Wok Bilong Sanapim Haus Kingdom i Wok Long Kamap Gutpela Moa
1 Long 1983 long ol “Stap Wanbel Long Kingdom” Kibung Distrik long Amerika, ol i tokaut olsem ol bai kamapim wanpela akaun bilong helpim wok bilong sanapim na stretim ol Haus Kingdom long Amerika na Kanada. Long dispela taim bipo yumi no save wanem ol blesing bai kamap long dispela wok. Tok bilong Song 92:4 i wok long kamap tru long yumi, em i tok: “Mi tingting long strongpela wok bilong yu, na mi belgut tru na mi singim song bilong amamas.”
2 Yumi long nau i save amamas tru long ol samting i wok long kamap. Long nau wok bilong sanapim ol Haus Kingdom long olgeta hap i wok long go bikpela hariap. Yumi olgeta inap insait long dispela wok. Yumi save mekim olsem long rot bilong givim liklik o bikpela mani, olsem kontribiusen, bilong baim ol samting bilong wokim sampela Haus Kingdom moa long olgeta hap. Na tu, planti ol i larim ol brata i mekim wok long ol masin samting bilong ol, na ol i givim taim na strong na save bilong ol bilong helpim dispela wok. Dispela wok i save kamap gutpela, long wanem, Jehova i save stiaim na sapotim dispela wok, na em i blesim ol wok yumi wanbel long mekim.—Sng. 127:1.
3 Planti brens-ofis i bin bihainim pasin ol brata i bin kamapim pastaim bilong helpim ol kongrigesen long Amerika. Long planti kantri i gat wanpela bokis long Haus Kingdom we ol pablisa i ken putim ol kontribiusen bilong helpim wok bilong sanapim ol Haus Kingdom. Long Amerika, Wok Kingdom bilong Mas 1997 i tokaut long wanpela senis bilong dispela pasin. Em i tok: “Kirap long 1983, taim Sosaiti i kamapim dispela akaun bilong sanapim ol Haus Kingdom, ol brata i bin givim planti mani na dispela i bin helpim planti kongrigesen long kisim dinau bilong wokim ol Haus Kingdom. Inap 2,700 kongrigesen long dispela kantri i bin kisim helpim long dispela rot. Sapos i no gat dispela helpim, bai planti kongrigesen i no inap wokim ol nupela Haus Kingdom o stretim ol Haus Kingdom i bagarap liklik. Orait nau i gat wok long yusim sampela bilong ol dispela mani na givim olsem dinau long ol kongrigesen long ol kantri i gat hevi long mani. Sosaiti, na ol kongrigesen i kisim helpim long ol kontribiusen bilong yupela, ol i save pilim tru dispela gutpela pasin em yupela i wok long mekim yet.”
4 Dispela toksave i bin opim rot bilong ol brata i ken insait long wanpela wok bilong sanapim planti Haus Kingdom hariap. Nau ol kontribiusen bai helpim ol brata long ol narapela kantri tu, tasol ol bai givim yet ol dinau bilong sanapim ol Haus Kingdom long Amerika. Wok Kingdom (USA edisen) bilong Ogas 1997 i tok: “Wok bilong sanapim planti Haus Kingdom long olgeta hap i stap yet. Long sevis yia i go pinis, ol i kamapim 3,288 nupela kongrigesen. Planti bilong ol dispela kongrigesen i stap long Afrika, Esia, Isten Yurop, na Sentral na Saut Amerika.”
5 Kirap long sevis yia i go pinis, wanem samting i bin kamap long dispela wok? 2001 Yearbook i tok: “Long 30 kantri ol i wokim pinis 453 Haus Kingdom, na ol i wokim yet 727 moa. Ol i laik wokim piksa bilong Haus Kingdom i stret long ol wan wan kantri yet, na mekim wok long ol samting bilong wokim haus i stap long dispela kantri na bihainim pasin bilong kantri long sanapim haus. Long Kenya ol i save mekim wok long ston ol man i bin katim long maunten; long Togo ol i save mekim wok long brik; long Kamarun ol i save mekim wok long blok simen ol i bin karamapim simen long en. Long dispela rot, ol brata inap kisim kwik save long pasin bilong wokim ol Haus Kingdom long kantri bilong ol yet.”
6 Blesing bilong Jehova long dispela wok em i kamap ples klia long Afrika. Taim yu lukim ol piksa bilong sampela Haus Kingdom ol i bin wokim, tingim olsem wanem dispela wok konstraksen i bin helpim gut wok bilong ol Witnes Bilong Jehova. I gat 3-pela bikpela samting em dispela wok konstraksen i bin helpim: Em i bin strongim pasin wanbel bilong bikpela lain brata bilong yumi i stap long olgeta hap; em i bin litimapim nem bilong Jehova long ples ol i wokim Haus Kingdom; na planti manmeri moa ol i save kam long ol miting. Dispela pepa yu kisim wantaim Wok Kingdom em i stori long ol Haus Kingdom ol i bin wokim long Afrika, tasol ol Wok Kingdom i kamap bihain long dispela bai stori long olsem wanem wok bilong sanapim ol Haus Kingdom i wok long kamap gutpela moa long ol narapela hap.
[Ol Piksa long pes 3]
SENTRAL AFRIKAN REPAPLIK
Bimbo, Bangui
Begoua, Bangui
[Ol Piksa long pes 4]
Ukonga, Tansania
[Piksa long pes 4]
Accra, Gana
[Piksa long pes 4]
Salala, Laibiria
[Piksa long pes 4]
Karoi, Simbabwe
[Ol Piksa long pes 4, 5]
Allada, Benin—olpela Haus Kingdom
Allada, Benin—nupela Haus Kingdom
[Piksa long pes 5]
Kpeme, Togo
[Piksa long pes 5]
Sokodé, Togo
[Ol Piksa long pes 4, 5]
Fidjrosse, Benin
[Piksa long pes 6]
Lyenga, Sambia—olpela Haus Kingdom
[Piksa long pes 6]
Lyenga, Sambia—nupela Haus Kingdom
[Piksa long pes 6]
Kinshasa, Kongo
[Piksa long pes 6]
Musambira, Ruanda