Lukautim Gut Ples Bilong Mekim Lotu

¹ Long olgeta hap bilong graun i gat moa long 94,000 kongrigesen bilong ol Witnes Bilong Jehova. Planti kongrigesen i bung na stadi long Baibel wantaim ol wanlain Kristen long wanpela Haus Kingdom, em ples bilong mekim lotu i tru.

² Klinim Long Olgeta Taim: Wok bilong klinim Haus Kingdom em i wanpela bikpela hap bilong wok holi bilong yumi. Buk Lo p. 61-62 i tok: “Taim ol brata i tromoi mani bilong helpim Haus Kingdom, o ol i mekim wok long klinim o stretim, ol i mas ting dispela wok i gutpela samting na ol i mas amamas long mekim. Ausait bilong Haus Kingdom na insait bilong en i mas gutpela na i litimapim oganaisesen bilong Jehova.” Long olgeta wik yumi save yusim Haus Kingdom inap planti taim liklik, olsem na i gat wok long klinim na stretim long olgeta taim. Ol brata sista bilong kongrigesen i yusim Haus Kingdom ol i save mekim dispela wok. Olsem ol i bin mekim long taim bilong Baibel, ol wokman bilong Jehova long nau i mas givim bel long “stretim” ples bilong mekim lotu.​—⁠2 Sto. 34:⁠10.

³ Long notis-bot, putim wanpela sediul bilong klinim Haus Kingdom long olgeta wik. Olgeta Buk-Stadi grup i mas senis senis long klinim Haus Kingdom, na bihainim wanpela lista i kolim ol wok samting bilong mekim. Olgeta em ol inap, ol i mas insait long dispela gutpela wok bilong klinim na stretim gut Haus Kingdom. Ol papamama i ken helpim ol pikinini na bai ol tu i insait long dispela wok, na long dispela rot ol i skulim ol pikinini long pilim tru dispela gutpela wok. Sapos tupela o tripela kongrigesen i save yusim wanpela Haus Kingdom, em i bikpela samting long ol i mas wok gut wantaim na bai i no liklik lain tasol i mekim dispela wok.

⁴ Ating long stuarum, putim wanpela lista i kolim ol wok samting bilong mekim. Dispela lista i mas stori gut long ol wok bilong mekim long olgeta wik, olsem brumim plua, klinim ol windo na antap bilong ol tebol samting, rausim pipia long ol rabis bin, mopim plua, na klinim ol toilet. Sampela wok i bilong mekim wan wan taim, olsem polisim ol samting ol i wokim long diwai na klinim gut ol sia, keten, na ol lait na fen. Olgeta marasin bilong klinim ol samting i mas stap longwe long ol pikinini, na raitim gut nem long ol dispela marasin. Raitim tu sampela tok i stori long pasin bilong mekim wok long ol dispela marasin.

⁵ Long Haus Kingdom em i bikpela samting long was gut na bai i no gat samting i kamapim bagarap. (Lo 22:⁠8) Long dispela as, blok long pes 4 i kamapim sampela samting em yumi mas sekim na bai ol bagarap i no ken kamap.

⁶ Stretim Ol Samting Long Haus Kingdom: Lain elda i gat wok long bosim wok bilong stretim ol samting long Haus Kingdom. Planti taim ol i save makim wanpela elda o kongrigesen sevent long lukautim dispela wok. Dispela elda o kongrigesen sevent bai stretim ol samting i kamap long Haus Kingdom long wan wan de, na em wok bilong em long lukim olsem Haus Kingdom i stap klin, ol samting long en i stap stret, na i no sot long ol saplai. Em i bikpela samting olsem long Haus Kingdom o long hap insait long banis bilong Haus Kingdom, i no ken i gat wanpela samting bilong kamapim bagarap. Sapos tupela o tripela kongrigesen i yusim wanpela Haus Kingdom, lain elda i save makim wanpela komiti bilong lukautim wok bilong stretim ol samting bilong Haus Kingdom na hap insait long banis. Dispela komiti i stap aninit long wok bos bilong lain elda.

⁷ Long olgeta yia, ol i save sekim gut olgeta samting long Haus Kingdom. Sapos i gat sampela samting i gat wok long stretim, orait ol elda i ken stretim rot bilong mekim olsem. Long ol liklik kongrigesen, ating wasman sekit bai go pas long mekim dispela wok. Ol i ken askim ol pablisa long helpim wok bilong stretim ol samting i bagarap. Maski sapos ol liklik samting tasol i bagarap, olgeta i mas redi long stretim ol dispela samting. Na sapos i gat sampela samting ol i mas stretim hariap, orait ol i mas hariap long mekim olsem.

⁸ Sapos ol elda i laik kisim sampela save long pasin bilong lukautim gut Haus Kingdom, ol i ken salim tok long Dipatmen Bilong Wokim Haus Kingdom long brens-ofis. Ating ol i ken kisim sampela tok long olsem wanem ol inap stretim hevi bilong waitanis, hul long kapa samting, o hevi bilong ol paip bilong wara na toilet samting. Ol volantia i save mekim planti bilong ol wok i save kamap long Haus Kingdom na long banis bilong en. Bilong mekim olsem, ol i save daunim sampela laik bilong ol yet na dispela i kamapim klia pasin bilong ol long laikim tru narapela, na i helpim pasin bilong lukautim gut mani. Sampela taim ating i gat wanpela wok we i hatwok tumas o i bikpela tumas na ol volantia bilong kongrigesen i no inap long mekim. Sapos olsem, salim tok long Dipatmen Bilong Wokim Haus Kingdom long brens-ofis na ol bai toksave long ol samting yupela i ken mekim.

⁹ Mekim Gut Wok Long Mani Bilong Kongrigesen: Sapos moa long wanpela kongrigesen i yusim Haus Kingdom, komiti i lukautim Haus Kingdom i mas i gat wanpela sek akaun. Long olgeta mun ol i mas givim ripot bilong ol akaun long ol wan wan lain elda na bai ol elda i ken save long mani i go we. Ol elda i gat wok long save olsem ol i yusim gut mani bilong kongrigesen.

¹⁰ Bikpela Wok Bilong Stretim: Taim komiti i lukautim Haus Kingdom i skelim olsem i gat bikpela wok bilong mekim long Haus Kingdom, komiti i save kamapim dispela long ol lain elda na bai ol lain elda i ken makim samting bilong mekim. Sapos ol i skelim olsem i mas i gat bikpela wok bilong stretim Haus Kingdom o ol i mas kisim helpim long ol narapela kongrigesen tu, orait ol elda i mas salim tok long Dipatmen Bilong Wokim Haus Kingdom long brens-ofis.

¹¹ Yumi amamas tru long yumi inap bung wantaim long Haus Kingdom! Oltaim yumi mas tingim tru ol miting na no ken mekim olsem ol i samting nating tasol, nogat. Ol miting i save strongim yumi, na yumi olgeta inap helpim ol miting long kamap gut taim yumi givim bel long lukautim gut Haus Kingdom. Dispela i save litimapim lotu i tru na i givim biknem long Jehova. Yumi mas tingting strong long lukautim gut dispela ples bilong mekim lotu.

[Askim Bilong Stadi]

1. Haus Kingdom i gat wanem wok bilong en?

2. Bilong wanem em i bikpela samting long Haus Kingdom i mas i stap klin na stret?

3. Olsem wanem ol i save stretim wok bilong klinim Haus Kingdom? Husat inap insait long dispela gutpela wok?

4. Kongrigesen i mas mekim wanem na bai ol brata sista i ken save long ol samting ol i mas mekim taim ol i klinim Haus Kingdom?

5. Olsem wanem na em i bikpela samting long yumi mas was gut na bai ol bagarap i no ken kamap? Yumi mas sekim wanem ol samting? (Lukim blok long p. 4)

6. Ol i save mekim wanem bilong stretim wok bilong lukautim Haus Kingdom?

7. (a) Long olgeta yia, ol i save mekim wanem bilong helpim ol samting long Haus Kingdom long i stap gut? (b) I gat wanem ol samting em yumi mas sekim? (Lukim blok long p. 5)

8. Long wanem taim ol elda i ken salim tok long brens-ofis long kisim sampela tok long wok bilong lukautim na stretim ol samting long Haus Kingdom?

9. Komiti i save mekim wanem na bai ol elda i ken save olsem komiti i yusim gut mani bilong kongrigesen?

10. Komiti i mas mekim wanem sapos ol i mas mekim bikpela wok bilong stretim Haus Kingdom?

11. Olsem wanem yumi inap kamapim klia olsem yumi amamas long go long ol miting long Haus Kingdom?

[Blok long pes 4]

Ol Samting Bilong Tingim

◻ Sapos long Haus Kingdom i gat ol fire extinguisher, ol i mas stap ples klia na sekim ol gut long olgeta yia.

◻ Ol dua bilong Haus Kingdom i mas stap klia na ol man inap i go kam long en, na ol lata samting i mas i stap strong.

◻ Ol stuarum na toilet i mas i stap stret na klin, na i no gat ol pipia na ol samting bilong kirapim paia, o sampela samting bilong ol brata sista.

◻ Oltaim yupela i mas sekim na klinim rup na ol gata.

◻ Sapos inap, orait i mas i gat lait long ol liklik rot bilong wokabaut na ples bilong putim ka. Ol dispela hap i no ken i gat ol samting inap mekim man i pundaun.

◻ Oltaim yupela i mas sekim na stretim gut ol waia bilong pawa, ol swits bilong fen, na ol narapela samting i wok long pawa.

◻ Sapos long kapa o banis bilong Haus Kingdom i gat hul na wara i kam insait, stretim kwik dispela na bai ol plang samting i no ken sting na bagarap.

◻ Long olgeta taim sekim gut ol timba na pos samting olsem ol waitanis i no bagarapim ol.

◻ Tingim gut ol pasin i save kamap long hap bilong yupela, na mekim ol samting i stret bilong lukautim Haus Kingdom taim i no gat man i stap long en. No ken larim mani i stap long Haus Kingdom. Bilong lukautim gut ol samting bilong saun i gat bikpela pe bilong en, ating long pinis bilong olgeta miting, yupela i ken karim i go na putim long wanpela hap we ol stilman i no inap kisim.

[Blok long pes 5]

Lukautim Gut Haus Kingdom na Ol Samting Bilong En

◻ Ausait: Rup, ol banis long sait, ol samting i gat pen long en, windo, na sain-bot bilong Haus Kingdom i stap gut?

◻ Graun: Ol hap insait long banis bilong Haus Kingdom i stap gut? Banis, na ol liklik rot bilong wokabaut, na ples bilong putim ka i stap gutpela?

◻ Insait: Ol keten, sia o fom, ol tep na swits bilong lait samting, banis na dua ol i bin penim, ol kabot bilong putim litresa, ol rum bilong mekim miting, ol i stap gut?

◻ Ol masin: Ol lait, ol samting bilong saun na ol fen, ol i wok gut?

◻ Toilet: Ol i stap klin na i wok gut?

◻ Ol pepa bilong kongrigesen: Ol pepa i tokaut long ol samting bilong Haus Kingdom, olsem husat i papa bilong en na ol samting bilong hap graun em Haus Kingdom i sanap long en, ol dispela pepa i save stap long brens-ofis. Ol kopi bilong ol dispela pepa i mas stap long ol fail bilong kongrigesen. Sapos kongrigesen i gat wok long baim takis samting long olgeta yia, ol i mas hariap long stretim dispela samting na putim gut kopi bilong olgeta pepa bilong dispela samting long fail bilong kongrigesen.

This article is repeated in km 4/10