Gutpela Samting Bilong Spirit Mipela i Kisim
EM STORI BILONG PHILLIP F. SMITH
“Ol i bin laitim wanpela lam na em bai lait i go long Afrika i olsem i stap long bikpela tudak.” Mipela i amamas tru long kaunim dispela tok antap, long pes 75 bilong yiabuk bilong ol Witnes Bilong Jehova bilong 1992! Long 1931 bubu bilong mipela, em Frank W. Smith, em i bin raitim dispela tok long wanpela pas em i salim long Brata Joseph F. Rutherford, em presiden bilong Sosaiti Was Taua long dispela taim. Bubu i bin raitim ripot bilong wanpela bikpela raun em wantaim brata bilong em i bin mekim bilong autim tok.
YIABUK bilong 1992 i stori olsem: “Gray Smith wantaim bikbrata bilong em Frank, em tupela painia bilong Kep Taun [Saut Afrika] ol i gat strongpela bel, ol i kirap i go long Britis Is Afrika; ol i laik save, ol inap autim tok long dispela hap o olsem wanem? Ol i kisim ka ol i kolim De Soto, em ol i bin wokim i kamap olsem haus ka, na ol i putim long wanpela sip wantaim 40 katon buk, na ol i kalap long dispela sip na i go long Mombasa, em i stap long pasis bilong Kenya.”
Long pas bubu i bin salim long Brata Rutherford, bubu i stori long taim ol i lusim Mombasa na ol i go long Nairobi, em nambawan biktaun bilong Kenya. Bubu i tok: “Dispela raun bilong mipela long ka i samting nogut tru. Mipela ran inap 4-pela de olgeta bilong i go 580 kilomita . . . Long olgeta taim mi mas pasim ka na kisim savol na stretim ol baret na pulimapim graun long ol hul, na katim kunai na ol diwai bilong slipim long graun malumalum na bai ol wil i ken holim na i no ken wel.”
Taim Frank na Gray i kamap pinis long Nairobi, ol i wok i go inap 21 de olgeta bilong tilim ol buk na nius bilong Baibel. Pas bilong bubu i tok, “Mipela i harim sampela tok bilong ol man long dispela samting, na i olsem wok bilong mipela i kirapim tru ol man bilong lotu long Nairobi na bikpela tok i kamap namel long ol.” Bihain bubu i laik i go bek long ples na lukim liklik pikinini man bilong em i gat tupela krismas, em Donovan, na meri bilong em Phyllis. Phyllis i gat bel long namba tu pikinini, em papa bilong mipela, Frank. Olsem na bubu i kisim sip long Mombasa, tasol taim em i no kamap yet long ples em i dai long sik malaria.
Mi wantaim susa na brata bilong mi, mipela i tingim dispela stori long yiabuk, na tingting bilong mipela i go long gutpela papa bilong mipela. Long 1991, inap sampela mun paslain long taim mipela i kisim dispela yiabuk bilong 1992, papa i dai long sampela samting i kamap taim ol dokta i katim em bilong stretim sik bilong klok. Em i no bin lukim papa bilong em, tasol tupela i wankain—tupela wantaim i laikim tumas Jehova. Bubu bai amamas tru sapos em i save, long 1959, em 28 yia bihain long taim em i dai, pikinini bilong em bai bihainim lek bilong em na mekim wok Kristen bilong autim tok long Is Afrika!
Taim Papa i Yangpela
Mama bilong papa i bin karim em long Julai 20, 1931, long Kep Taun, em tupela mun bihain long taim papa bilong em i dai. Em i kisim nem bilong papa bilong em. Kirap long taim papa i liklik yet, em i kamapim bel bilong em, em i laikim tumas Jehova. Taim em i gat 9-pela krismas tasol, em i laik mekim wok autim tok na em i pasim bikpela toksave long bros na sanap long ples ol man i save kisim tren long Kep Taun, na ol wanskul bilong em i lap na tok bilas long em. Taim em i gat 11-pela krismas em i kisim baptais bilong kamapim long ples klia olsem em i dediket pinis long Jehova. Sampela taim ol i salim papa wanpela tasol long autim tok long olgeta haus i stap long wanpela rot. Taim em i gat 18 krismas, em i save lukautim Stadi Wastaua long wanpela grup bilong ol lapun sista Kristen long Kep Taun.
Long 1954 Sosaiti Was Taua i tokaut olsem ol bai wokim sampela kibung long hap bilong Yurop long yia antap. Papa i gat bikpela laik tru long i go, tasol em i no gat mani bilong baim rot. Olsem na em i wokim kontrak bilong mekim wok inap 3-pela mun long glasim kopa ol i kisim long wanpela kopa-main long Noten Rodisia (nau ol i kolim Sambia). Ol samting bilong mekim dispela wok ol i stap long hap bilong bus.
Papa i save, i gat planti Witnes Afrika long Noten Rodisia, olsem na taim em i kamap pinis em i wok long painim ol, na em i kisim save long ples ol i save mekim miting long en. Em i no inap mekim tok ples bilong dispela hap, tasol em i bung wantaim ol na oltaim em i save go long ol miting long kongrigesen bilong ol Witnes Bilong Jehova i stap long hap bilong kopa-main. Ol waitskin i wok long main ol i no laikim ol blakskin, na planti taim ol i save toknogutim ol. Tasol papa i no olsem—long olgeta taim em i save mekim gutpela pasin long ol.
Taim 3-pela mun i pinis, wanpela wokman Afrika em i no wanpela Witnes, em i kam long papa na i askim em: “Yu save wanem nem mipela save kolim long yu?” Man ya i lap na i tok, “Mipela i save kolim yu Bwana [Mista] Wastaua.”
Long 1955 papa i go long ol “Kingdom i Win” Kibung i kamap long Yurop. Long dispela hap em i bungim Mary Zahariou, na long yia antap tupela i marit. Taim ol i marit pinis, ol i go sindaun long Pama, Ohaio, long Amerika.
Ol i Go Long Is Afrika
Long wanpela kibung distrik long Amerika, Sosaiti i singautim sampela manmeri i go sindaun long sampela hap i no gat planti Witnes long en. Papamama i pasim tok long i go long Is Afrika. Tupela i bihainim stret tok bilong Sosaiti Was Taua. Ol i bungim sampela mani bilong baim rot bilong i kam bek sapos papa i no inap kisim wanpela wok; long wanem, ol man i holim pepa olsem laisens bilong kisim wok, ol tasol inap sindaun long dispela kantri.
Orait papamama i kisim pinis paspot na visa na ol i kisim wanpela kain sut bilong ol man i laik i go long narapela kantri, na nau tupela i kisim sip long Nu Yok Siti na ol i go long Mombasa, long rot bilong Kep Taun. Ol i stap long sip inap 4-pela wik. Ol i kamap pinis long Mombasa na sampela brata Kristen ol i stap long bris na wetim ol. Ol tu i bin i kam long dispela hap bilong autim tok. Taim papamama i kamap pinis long Nairobi, wanpela pas bilong papa i stap. Em pas bilong wanpela kampani (Geological Survey Department) long Entebe, Yuganda. Em i bin rait na askim ol long wanpela wok olsem bilong glasim graun bilong painim kopa samting. Orait papamama i kisim tren i go long Kampala, Yuganda, na ol i toktok wantaim papa na em i kisim dispela wok. Long dispela taim i gat wanpela Witnes moa long hap bilong Entebe-Kampala, em George Kadu, na i no gat narapela.
Gavman i baim man bilong lainim papa long tok ples bilong dispela hap, em tok ples Luganda. Papa i amamas, long wanem, em i tingting pinis long lainim dispela tok ples bambai em inap mekim gut wok bilong autim tok long ol man. Bihain papa i helpim sampela long tanim tok bilong buklet “Dispela Gutpela Tok Bilong Kingdom” long tok ples Luganda.
Papa i no save pret long autim tok long ol man. Em i autim tok long olgeta waitskin long ples wok bilong em, na long olgeta taim em i save go autim tok long ol Yuganda tu. Na em i autim tok long nambawan ofisa bilong lo long Yuganda. Dispela man i putim gut yau long tok bilong Kingdom, na em i singautim papa na mama long i kam kaikai wantaim em.
Mama i karim susa bilong mi, Anthe, long 1960, na em i karim mi long 1965. Famili bilong mipela i kamap pren tru bilong ol brata sista long liklik kongrigesen long nambawan biktaun, Kampala. I no gat sampela Witnes waitskin moa long Entebe, olsem na sampela samting i kamap, olsem: Wanpela taim wanpela pren bilong papa i kam long Entebe bilong sotpela taim tasol na em i wok long painim papa. Em i mekim mekim, nogat. Orait bihain em i askim wanpela man: “Yu save long tupela marit waitskin em ol i Witnes Bilong Jehova?” Orait, kwiktaim man ya i kisim em long ka na bringim em stret long haus bilong papamama.
Tasol sampela taim ol hevi tu i painim mipela. Tupela taim ol lain i birua long gavman na ol i pait. Wanpela taim ami bilong gavman i holim gan na i sut nabaut long ol man bilong wanpela lain. Long dispela de, long san na long nait ol i wok long sut long gan. Long olgeta de, kirap long 6 klok apinun i go inap 6 klok moningtaim, i tambu long ol man i raun ausait. Olsem na mipela i mekim ol miting long haus bilong papamama long belo bek samting. Bihain ol i pinisim tambu na papa i kisim mipela long ka i go long Stadi Wastaua long Kampala. Wanpela soldia i makim mipela long gan na i pasim ka na em i laik save, mipela i go we. Long dispela taim mi liklik tru na Anthe i gat 5-pela krismas. Long pasin isi papa i tokim soldia long ples mipela laik i go long en, na em i soim ol Baibel na buk bilong mipela long em, olsem na em i larim mipela i go.
Mipela i stap klostu 8-pela yia long Yuganda, tasol sik i mekim, na papamama i tingting long famili tu, na long 1967 mipela i go bek long Amerika. Mipela i insait long Kongrigesen Kanfil, long Ohaio, na papa i stap elda. Papamama i laikim tru ol brata sista long dispela hap, wankain olsem ol i laikim ol brata sista long liklik kongrigesen long Kampala.
Go Bikpela Insait Long Pasin Kristen
Long 1971 mama i karim brata bilong mi David. Mipela ol pikinini i go bikpela insait long famili i gat bikpela pasin sori i stap long en. Mi ting dispela gutpela pasin i stap insait long famili, long wanem, pasin bilong laikim tru narapela i stap namel long papa na mama.
Taim mipela i pikinini yet, oltaim papa i save kaunim wanpela stori bilong Baibel long mipela long taim bilong slip, na taim em i beten pinis em i save givim sokolat long mipela, em ol i bin pasim long pepa i olsem gol, tasol mama i no save papa i givim long mipela. Long olgeta taim mipela famili i save stadi wantaim long Wastaua, maski mipela i stap we. Wanpela taim mipela i holide na mipela mekim stadi long wanpela maunten, na wanpela taim mipela i mekim long wanpela hap em mipela inap lukim solwara. Planti taim papa i save tok, em i tingim ol dispela taim em taim bilong amamas tru, winim ol narapela taim. Em i tok, em i sori tru long ol famili em ol i no kisim dispela gutpela amamas em famili stadi i save kamapim.
Pasin bilong papa i skulim mipela long laikim tumas Jehova. Taim mipela i kisim nupela Wastaua o Kirap! o wanpela buk samting bilong Sosaiti Wastaua, kwiktaim em i save kaunim olgeta. Pasin bilong em i lainim mipela olsem mipela i no ken ting, tok i tru bilong Baibel em samting nating tasol; mipela mas ting em i olsem wanpela gutpela samting i gat bikpela pe tru bilong en. Wanpela gutpela samting tru nau mipela i holim, em wanpela Baibel bilong papa, em Reference Bible. Long klostu olgeta pes i gat planti tok em i bin raitim, em ol save em i bin kisim taim em i stadi. Nau, taim mipela i kaunim ol dispela tok em i bin raitim long arere bilong ol pes, i olsem mipela inap harim em i skulim mipela.
Stap Strong i Go Inap Long Pinis
Long Me 16, 1991, papa i kisim hat-atek taim em i raun autim tok. Sampela wik bihain ol dokta i katim em na i olsem em bai orait. Tasol long nait bihain long taim ol i katim em, haus sik i ring long mipela. Ol i tok, blut bilong papa i wok long lus, na ol dokta i tingting planti. Long dispela nait yet ol i kisim em i go tupela taim long rum bilong katim man na ol i traim pasim blut, tasol ol i no inap. Blut i ran yet.
Long de antap sik bilong papa i go nogut, olsem na ol dokta i kisim mama pastaim na ol i toktok wantaim em, na bihain ol i toktok wantaim liklik brata bilong mi, na bai tupela i ken orait long ol dokta i givim blut long papa. Tasol longtaim papa i tok pinis olsem em i no ken tru kisim blut, maski wanem samting i kamap. Em i kamapim ol tok bilong Baibel i as na em i no laik kisim blut, tasol em i tok, em i orait long kisim ol narapela samting i no gat blut long en.—Wok Pris 17:13, 14; Aposel 15:28, 29.
Sampela insait long lain dokta na nes samting i kros long dispela, na mipela i pilim tru dispela pasin birua insait long wod ICU, em wod bilong ol man i sik nogut tru. Na tu, i olsem papa i laik bagarap, na dispela tupela hevi wantaim i mekim na bel bilong mipela i bagarap stret. Mipela i beten askim Jehova long helpim mipela, na mipela i bihainim ol gutpela tok mipela i bin lain long en. Olsem na taim mipela i go long dispela hap bilong haus sik bilong lukim papa, mipela i save bilas gut na mipela i daun long ol nes samting na mekim gutpela pasin long ol. Mipela i givim sampela askim long ol na bai mipela i ken save, sik bilong papa i olsem wanem, na mipela i tok tenkyu long olgeta dokta na nes i save lukautim papa.
Ol dispela lain bilong haus sik i lukim dispela pasin bilong mipela, olsem na sampela de bihain mipela lukim olsem kros bilong ol i dai, na ol i kirap mekim gut long mipela. Sampela nes i bin lukautim papa ol i kisim wok bilong lukautim ol narapela, tasol oltaim ol i go lukim em bilong save em i kamap gutpela liklik o nogat. Wanpela dokta, pastaim em i bin mekim hatpela tok tru long mipela, nau em i mekim pasin isi na em i askim mama, em i hatwok long karim dispela hevi bilong papa o olsem wanem. Kongrigesen na ol wanblut bilong mipela ol i mekim pasin sori na sambai long mipela. Ol i salim kaikai long mipela na planti kat i gat ol gutpela tok bilong strongim bel bilong mipela, na ol i beten bilong helpim mipela.
Tasol sori tru, maski ol dokta i mekim wanem, papa i no orait liklik. Em i dai tenpela de bihain long taim ol i bin katim em. Mipela i krai sori yet long papa. Sampela taim bel bilong mipela i bagarap stret. Tasol gutpela tru, God bilong yumi i tok promis pinis olsem em bai karim hevi bilong mipela long olgeta wan wan de, na mipela i lain pinis long putim olgeta hevi bilong mipela long han bilong em.—Song 68:19.
Mipela olgeta i tingting strong long mipela tu bai stap gut long mekim wok bilong Jehova na bai mipela inap kisim amamas long bungim gen papa long nupela taim bihain.—Mak 5:41, 42; Jon 5:28; Aposel 24:15.
[Piksa long pes 21]
Frank Smith wantaim mama bilong em, Phyllis, long Kep Taun
[Piksa long pes 22]
Papa na mama long taim tupela i marit
[Piksa long pes 23]
Bilong mekim namba wan baptais long Entebe, ol i rentim wanpela liklik raunwara bilong wanpela man Afrika, em bikman bilong ples
[Piksa long pes 23]
Pasin bilong ol man bilong dispela hap long tok gude
[Piksa long pes 24]
Papa na mama klostu long taim papa i dai