Taim Wanpela Long Famili i Dai
Long 7 klok apinun, long Tunde, Julai 17, 2007, long ples balus namel long São Paulo, Brasil, wanpela balus i ron i go em i wel na lusim rot bilong en, na i spit i go na brukim wanpela bikpela rot na bamim wanpela haus bilong putim kago. Inap 200 manmeri i dai long dispela eksiden.
KAIN bikpela eksiden olsem i no bin kamap bipo long Brasil, na ol lain em wanpela long famili bilong ol i bin dai long dispela eksiden, ol i no inap tru long lusim tingting long en. Claudete em wanpela bilong ol. Em i lukim TV i stap taim em i harim toksave bilong dispela eksiden. Pikinini man bilong em, Renato, i bin stap long dispela balus. Em i gat 26 krismas tasol. Em bai marit long Oktoba. Claudete i traim ringim em long mobail, tasol fon i ring nating. Claudete i pundaun long plua na krai nogut tru.
Man em Antje i laik maritim, em i dai long ka eksiden long Janueri 1986. Taim Antje i kisim toksave bilong dispela samting, tingting bilong em i pas na em i no inap tingting stret. Em i tok: “Pastaim mi no bilipim dispela tok. Mi ting olsem mi driman tasol na bai mi kirap na save olsem dispela samting i no bin kamap. Skin bilong mi i guria na mi pilim strongpela pen, olsem wanpela i bin paitim mi long bel.” Inap 3-pela yia, Antje i bel hevi i stap. Maski dispela eksiden i bin kamap 20 yia i go pinis, skin bilong Antje i save guria yet taim em i tingim bek dispela samting.
Taim samting i kamap wantu tasol na wanpela long famili i dai, i hatwok long stori long samting man i pilim long bel. Ating em i kirap nogut tru, em i no bilip wanblut bilong em i dai, em i no pilim wanpela samting, o bel bilong em i bagarap stret. Tasol maski yu save pinis olsem wanpela yu laikim tumas em i gat bikpela sik na em bai dai, taim em i dai, bai yu bel hevi yet. I no gat wanpela i redi taim wanpela em i laikim tumas em i dai. Mama bilong Nanci i bin sik longpela taim na long 2002 em i dai. Long dispela de em i dai, Nanci i sindaun long plua bilong haus sik na em i no inap mekim wanpela samting. I olsem i stap bilong em i no gat as moa bilong en. Faipela yia i go pinis, tasol em i krai yet taim em i tingim mama bilong em.
Dokta Holly G. Prigerson i tok: “Maski famili bilong man i dai pinis ol i lain na save olsem em i no inap stap moa wantaim ol, ol i no save lusim tingting olgeta long em. Sapos wanpela long famili bilong yu yet i bin i dai, maski dispela samting i bin kamap wantu tasol o nogat, ating yu laik save: ‘I stret mi krai sori? Olsem wanem mi inap karim dispela hevi? Bihain bai mi lukim em gen?’ Stori i kamap bihain long dispela bai stori long ol dispela askim na sampela askim moa.
[Piksa Kredit Lain long pes 3]
EVERTON DE FREITAS/AFP/Getty Images