“Kam Long Mi na Bai Mi Givim Malolo Long Yupela”

Lain i Kamap Bikpela Tru Ol i Mas Wokim Hariap Ol Haus Kingdom

JISAS i tok olsem: “Yupela . . . kam long mi na bai mi givim malolo long yupela.” (Matyu 11:28) Tru tumas, em wanpela gutpela singaut i kam long Het bilong kongrigesen Kristen! (Efesus 5:23) Taim yumi skelim gut dispela tok yumi no kirap nogut long dispela gutpela rot bilong kisim nupela strong​—em long taim yumi bung wantaim ol brata sista long ol miting Kristen. Olsem na yumi wanbel long tok bilong man bilong raitim song, em i tok: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas”!​—Song 133:1.

Tru tumas, taim yumi go long ol dispela bung bilong lotu yumi bung wantaim ol gutpela poroman, na long dispela bung i gat gutpela pasin bilong spirit i stap na dispela i mekim na yumi stap gut na amamas wantaim. Olsem na i gat gutpela as na wanpela yangpela meri Kristen i tok: “Mi save go long skul long de olgeta, na dispela i save pinisim strong bilong mi. Tasol ol miting i olsem wanpela hulwara long ples wesan nating, em mi inap kisim nupela strong long en bilong helpim mi long winim ol hevi bilong skul long de bihain.” Wanpela yangpela Kristen bilong Naijiria i tok: “Mi kisim save olsem taim mi bung wantaim ol narapela ol i laikim tru Jehova, dispela i save helpim mi long stap klostu long em.”

Ol Haus Kingdom bilong ol Witnes Bilong Jehova i stap olsem gutpela ples tru bilong mekim lotu i tru namel long komiuniti. Long planti hap, ol miting i save kamap long Haus Kingdom inap olsem tupela taim long olgeta wik, na ol i laik kirapim ol man i stadi wantaim ol Witnes long kam long ol dispela miting na bai ol i kisim nupela strong long bung wantaim ol gutpela poroman.​​—Hibru 10:​24, 25.

I Mas i Gat Sampela Haus Kingdom Moa

Tasol i no olgeta Witnes Bilong Jehova i gat gutpela Haus Kingdom. Long olgeta hap bilong graun namba bilong ol Witnes Bilong Jehova i wok long i go antap, na dispela i mekim na ol i sot tru long ol Haus Kingdom. Olsem na i mas i gat planti tausen Haus Kingdom moa, na moa yet long ol kantri i stap rabis.​​—Aisaia 54:2; 60:22.

Olsem: Long biktaun bilong Ripablik Demokratik Bilong Kongo i gat 10-pela Haus Kingdom tasol bilong 290 kongrigesen. Dispela kantri i mas i gat planti Haus Kingdom moa. Long Angola klostu olgeta kongrigesen i save bung ausait bilong mekim miting, long wanem, ol i sot tru long Haus Kingdom. I gat wankain hevi long planti ol narapela kantri tu.

Olsem na kirap long 1999, ol i stretim rot bilong helpim wok bilong sanapim ol nupela Haus Kingdom long ol hap em kantri i sot long ol samting. Bilong helpim dispela wok, ol Witnes i gat save long wok ol i volantia long mekim wok. Taim ol i givim bel long mekim wok na ol i mekim wantaim ol volantia bilong dispela ples yet, dispela i save strongim olgeta wantaim. Na tu, ol Witnes bilong ples i kisim skul long ol volantia i gat save long mekim dispela wok, na dispela i helpim gut ol. Olgeta dispela samting i helpim wok bilong sanapim ol Haus Kingdom long ol kantri bilong ol.

Olsem na ol i kisim helpim long wokim ol Haus Kingdom i stret long ol dispela hap na mekim wok long ol samting bilong dispela hap yet long wokim haus. Tru, em i bikpela samting long wokim ol Haus Kingdom, tasol ol i mas wokim ol kain Haus Kingdom em isi long ol Witnes bilong dispela hap i ken stretim na lukautim.​​—2 Korin 8:​14, 15.

Planti Gutpela Samting i Kamap

Wanem samting i kamap taim i gat ples bilong mekim lotu? Long kirap bilong yia 2001, wanpela ripot i kam long Malawi i tok olsem: “Bikpela wok tru i kamap insait long dispela kantri. Insait long tupela mun bihain, bai mipela pinisim sampela Haus Kingdom moa.” (Piksa 1 na 2) Long Togo long sampela mun i go pinis ol volantia i wokim sampela Haus Kingdom i no gat planti bilas long en tasol ol i gutpela. (Piksa 3) Gutpela wok ol volantia i givim bel long mekim i helpim wok bilong sanapim ol gutpela Haus Kingdom long Meksiko, Brasil na ol narapela hap bilong graun.

Ol kongrigesen i kisim save olsem: Taim ol i wokim wanpela nupela Haus Kingdom long ol kantri i stap rabis, ol asples i luksave olsem ol Witnes Bilong Jehova bai i stap olgeta long dispela hap. Bipo i olsem planti i no laik bung wantaim ol Witnes, tasol taim ol Witnes i wokim pinis wanpela gutpela haus bilong mekim lotu, dispela i kirapim ol man long bung wantaim ol. Wanpela ripot i kam long Kongrigesen Nafisi long Malawi i tok: “Nau mipela i gat gutpela Haus Kingdom na dispela i opim rot na mipela inap autim gut tok long ol man. Olsem na nau em i isi long kirapim ol Baibel-stadi.”

Long Benin, Kongrigesen Krake i bin karim hevi long tok bilas bilong ol man long dispela hap, long wanem, Haus Kingdom bilong ol i no gutpela olsem haus lotu bilong ol narapela lotu. (Piksa 4) Long nau dispela kongrigesen i gat nupela Haus Kingdom i kamapim long ples klia lotu i tru, maski i no gat planti bilas long en. (Piksa 5) I gat 34 manmeri i save autim tok bilong Kingdom long dispela kongrigesen, na inap olsem 73 manmeri i save kam long ol miting long Sande, tasol long taim bilong dediketim Haus Kingdom inap 651 i kam bung. Planti ol i bilong dispela hap yet, em ol i bin kirap nogut long lukim olsem ol Witnes inap wokim wanpela haus insait long sotpela taim tasol. Brens-ofis long Simbabwe i tingim ol samting i bin kamap taim ol i sanapim ol Haus Kingdom long hap bilong ol na ol i tok: “Bihain long mipela i pinisim Haus Kingdom, namba bilong ol man i kam long ol miting i save dabol insait long wanpela mun.”​—Piksa 6 na 7.

Tru tumas, ol nupela Haus Kingdom i stap olsem ples bilong kisim nupela strong long ol samting bilong spirit taim ol Kristen i dediket pinis na ol nupela man i bung wantaim. Taim wanpela kongrigesen long Yukren i kirap mekim wok long nupela Haus Kingdom bilong ol, wanpela Witnes bilong dispela kongrigesen i tok: “Bel bilong mipela i amamas tru. Long ai bilong mipela yet mipela i lukim strong bilong Jehova long helpim lain bilong em.”

[Blok/Ol Piksa long pes 10, 11]

Tenkyu Long Ol Kontribiusen

Ol Witnes Bilong Jehova i amamas long lukim wok bilong wokim ol Haus Kingdom i go bikpela hariap long olgeta hap. Namba bilong ol man i lotuim Jehova i wok yet long i go antap long planti kantri, olsem na i mas i gat ol nupela Haus Kingdom. Bilong wanem i olsem? Long wanem, long sevis yia bilong 2001, inap olsem 32 nupela kongrigesen i save kamap long olgeta wik! Ol dispela kongrigesen i mas i gat ol ples bilong bung na mekim lotu.

Dispela inap kamapim kain askim olsem, ‘Olsem wanem yumi inap painim mani bilong wokim ol nupela Haus Kingdom, na moa yet long ol kantri em ol brata i sot long ol samting bilong skin?’ Bilong mekim olsem, yumi kisim helpim i kam long God na long ol man wantaim, em ol i amamas long givim samting bilong helpim dispela wok.

Jehova i truim tok promis bilong em na em i givim spirit holi bilong em long ol wokman bilong em, na dispela i kirapim ol long “mekim planti gutpela pasin bilong helpim ol arapela manmeri. Oltaim ol i . . . givim planti samting long ol manmeri i sot.” (1 Timoti 6:18) Spirit bilong God i kirapim ol Witnes Bilong Jehova long helpim wok bilong autim tok bilong Kingdom long olgeta kain rot​—ol i mekim wok long taim na strong bilong ol, na ol samting bilong ol yet, na ol narapela samting tu bilong helpim wok Kristen.

Ol Witnes na ol narapela i amamas long givim mani long laik bilong ol yet bilong helpim dispela wok bilong sanapim ol Haus Kingdom. Ol i save givim kontribiusen bilong helpim na lukautim kongrigesen bilong ol yet na ol i givim kontribiusen bilong helpim tu wok bilong sanapim ol Haus Kingdom long ol narapela hap bilong graun.

Insait long ol wan wan kongrigesen, i gat wanpela bokis i stap na i gat nem olsem “Ol Kontribiusen Bilong Helpim Wok Long Olgeta Hap​​—Matyu 24:14.” Ol manmeri inap putim kontribiusen long dispela bokis long laik bilong ol yet. (2 King 12:9) Mipela i amamas long ol kontribiusen bilong yupela, maski i bikpela o i liklik. (Mak 12:​42-​44) Ol dispela kontribiusen i bilong helpim kain kain wok, wanpela em wok bilong sanapim ol Haus Kingdom. Ol dispela kontribiusen i no bilong baim ol man i mekim wok maneja, long wanem, ol Witnes Bilong Jehova i no gat man bilong mekim dispela kain wok bilong ol.

Olsem wanem? Ol kontribiusen bilong helpim wok long olgeta hap ol inapim tru dispela wok? Yumi ken tok yes, ol i save mekim olsem. Report i kam long brens-ofis long Laibiria​—em wanpela kantri i gat bikpela pait i kamap insait long en na i bagarapim kantri​—i tok klostu olgeta Witnes long dispela hap i no gat wok skin moa na ol i sot tru long mani. Olsem wanem lain bilong Jehova long dispela kantri bai wokim ol haus bilong mekim lotu? Brens-ofis bilong Laibiria i tok: “Ol bai mekim wok long kontribiusen em ol brata bilong narapela hap i save givim bilong helpim dispela wok.” Tru tumas, “em pasin bilong gutpela tingting na pasin sori tru ol i mekim!”

Ol brata bilong dispela hap tu i givim kontribiusen, maski ol i no gat planti samting. Ripot i kam long Siera Leon long Afrika i tok: “Ol brata bilong dispela hap i amamas long mekim wok na givim kontribiusen tu bilong helpim wok bilong sanapim ol Haus Kingdom.”

Dispela bikpela wok bilong wokim ol Haus Kingdom i save litimapim nem bilong Jehova. Ol brata long Laibiria i amamas tru na ol i tok: “Wok bilong sanapim ol gutpela haus bilong mekim lotu long en insait long kantri, em bai kamapim klia olsem lotu i tru i bilong i stap oltaim long Laibiria na dispela bai givim biknem long God bilong yumi na mekim gut tru long nem bilong em.”