Gutpela Samting Mi Kisim Long Papamama Kristen
STORI BILONG BLOSSOM BRANDT
Ais i kam daun long taun San Antonio, long Teksas, long Janueri 17, 1923, em de mama i karim mi. Ausait em kol, tasol mi stap gutpela long han bilong gutpela papamama Kristen, em Judge na Helen Norris, em tupela i amamas long mi kamap. Taim mi liklik yet mi lukim papamama i givim bel tru long lotuim God Jehova.
LONG yia 1910, taim mama i gat 8-pela krismas, papamama bilong em i lusim taun Pitsbek, long Pensilvenia, na i go sindaun long wanpela fam klostu long taun Alvin, long Teksas. Ol i amamas long kisim save long ol tok i tru bilong Baibel long wanpela man i stap klostu. Inap long taim mama i dai, em i wok strong long helpim ol man long save long Kingdom. Bihain famili i go sindaun long taun Hustan, long Teksas, na long yia 1912 mama i baptais.
Charles T. Russell, em namba wan presiden bilong Sosaiti Was Taua, em i kam lukim kongrigesen long Hustan, na mama wantaim papamama bilong em i bungim Brata Russell long namba wan taim. Planti taim famili i save singautim ol brata i raun mekim wok bilong Sosaiti, em bipo ol i kolim pilgrim, na ol i kam kaikai wantaim ol. Sampela yia bihain mama i go wantaim papamama bilong em long taun Sikago, long Ilinoi na ol i sindaun long dispela hap, na Brata Russell i save kam lukim kongrigesen long hia tu.
Long 1918 tumbuna mama i kisim sik nogut i bin kirap long Spen na i go long olgeta hap, na bihain skin bilong em i no strong, olsem na dokta i tok, gutpela sapos em i go sindaun long ples hat. Tumbuna papa i wok long kampani bilong ol tren, na long yia 1919 ol i orait long em i wok gen long Teksas. Na hia, long kongrigesen San Antonio, mama i bungim wanpela yangpela brata i givim bel long mekim wok bilong Jehova, nem bilong em Judge Norris. Narapela i laikim narapela, na bihain tupela i marit, na Judge Norris em papa bilong mi.
Papa i Kisim Save Long Baibel
Tumbuna papa i givim dispela narapela kain nem “Judge” [Jas] long papa taim papa i kamap nupela, long wanem, tumbuna i tok: “Dispela bebi i pes drai olsem wanpela jas.” Long yia 1917, taim papa i gat 16 krismas, em i kisim tupela liklik nius bilong Sosaiti Was Taua (Where Are the Dead? na What Is the Soul?) i bekim askim bilong em long ol samting i painim man i dai pinis. Em i tingting planti long dispela, long wanem, papa bilong em i dai tupela yia bipo. Nau em i kirap i go long ol miting bilong ol Sumatin Bilong Baibel, em nem bilong ol Witnes Bilong Jehova long bipo.
Papa i laik kirap kwik long wok wantaim kongrigesen. Em i kisim hap teritori bilong autim tok, na taim skul i pinis em i save kalap long wilwil na i go tilim ol liklik nius long dispela hap. Em i givim bel olgeta long tokim ol man long Kingdom. Em i dediket long Jehova, na long Mas 24, 1918, em i baptais.
Long yia 1919, taim mama i kam long San Antonio, papa i lukim em na laikim em tru. Papa i tok, “pes bilong em i save lait tru na ai bilong em i blupela tru.” Kwiktaim tupela i tok, ol i laik marit, tasol papamama bilong mama i gat tupela tingting. Tasol long Epril 15, 1921, tupela i marit. Tupela i tingting long mekim wok bilong God long olgeta de, olsem wok painia.
Mi Liklik Yet na Mi Go Long Autim Tok
Papamama i tingting long i go long bikpela kibung long Sida Poin, long Ohaio, long yia 1922, na nau mama i save em i gat bel. Mama i karim mi taim papa i gat 22 krismas tasol. Bihain liklik papa i kamap wasman bilong wok autim tok. Em i lukautim olgeta wok bilong autim tok. Mi nupela bebi yet na mama i kisim mi i go autim tok. Tupela tumbuna tu i amamas long kisim mi i go wantaim ol.
Taim mi gat tupela krismas, papamama i go sindaun long taun Dalas, long Teksas, na 3-pela yia bihain tupela i kirap mekim wok painia. Long nait tupela i slip long liklik bet klostu long rot, na mi slip insait long ka, long sia long baksait. Mi amamas, tasol tupela i no redi gut long i stap painia. Olsem na papa i kirapim wanpela wok bisnis. Na bihain em i wokim wanpela liklik haus i gat wil bambai tupela inap kirap gen long mekim wok painia.
Taim mi no skul yet, mama i lainim mi long rit rait, na mi inap kolim ol namba i go inap 4 taims 12. Mama i wok strong long helpim mi long kisim save. Em i save sanapim mi long sia klostu long em bambai mi ken klinim ol plet taim em i wasim, na em i lainim mi long kolim sampela tok bilong Baibel, na mekim ol singsing bilong Kingdom.
Mekim Wok Bilong God Wantaim Papamama
Long yia 1931 mipela olgeta i go long gutpela kibung long Kolambas, long Ohaio, na mipela i kisim nem olsem ol Witnes Bilong Jehova. Mi gat 8-pela krismas na mi ting dispela nem i gutpela tru. Kibung i pinis na bihain liklik, bisnis bilong papa i paia na bagarap olgeta. Papamama i tok, “Em laik bilong Bikpela,” na tupela i kirap gen long mekim wok painia. Olsem na kirap long taim bilong san long yia 1932 i go inap planti yia, mipela i mekim wok painia.
Papamama i mekim wok painia long provins Teksas bambai ol inap i stap klostu long papamama bilong mama, em tupela i stap yet long San Antonio. Ol i kisim narapela narapela ples wok, na mi go long narapela narapela skul. Sampela brata i no tingting gut na ol i tok: “Yutupela i no laik sindaun gut long wanpela hap na bai pikinini i stap gutpela?” I olsem ol i ting papamama i no lukautim mi gut. Tasol mi stap amamas, na mi ting mi helpim papamama long mekim wok bilong God. Mi lain long pasin bihain mi yet mi bihainim.
Inap planti mun mi wok long tokim papamama, mi laik baptais, na tupela i save toktok wantaim mi bambai ol i ken save gut, mi save dispela em i bikpela samting o nogat. Long Disemba 31, 1934 mi mekim dispela bikpela samting. Tasol long apinun paslain, papa i askim mi: “Yu bin beten long Jehova?” Mi tok, mi bin mekim, na nau papa i mekim gutpela samting tru. Em i tok, mitripela i ken brukim skru, na em i beten. Em i tokim Jehova, em i amamas tru long liklik pikinini meri bilong em i laik givim em yet long Em. Inap long olgeta taim bihain, mi no inap lusim tingting long dispela apinun!
Tumbuna Papamama i Lainim Mi
Namel long yia 1928 na 1938, planti taim mi go lukim tumbuna papamama long San Antonio. Ol i save mekim pasin olsem bilong papamama. Tumbuna mama i bin mekim wok painia (colporteur), na bihain em i mekim haptaim. Tumbuna papa i bin kamap painia long Disemba 1929, olsem na long olgeta de em i save go autim tok.
Long nait, tumbuna papa i save holim mi na lainim mi long nem bilong ol sta. Na em i save kolim ol tok olsem song. Taim em i wok long ol tren, planti taim mi raun wantaim em. Taim mi gat hevi, mi save go long em; em i save mekim gut bel bilong mi na klinim aiwara bilong mi. Tasol taim mi mekim pasin kranki na mi kisim strafe na mi go long em, em i save mekim wanpela tok (long dispela taim mi no kisim gut, tasol mi pilim): “Bubu, man i mekim rong em i kisim pen.”
Taim Bilong Hevi
Long yia 1939, Namba 2 Pait Bilong Olgeta Hap i kirap, na ol man i mekim nogut tru long lain bilong Jehova. Sik bilong mama i go bikpela na ol dokta i mas katim em, olsem na long pinis bilong yia 1939, mipela i go bek long San Antonio.
Taim mipela i mekim wok magasin long rot long San Antonio, bikpela lain i save bung bilong ranim mipela. Tasol long olgeta wik mipela wan wan bilong famili i save sanap long narapela narapela kona. Planti taim mi lukim ol i pulim papa i go long polis-tesen.
Papa i wok yet long mekim wok painia, maski mama i mas lusim. Tasol em i wok mani haptaim tasol na mipela i sot, olsem na em tu i lusim. Mi pinis skul long yia 1939, na mi tu mi wok mani.
Long dispela taim nem bilong papa, Judge (Jas), i helpim mipela. Olsem: Sampela brata i go autim tok long wanpela taun klostu long San Antonio long hap bilong not. Namba wan polis i laik tromoi olgeta long kalabus. Em i holim pinis 35 na tumbuna papamama tu. Ol i salim tok i go long papa na em i draiv i go long dispela taun. Em i go insait long ofis bilong polis na em i tok: “Mi Judge [Jas] Norris bilong San Antonio.”
Namba wan polis i tok: “Yes Bikman, Jas, mi ken helpim yu olsem wanem?”
Papa i tok: “Mi kam bilong helpim dispela lain long lusim kalabus.” Olsem na polis i larim ol i go na ol i no baim kot!
Papa i save laik tumas long autim tok long ol ofis long taun, olsem ofis bilong ol jas na loya. Em i save go insait na tokim seketeri: “Mi Judge [Jas] Norris, na mi laik lukim Jas . . .”
Na taim em i bungim jas, kwiktaim em i save tok: “Bihain bai mi tokim yu i gat wanem as na mi kam lukim yu, tasol pastaim mi laik tokim yu mi stap Judge [Jas] longtaim, winim yu. Mi stap olsem kirap long taim mama i karim mi na i kam inap nau.” Na bai em i stori long em i bin kisim dispela nem olsem wanem. Em i mekim dispela gutpela pasin na em i kamap olsem pren bilong planti jas long dispela taim.
Tenkyu Long Papamama i Soim Gut Rot
Taim mi winim pinis 13 krismas, em taim bilong senis. Planti taim papamama i tingting planti long mi bai mekim wanem. Mi save traim tupela, olsem olgeta pikinini i save mekim—mi save tokim tupela mi laik mekim wanpela samting o go long wanpela hap, maski mi save ol bai tambuim mi. Na taim ol i tok, Nogat, sampela taim mi bel hevi na mi krai. Tasol sapos tupela i bin tok, “Goan. Mekim laik bilong yu. Mipela i no wari,” bel bilong mi bai bagarap stret.
Mi save mi no inap subim tupela long senisim lo bilong tupela, na dispela i mekim na mi stap bel isi. Na taim ol narapela yangpela i singautim mi i go painim amamas i no gutpela, i no hatwok long mi sakim ol. Mi save tokim ol, “Papa i no ken larim mi i mekim.” Taim mi gat 16 krismas, papa i helpim mi long lain long draiv na kisim laisens. Na long dispela taim em i givim ki bilong haus long mi. Mi save em i bilip long mi na mi amamas. Mi pilim olsem mi bikpela pinis na mi gat wok; mi no laik mekim wanpela samting na bai tupela i no bilip moa long mi.
Long dispela taim bipo mipela i no kisim planti tok long marit, tasol papa i save, Baibel i tok yumi mas “maritim man i bilip long Bikpela.” (1 Korin 7:39) Em i tokim mi, sapos mi kisim wanpela man ausait i kam lukim tupela o mi tingting long maritim man ausait, bel bilong em bai pas tru. Mi save dispela tok bilong Baibel i stret, long wanem, tupela yet i bihainim na marit bilong tupela i wok gut na tupela i pas gut wantaim na i stap amamas.
Long 1941, taim mi gat 18 krismas, mi ting mi laikim wanpela yangpela man long kongrigesen. Em i mekim wok painia na em i skul bilong kamap loya. Bel bilong mi i amamas. Taim mitupela i tokim papamama mipela i laik marit, tupela i no kros o i laik pasim mi, tasol tupela i tok: “Blossom, mitupela i laik askim yu long mekim wanpela samting. Mitupela i pilim olsem yu yangpela tumas, olsem na mipela i laik bai yu wet wanpela yia pastaim. Sapos yu givim bel tru long em, bai yu no senisim tingting insait long wanpela yia.”
Mi amamas tru mi bihainim gutpela tok ol i givim long mi. Insait long dispela yia, mi kamap strong na mi lukim olsem dispela yangpela man i no gat ol gutpela pasin, na sapos mitupela i marit bai mitupela i no inap i stap amamas. Bihain em i lusim oganaisesen bilong Jehova, na mi abrusim bikpela hevi. Mi amamas tru mi gat gutpela papamama i soim gut rot long mi!
Marit na Wok Sekit
Long taim bilong kol long yia 1946, taim mi mekim wok painia inap 6-pela yia pinis na mi mekim wok mani haptaim, nambawan gutpela yangpela man i kam insait long Haus Kingdom bilong mipela. Nem bilong em Gene Brandt. Sosaiti i bin makim em bilong raun wantaim wasman sekit. Mi laikim em na em i laikim mi, na mitupela i marit long Ogas 5, 1947.
I no longtaim na papa wantaim Gene i opim wanpela ofis bilong lukautim akaun bilong ol kampani. Tasol papa i tokim Gene: “Taim dispela ofis i mekim na yumi lusim wanpela miting o wanpela wok bilong God, bai mi lokim dua na tromoi ki.” Jehova i blesim dispela gutpela tingting na dispela wok mani i lukautim mipela long ol samting bilong skin na helpim mipela long mekim wok painia. Tupela inap kamap maniman, tasol ol i no gat tingting olsem.
Long 1954 Sosaiti i singautim Gene long mekim wok sekit; em bikpela senis long sindaun bilong mipela. Bai papamama i ting olsem wanem? Tupela i no tingim ol yet; tupela i tingting long helpim wok bilong Kingdom na helpim pikinini bilong ol long i stap strong long spirit. Tupela i no tok: “Yupela i no laik kamapim pikinini bambai mipela i gat tumbuna?” Nogat. Tupela i save tok: “Olsem wanem mipela i ken helpim yupela long mekim wok painia?”
Olsem na taim mitupela i laik lusim ol, ol i mekim ol gutpela tok tasol bilong strongim mipela na amamas long blesing mipela i kisim. Tupela i no mekim liklik olsem mipela i givim baksait long ol; ol i redi tasol long helpim mipela. Bihain tupela i mekim wok painia inap 10-pela yia moa. Papa i kamap wasman bilong lukautim sampela wok bilong Sosaiti long taun San Antonio, na em i holim dispela wok inap 30 yia. Em i amamas long lukim ol kongrigesen i kamap planti long San Antonio—long 1920 samting i gat wanpela kongrigesen, tasol paslain long em i dai long 1991 em i lukim i gat 71 kongrigesen.
Planti gutpela samting i painim mitupela Gene. Mipela i amamas long helpim ol brata sista long 31 provins, na gutpela samting tru em olsem: Mipela i go long namba 29 klas bilong Skul Gileat long 1957. Bihain mipela i raun mekim wok sekit na wok distrik inap 30 yia, na long 1984 Sosaiti i mekim gut long mipela na givim wok sekit long Gene long hap bilong San Antonio bambai mipela inap lukautim lapun papamama, em tupela i winim pinis 80 krismas na tupela i gat sik.
Lukautim Papamama
Inap wanpela yia na hap bihain long taim mipela i kam bek, mama i olsem hap i dai, na i no longtaim na em i dai olgeta. Dispela i kamap kwiktaim tumas na mi no bin mekim ol gutpela tok long em olsem mi laik mekim. Dispela i lainim mi na planti taim mi toktok wantaim papa. Tupela i marit inap 65 yia, olsem na papa i save bel hevi, tasol mitupela i stap bilong sori long em na strongim em.
Inap long taim papa i dai em i stap olsem gutpela piksa long i go oltaim long ol miting, na stadi, na autim tok. Em i laik tumas long kaunim ol buk. Taim mipela i go autim tok, em i stap wanpela long haus, na taim mi kam bek mi save tok: “Tarangu, yu stap wanpis.” Tasol em i bin kaunim ol buk na stadi na em i no tingim.
I gat narapela pasin mipela bihainim oltaim. Papa i strong long famili i mas kaikai wantaim, olsem long moningtaim, bambai mipela inap mekim teks, olsem kaunim wanpela hap bilong Baibel na stori long en. Taim mi pikinini yet, mi no ken lusim haus kwik; mi mas mekim teks pastaim. Sampela taim mi tok: “Tasol papa, taim pinis; bai mi kamap bihaintaim long skul (o ples wok).”
Papa i save tok: “I no teks i mekim na yu bai kamap bihaintaim; yu no kirap kwik long moningtaim.” Na mi mas i stap na harim teks pastaim. Em i bihainim dispela gutpela pasin i go inap long taim em i dai. Em narapela gutpela pasin mi kisim long em.
Tingting bilong papa i wok gut i go inap long taim em i dai. I no hatwok long lukautim em, long wanem, em i no save bel nogut na toktok planti. Sampela taim em i tok, skru bilong em i pen, tasol mi save tokim em, “Em pen yu kisim long Adam,” na em i lap. Long moningtaim, long Novemba 30, 1991, mitupela Gene i sindaun klostu long bet bilong em, na em i pasim ai na i dai.
Nau mi winim pinis 70 krismas, tasol gutpela pasin bilong papamama i wok yet long helpim mi. Mi pilim tru ol gutpela samting mi bin kisim long papamama Kristen bilong mi, na mi save beten askim Jehova long helpim mi bambai mi ken mekim gutpela wok long dispela i go inap long olgeta taim bihain.—Song 71:17, 18.
[Piksa long pes 5]
Mitupela mama
[Ol Piksa long pes 7]
1. Namba wan kibung mi go long en: San Makos, long Teksas, Septemba 1923
2. Laspela kibung bilong papa: Fot Wot, long Teksas, Jun 1991 (Papa i sindaun)
[Piksa long pes 9]
Gene na Blossom Brandt