Ol Haus Bilong Mekim Lotu

OL MAN i lotu tru long Jehova ol i mas bung wantaim bilong kisim tok bilong stiaim ol na bilong narapela i ken strongim bel bilong narapela. (Hib. 10:23-25) Namba 1 ples em lain bilong God—lain Israel—i mekim lotu long en em “haus lotu sel, em haus sel bilong bung.” (Kis. 39:32, 40) Bihain, pikinini bilong Devit, em Solomon, i sanapim wanpela haus, o tempel, bilong litimapim nem bilong God. (1 Kin. 9:3) Bihain long dispela tempel i bagarap long 607 B.C.E., ol Juda i stretim rot bilong bung long ol haus ol i kolim sinagog bilong mekim lotu long God. Bihain, ol i wokim gen tempel, na em i kamap gen olsem ples bilong mekim lotu i tru. Jisas i lainim ol man long ol sinagog na long tempel tu. (Luk 4:16; Jon 18:20) Jisas i bin mekim wanpela bung long wanpela maunten.—Mat. 5:1–7:29.

² Bihain long Jisas i dai, ol Kristen i bung long ol pablik ples na ol i bung tu long ol haus bilong ol brata bilong skulim ol man long Baibel na bung wantaim ol wanbilip. (Apo. 19:8, 9; Rom 16:3, 5; Kol. 4:15; File. 2) Sampela taim ol Kristen bilong bipo i mas bung wantaim long ol hap i no gat man na bai ol birua i no inap painim ol. Tru tumas, ol gutpela wokman bilong God long bipo i gat bikpela laik long bung wantaim long ol ples bilong mekim lotu na “Jehova bai skulim ol.”—Ais. 54:13.

³ Long nau tu, ol miting Kristen i save kamap long ol haus bilong ol brata na long ol pablik ples. Planti taim ol bung bilong autim tok i save kamap long haus bilong ol brata. Ol brata husat i givim haus bilong ol bilong mekim ol kain bung olsem, ol i tingim dispela i olsem gutpela samting tru. Planti i pilim olsem ol i go klostu moa long Jehova taim ol i givim haus bilong ol bilong mekim olsem.

HAUS KINGDOM

⁴ Nambawan ples bilong ol Witnes Bilong Jehova long mekim ol miting em Haus Kingdom. Planti taim ol i baim graun na sanapim nupela Haus Kingdom, o ol i baim na stretim wanpela haus. Bilong seivim mani na mekim gutpela wok long ol haus bilong mekim lotu, sampela kongrigesen i save yusim wanpela Haus Kingdom tasol. Long sampela hap, em i gutpela moa long rentim wanpela haus bilong mekim ol miting. Taim ol i wokim nupela Haus Kingdom o ol i mekim bikpela wok long stretim wanpela Haus Kingdom, i stret ol i dediketim dispela Haus Kingdom. Sapos ol i stretim o mekim sampela liklik senis tasol long wanpela Haus Kingdom i stap pinis, i no gat wok long dediketim gen dispela haus.

⁵ Haus Kingdom i no ken i gat planti bilas bilong pulim ai bilong ol man. Stail bilong ol Haus Kingdom i no wankain long olgeta hap, tasol ol i stret bilong mekim ol miting long en. (Apo. 17:24) Haus Kingdom i mas i stap gutpela ples bilong mekim ol miting Kristen long en na ol i wokim long stail i stret long ol wan wan ples.

⁶ Ol kongrigesen bilong ol Witnes Bilong Jehova i save givim kontribiusen bilong stretim na baim ol samting bilong Haus Kingdom em ol i save go long en. Ol i no save salim plet bilong kisim mani o askim ol man long givim mani. I gat bokis kontribiusen i stap na bai ol man i kam long ol miting inap putim kontribiusen bilong helpim kongrigesen long baim ol samting bilong lukautim Haus Kingdom. Ol i amamas long mekim olsem na bel bilong ol i kirapim ol long mekim.—2 Kor. 9:7.

⁷ Ol bratasista bilong kongrigesen i tingim olsem em i wanpela gutpela wok ol i ken mekim bilong lukautim Haus Kingdom long rot bilong givim mani na mekim wok bilong klinim na stretim haus. Ol i ken makim wanpela elda o kongrigesen sevan long lukautim dispela wok. Planti taim ol grup bilong autim tok i save klinim Haus Kingdom, na wasman bilong grup o helpim bilong em i save go pas long dispela wok. Ausait na insait bilong Haus Kingdom i mas litimapim nem bilong Jehova na oganaisesen bilong em.

⁸ Taim tupela o tripela kongrigesen i bung long wanpela Haus Kingdom, ol elda bilong ol dispela kongrigesen bai kamapim Komiti Bilong Lukautim Haus Kingdom, na bai ol i ken stretim ol samting bilong Haus Kingdom na eria bilong en. Lain elda bai makim wanpela brata long stap olsem kodineta bilong komiti bilong lukautim Haus Kingdom. Dispela komiti i wok aninit long lain elda, em i lukautim wok bilong klinim, stretim gut ol samting, na baim ol sop na toilet pepa samting bilong Haus Kingdom. Ol dispela kongrigesen i mas wok gut wantaim long mekim dispela wok.

⁹ Taim tupela o tripela kongrigesen i bung long wanpela Haus Kingdom, ol elda i mas stretim sediul bilong taim bilong ol miting na senis senis. Ol elda i mas wok gut wantaim long mekim olsem na tingim ol arapela na laikim tru ol brata. (Fili. 2:2-4; 1 Pita 3:8) I no gat wanpela kongrigesen i ken ting ol yet bai makim taim ol arapela kongrigesen bai mekim ol miting bilong ol. Taim wasman sekit i go lukim wanpela bilong ol kongrigesen i save bung long wanpela Haus Kingdom, ol arapela kongrigesen bai senisim taim bilong miting bilong ol, sapos i gat wok long mekim olsem.

¹⁰ Kongrigesen Sevis Komiti inap givim tok orait long ol brata i ken yusim Haus Kingdom bilong mekim ol weding na ol fiuneral. Taim wanpela i askim ol elda long orait long mekim kain samting olsem long Haus Kingdom, ol elda bai skelim gut na disisen bilong ol bai stret wantaim tok brens ofis i givim.

¹¹ Lain i kisim tok orait long yusim Haus Kingdom, ol i mas mekim ol pasin we i stret long ol Kristen tru i mas mekim. Ol i no ken mekim ol pasin inap bagarapim bel bilong ol bratasista o bagarapim nem bilong Jehova na gutnem bilong kongrigesen. (Fili. 2: 14, 15) Sampela taim ol narapela skul em brens ofis i lukautim inap kamap long Haus Kingdom, olsem Skul Bilong Wok Kingdom na Skul Bilong Wok Painia.

¹² Oltaim kongrigesen i mas soim olsem ol i rispek long ples miting. Klos, bilas, na pasin yu mekim i mas kamapim pasin i stret long lotu bilong Jehova. (Ekl 5:1; 1 Ti 2:9, 10) Taim yumi mekim olsem, em i wanpela rot bilong soim olsem yumi tingim ol miting Kristen bilong yumi i bikpela samting.

¹³ Em i bikpela samting long sindaun gut na stap isi long taim bilong ol miting. I gutpela sapos ol pikinini i sindaun wantaim ol papamama bilong ol. Ol papamama i gat ol liklik pikinini i ken sindaun long hap we ol i no distebim ol narapela sapos ol i mas kisim pikinini i go ausait bilong stretim em o mekim narapela samting long em.

¹⁴ Long ol miting long Haus Kingdom, ol i makim sampela brata long mekim wok atendan. Ol atendan i mas stap redi, mekim pasin pren, na bihainim gutpela tingting. Ol i mas tok gude long ol nupela man na welkamim ol, helpim ol lain i kam leit long painim ples sindaun, kaunim na raitim hamas man i kam bung, na onim ol fen na opim ol windo bilong kisim win. Sapos inap, ol atendan bai tokim ol papamama long putim ai long ol pikinini na bai ol i no ken ran insait long Haus Kingdom paslain na bihain long miting o pilai antap long pletfom. Long gutpela pasin, atendan i ken askim papa o mama long kisim pikinini i bikhet i go ausait na bai ol bratasista inap harim gut tok. Wok bilong ol atendan i helpim olgeta long kisim amamas long ol miting. I gutpela sapos ol elda na ol kongrigesen sevan i mekim wok atendan.

SANAPIM HAUS KINGDOM

¹⁵ Long taim bilong ol aposel, sampela Kristen i gat planti samting bilong skin winim ol arapela, olsem na aposel Pol i tok: “Planti samting bilong yupela long nau i ken inapim ol samting ol arapela i sot long en, na bai planti samting bilong ol i ken inapim ol samting yupela i sot long en. Long dispela rot bai i no gat wanpela bilong yupela i sot long ol samting.” (2 Kor. 8:14) Long nau tu, ol Kristen i save “inapim ol samting ol arapela i sot long en.” Ol kongrigesen long olgeta hap bilong graun i save givim kontribiusen bilong helpim wok bilong wokim na stretim ol Haus Kingdom. Oganaisesen na ol kongrigesen i save kisim helpim long ol dispela kontribiusen, ol i save amamas long helpim em ol bratasista long olgeta hap i givim.

¹⁶ Long planti kantri, brens ofis i makim ol Haus Kingdom em ol kongrigesen i mas go long en. Na tu, brens ofis bai makim wanem taim na wanem hap ol i mas wokim nupela Haus Kingdom na stretim ol olpela Haus Kingdom i stap long teritori bilong brens ofis. Taim ol disasta i kamap, ol bai stretim rot bilong wokim gen ol nupela Haus Kingdom, na sampela taim ol i stretim ol haus bilong ol bratasista.

¹⁷ Brens ofis i stretim rot na sampela volantia inap helpim wok bilong painim na baim graun, wokim plen bilong Haus Kingdom, kisim tok orait long gavman, mekim wok konstraksen, na stretim Haus Kingdom samting. Planti hap ol i nidim ol Haus Kingdom, olsem na i mas i gat planti volantia. Ol bratasista i baptais pinis na i winim mak na i laik helpim wok, ol i ken pulapim wanpela aplikesen na givim long Kongrigesen Sevis Komiti long kongrigesen bilong ol yet. Ol pablisa i no baptais tu i ken helpim wok bilong sanapim o stretim Haus Kingdom bilong ol yet.

OL HAUS KIBUNG

¹⁸ Ol Kristen long bipo i bin bung long ol liklik grup. Tasol sampela taim “bikpela lain manmeri” i bung. (Apo. 11:26) Long nau tu, lain bilong Jehova i save bung long ol bikpela bung olsem kibung sekit na kibung rijinel. Planti taim ol i rentim wanpela haus bilong mekim kibung, tasol long ol hap we i no gat ol gutpela haus bilong mekim kibung long en, ating ol i mas wokim wanpela haus bilong mekim lotu em ol i kolim Haus Kibung.

¹⁹ Sampela taim ol i baim wanpela haus, stretim gut na yusim olsem Haus Kibung. Tasol planti taim, ol i baim hap graun na wokim nupela haus. Sais bilong ol Haus Kibung i narapela narapela i stret long hap em i stap long en. Brens ofis i pasim tok long wokim kain haus olsem bihain long ol i skelim gut mani ol i mas tromoi bilong wokim haus na hamas taim long olgeta yia ol bai yusim dispela haus.

²⁰ Brens ofis i makim sampela brata long lukautim na stretim ol wok bilong Haus Kibung. Ol i stretim rot bilong ol sekit i ken klinim Haus Kibung olgeta taim bihain long kibung, inap tupela taim long yia ol i mas mekim bikpela wok bilong klinim gut, na stretim ol samting bilong haus, nogut em i bagarap. I gutpela moa long ol bratasista i volantia long mekim ol dispela wok. Olsem na em i bikpela samting long ol kongrigesen i givim bel long helpim dispela wok.—Sng. 110:3; Mal. 1:10.

²¹ Sampela taim ol inap yusim Haus Kibung bilong mekim ol narapela bung tiokratik, olsem ol skul bilong Baibel na ol spesel miting bilong ol wasman sekit. Olsem Haus Kingdom, Haus Kibung em i ples ol i dediketim bilong mekim lotu long en. Taim yumi bung long wanpela Haus Kibung, pasin, klos, na bilas bilong yumi i mas stret wankain olsem yumi go long miting long Haus Kingdom bilong mekim lotu.

²² Planti man i wok long kam insait long oganaisesen bilong God long dispela taim bilong las de. Dispela i kamapim klia olsem Jehova i blesim dispela wok. (Ais. 60:8, 10, 11, 22) Olsem na yumi laik sapotim wok bilong kisim ples bilong mekim lotu, stretim, klinim, na lukautim gut. Taim yumi mekim olsem, yumi soim olsem yumi pilim ol gutpela wok ol dispela haus i mekim bilong helpim yumi long strongim bel bilong narapela narapela, moa yet taim yumi lukim de bilong Jehova i wok long kam klostu.