mipela i ken stap olsem gutpela piksa long ol pikinini bilong dispela famili. Em i tokim mipela long painim na ritim ol skripsa long Baibel, na bekim sampela askim i no hatwok long bekim. Olsem na planti bilong ol dispela yangpela em mipela i bin stadi wantaim ol, ol i lotu yet long Jehova. Na dispela i bin strongim mipela tu long laikim yet God.

Taim Dewey i wok long go bikpela, em i hatwok long stap wantaim tupela yangpela susa long liklik haus-ka. Olsem na long 1940, em i lusim haus na em i mekim wok painia wantaim wanpela narapela Witnes. Bihain em i maritim Audrey Barron. Olsem na papamama i lainim Audrey tu long planti samting, na em i laikim tru papamama bilong mipela. Dewey i no laik insait long ami, olsem na em i kalabus long 1944, na inap liklik taim Audrey i stap wantaim mipela long liklik haus-ka bilong mipela.

Long bikpela kibung long Sen Lui, Misuri, long 1941, Brata Rutherford i toktok long ol pikinini i gat 5-pela i go inap 18 krismas, na ol i sindaun long wanpela hap klostu long pletfom. Mitupela Edwena i putim yau long gutpela nek bilong em. Em i olsem wanpela gutpela papa i skulim ol pikinini bilong em yet long haus. Em i kirapim ol papamama olsem: “Long nau Krais Jisas i bin bringim lain bilong em i kam long em, na em i tok strong long ol papamama i mas skulim pikinini bilong ol long stretpela rot.” Na em i tok moa: “Ol pikinini i mas i stap long haus, na yupela i mas lainim ol long tok i tru!” Gutpela tru na papamama bilong mipela ol i bin mekim olsem!

Long dispela kibung mipela i bin kisim wanpela nupela buklet, nem bilong en, Jehovah’s Servants Defended, em dispela buklet i stori long ol kot ol Witnes Bilong Jehova i bin winim, na ol kot ol i bin winim long Nambawan Kot bilong Yunaitet Stets. Papa i stadi long dispela buklet wantaim famili olgeta. Mipela i no ting dispela i redim mipela long ol samting bai painim mipela long sampela wik bihain long Selma, Alabama.

Ol i Bung na Pait Long Mipela Long Selma

Long moningtaim bilong dispela de em samting nogut i bin kamap, papa i bin givim kopi bilong wanpela pas long wanpela polisman, na long bikman bilong taun, na long namba wan polis long Selma. Dispela pas i tok, lo bilong kantri i orait long mipela i autim tok. Tasol ol i rausim mipela long taun.

Inap 5-pela man i holim gan ol i kam long haus-ka bilong mipela long apinun, na ol i kisim mama, na mi wantaim susa bilong mi. Ol i tromoi nabaut ol samting na ol i wok long painim samting i gat tok bilong daunim gavman. Papa i stap ausait, na ol i tokim em long pasim haus-ka long ka bilong mipela, na ol i makim gan long em. Mi no pret long dispela taim. Tingting bilong ol dispela man i kranki stret, ol i ting mipela i man nogut, olsem na mi na susa bilong mi i lap. Tasol papa i lukluk strong long mipela na mipela i pasim maus na stap isi.

Taim mipela i redi long i go, ol dispela man i laik mitupela Edwena i go long ka bilong ol. Papa i tok strong: “Yupela i no inap kisim tupela i go wantaim yupela, nogat tru!” Taim ol i stretim tok pinis, famili bilong mipela inap i go long wanpela ka, na ol man i holim gan ol i bihainim mipela long ka bilong ol. Inap 25 kilomita ausait long taun, ol i tokim mipela long draivim ka i go long sait bilong bikrot, na ol i kisim papamama i go longwe liklik long ka. Ol dispela man i toktok long papamama bilong pulim tingting bilong ol. Ol i tok: “Lusim dispela lotu. Go bek long fam, na lukautim gut tupela pikinini meri bilong yupela!” Papa i traim long toktok gut wantaim ol, tasol ol i no harim.

Orait, wanpela man i tok: “Yupela go, na sapos yupela i kam bek long Dalas Kaunti, bai mipela i kilim i dai yupela olgeta wan wan!”

Mipela i amamas na stap wantaim gen, na mipela i raun long ka inap sampela aua na bihain mipela i putim ka long wanpela hap na slip. Mipela i bin raitim long pepa namba-plet bilong ka bilong ol dispela man. Wantu papa i toksave long dispela samting long Sosaiti Was Taua, na sampela mun bihain ol polis i holim ol dispela man.

Go Long Skul Gileat Bilong Kamap Misineri

Long 1946, ol i singautim Edwena long i go long klas namba 7 bilong Wastaua Baibel Skul Bilong Gileat long Saut Lansing, Nu Yok. Wanpela tisa, em Albert Schroeder, em i tokim Bill Elrod long ol gutpela pasin bilong Edwena. Bipo Bill em i poroman bilong Brata Schroeder long wok painia, na long dispela taim em i wok long hetkota bilong ol Witnes Bilong Jehova long Bruklin, Nu Yok.a Bill i bungim Edwena, na wanpela yia bihain long Edwena i winim Skul Gileat, tupela i marit. Inap planti yia ol i mekim wok bilong God long olgeta de, na ol i wok wantaim long Betel tu inap 5-pela yia. Bihain, long wanpela de long 1959, Brata Schroeder i toksave long klas namba 34 bilong Skul Gileat, olsem gutpela pren bilong em i bin kamap papa bilong pikinini man na pikinini meri, em mama i karim tupela wantaim.

Long pinis bilong yia 1947, taim mi wok wantaim papamama bilong mi long Meridian, Misisipi, ol i singautim mipela 3-pela long i go long klas namba 11 bilong Skul Gileat. Mipela i kirap nogut long dispela, long wanem, mi yangpela tumas na krismas bilong papamama i abrusim mak bilong skul. Tasol ol i orait long mipela i kam, na mipela i kisim dispela gutpela skul bilong Baibel.

Wok Misineri Wantaim Papamama

Ol i makim mipela long mekim wok misineri long Kalombia, Saut Amerika. Tasol mipela i kamap long Bogota long Disemba 1949, inap wanpela yia bihain long mipela i winim skul. Mipela i go stap long wanpela haus misineri i gat 3-pela narapela misineri i stap pinis long en. Pastaim papa i ting i hatwok tru long em i lainim tok Spen, na ating i gutpela moa long em i lainim ol narapela long tok Inglis! Em nau, ol hevi i painim mipela, tasol mipela i kisim planti gutpela blesing! Long Kalombia namba bilong ol Witnes i no winim 100 long 1949, tasol nau i gat inap 100,000!

Papamama i wok long Bogota inap 5-pela yia, na bihain Sosaiti i salim ol i go long taun Kali. Long 1952, mi maritim Robert Tracy, em wanpela misineri long Kalombia.b Mipela i stap long Kalombia i go inap long 1982, na long dispela yia Sosaiti i salim mipela i go long Meksiko, na mipela i bin stap long dispela hap i go inap long nau. Long 1968, papamama bilong mi ol i mas go bek long Yunaitet Stets bilong lukim dokta. Taim sik bilong ol i pinis, ol i mekim wok painia salim klostu long taun Mobal, Alabama.

Lukautim Papamama Bilong Mipela

Taim papamama i wok long kamap lapun, ol i no inap mekim bikpela wok moa na i mas i gat man i helpim ol. Ol i askim Sosaiti long salim ol i go mekim wok klostu long hap Edwena na Bill i sindaun long en long Atens, Alabama. Bihain brata bilong mipela, Dewey, em i ting i gutpela long famili i stap long wanpela hap long Saut Karolaina. Olsem na Bill wantaim famili bilong em na papamama ol i go sindaun long Grinwud. Dispela gutpela samting ol i mekim i helpim mitupela Robert long mekim yet wok misineri long Kalombia, na mipela i save olsem i gat man i lukautim gut papamama.

Bihain, long 1985, papa i kisim sik strok na em i no inap toktok na wokabaut. Mipela famili i bung na toktok long olsem wanem mipela inap lukautim gut papamama. Mipela i pasim tok olsem Audrey bai go pas long wok bilong lukautim papa, na mitupela Robert i ken helpim papamama long rot bilong salim pas long ol long olgeta wik na raitim ol gutpela eksperiens, na mipela i go lukim ol taim rot i op long mipela i mekim olsem.

Mi inap tingim gut laspela taim mi lukim papa. Em i no inap toktok gut, tasol taim mipela i tokim em olsem bai mipela i go bek long Meksiko, em i taitim bun na mekim wanpela tok, “Gutbai!” Olsem na mipela i save em i wanbel wantaim laik bilong mipela long mekim yet wok misineri. Em i dai long Julai 1987, na mama i dai 9-pela mun bihain.

Wanpela pas mi kisim long susa bilong mi​—⁠em man bilong em i dai pinis​—⁠i kamapim gut tingting bilong mipela long papamama. Em i tok: “Mi amamas tru long ol bilip Kristen em papamama i bin lainim mi long en, na i no gat wanpela taim mi bin ting bai mi amamas moa sapos papamama i bin mekim bikpela long mipela long narapela rot. Ol i stap olsem gutpela piksa long pasin bilong bilip strong long Jehova, na long pasin bilong daunim laik bilong ol yet, na dispela i bin helpim mi long sanap strong long taim mi bin bel hevi tru.” Edwena i tok moa: “Mi tok tenkyu long Jehova long yumi gat papamama em toktok na pasin bilong ol i bin soim yumi olsem, yumi ken stap amamas sapos pasin bilong lotuim God bilong yumi, em Jehova, i nambawan samting long i stap bilong yumi.”

[Ol Futnot]

[Ol Piksa long pes 22, 23]

Famili Fountain: (long han kais i go han sut) Papa Dewey, Edwena, Winnie, Elizabeth, Dewey; han sut: Elizabeth na Dewey i sindaun long trak bilong Henschel (1937); long daunbilo long han sut: Elizabeth i gat 16 krismas, em i pasim ol bikpela toksave long bros na baksait na wokabaut