Ol Yangpela i Laik Save . . .

Olsem Wanem Sapos Papa i Mekim Pasin i No Stret?

‘Inap 10-pela yia papa bilong mi em i wanpela Kristen. Nau em i stap nating. Em i no save stadi long Baibel, em i no save go olgeta taim long ol miting. Planti taim em i sutim tok long ol brata Kristen insait long kongrigesen. Em i gat tingting bilong ol man bilong dispela graun long ol man bilong narapela kain skin na long planti samting moa. Taim mi tingim papa, mi ting em i gat planti pasin i no stret.’—Em tok bilong wanpela yangpela meri.

I NO gat wanpela papa o mama i gutpela olgeta. Baibel i tok: “Yumi olgeta man yumi bin mekim sin.” (Rom 3:23) Tasol em i narapela kain samting sapos long ai bilong ol man papa o mama i mekim pasin Kristen, tasol long haus ol i mekim pasin i no stret. Wanpela yangpela meri i tok: ‘Taim ol narapela i stap papa i mekim gutpela pasin, tasol long haus, em i narapela kain man​—⁠em i gat hatpela pasin! Maski mi mekim wanem, em i sutim tok long mi, na famili olgeta i no amamas long pasin bilong em. Nau mi pilim olsem mi no inap painim liklik amamas. Mi nolaik tru long em.’

Sapos long pasin hait papa o mama i mekim nogut long yangpela, ating kros na bel nogut bilong em i winim kros na bel nogut bilong ol narapela yangpela. Wanpela meri, nem bilong em Mary, em i raitim pas na stori long pasin bilong papa bilong em. Long pasin hait em i bin dring oltaim, na Mary i bin karim planti hevi. Papa bilong em i save ‘kros pait, tok nogut, na mekim ol narapela samting nogut.’ Mary i tingting bek na bel hevi na i tok: ‘Ol man i bin kam long mipela ol pikinini na tokim mipela olsem mipela i gat gutpela papa na ating mipela i amamas mipela i gat kain papa olsem.’

Baibel i tambuim olgeta pasin giaman. (Jems 3:17) Tasol Baibel i tok, insait long lain bilong God tu, sampela bai haitim pasin tru bilong ol. (Song 26:4; skelim wantaim Jut 4.) Tasol maski yu save long dispela tok bilong Baibel, ating yu bel hevi sapos papa o mama​—⁠em wanpela yu mas laikim tru na daun long em​—⁠em i mekim pasin giaman. Taim dispela hevi i stap long famili, sampela yangpela i kirap nogut long ol samting ol i pilim long papa o mama. Wanpela yangpela meri i tok: ‘Mi mas i gat wanpela i helpim mi. Baibel i tok mi mas daun long papa bilong mi, tasol mi no inap mekim olsem.’

Olsem Wanem Yu Ken Daun Long Papamama?

Tru Baibel i tok pikinini i mas daun long papamama, olsem na maski pasin bilong papamama i no stret, i no olsem pikinini i no ken daun moa long ol, nogat. (Efesus 6:​1, 2) Tasol i no olsem pikinini i daun long papa i mas laikim pasin nogut papa i mekim o em i mas amamas long pasin papa i mekim long em, nogat.a Long Baibel dispela tok “daun” i makim olsem yumi daun long ol man i gat wok long bosim yumi.

I olsem tok aposel Pita i bin raitim long ol Kristen, em i tok: “Yupela i mas givim biknem long king.” (1 Pita 2:17) Pita i save planti king i no gat gutpela pasin, olsem King Herot Agripa Namba Wan. Em i man bilong tromoi nating mani na em i no tingim gut wanpela samting. Rom i makim em bilong kamap king long Palestain na bihain em i kirap na birua long ol Kristen. Em i “kilim i dai Jems, em brata bilong Jon, long bainat. Herot i lukim ol Juda i laikim dispela samting em i mekim, olsem na em i kalabusim Pita tu.” (Aposel 12:​1-3) Tasol Pita i no kirapim ol Kristen long bekim dispela pasin nogut bilong Herot. Nogat. Em i tokim ol long daun long ol king. Na tok bilong em i gat gutpela as, long wanem, Jehova i laik yumi daun long ol king na gavman samting. Na long taim bilong Pita sampela king i bosim olgeta samting. Solomon i tok: “King bai i bihainim laik bilong em yet. Sapos king i tok, orait olgeta man i mas bihainim tok bilong em. Na i no gat wanpela man inap askim em, ‘Watpo yu mekim olsem?’ ”​—⁠Saveman 8:​3, 4.

Wankain long papa bilong yu. Maski sampela pasin bilong em i no stret, em i gat wok long bosim yu na long skelim wanem samting i gutpela bilong helpim yu. Olsem na i no stret sapos yu bikhet long papa o mekim ol samting long em i makim olsem yu no laikim em. Dispela kain pasin i no inap kamapim wanpela gutpela samting. Na tu, God i no ken orait long yu sapos yu mekim olsem. (Skelim wantaim Sindaun 30:17; Saveman 10:⁠4.) Tasol i gutpela sapos yu traim long bihainim tok bilong papa na ating dispela bai helpim yu long i stap bel isi wantaim em.​—⁠Kolosi 3:20.

Sapos Yu Bel Nogut Long Papa Yu Mas Mekim Wanem?

Tasol olsem wanem yu ken daun long papa sapos yu pilim olsem em i mekim nogut long yu na bagarapim bel bilong yu? Ating bai yu hatwok. Tasol sapos olgeta taim yu tingim dispela samting nogut papa i mekim long yu, dispela i mekim na bel nogut bilong yu bai go bikpela moa. Ating i gutpela sapos yu no tingim ol pasin kranki bilong em​—⁠yu mas tingim ol gutpela pasin bilong em.

Tingim tok bilong Sindaun 19:11: “Man i gat gutpela tingting, em i no inap kros kwik.” Ating pasin bilong yu bai senis sapos yu pilim tru tingting bilong papa. Tru, pasin bilong em i pasin nogut tru? O papa i no strong long spirit, o em i bel hevi na i mas i gat wanpela bilong helpim em? Olsem wanem? Yu ting ol samting papa i mekim, em i mekim long wanem em i sik, bel hevi, wanpis, o em i gat hevi long ples wok? Sapos olsem, na yu pilim tru hevi bilong em, dispela bai helpim yu long sori long em na ating yu no ken kros tumas.

Tasol maski wanem wanem samting i as bilong hevi, i gutpela sapos yu kamapim bel bilong yu long narapela. (Sindaun 12:25) Wanpela yangpela meri i tok: ‘Bipo papa bilong mi i save dring. Mi no inap kamapim bel bilong mi long papamama, olsem na mi pasim bel na mi no toktok wantaim wanpela man.’ Tasol i no olsem yu wanpela i mas karim hevi. Ol strongpela Kristen insait long kongrigesen i no inap kisim wok bilong papamama, tasol ol inap mekim sampela samting long yu em papamama i no save mekim. (Skelim wantaim Mak 10:30.) Sindaun 17:17 i tok: “Ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.”

‘Mi Inap Senisim Pasin Bilong Em’

Bel bilong sampela yangpela i bagarap, long wanem, ol i gat tingting kranki long wok bilong ol. Mary i stori long em yet na ol brata susa bilong em olsem: ‘Olgeta taim mipela i pret pret, nogut wanpela i kisim save olsem papa i gat hevi long dring.’ Na sampela i wok long senisim pasin bilong papa, tasol wok bilong ol i lus, long wanem, ol i no inap.

Ating yu laikim tru papa bilong yu na yu sori long em, tasol pasin kranki bilong em i no asua bilong yu. Long ai bilong God em i mas ‘karim hevi bilong pasin em yet i mekim.’ (Skelim wantaim Galesia 6:5; Jems 5:14.) I no wok bilong yu long bosim o skelim pasin bilong papa bilong yu. Sapos olgeta taim yu toktok planti long pasin bilong em na krosim em, dispela i no inap helpim em, bai em i kros tasol.

Tasol i no olsem i no gat wanpela samting yu inap mekim. Yu inap “beten oltaim” olsem papa bai senisim tingting bilong em. (1 Tesalonaika 5:17) Sapos planti taim yu tokim papa yu laikim em, na sapos i stret na yu inap mekim, tok amamas long gutpela wok em i mekim, ating dispela i mekim na em i sem na em i no birua moa long yu. Sapos dispela samting i no helpim sindaun bilong yu, ating yu mas wok strong long karim dispela hevi.b

Tasol sapos yu na papa i Kristen na papa i mekim pasin nogut, olsem dring oltaim o olgeta taim em i kros nogut tru, i stret yu toktok wantaim ol elda insait long kongrigesen. (Jems 5:14) Sapos yu mekim olsem i no olsem yu no bilip moa long papa, nogat; em pasin sori, long wanem, em rot bilong helpim papa long kisim helpim em i mas kisim. Tru, taim pikinini i kotim papa, sampela papa i kros nogut tru na tok ol i no save mekim wanpela rong, na bihain long pasin hait ol i bin bekim nogut long pikinini bilong ol. Tasol sapos yangpela “i mekim stretpela pasin, na [em] i karim pen” long dispela, em i ken save Jehova i amamas long pasin bilong em, olsem em i no pret long kamapim rong. Em i ken wetim Jehova i stretim ol samting na kamapim tok tru.​—⁠1 Pita 3:14; 1 Timoti 5:​24, 25.

Wok Strong na God i Ken Kisim Bek Yu

Solomon i tok: “Taim ol i mekim nogut long wanpela man na daunim em, maski em i gat gutpela tingting, em bai kirap mekim pasin kranki.” (Saveman 7:​7, NW) Sori tru, sampela yangpela i bel nogut long pasin bilong papa, olsem na ol yet i kirap na mekim pasin i no stret. Na sampela i bel nogut long God na lusim lain Kristen! (Sindaun 19:⁠3) Baibel i tok: “Olsem na lukaut. Nogut yu larim belhat bilong yu i pulim yu long mekim tok bilas long God. Olsem na yu mas lukaut gut. Nogut yu pas olgeta long pasin nogut.”​—⁠Jop 36:​18-21.

Nogut yu tingting planti long papa i stap olsem wanem long ai bilong God, yu mas tingim pasin bilong yu yet na ‘God i ken kisim bek yu, na yu mas pret na guria na wok strong.’ (Filipai 2:12) Bipo tru yangpela Hesekia, pikinini bilong king, em i bin mekim olsem. Papa bilong em, em King Ahas, em i tok em i save lotuim Jehova. (Aisaia 7:​10-12) Tasol em i giaman, em i man bilong lotuim ol god giaman, na wanpela taim em i kilim wanpela pikinini man bilong em na i kukim em olsem ofa! (2 King 16:​1-4) Tingim Hesekia na hevi em i bin karim long pasin bilong papa long mekim lotu giaman! Sampela man i ting dispela yangpela man, em pikinini bilong king, em i bin raitim Song 119:28. Em i tok: “Bel bilong mi em i hevi tru. Yu strongim mi olsem yu bin promis.”

Na Jehova i bin mekim olsem! Hesekia i givim bel long beten na long stadi long Tok Bilong God, olsem na em yet i kamap strong long spirit maski ol man klostu i lotuim ol god giaman. (Song 119:97) Na Hesekia i bin was gut, nogut em i bung wantaim ol man nogut. (Song 119:63) Wanem samting i painim Hesekia? Maski papa bilong em i man nogut na em i bihainim pasin giaman, Hesekia ‘i pas tru long Jehova.’ (2 King 18:⁠6) Yu tu inap mekim olsem! Sapos papa bilong yu i mekim pasin giaman i no olsem yu tu i mas mekim olsem. Pas yet long Jehova, na ating bihain gutpela pasin bilong yu long stap strong long bilip inap mekim na papa i senisim pasin bilong em.

[Ol Futnot]

[Ol Piksa long pes 15]

Sapos papa i mekim pasin i no stret, i no olsem yu tu i mas mekim pasin i no stret